Gjeneralmajori i ushtrisë Italiane, Enrico Barduani, në fjalën e tij të fundit si komandant i KFOR-it në Kosovë tha se situata e sigurisë është përmirësuar dukshëm, por theksoi se ekzistojnë ende shqetësime për shkak të disa çështjeve të pazgjidhura.

Sipas tij, dialogu në mes Kosovës dhe Serbisë është kornizë për të zgjidhur çështjet e hapura.

“Natyrisht, situata e sigurisë është përmirësuar dukshëm që nga fillimi i KFOR-it, dhe dëshmi e prekshme e kësaj është fakti që sot forcat e KFOR-it janë reduktuar në më pak se 10% të asaj që ishin në vitin 1999, një arritje e rëndësishme. Megjithatë, ekzistojnë ende shqetësime për humbje sigurie për shkak të disa çështjeve të pazgjidhura, dhe kjo është arsyeja pse roli i KFOR-it mbetet ende kritik, dhe pse është thelbësore që KFOR-i të shihet si pjesë integrale e angazhimit të vazhdueshëm të komunitetit ndërkombëtar. NATO vazhdon të mbështesë plotësisht dialogun e lehtësuar nga BE-ja për normalizimin e marrëdhënieve ndërmjet Beogradit dhe Prishtinës, dhe KFOR-i po luan rolin e tij në këtë drejtim. Ky dialog është një kornizë për të zgjidhur çështjet e hapura dhe për të arritur zgjidhje që respektojnë të drejtat e të gjitha komuniteteve. Kjo është thelbësore për një stabilitet afatgjatë”, tha ai.

Sipas tij për të ecur përpara është e rëndësishme që Kosova dhe Serbia të zbatojnë marrëveshjet ekzistuese, dhe që të dyja palët të tregojnë fleksibilitet për të bërë kompromiset e nevojshme.

“Por për të ecur përpara, siç ka theksuar vazhdimisht Sekretari i Përgjithshëm i NATO-s, Mark Rutte, është e rëndësishme që Beogradi dhe Prishtina të zbatojnë marrëveshjet ekzistuese, dhe që të dyja palët të tregojnë fleksibilitet për të bërë kompromiset e nevojshme. Por politikanët e mençur duhet të kujdesen për të mirën e popullit të tyre dhe për të ardhmen e vendeve të tyre. Prandaj ata duhet të jenë të gatshëm të bëjnë kompromis. Nëse shohim skenarin e sigurisë ndërkombëtare sot, jam i bindur se tani, më shumë se kurrë, kemi nevojë për udhëheqje politike për të ndjekur zgjidhje afatgjata për shumë çështje të pazgjidhura që ende prekin Kosovën dhe rajonin”, theksoi ai.

Në kampin e KFOR-it, Film City është mbajtur sot ceremonia e Ndërrimit të Komandës. Gjeneralmajori i ushtrisë italiane, Enrico Barduani, ia dorëzojë komandën e KFOR-it gjeneralmajorit të ushtrisë turke, Özkan Ulutas./D.B/KP

Zyra për Mbrojtje dhe Ndihmë Viktimave (ZMNV) gjatë javës së fundit, në nivel të Republikës së Kosovës ka trajtuar gjithsej 67 raste të reja, ku shumica e tyre kanë të bëjnë me dhunën në familje.

Sipas të dhënave zyrtare, 51 nga rastet e paraqitura ishin të natyrës së dhunës në familje, duke e bërë këtë kategori më shqetësuese dhe më të përfaqësuar në punën e mbrojtësve të viktimave.

“Përveç kësaj, janë trajtuar edhe 1 rast i grabitjes; 1 rast i kanosjes; 1 rast i tentim-vrasjes; 1 rast i vrasjes; 6 raste të bashkëjetesës me persona nën moshën 16 vjeç; 2 raste të krimeve të luftës; 1 rast i tentim-dhunimit; 3 raste për shkelje të urdhrave për mbrojtje (KUM)”, thuhet në njoftim.

Në të njëjtën periudhë, janë parashtruar në gjykatë 6 kërkesa për Urdhër Mbrojtjeje (KUM) dhe 14 kërkesa për Urdhër Mbrojtjeje Emergjente (KUME).

“Po ashtu, janë regjistruar 3 kërkesa për vazhdim të UM nga pala; 5 kërkesa për ndërprerje të UM; 2 kërkesa për ndryshim të UM. Në kuadër të procedurave ligjore, ZMNV ka qenë pjesë aktive në 85 seanca gjyqësore; 6 seanca në prokurori; 81 raste të këshillave juridike; 15 aktgjykime dënuese; 2 aktgjykime refuzuese; 2 aktgjykime liruese. Po ashtu, janë regjistruar 17 aktvendime të aprovuara; 3 aktvendime të tërhequra;1 aktvendim i refuzuar”, thuhet në njoftim.

ZMNV ka ofruar gjithashtu përfaqësim në polici për një rast, në strehimore për dy raste, si dhe referim në Avokatinë e Ndihmës Juridike Falas (ANJF) për një rast./D.B/KP

Presidentja e Kosovës, Vjosa Osmani gjatë ndërrimit të Komandës së KFOR-it tha se për më shumë se dy dekada KFOR ka qenë gurthemel i paqes sigurisë dhe stabilitetit në Kosovë dhe rajon.

Ajo theksoi se populli i Kosovës është i rreshtuar me vlerat e lirisë e demokracisë, prandaj siç tha Osmani aspirata e Kosovës për t’u anëtarësuar në NATO nuk është thjesht një zgjedhje strategjike, por një pasqyrim i asaj se kush jemi.

“Kosova gjithmonë do të mbetet mirënjohëse për shërbimin tuaj, për sakrificën tuaj dhe për përkushtimin tuaj të palëkundur për paqe. Uroj që ky mision të vazhdojë të qëndrojë si simbol i angazhimit të qëndrueshëm të NATO-s dhe si një premtim i gjallë se, së bashku, uniteti vërtet i kapërcen të gjitha. Kjo kauzë e madhe, pa dyshim, kërkon përpjekjen e secilit prej nesh. Historikisht edhe sot, populli i Republikës së Kosovës gjithmonë është rreshtuar me vlerat e lirisë, demokracisë dhe sigurisë kolektive. Kjo është arsyeja pse aspirata jonë për t’u anëtarësuar në NATO nuk është thjesht një zgjedhje strategjike, por një pasqyrim i asaj se kush jemi. Në kohë kur kërcënimet ndaj paqes po shtohen, aleanca është më e fortë kur qëndron pranë partnerëve që vërtet kanë dëshmuar përkushtimin e tyre. Kosova e ka bërë këtë vazhdimisht – përmes qëndrueshmërisë sonë, reformave tona dhe vendosmërisë së popullit tonë. Dhe do të vazhdojmë ta bëjmë këtë krah aleatëve tanë, sepse vetëm së bashku mund të sigurojmë që paqja e fituar me mund sot, të bëhet paqja e qëndrueshme e së nesërmes”, theksoi ajo.

Tutje presidentja e vendit, Vjosa Osmani shtoi se një realitet do të jetë i plotë vetëm atëherë kur flamuri i Republikës së Kosovës të qëndrojë pranë të gjithë flamujve që shohim sot këtu, si anëtare krenare e NATO-s.

“Vendosmëria e Kosovës do të mbetet e palëkundur. Në mbrojtje të këtyre vlerave, në mbrojtje të sovranitetit të saj, dhe në mbrojtje të çdo pëllëmbe të integritetit tonë territorial. Vetëm kur veprojmë të bashkuar në mbrojtje të këtyre vlerave, mund të ëndërrojmë për një Evropë të tërë, të lirë dhe në paqe. Një realitet që do të jetë i plotë vetëm atëherë kur flamuri i Republikës së Kosovës të qëndrojë pranë të gjithë flamujve që shohim sot këtu, si anëtare krenare e NATO-s”, tha ajo./D.B/KP

Trajneri i Kombëtares Shqiptare, Silvinjo, ka publikuar listën e lojtarëve të grumbulluar për dy ndeshjet e muajit tetor, sfidën kualifikuese të Kupës së Botës kundër Serbisë dhe miqësoren ndaj Jordanisë.

Tekniku kuqezi ka thërritur 25 lojtarë dhe risia e vetme është futbollisti i Shkëndijes së Tetovës, Klisman Cake. Qendërmbrojtësi ka qenë më parë pjesë e Kombëtares U-21 dhe pas paraqitjeve të mira me Shkëndijën, ku arritën edhe kualifikimin historik në Conference League, ka bindur trajnerin Silvinjo për ta ftuar në Kombëtare.

Lista e plotë e publikuar:

Portierë: Thomas Strakosha, Mario Dajsinani, Simon Simoni

Mbrojtës: Elseid Hysaj, Ivan Balliu, Mario Mitaj, Naser Aliji, Ardian Ismajli, Enea Mihaj, Berat Gjimshiti, Arlind Ajeti, Klisman Cake

Mesfushorë: Ylber Ramadani, Juljan Shehu, Kristjan Asllani, Medon Berisha, Qazim Laçi, Adrion Pajaziti, Nedim Bajrami, Arbër Hoxha, Jasir Asani

Sulmues: Armando Broja, Myrto Uzuni, Rey Manaj, Mirlind Daku

Grumbullimi i Kombëtares nis të hënën, më 6 tetor, në Tiranë, ku kuqezinjtë do të përgatiten fillimisht për sfidën kualifikuese të Kupës së Botës ndaj Serbisë, e cila do të luhet më 11 tetor në stadiumin “Gradski stadion Dubočica” në Leskovac, në orën 20:45.

Ndeshja miqësore Shqipëri- Jordani, do të zhvillohet më 14 tetor, në “Air Albania”, në 19:00./S.K/KP/