Lajmet

​Zelensky para Kongresit amerikan: Jeta ime ndaloi kur u vranë 100 fëmijë

“Unë dua që ju të kuptoni se çfarë kemi nevojë tani”, tha ai.

Published

4 years ago

on

Presidenti ukrainas Volodymyr Zelensky iu drejtua Kongresit Amerikan sot përmes një video-lidhjeje.

“Rusia ka pushtuar atdheun dhe qytetet tona. Ajo sulmoi vlerat tona në një mënyrë brutale. Ajo na sulmoi me tanke, aeroplanë, ajo sulmoi lirinë tonë, të drejtën për të jetuar të lirë në vendin tonë dhe për të planifikuar të ardhmen tonë”, tha Zelensky.

“Më kujtohet monumenti juaj në malin Rushmore dhe fytyra e themeluesit të Shteteve të Bashkuara të bazuar në demokraci dhe liri për të gjithë ata që punojnë me ndershmëri dhe respektojnë ligjin. Ne duam të njëjtën gjë për popullin ukrainas”, tha Zelensky.

“Miq amerikanë, në historinë tuaj të mrekullueshme keni përjetuar atë që ju lejon të kuptoni ukrainasit. Unë dua që ju të kuptoni se çfarë kemi nevojë tani. Mbani mend Pearl Harbor, kur qielli u errësua nga të gjithë avionët që ju sulmonin. Kujtoni 11 shtatorin 2001, një ditë e tmerrshme kur e keqja u përpoq të pushtonte dhe t’i kthente qytetet tuaja në fushëbetejë, kur njerëz të pafajshëm u sulmuan nga ajri. Askush nuk mund ta priste këtë, nuk mund ta ndalonit, dhe vendi ynë po përjeton çdo ditë të njëjtën gjë. Çdo natë për tri javë, Odessa, Zhytomyr, Mariupol, Dnipro dhe shumë qytete të tjera janë nën sulm dhe Rusia e ka kthyer Ukrainën në një fushë vdekjeje për mijëra njerëz”, tha Zelensky.

“Ju e dini se çfarë lloj sistemesh mbrojtëse na duhen, ju e dini se sa shumë varemi nga aftësia për të përdorur avionë të fuqishëm, për të mbrojtur njerëzit tanë, lirinë tonë. Na duhen avionë për të ndihmuar Ukrainën dhe Evropën. Ju i keni këta avionë, por janë të tokëzuar, nuk janë në qiellin e Ukrainës, nuk mbrojnë njerëzit tanë. Unë kam një ëndërr, ato fjalë janë të njohura për ju, por kam nevojë, duhet të mbroj qiellin tim dhe kam nevojë për ndihmën tuaj”, shtoi Zelensky.

Ai përsëriti mirënjohjen e tij për Shtetet e Bashkuara për atë që është bërë deri më tani në aspektin e armëve dhe stërvitjes.

“Tani, në momentin më të errët për vendin tonë, ju bëj thirrje të bëni më shumë. Sanksionet duhet të vendosen çdo javë derisa makineria ushtarake ruse të ndalet. Duhen kufizime për të gjithë ata që e mbështesin këtë regjim. Ne rekomandojmë që të vendosen sanksione ndaj të gjithë politikanëve në Rusi që nuk e kanë dënuar pushtimin e Ukrainës. Të gjitha kompanitë amerikane duhet të largohen menjëherë nga tregu rus, sepse ai treg është zhytur në gjakun tonë. Ju lutemi merrni drejtimin, nëse keni kompani që janë ende në Rusi që financojnë makineritë ruse, ju lutemi bëni presion ndaj Rusisë që të mos marrë para për të shkatërruar vendin tonë. Paqja është më e rëndësishme se të ardhurat dhe ne duhet ta mbrojmë këtë parim në të gjithë botën”, tha Zelensky.

Ai u tregoi kongresistëve një video të qyteteve të Ukrainës para luftës.

“Sot nuk mjafton të jesh vetëm lider i botës, por edhe lider i paqes. Paqja nuk varet vetëm nga ju, ajo varet nga ata që ju rrethojnë, nga ata që janë të fortë. Të jesh i fortë nuk do të thotë se je i madh, por se je i guximshëm dhe i gatshëm të luftosh për jetën e qytetarëve të tu dhe të qytetarëve të botës, për liri, jetë dhe vdekje dinjitoze kur të vijë koha, dhe jo për dikë tjetër që të vendos fqinji”, tha Zelensky.

“Ne po luftojmë për vlerat evropiane dhe botërore. Kjo është arsyeja pse populli amerikan po ndihmon jo vetëm Ukrainën, por edhe Evropën dhe botën. Sot jam 45-vjeç, por jeta ime u ndal kur vdiqën 100 fëmijë. Nuk shoh asnjë arsye për të jetuar nëse nuk mund ta parandaloj vdekjen. Si udhëheqës i kombit tim, duhet t’i drejtohem presidentit Biden. Ju jeni udhëheqësi i popullit tuaj, unë dua që ju të jeni udhëheqësi i botës. Të jesh lider i botës do të thotë të jesh udhëheqës i paqes. Faleminderit për mbështetjen tuaj”, tha Zelensky.

Kongresistët e përshëndetën Zelensky me duartrokitje të forta e të gjata.

Related Topics:
Continue Reading

Lajmet

Numërimi i votave nga KQZ: Kush janë kandidatët më të votuar pas 35% të kutive?

Published

4 hours ago

on

June 9, 2026

By

Komisioni Qendror i Zgjedhjeve (KQZ) po vazhdon me procesimin e rezultateve për zgjedhjet e parakohshme parlamentare. Sipas të dhënave zyrtare të orës 16:20, ku janë numëruar 35.27% gara brenda listave partiake tashmë ka marrë formë.

Në listën e Vetëvendosjes, garës i prin bindshëm bartësi i listës dhe lideri i partisë, Albin Kurti, i cili deri më tani ka grumbulluar 80,669 vota. Ai ndiqet nga Glauk Konjufca me 63,340 vota, ndërsa e treta radhitet Albulena Haxhiu me 36,623 vota. Në vendin e katërt pozicionohet Hekuran Murati me 31,943 vota, i pasuar nga Donika Gërvalla-Schwarz me 29,592 vota dhe Xhelal Sveçla me 23,830 vota.Dhjetëshen e parë e përmbyllin Avni Dehari me 21,718 vota, Hajrulla Çeku me 20,472 vota, Mimoza Kusari Lila me 20,464 vota dhe Ejup Maqedonci me 17,858 vota.

Te PDK-ja, procesit të numërimit i prin me shkëputje të ndjeshme bartësi i listës Bedri Hamza, i cili ka siguruar 38,800 vota. Ai ndiqet nga Përparim Gruda që mban vendin e dytë me 24,616 vota, dhe Arian Tahiri i treti me 21,411 vota. Në pozitën e katërt gjendet Uran Ismaili me 19,265 vota, i pasuar nga Sala Jashari me 13,605 vota dhe Vlora Çitaku me 13,369 vota. Lista e më të votuarve te kjo parti vazhdon me Ganimete Musliun me 10,344 vota, Arben Mustafën me 9,374 vota, Mërgim Lushtakun me 9,137 vota dhe Enver Hoxhajn që mbyll top-10-shen me 8,864 vota.

Në radhët e Lidhjes Demokratike të Kosovës, garën e udhëheq bartësja e listës Vjosa Osmani Sadriu, e cila ka marrë 25,820 vota. Ajo ndiqet ngushtë nga kryetari i partisë, Lumir Abdixhiku, me 23,384 vota. E treta në radhë është Doarsa Kica Xhelili me 18,358 vota, e pasuar nga Hykmete Bajrami me 14,488 vota dhe Avdullah Hoti me 13,215 vota.Në vendin e gjashtë radhitet Ukë Rugova me 11,061 vota, i ndjekur nga Kujtim Shala me 10,723 vota dhe Anton Quni me 8,956 vota. Dhjetëshen e parë për LDK-në e plotësojnë Armend Zemaj me 8,103 vota dhe Lutfi Haziri me 7,925 vota.

Në AAK, garës aktualisht i prin kryetari i partisë dhe njëherësh bartësi i listës, Ardian Gjini, me 13,407 vota. Pas tij renditet Ramush Haradinaj me 12,089 vota, ndërsa i treti është Daut Haradinaj me 9,196 vota. Në pozitën e katërt radhitet Besnik Tahiri me 8,066 vota, i pasuar nga Bekë Berisha me 6,451 vota dhe Burim Ramadani me 5,972 vota. Listën e dhjetë kandidatëve më të votuar e përmbyllin Time Kadrijaj me 5,839 vota, Agim Çeku me 5,168 vota, Arbër Tolaj me 4,771 vota dhe Albana Bytyqi me 3,211 vota. /E.A/

Continue Reading

Lajmet

Gjimnazi Natyror në UBT International Smart Schools, arsim modern me diplomë të njohur ndërkombëtarisht

Published

4 hours ago

on

June 9, 2026

By

Nëse dëshironi një arsimim modern që kombinon shkencën, teknologjinë dhe zgjidhjen e sfidave reale të botës së sotme, atëherë Gjimnazi Natyror në UBT International Smart Schools është zgjedhja ideale për ju.
Falë akreditimit nga Cambridge International Education, nxënësit përfitojnë një diplomë të njohur ndërkombëtarisht, e cila u hap dyert drejt universiteteve prestigjioze dhe mundësive të shumta akademike në mbarë botën.
Nxënësit përfitojnë nga laboratorë modernë dhe të pajisur me teknologjinë më të avancuar, ku teoria shndërrohet në praktikë përmes eksperimenteve dhe hulumtimeve shkencore. Këtu, të rinjtë nuk mësojnë vetëm konceptet shkencore, por i zbatojnë ato në situata konkrete, duke zhvilluar aftësi analitike dhe kërkimore.
Programi mësimor është i orientuar drejt zgjidhjes së problemeve reale, përmes projekteve inovative që fokusohen në teknologjinë e gjelbër, qëndrueshmërinë dhe zhvillimin e ideve kreative për të ardhmen. Nxënësit angazhohen në projekte të bazuara në realitet, të cilat i përgatisin për sfidat akademike dhe profesionale të shekullit XXI.
Një nga veçoritë kryesore të këtij programi është mësimi praktik, ku çdo njohuri teorike shoqërohet me aplikim konkret. Përmes projekteve ndërdisiplinore, nxënësit mësojnë të punojnë në ekip, të analizojnë të dhëna dhe të zhvillojnë zgjidhje inovative.
Për më tepër, ata përfitojnë mentorim nga ekspertë të fushës, profesionistë dhe akademikë që i udhëzojnë në zhvillimin e ideve, projekteve dhe karrierës së tyre të ardhshme.
Në UBT International Smart Schools, Gjimnazi Natyror nuk është vetëm një program mësimor, është një hap drejt krijimit të shkencëtarëve, inovatorëve dhe liderëve të së ardhmes.
Edhe pak vende të lira kanë mbetur, ndërsa regjistrimet e hershme po vazhdojn në UBT International Smart Schools.

Continue Reading

Lajmet

UBT vazhdon mbështetjen për maturantët: Mijëra nxënës ndjekin javën e dytë të programit përgatitor për Testin e Maturës 2026

Published

4 hours ago

on

June 9, 2026

By

Nxënësit e vitit të fundit të shkollave të mesme anë e mbanë Kosovës po vazhdojnë të ndjekin me interes të lartë programin intensiv përgatitor për Testin e Maturës Shtetërore 2026, i cili po organizohet në ambientet moderne të UBT-së.

Ky program tashmë ka hyrë në javën e tij të dytë, duke bërë bashkë qindra dhe mijëra nxënës të cilët synojnë të konsolidojnë njohuritë e tyre përpara këtij rrugëtimi të rëndësishëm akademik. Për t’u siguruar që studentët e së ardhmes të jenë sa më të gatshëm, trajnimet po fokusohen me përkushtim në lëndët kryesore si Gjuhë Shqipe, Gjuhë Angleze dhe Matematikë, si dhe në lëndët kryesore zgjedhore si Teknologji e Informacionit dhe Komunikimit (TIK) dhe Biologji.

Për t’u dalë në ndihmë të gjithë nxënësve dhe për të lehtësuar qasjen e tyre, UBT e ka shtrirë këtë program përtej kryeqytetit.

Përveç në Prishtinë, trajnimet përgatitore po zhvillohen paralelisht dhe me të njëjtin intensitet edhe në qendrat e UBT-së në qytetet e tjera përfshirë Ferizajn, Prizrenin dhe Pejën. Përmes angazhimit të kuadrove profesionale dhe stafit të përzgjedhur akademik të UBT-së, maturantët po marrin njohuritë e nevojshme, strategjitë dhe teknikat e duhura për ta kaluar me sukses këtë sfidë.

Ky organizim tradicional rikonfirmon përkushtimin e vazhdueshëm të UBT-së për të ngritur cilësinë e arsimit dhe për t’i përkrahur të rinjtë në tranzicionin e tyre drejt studimeve universitare dhe karrierës profesionale.

Continue Reading

Lajmet

Pesë të arrestuar në operacionin “White Star”, sekuestrohen armë, drogë dhe pasuri e madhe

Published

6 hours ago

on

June 9, 2026

By

Pesë persona janë arrestuar gjatë një operacioni të Policisë së Kosovës dhe Prokurorisë Speciale, i zhvilluar në disa qytete të vendit nën emrin “White Star”.

Aksioni është realizuar në Prishtinë, Pejë, Prizren, Viti dhe Drenas, nën mbikëqyrjen e Prokurorisë Speciale dhe në bazë të urdhrit të Gjykatës Themelore.

Të dyshuarit janë ndaluar me vendim të prokurorit special për 48 orë, nën dyshimin për pjesëmarrje ose organizim të grupit kriminal të organizuar, si dhe për blerje, posedim, shpërndarje dhe shitje të paautorizuar të narkotikëve dhe përfshirje në pastrim parash.

Gjatë kontrolleve në lokacione të ndryshme janë sekuestruar:

  • 6 armë zjarri
  • 5 karikatorë dhe 239 fishekë
  • Lëndë narkotike (kokainë dhe fara marihuane)
  • 25 telefona mobilë
  • 7,595 euro para të gatshme
  • 10 automjete dhe 1 motoçikletë
  • 10 kompjuterë
  • 13 USB dhe 1 DVR
  • 16 ora dore

Operacioni është mbështetur nga EUROPOL-i dhe autoritetet e Belgjikës, Francës dhe Holandës, të cilat kanë qenë të pranishme dhe kanë monitoruar zhvillimin e aksionit në terren së bashku me prokurorin e rastit.

Prokuroria Speciale dhe Policia e Kosovës kanë theksuar se ky operacion paraqet goditje të rëndësishme ndaj krimit të organizuar dhe se veprimet hetimore do të vazhdojnë në drejtim të zbardhjes së plotë të rastit dhe identifikimit të të gjithë të përfshirëve. /A.K/

Continue Reading

Të kërkuara