Lajmet

​Qytetarët kërkojnë rikthimin në tërësi për qarkullim të rrugës “Xhorxh Bush”

Andej mund të kalojnë autobusët e Trafikut Urban, taksitë, automjetet e policisë, zjarrfikësve dhe autoambulanca.

Published

4 years ago

on

Rruga që ndan katedralen “Nënë Tereza” dhe Kampusin Universitar është rihapur për qarkullim, por vetëm për automjete të caktuara. Në bulevardin “Xhorxh Bush” mund të kalojnë autobusët e Trafikut Urban, taksitë, automjetet e policisë, zjarrfikësve dhe autoambulanca. Kryeqytetasit po kërkojnë rikthimin për qarkullim si më parë, meqë ankohen për tollovi në Prishtinë. Po ashtu, ata thonë se nuk e kanë të qartë në tërësi se kush ka të drejtë të kalojë me automjete në këtë rrugë.

Eroll Agolli kërkon që qarkullimi në këtë pjesë të Prishtinës të jetë tërësi, meqë ankohet për kaosin e shkaktuar në Prishtinë.


“Më mirë ka qenë atëherë se tash…. qysh ka qenë përpara me qarkullu këtu, tash po duhet krejt rreth e rreth. Shiko çfarë guzhme (tollovi) është bërë nëpër rrugë… Unë e kam kerrin atje, kam pasur takim këtu, badihava, duhet t’i bëjë dy kilometra në këmbë se nuk kam si të vij këtu”, shprehet ai.

Për dikë tjetër që pak herë e shfrytëzon makinën, nuk paraqet problem mos qarkullimi i automjeteve në këtë rrugë. Teuta Hazbata është e mendimit që bulevardi “Xhorxh Bush” të jetë pjesë e sheshit.


“Unë shumë eci, në fakt nuk jam e varur shumë prej veturave. Kështu që mua më duket që ka nevojë për me pas. Por, ky organizim nuk e di siç do të shkojë, sa do të jetë e këndshme edhe për këmbësorë me ec në mes të veturave, nuk e di. Por, për që ka nevojë të bëhet shesh, po….Tollovi gjithmonë ka edhe 100 rrugë të tjera me i hap, tollovi ka Prishtina. Duhet në një mënyrë tjetër me qenë për me ndalua këtë qarkullim. Kështu që unë mendoj që na kanë ngulfat këto vetura”, shprehet ajo.

E Avni Zubi e ka të paqartë vendimin për rikthimin e kësaj rrugë në qarkullim për automjete të caktuara.


“Nuk po e din njeri, a ka me shku këndej, a duhet të kthehen përmas. Nuk po merret vesh kjo punë. Autobusi tash shkoj këndej, ai tjetri shkoj andej. Nuk është në rregull diçka”, deklaron ai.

Ngjashëm shprehet edhe Avni Gashi, i cili thotë se një pjesë e rrugës nuk dihet se për cka do të shfrytëzohet.


“Nuk e di tash, një trak u lëshua për autobusë dhe për këto, por tjetra trak nuk e di për çka është. Këta këmbësorët nuk mund të kalojnë aty, unë këtë nuk po e di. Kjo u lëshua për autobusë, për taksi e zjarrfikës, por kjo traka tjetër për çka është nuk po e dimë”, thotë ai.

Komuna e Prishtinës ka njoftuar se sheshi “Xhorxh Bush” është hapur për linjat e Trafikut Urban, taksitë dhe veturat emergjente, të cilat do të kenë qasje me shpejtësi të kufizuar prej 20 km/h.

Related Topics:
Continue Reading

Lajmet

Hamza refuzon ftesën e Kurtit: PDK rikonfirmon qëndrimin për të mbetur në opozitë

Published

6 hours ago

on

August 3, 2026

By

Kryetari i Partisë Demokratike të Kosovës, Bedri Hamza, ka refuzuar zyrtarisht ftesën për takim të dërguar nga lideri i Lëvizjes Vetëvendosje, kryeministri në detyrë Albin Kurti.

Përmes një letre kthyese drejtuar Kurtit, Hamza ka bërë të ditur se PDK-ja nuk do të jetë pjesë e takimeve konsultative, duke rikonfirmuar vendimin e partisë për të qëndruar në opozitë.

“Duke iu referuar takimit tonë të datës 10 korrik 2026 dhe qëndrimit publik të PDK-së, ju rikonfirmoj se, në rrethanat aktuale, qëndrimi ynë është që të vazhdojmë të qëndrojmë në opozitë”, thuhet në përgjigjen e Hamzës.

Përveç refuzimit të ftesës, kreu i PDK-së i ka bërë thirrje Kurtit që të kërkojë marrëveshje me subjektet e tjera politike për krijimin e institucioneve të reja. /E.A/

 

Continue Reading

Lajmet

Moska fajëson Ukrainën për shpërthimin vdekjeprurës në një restorant:

Published

7 hours ago

on

August 3, 2026

By

Rusia ka akuzuar Ukrainën për organizimin e një shpërthimi në një restorant luksoz në qendër të Moskës, nga i cili mbetën të vdekur pesë persona dhe u plagosën 19 të tjerë. Ngjarja ka nxitur dyshime të forta se shënjestra e sulmit ishte komandanti i lartë ushtarak rus, kolonel-gjenerali Aleksandr Chayko.

Ngjarja ndodhi të shtunën në mbrëmje pranë hyrjes së restorantit italian “Balzi Rossi”, i vendosur në një nga rrokaqiejt historikë të epokës së Stalinit në Sheshin Kudrinskaya. Sipas prokurorëve rusë, një grua e paidentifikuar që mbante një mjet shpërthyes të improvizuar u përpoq të hynte brenda, por u ndalua nga roja e sigurisë, çka çoi në shpërthimin e lëndës plasëse pak çaste më vonë në hyrje të objektit.

Përmes një deklarate zyrtare, Ministria e Jashtme e Rusisë e cilësoi ngjarjen si akt terrorist të udhëhequr nga Kievi, duke u shprehur se “tentakulat e përgjakshme të bandës terroriste të Zelenskyt kanë arritur deri te restoranti italian ‘Balzi Rossi’ në Moskë”.

Ndonëse autoritetet ruse nuk kanë publikuar emrat e viktimave apo shënjestrën e sulmit, blogerë ushtarakë pro-Kremlinit dhe media të pavarura raportojnë se mbledhja private organizohej për ditëlindjen e 55-të të gjeneralit Aleksandr Chayko. Pamjet e publikuara në rrjete sociale nga eventi tregonin sfondin me mbishkrimin “Aleksandr 55”.

Chayko, i cili ka udhëhequr më parë mësymjen ruse ndaj Kievit në vitin 2022 përpara se të merrte drejtimin e forcave ajrore-hapësinore, ka shpëtuar pa lëndime. Mirëpo, sipas kanalit informativ “VChK-OGPU”, nga shpërthimi në tarracën e restorantit ka mbetur i vrarë dhëndri i tij, Daniil Peredriy, ndërsa e bija, Maria, ka pësuar lëndime të rënda. /BBC/

Continue Reading

Lajmet

17-vjeçari nga Ferizaj gjen portofolin me mbi 2,600 euro e dokumente dhe e dorëzon në polici

Published

7 hours ago

on

August 3, 2026

By

Policia e Kosovës përmes një njoftimi ka bërë të ditur së një i ri 17-vjeçar me inicialet A.N nga fshati Bablak i Ferizajt është paraqitur vullnetarisht në stacionin policor pasi kishte gjetur një portofol pranë një pike karburanti në fshatin Lloshkobare.

Pas verifikimeve nga zyrtarët policorë, u bë i mundur identifikimi i pronarit, K.S., 40 vjeç nga Gjakova, të cilit iu kthyen të gjitha mjetet monetare në vlerë prej 2,435 eurosh e 270 frangash, së bashku me dokumentet e tij të identifikimit.

Drejtoria Rajonale e Policisë në Ferizaj ka shprehur falënderimin dhe vlerësimin e lartë për veprimin e A. Nuhës, duke e cilësuar ndershmërinë e tij si një shembull të shkëlqyer për të gjithë komunitetin. /E.A/

Continue Reading

Lajmet

IKShPK konfirmon 99 të prekur me fruth dhe apelon për vaksinim të menjëhershëm të fëmijëve

Published

7 hours ago

on

August 3, 2026

By

Instituti Kombëtar i Shëndetësisë Publike të Kosovës (IKShPK) ka nxjerrë një përditësim mbi situatën epidemiologjike në vend, ku njofton se nga 16 prilli deri më 3 gusht 2026 janë konfirmuar gjithsej 99 raste me fruth. Vetëm përgjatë javës së fundit janë regjistruar 21 raste të reja, duke shënuar një rritje të ndjeshme krahasuar me të njëjtën periudhë të vitit të kaluar, ku ishin raportuar 65 raste.

Sipas të dhënave të institutit, vatrat kryesore të infeksionit mbeten Prishtina me 33 raste dhe Fushë-Kosova me 25 raste, të ndjekura nga Ferizaj me 12 dhe Kaçaniku me 7 raste. Rastet e tjera janë shpërndarë në numër më të vogël në komunat si Drenas, Lipjan, Obiliq, Gjilan, Skenderaj, Shtime, Vushtrri, Deçan, Graçanicë, Podujevë, Shtërpcë dhe Viti.

Për shkak të shkallës së lartë të infektueshmërisë dhe rrezikut nga komplikimet e mundshme, IKShPK u ka bërë thirrje të gjithë prindërve dhe kujdestarëve që të verifikojnë kartelat e vaksinimit dhe të sigurojnë imunizimin e fëmijëve në Qendrat e Mjekësisë Familjare sipas kalendarit të rregullt. Po ashtu, instituti u bën apel qytetarëve që me shfaqjen e simptomave të para — si temperaturë e lartë, skuqje në lëkurë, kollë apo rrufë — të paraqiten menjëherë për kontroll në institucionet shëndetësore. /E.A/

Continue Reading

Të kërkuara