Në Dhomat e Specializuara të Kosovës në Hagë sot do të vazhdojë procesi gjyqësor ndaj ish-krerëve të Ushtrisë Çlirimtare të Kosovës Hashim Thaçit, Kadri Veselit, Rexhep Selimit dhe Jakup Krasniqit.

Sot është dita e tretë e dëshmisë së Bislim Zyrapit në Speciale.

Dëshmitari Bislim Zyrapi pohoi se Jakup Kransiqi ka qenë zëvendëskomandant i Shtabit të Përgjithshëm të UÇK-së gjatë periudhës së 1998-së.Dëshmitari tha se Shtabi i Përgjithshëm ka pasur takime të vazhdueshme për shkak të situatës së luftës, mirëpo ato me komandantët e zonave ishin më të rralla.

Dëshmitari Bislim Zyrapi gjatë dëshmisë së tij ka treguar se ka pasur nofkën “Bisi” në kohën e luftës dhe se me këtë emër i është drejtuar Rexhep Selimi.

Po mbahen homazhe për shkrimtarin e madh shqiptar, Ismail Kadare në Teatrin Kombëtar të Operas, Baletit dhe Ansamblit Popullor në Tiranë.

Kadare varroset sot dhe në ceremoninë e varrimit pritet të marrin pjesë edhe liderë nga Kosova.

Poeti shqiptar vdiq të hënën në mëngjes në Urgjencën e Tiranës, në moshën 88-vjeçare.

Dy persona janë dërguar në mbajtje nën dyshimin se e kanë sulmuar dhe dhunuar një vajzë në Suharekë.

Në raportin 24 orësh të Policisë, thuhet se rasti ka ndodhur të martën rreth orës 09:00, ndërsa fillimisht ishin arrestuar tre të dyshuar, por njëri prej tyre u lirua në procedurë të rregullt.

“Viktima femër kosovare ka raportuar se është sulmuar fizikisht dhe dhunuar nga dy persona të panjohur. Viktima është dërguar për ekzaminim mjekësor, ndërsa lidhur me rastin janë arrestuar tre të dyshuar meshkuj kosovarë dhe me vendim të prokurorit, pas intervistimit dy prej tyre janë dërguar në mbajtje ndërsa i dyshuari tjetër është liruar”, thuhet në njoftim.

Ministri i Bujqësisë, Pylltarisë dhe Zhvillimit Rural, Faton Peci, ka njoftuar se sot ka filluar ekzekutimi i pagesave të subvencioneve për fermerët kosovarë.

3 mijë e 906 fermerë do të përfitojnë nga pagesat e sotme që ka filluar Ministria e Bujqësisë.

Vlera e përgjithshme e pagesave kap shifrën e 3.8 milionë eurove.

“3,8 milionë euro për 3906 fermerë përfitues. Fillon ekzekutimi i pagesave për fermerët përfitues të Programit për Pagesa Direkte / Subvencione 2024”, ka shkruar Peci.