Lajmet

Tahiri: Projektligji për pagën minimale të kthehet në qeveri

Ai tha se mazhoranca në Kuvend dhe ekzekutivi po prodhojnë kriza të njëpasnjëshme.

Published

4 years ago

June 6, 2022

Betim Gashi

Shefi i Grupit Parlamentar të AAK-së, Besnik Tahiri ka adresuar një varg kritikash ndaj Qeverisë Kurti, për siç tha diskriminimin ndaj veteranëve të luftës së UÇK-së. Ai tha se mazhoranca në Kuvend dhe ekzekutivi po prodhojnë kriza të njëpasnjëshme.

“Ajo çka po shohim në Kuvendin e Kosovës është një diskriminim i paparë. Është një huqje e madhe që lidhet drejtpërdrejtë me veteranët e UÇK-së, por edhe me një kategori që realisht kërkojnë benefite publike, por nuk i kanë. Po flasim për kategori të cilat janë tepër të dëmtuara. Këto tri kategori janë larguar nga ky ligj. Është turq që ky propozim i qeverisë të mos largohet pas një diskutimi të gjatë që e pata me kryetarin e Kuvendit dhe grupet parlamentare. Insistimi me ecë tutje tregon fytyrën, logjikën dhe kulturën e kësaj qeverie… Është qeveri e prodhimit të krizave të njëpasnjëshme, nuk na duhet kjo situatë”, tha ai.

Gjatë konferencës për medie të hënën, Tahiri kërkoi që Projektligji për pagën minimale të tërhiqet në Qeveri.

Dy ndryshimet kryesore, sipas tij duhet të jenë që paga minimale të ndërlidhet sërish me pensionin e veteranit dhe të largohet dispozita që i mundëson veteranëve të marrin pension dhe të punojnë.

“Ky projektligj duhet të kthehet në qeveri dhe duhet të diskutohet seriozisht për këtë kategori. Nuk është ky shpërblim, por pension, burim jete i ekzistencës së tyre. Pra duhet të bëhen dy ndryshime të mëdha, e para të lidhet me pagën minimale dhe e dyta t’iu mundësohet veteranëve që të punojnë. Pasi, kur kanë shkuar në luftën për liri, nuk kanë menduar as në ëndërr që kjo situatë, kjo qasje do t’iu bëhet në një Kosovë të lirë dhe pavarur”, shtoi Tahiri.

Duke komentuar protestën e sotme të OVL-UÇK-së, deputeti opozitar tha se ata nuk kanë dal për qejf në protestë, por nga vështirësitë jetësore.

“Nuk ka kategori dhe as veteranë të cilët dalin për qejf në protestë. Kush del sot në protestë, 1.75 nafta është me ardh deri në Prishtinë. Secili prej tyre jeton në buzë të varfërisë, askush nuk del për qejf në protestë”, tha ai.

Vendi

Mbi 100 gramë kokainë dhe marihuanë kapen në Vërmicë

Published

15 hours ago

June 19, 2026

UBT News

Dogana e Kosovës, në bashkëpunim me Policinë e Kosovës, ka zbuluar dy raste të substancave narkotike gjatë kontrolleve në Pikën Kufitare të Vërmicës.

Në rastin e parë, gjatë kontrollit të një automjeti që po hynte në Kosovë, janë gjetur 104.90 gramë substancë e dyshuar si kokainë, e fshehur në çantën personale të një udhëtari.

Ndërkaq, në rastin e dytë janë zbuluar 5.53 gramë substancë e dyshuar si marihuanë, e fshehur në bagazhin e një automjeti. Gjatë kontrollit është gjetur edhe një thikë kuzhine e padeklaruar.

Rastet janë proceduar për hetime të mëtejshme nga autoritetet kompetente.

/A.K/

Vendi

Mbyten dy vajza të mitura në Tale

Published

16 hours ago

June 19, 2026

UBTNews

Një ngjarje e rëndë ka ndodhur mesditën e sotme në plazhin e Tales, ku dy vajza të mitura, të moshës 11 dhe 9 vjeçe, janë mbytur në det.

Sipas njoftimit zyrtar të Policisë, tragjedia ka ndodhur rreth orës 12:50. Pas marrjes së informatës, zyrtarët policorë kanë dalë menjëherë në vendngjarje dhe, në bashkëpunim të ngushtë me pushuesit e tjerë, kanë bërë të mundur gjetjen dhe nxjerrjen e trupave të pajetë në breg.

“Në bashkëpunim me pushuesit, është bërë e mundur gjetja dhe nxjerrja e trupave të pajetë në breg“, thuhet në njoftimin e policisë. /E.A/

Vendi

Dyshime për cilësinë: Bllokohen mbi 1 mijë e 400 infuzione në Spitalin e Mitrovicës

Published

17 hours ago

June 19, 2026

UBTNews

Shërbimi Spitalor Klinik dhe Universitar i Kosovës (ShSKUK) ka njoftuar se ka bllokuar përkohësisht 1,432 njësi të një produkti mjekësor në Spitalin Rajonal “Sami Haxhibeqiri” në Mitrovicë, pas dyshimeve se ai mund të mos jetë brenda specifikave të kërkuara të cilësisë.

Bëhet fjalë për infuzionet e llojit Compound Sodium Lactate (500 ml). Alarmi u ngrit fillimisht nga farmacistja përgjegjëse e spitalit, gjë që vuri në lëvizje Inspektoratin Farmaceutik dhe Agjencinë e Kosovës për Produkte dhe Pajisje Medicinale (AKPPM).

Pas një inspektimi të dytë të kryer më 17 qershor, autoritetet urdhëruan bllokimin e menjëhershëm të këtij kontingjenti deri në pranimin e rezultateve nga analizat laboratorike. ShSKUK ka njoftuar opinionin publik se ky është një masë parandaluese dhe se mbetet e përkushtuar për të garantuar sigurinë e plotë të pacientëve dhe cilësinë e barnave nëpër spitalet publike. /E.A/

Lajmet

KQZ gati për rezultatet përfundimtare: Përfundon rinumërimi i 185 vendvotimeve

Published

18 hours ago

June 19, 2026

UBTNews

Komisioni Qendror i Zgjedhjeve (KQZ) ka përmbyllur zyrtarisht procesin e rinumërimit për të gjitha 185 vendvotimet e kontestuara. Sipas zëdhënësit të KQZ-së, Valmir Elezi, procesi ka përfunduar sot në orën 12:00 dhe të dhënat e reja tashmë janë përditësuar në platformën zyrtare të rezultateve.

Me këtë hap, KQZ-ja ka mbyllur teknikisht të gjitha aktivitetet e administrimit të votave dhe është gati për shpalljen e rezultateve përfundimtare të zgjedhjeve të 7 qershorit.

Megjithatë, përpara shpalljes zyrtare, duhet të respektohen afatet ligjore për ankesat e mundshme. Elezi sqaroi se sot përfundon afati për ankesat lidhur me administrimin e numërimit nga dita e mërkurë (17 qershor), ndërsa po ashtu do të pritet nëse do të ketë ankesa për procesin e rinumërimit të përmbyllur sot.

Për më tepër, para se të procedohet tutje, KQZ-ja do të kërkojë një konfirmim zyrtar nga Paneli Zgjedhor për Ankesa dhe Parashtresa (PZAP) për të vërtetuar nëse ka ndonjë ankesë tjetër ende në shqyrtim.

Në fund, Qendra e Numërimit dhe Rezultateve (QNR) do të hartojë një raport të detajuar për gjetjet në secilin prej 185 vendvotimeve. Ky raport synon të konfirmojë se procesi i parë i numërimit nëpër komuna është zhvilluar me saktësi dhe në përputhje të plotë me vullnetin e shprehur të qytetarëve, raporton Ekonomia Online. /Ekonomia Online/ /E.A/