Lajmet

Tahiri: Kurti ka agjendë për veriun, po e trajton në mënyrë të veçantë

Deputeti i PDK-së arsyetimin e ZRrE-së për mosrritjen e çmimit të rrymës për pjesën veriore e ka quajtur politik.

Published

4 years ago

February 9, 2022

Betim Gashi

Shefi i Grupit Parlamentar të PDK-së, Abelard Tahiri vendimin e Zyrës së Rregullatorit të Energjisë (ZRrE) për shtrenjtim të energjisë elektrike e ka quajtur të papërballueshëm për qytetarët e Kosovës. Ndërsa, lidhur me mos përfshirjen e pjesës veriore në bllok tarifat e reja, Tahiri tha se kryeministri i Kosovës, Albin Kurti ka një agjendë për veriun për zgjerim të një autonomie në atë pjesë të Kosovës.

Tutje, deputeti i PDK-së arsyetimin e ZRrE-së për mosrritjen e çmimit të rrymës për pjesën veriore e ka quajtur politik.

“ZRrE si organ që duhet të jetë i pavarur dhe jo politik, jep arsyetime politike se pse nuk mund të përfshihet veriu në shtrenjtim të energjisë elektrike. Pra, nga ai organi profesional tash na del me arsyetime politike që aty ekziston një problem politik dhe ne normalisht që nuk mundemi me vendos në kuadër të shtrenjtimit të energjisë elektrike. Fatkeqësisht Qeveria Kurti dhe Albin Kurti është duke e trajtuar në mënyrë të veçantë veriun dhe unë mendoj se tani po shihet që Albin Kurti ka një agjendë për veriun, pra këtu kemi të bëjmë pikërisht me zgjerimin e një autonomie me angazhimin e kësaj qeverie që këta njerëz ta kenë një autonomi pikërisht në atë pjesë të vendit. Kjo është e dëmshme dhe unë besoj që kjo është pikërisht arsyeja pse Albin Kurti nuk guxon të marr pjesë në seancë sepse nuk ka arsyetim pikërisht për veriun”, tha ai.

Deputeti nga radhët e PDK-së, Abelard Tahir tha se vendimi i ZRrE-së për shtrenjtim të energjisë elektrike për 100% është i papranueshëm.

Tahiri ka ftuar Qeverinë e Kosovës që ta shkarkojë bordin aktual të ZRrE-së dhe ta anulojë vendimin për rritje të çmimit të rrymës.

“Vendimi i ZRrE-së për shtrenjtim të energjisë elektrike për 100% është i papranueshëm për ne si deputetë të opozitës dhe çdo qytetar në vendin tonë. Pagat në Republikën e Kosovës si në sektorin privat ashtu edhe publik janë të papërballueshme për koston të cilën kemi arritur në këtë nivel. Janë shtrenjtuar çmimet e karburanteve, është shtrenjtuar secili produkt esencial ushqimor në vendin tonë, sot shtrenjtimi i energjisë elektrike shkakton edhe një zinxhir të shtrenjtimeve në gastronomi dhe sektorë të tjerë dhe realisht në këtë situatë çfarë jemi, e kemi të papërballueshme koston mujore pothuajse për secilën familje në vendin tonë”, tha ai.

Lajmet

Aksident në rrugën Dragash-Prizren, tre të lënduar

Published

2 minutes ago

October 1, 2025

UBTnews

Tre persona kanë pësuar lëndime si pasojë e një aksidenti që ka ndodhur sot mes dy veturave në rrugën Dragash-Prizren.

Rastin për Ekonomia Online e ka konfirmuar zëdhënësi i policisë për rajonin e Prizrenit, Shaqir Bytyqi.

Bytyqi tha se të lënduarit janë dërguar për trajtim mjekësor.

“Në aksident janë të përfshira dy automjete. Si pasojë e aksidentit përveç dëmeve materiale, tre persona kanë pësuar lëndime trupore. Policia ka dal në vendngjarje dhe është duke u marrë me rastin” deklaroi Bytyqi./D.B/EO

Lajmet

Nuk ndalet Tare, nis kontaktet me agjentin e top sulmuesit

Published

25 minutes ago

October 1, 2025

UBT News

Milani po mendon për një tjetër goditje të madhe në merkato, pas Luka Modric. Drejtori sportiv Igli Tare ka kontaktuar agjentin e Robert Lewandowskit, Pini Zahavi, për të kuptuar situatën e sulmuesit polak, kontrata e të cilit me Barcelonën skadon më 30 qershor 2026, sipas mediave spanjolle.

Tare ëndërron ta sjellë 37-vjeçarin në Milano me parametër zero, një operacion i ngjashëm me atë të Modric.

Edhe pse Lewandowski fiton rreth 33 milionë euro në vit dhe interesimi nga klubet arabe është i madh, Milani po përgatitet të jetë gati nëse sulmuesi vendos të largohet nga “Camp Nou” dhe të vazhdojë karrierën në Evropë.

Në “San Siro”, fanella me numrin 9 po pret ende një pronar të ri, ndërsa Massimiliano Allegri shihet i gatshëm ta mirëpresë një lojtar me përvojën dhe cilësitë e Lewandowskit./S.K/KP/

Lajmet

Zgjedhjet e 12 tetorit, Orav dhe shefat e misioneve të vendeve të BE e presin Radoniqin

Published

28 minutes ago

October 1, 2025

UBTnews

Ambasadori i Bashkimit Evropian në Kosovë, Aivo Orav, ka bërë të ditur se ai së bashku me shefat e misioneve të BE-së, sot e kanë pritur në takim kryetarin e Komisionit Qendror të Zgjedhjeve, Kreshnik Radoniqi.

Në njoftim thuhet se në takim është diskutuar roli thelbësor i KQZ-së në sigurimin e integritetit dhe organizimit të qetë të zgjedhjeve të ardhshme.

‘‘Ambasadori i BE-së, Aivo Orav, priti sot Kryetarin e Komisionit Qendror të Zgjedhjeve, Radoniqi, në takimin e të Shefave të Misioneve të BE-së.

Ata diskutuan rolin thelbësor të KQZ-së në sigurimin e integritetit, përfshirjes, transparencës dhe organizimit të qetë të zgjedhjeve të ardhshme dhe vendimmarrjes së paanshme dhe të bazuar në ligj, duke ndërtuar besimin e publikut’’, thuhet në njoftim./D.B/EO

Lajmet

KQZ emëron më shumë se 520 ekipe të numërimit në Qendra Komunale të Numërimit

Published

31 minutes ago

October 1, 2025

UBTnews

Komisioni Qendror i Zgjedhjeve (KQZ) ka emëruar më shumë se 520 ekipeve të numërimit në Qendrat Komunale të Numërimit me mbi 2 mijë anëtarë, për zgjedhjet lokale që do të mbahen me 12 tetor të këtij viti.

Sipas Ligjit për Zgjedhjet e Përgjithshme, në Zgjedhjet Lokale numërimi i votave të kandidatëve për Kryetarë të Komunave dhe votave të subjekteve politike për Kuvende Komunale bëhet në vendvotime pas përfundimit të votimit, të cilat evidentohen në formularë. Ndërkaq, sipas të njëjtit ligj, votat e kandidatëve për anëtarë të Kuvendeve Komunale numërohen në Qendra Komunale të Numërimit, proces i cili do të realizohet përmes ekipeve të numërimit.

Përveç numërimit të votave të kandidatëve për anëtarë të Kuvendeve Komunale, në këto qendra, sipas aktit nënligjor të KQZ-së, Rregullore Zgjedhore nr. 16/2024 për Qendrat Komunale të Numërimit, do të bëhet edhe verifikimi i votave të subjekteve politike, nga formularët që janë plotësuar në vendvotime pas numërimit të fletëvotimeve.

Po ashtu KQZ mori vendim për miratimin e procedurës së veprimit në Qendrat Komuna e të Numërimit për Zgjedhjet Lokale 2025. Me anë të kësaj procedure, përcaktohet themelimi, funksionimi dhe menaxhimi i QKN-ve, duke përfshirë mbikëqyrjen, pranimin e materialeve zgjedhore, numërimin e fletëvotimeve dhe verifikimin e rezultateve nga formularët e plotësuar në vendvotime./D.B/EO