Prishtina ka shënuar fitore bindëse si mysafire e Ferizajt me rezultat 5-0, në kuadër të javës së gjashtë të Superligës së Kosovës, duke treguar se është një nga kandidatët kryesorë për titull.

Ndeshja u ndërpre për 30 minuta, pasi tifozët ferizajas “Ujqit” dhe ata prishtinas “Plisat” u përleshën jashtë stadiumit.

Pas rifillimit të lojës, Prishtina kaloi në epërsi me Arbnor Mujën, i cili shënoi pas një kombinimi shumë të bukur me Mario Iliveskin. Dyshja bashkëpunoi sërish në minutën e 41-të, kur sulmuesi maqedonas Iliveski shënoi për 2-0.

Pak para fundit të pjesës së parë, Dren Zeqiri realizoi golin e tij të parë në Superligën e Kosovës, duke e çuar rezultatin në 3-0.

Edhe pjesa e dytë zhvillohej me të njëjtin ritëm, me Prishtinën që dominonte në lojë ndaj një Ferizaji të pafuqishëm. Blend Baftiu, i futur në pjesën e dytë, shënoi në minutën e 77-të për 4-0, ndërsa i riu Rin Ahmeti vulosi rezultatin 5-0 vetëm pak minuta më pas.

Sulmuesi kosovar, Emir Sahiti, nuk po gjen hapësirë te skuadra gjermane e Hamburgut, pasi në dy ndeshjet e fundit të Bundesligës ndaj Heidenheim dhe Union Berlin nuk është përfshirë as në listën e të ftuarve.

Edhe në përballjen kundër Bayern Munichut, 25-vjeçari ishte vetëm në stol, pa marrë minuta në fushë.

Shkak për këtë situatë duket të jetë forma jo e mirë e lojtarit, gjë që e konfirmoi edhe trajneri Merlin Polzin, i cili i ka kërkuar Sahitit përmirësim në disa aspekte të lojës.

“I kam shpjeguar Emirit se në cilat pozita duhet të përmirësohet. Finalizimi dhe përfundimi i aksioneve janë segmentet ku ai ka më shumë nevojë të punojë. Situata në skuadër nuk është e lehtë për shkak të konkurrencës së madhe, por ai ka po aq shanse sa të gjithë të tjerët për të fituar një vend në ekip”, tha Polzin.

Mbetet të shihet nëse Sahiti do të arrijë ta bindë trajnerin gjatë stërvitjeve të kësaj jave, në mënyrë që të jetë pjesë e skuadrës për ndeshjen e radhës, ku Hamburgu pret në shtëpi Mainz 05. /A.Z/UBT News/

Një lajm jo i mirë për Cagliarin nis kur Andrea Belotti doli nga fusha pothuajse i përlotur në pushimin e ndeshjes të së shtunës në shtëpi kundër Interit.

Testet që iu nënshtrua sulmuesi zbuluan një këputje të ligamentit të kryqëzuar anterior në gjurin e tij të majtë, sipas një deklarate nga klubi sard.

“Lojtari do t’i nënshtrohet testeve të mëtejshme dhe vizitave të specialistëve në ditët në vijim”, thuhet në njoftim.

Për “gjelin”, sezoni praktikisht ka mbaruar, dhe kujtojmë se Belotti iu bashkua Cagliarit në fund të merkatos të verës dhe luajti tre ndeshje në kampionat për kuqeblutë, duke shënuar dy gola në një fitore 2-1 ndaj Leçes.

Gjykata e Lartë e Katalonjës ka rrëzuar të premten dënimin për përdhunim ndaj ish-futbollistit brazilian Dani Alves, duke arsyetuar se çështja kishte mospërputhje dhe kontradikta në dëshmitë e paraqitura.

Alves, 41 vjeç, ishte dënuar vitin e kaluar me katër vjet e gjysmë burg për përdhunimin e një gruaje në një klub nate në Barcelonë në vitin 2022. Megjithatë, gjykata e apelit vendosi se dëshmia e akuzueses nuk kishte besueshmëri të mjaftueshme, duke theksuar se mungonin prova të qarta për të mbështetur akuzën.

“Dani Alves është shumë i lumtur. Ai është i pafajshëm, kjo është demonstruar. Drejtësia ka folur,” deklaroi avokatja e tij, Ines Guardiola.

Ndërkohë, avokatja e akuzueses, Ester Garcia, paralajmëroi se do ta çojë çështjen në Gjykatën Supreme të Spanjës, proces që mund të zgjasë deri në një vit./S.K/KP/Morung Express/