Protestuesit kanë bllokuar autostradën kryesore Ayalon në qendër të Tel Avivit, raporton Channel 12.

Ata po kërkojnë që të arrihet një marrëveshje me Hamasin për t’i kthyer robërit izraelitë në shtëpi dhe mbajtjen e zgjedhjeve të parakohshme parlamentare.

“Izraeli ka nevojë për një qeveri të përgjegjshme dhe të arsyeshme që do të garantojë një të ardhme më të mirë për shtetin e Izraelit”, citoi The Times of Israel të thoshte një protestues./UBTNews/

Një person ka humbur jetën derisa po trajtohej në Qendrën Klinike Universitare të Kosovës (QKUK), pasi ishte rrëzuar nga një objekt në vend të punës.

Policia e Kosovës njoftoi se ai është rrëzuar në Lipjan, e për rastin është arrestuar pronari i firmës ndërtimore dhe pronari i pronës. Në vendin e ngjarjes kanë dalë njësitet policore, prokurori dhe inspektori i punës.

Të arrestuarit janë dërguar në mbajtje, e trupi i pajetë është dërguar për obduksion.

Rasti po trajtohet si “asgjësim, dëmtim ose heqje e pajisjeve mbrojtëse dhe rrezikim i sigurisë në vendin e punës”.

Kjo është vdekja e parë sivjet e një punëtori që u lëndua në vendin e punës. Inspektorati i Punës gjatë qershorit kishte thënë se ka ulje të jashtëzakonshme të aksidenteve me fatalitet në vendin e punës.

Presidentja e Kosovës, Vjosa Osmani ka uruar Shtetet e Bashkuara të Amerikës (ShBA) për 248-vjetorin e shpalljes së pavarësisë duke thënë se populli i Kosovës feston krahas popullit amerikan.

Në një postim në Facebook, e para e vendit ka thënë se aleanca e Kosovës me ShBA-të vazhdon t’i mbijetojë kohës dhe sfidave dhe në këtë ditë kujtohen vlerat e idealet mbi të cilat janë ndërtuar Shtetet e Bashkuara.

“Aleancë që vazhdon t’i mbijetojë kohës dhe sfidave. Sot, populli i Kosovës feston krahas popullit amerikan. Sot, kujtojmë vlerat e idealet mbi të cilat janë ndërtuar Shtetet e Bashkuara dhe aleanca jonë e fuqishme! Aleatëve tanë amerikanë: Gëzuar 4 Korriku! Happy Fourth of July”, thuhet në urimin e Osmanit.

Kryetari i LDK-së, Lumir Abdixhiku, ka uruar Qeverinë dhe popullin e Shteteve të Bashkuara të Amerikës, që sot festojnë 248-vjetorin e shpalljes së pavarësisë.

Abdixhiku ka thënë se 4 korriku i vitit 1776 shënon datën e lindjes së një vendi që identifikon luftën për lirinë e të gjithë popujve, për demokracinë dhe prosperitetin në botë.

“4 korriku i vitit 1776, shpallja e pavarësisë së ShBA-ve padyshim shënon datën e lindjes së një vendi që identifikon luftën për lirinë e të gjithë popujve, për demokracinë dhe prosperitetin nëpër botë. Në historinë politike të krijimit të shteteve, SHBA-të janë themelues dhe pishtar i të drejtës universale për të jetuar të lirë secili popull kudo në botë.”

Ai ka shtuar se SHBA’të janë sinonim i kombit të madh që angazhohet përherë për një botë më paqësore dhe më të sigurt.

“Sot, Shtetet e Bashkuara të Amerikës janë sinonim i kombit të madh, që angazhohet përherë për një botë më paqësore dhe më të sigurt. Ato janë motiv dhe model i shumë popujve anekënd globit për liri, paqe e demokraci.”

Ndërkaq për Kosovën, Abdixhiku ka thënë se SHBA’të kanë qenë, janë dhe do të mbesin aleat i përhershëm strategjik.

I pari i LDK-së tha se pa mbështetjen e SHBA-ve Kosova do ta kishte të pamunfur lirinë, krijimin dhe konsolidimin e shtetit.

“Edhe për Kosovën SHBA-të kanë qenë, janë dhe do mbesin aleat i përhershëm strategjik, pa mbështetjen e të cilëve vendi ynë do ta kishte të pamundur lirinë, krijimin dhe konsolidimin e shtetit. Aleanca me ShBA-të është e përmbledhur qartë në postulatin e atit themeltar të Republikës, Presidentit Historik Rugova: “Kosova shtet i pavarur e sovran, i integruar në NATO e BE, dhe me miqësi të përhershme me Shtetet e Bashkuara të Amerikës”. Vizioni politik i yni është i qartë; duhet ta ndjekim orientimin natyral politik drejt vlerave perëndimore e integrimin në strukturat euro-atlantike.”

“Në emër të Lidhjes Demokratike të Kosovës, uroj Qeverinë dhe popullin e Shteteve të Bashkuara të Amerikës për Ditën e Pavarësisë. Urime Ditën e Pavarësisë SHBA! Zoti i bekoftë Shtetet e Bashkuara të Amerikës! Zoti e bekoftë miqësinë në mes dy vendeve tona!”