Lajmet

​Qeveria kundër tërheqjes së trustit, Kurti: Opozita po manipulon

Ai madje ka theksuar se kjo nismë po gjen përkrahjen e Listës Serbe.

Published

on

Kryeministri Albin Kurti ka përsëritur qëndrimin e qeverisë, kundër tërheqjes së 30 për qind të mjeteve të grumbulluara në Trustin Pensional, teksa ka akuzuar opozitën se po manipulon me konceptin e varfërisë.

Ai madje ka theksuar se kjo nismë po gjen përkrahjen e Listës Serbe, të cilët nuk e kanë brengë jetesën e komunitetit të tyre.

Shefi i ekzekutivit në fjalën hyrëse para kabinetit qeveritar ka përsëritur kundërshtimin për nismën e tërheqjes së 30 për qind të parave të Trustit. Sipas tij, ata që po kërkojnë një gjë të tillë e kanë sjellë vendin në këtë gjendje.

“Nga mbi 630 mijë llogari të cilat janë të hapura, edhe pse gjysma e tyre jo aktive, në Trustin Pensional të Kosovës, 92 për qind e tyre kanë të akumuluara më pak se 10 mijë euro. 80 për qind të llogarive apo mbi 500 mijë sosh kanë një mesatare vetëm një 1100 euro llogari. Pjesa më e madhe apo afërsisht gjysma e kursimeve janë koncentruar te më pak se tetë për qind e bartësve të llogarive. Pra, që kanë afërsisht gjysmën e mjeteve të akumuluara. 1,2 për qind afërsisht i individëve që kanë llogari në Trust kanë një mesatare 30-fish më shumë se 80 për qind e qytetarëve me llogari të hapura në Trust. Andaj këta 8 për qind edhe do të ishin përfituesit kryesorë të një skeme për rrënimin e Trustit Pensional të vendit. Janë këta që kanë sjellë këtë propozim në vend dhe janë këta që po keqpërdorin edhe rrjetin medial për të manipuluar opinionin mbi përmasat e krizës dhe domosdoshmërinë e tërheqjes së mjeteve të Trustit si zgjidhje”, ka theksuar ai.

Kurti theksoi se mjetet e Trustit nuk mund të shpenzohen për të zgjidhur problemet e sotme, pasi duhet të shfrytëzohen për pensione.

“Ata po manipulojnë me konceptin e varfërisë, ku nuk bëjnë pjesë vetë dhe me qytetarët e vendit për të arritur qëllimet e tyre personale që nuk janë të qytetarëve të vendit. Buxheti i vitit 2028 është buxheti i yni dhe mjetet në Trustin Pensional janë të tonat, por buxheti në vitin 2028 është për vitin 2028 dhe jo për vitin 2022. Njësoj pensionet nuk janë për tash, por kur të plakemi. Dhe nuk mundemi një problem të përkohshëm tani ta zgjidhim me një rrënim të së ardhmes tonë. Nuk mund të lejojmë që ta humbin edhe të ardhmen edhe mos ta fitojmë të tashmen”, ka thënë Kurti.

Kurti ka komentuar edhe deklaratën e deputetit të PDK-së, Bekim Haxhiu për Fondin Monetar Ndërkombëtar.

“Ne mbase jemi brezi i parë që mund të ketë pleqëri me dinjitet. Nëse edhe këtë e rrënojmë qysh sot për një problem afatshkurtër, në situatën ku ngjallet panik i paqenë, atëherë brezi ynë humbet këtë mundësi që po e ndërtojmë së bashku. Nisma për tërheqjen e parave të Trustit nuk është rastësishme që ka ardhur nga një deputet i opozitës, i cili duke komentuar deklaratën e përfaqësuesve të Fondit Monetar Ndërkombëtar ka thënë përafërsisht se ‘po të donte FMN-ja do të na jepte mjete t’i shpërndanim për qytetarët dhe nuk do t’i preknim mjetet e Fondit. Ka mjete aq të mjaftueshme FMN’. Ja pra se kush po merret me financa dhe makroekonomi te ne. Është diletantizëm i jashtëzakonshëm, por pasojat e të cilit nuk kemi pse i bartim ne të tjerët, veç se vetë ai personi”, ka deklaruar Kurti.

Sipas tij, krahë partive opozitare është rreshtuar edhe Lista Serbe.

“Këtu më së shumti zell pritet t’iu del në ndihmë edhe Lista Serbe. Nismëtari i idesë ka deklaruar se gëzojnë mbështetjen edhe të Listës Serbe për propozimin e tyre. E besoj që nuk duhet të na bindin që kjo ndodh qoftë për shkak të brengës së madhe të Listës Serbe për koston e jetesës së qytetarëve të Kosovës, apo për shkak se kjo masë do të ndihmonte qytetarëve të komunitetit serb. Andaj, ne nuk kemi se si e mbështesim një nismë të tillë”, ka përfunduar Kurti.

Në mbledhjen e sotme janë miratuar 26 pika të rendit të ditës. Në Ditën Botërore të Fëmijëve, kabineti qeveritar ka vendosur për themelimin e Komisionit Ministror për memorialin për fëmijët e vrarë gjatë luftës 1998-1999 në Kosovë.

Ky komision do të udhëhiqet nga vetë kryeministri Albin Kurti. Në mbledhjen e sotme është miratuar edhe koncept-dokumenti për themelimin e Fondit Sovran të Kosovës. Sipas kryeministrit Albin Kurti, ky fond do të ketë rol mbikëqyrës të aseteve të Kosovës.

Qeveria po sot ka marrë vendim për ndarjen e 50 mijë eurove për Preshevën, Bujanocin e Medvegjën.

Po ashtu, është emëruar bordi i ri i drejtorëve të Kompanisë Rajonale të Ujësjellësit, ndërkaq është shkarkuar bordin e kompanisë së ujitjes “Drini i Bardhë” me arsyetimin se ka qenë i pasuksesshëm, ku është emëruar një bord të përkohshëm për këtë ndërmarrje.

Vendi

Dështon mbledhja e Kryesisë së Kuvendit për mungesë kuorumi, shtyhet shqyrtimi i Projektligjit për Gjykatën Speciale

Published

on

Mbledhja e Kryesisë së Kuvendit të Kosovës ka dështuar të mbahet të martën për shkak të mungesës së kuorumit.

Këtë e bëri të ditur nënkryetari i Kuvendit, Ardian Gola, i cili para gazetarëve foli edhe për Projektligjin për Gjykatën Speciale. Ai tha se vazhdimi i seancës së ndërprerë, ku ishte paraparë shqyrtimi i këtij projektligji, kërkon koordinim dhe dakordim mes partive politike.

“Është çështje komplet jashtë rendit të ditës së Kryesisë. Arsyeja që është ndërprerë seanca ka të bëjë me mungesë të kuorumit dhe realisht kryetarja Haxhiu ka autorizuar që, në koordinim me shefat e grupeve parlamentare, të caktohet një datë kur do të vazhdojë ajo seancë. Mbetet çështje e dakordimit politik, të menaxhuar dhe drejtuar nga kryetarja e Kuvendit”, theksoi Gola.

Ai u pyet edhe për dënimin e ish-presidentit Hashim Thaçi nga Dhomat e Specializuara në Hagë.

Gola shprehu keqardhje për procesin gjyqësor që po zhvillohet në këtë institucion, ndërsa bëri të ditur se vendimi i fundit do të trajtohet edhe në kuadër të grupit punues për strategjinë lidhur me ish-krerët e UÇK-së, të udhëhequr nga zëvendëskryeministri Glauk Konjufca.

“Shprehim keqardhjen tonë për gjithë procesin që po zhvillohet në Dhomat e Specializuara. Ne e kemi themeluar një grup punues, në krye të të cilit është zëvendëskryeministri Glauk Konjufca, dhe shpresojmë që edhe ky vendim të jetë si pjesë shtesë e këtij grupi punues”, tha ai./A.K/

Continue Reading

lajme

Gjykata e Lartë në Beograd cakton paraburgimin dhe lëshon urdhërarrest për Milan Radoiçiqin

Published

on

By

Gjykata e Lartë në Beograd ka marrë vendim për caktimin e masës së paraburgimit dhe lëshimin e urdhërarrestit ndaj ish-nënkryetarit të Listës Serbe, Milan Radoiçiq, pasi ky i fundit nuk është paraqitur në stacionin policor, konfirmim ky i dhënë për median serbe Insajder nga vetë Gjykata e Lartë në Beograd.

Sipas Gjykatës, vendimi për paraburgim dhe fletarrest është marrë për shkak se Radoiçiq i cili ndodhet nën hetime për pjesëmarrje në sulmin e armatosur në fshatin Banjskë nuk është lajmëruar në stacionin policor më 15 nëntor. Paraqitja periodike në polici ishte një nga masat e sigurisë të caktuara nga gjykata si garanci se ai do të ishte i disponueshëm gjatë kohëzgjatjes së hetimeve. Sipas po të njëjtave burime gjyqësore, paraburgimi u caktua për shkak të rrethanave që tregojnë se i pandehuri po fshihet ose është arratisur. Informacionin fillimor se për Radoiçiq është lëshuar urdhërarrest e kishte publikuar portali BIRN.

Milan Radoiçiq po hetohet në Serbi në kuadër të lëndës “Banjska”, e cila u iniciua pas konfliktit të armatosur në fshatin Banjskë të Kosovës më 24 shtator 2023, ku mbetën të vrarë katër persona, rreshteri i Policisë së Kosovës,  Afrim Bunjaku i cili ishte në detyrë dhe tre anëtarë të grupit të armatosur.

Radoiçiq kishte pranuar përmes avokatit të tij, Goran Petronijević, se kishte qenë përgjegjës logjistike për organizimin e grupit terrorist.

Ndonëse Prokuroria e Lartë në Beograd kishte kërkuar paraburgim pas nisjes së procedurës penale për vepra të tilla si armëmbajtje pa leje dhe vepra kundër sigurisë përgjithëshme, gjykata e kishte lënë të mbrohet në liri, me kusht që të dorëzonte pasaportën, të mos udhëtonte në Kosovë dhe të paraqitej në polici çdo dy javë. Që atëherë, prokuroria nuk kishte dhënë asnjë informacion për ndonjë përparim tjetër në këtë hetim.

Paralelisht me këto zhvillime në Serbi, në Kosovë është duke u zhvilluar një proces gjyqësor kundër 45 personave, ku rasti në Banjskë është cilësuar si terrorizëm dhe sulm ndaj rendit kushtetues, proces në të cilin dy persona tashmë janë dënuar me burgim të përjetshëm dhe një tjetër me 30 vjet burgim.

Në kohën kur ndodhi sulmi terrorist në Banjskë, Milan Radoiçiq ushtronte funksionin e nënkryetarit të Listës Serbe, subjekti kryesor i serbëve të Kosovës me lidhje të ngushta me Partinë Përparimtare Serbe (SNS) në pushtet, ndërsa më parë ishte shfaqur shpesh në tubime politike dhe në shoqërinë e zyrtarëve më të lartë shtetërorë të Serbisë. /E.A/

 

Continue Reading

Vendi

Marko Hatlak kërkon falje për interpretimin e këngës “Oj Kosovo, Kosovo” në Bruksel

Published

on

Muzikanti dhe fizarmonicisti slloven, Marko Hatlak, ka kërkuar falje për përzgjedhjen dhe interpretimin e këngës “Oj Kosovo, Kosovo” gjatë ceremonisë hapëse të Forumit të Zgjerimit të Bashkimit Evropian 2026 në Bruksel.

Kënga, e cila përmban pretendime nacionaliste serbe ndaj Kosovës, kishte nxitur reagime të shumta pas interpretimit të saj në këtë aktivitet.

Hatlak, i cili ishte përgjegjës për përgatitjen e programit muzikor në emër të Komisionit Evropian, ka thënë se përzgjedhja ishte e paqëllimshme dhe se nuk ishte në dijeni të kontekstit historik e politik të këngës.

Në një reagim publik, ai ka shpjeguar se ishte ngarkuar të përzgjidhte dhjetë këngë, nga një për secilin vend pjesëmarrës në forum, dhe t’ia dorëzonte ato organizatorëve për miratim.

Sipas tij, gjatë kërkimit në Google për një këngë tradicionale nga Kosova, kishte hasur në “Oj Kosovo, Kosovo”, e cila ishte përshkruar si këngë patriotike.

“Unë e përzgjodha atë nga këndvështrimi i një muzikanti, pra duke u bazuar në harmoninë, ritmin dhe tingullin e saj”, ka shpjeguar Hatlak.

Ai ka thënë se kishte vetëm një javë kohë për përgatitjen dhe interpretimin e programit dhe se, për shkak të afatit të shkurtër, nuk kishte arritur të hulumtonte prejardhjen dhe domethënien e këngës. Sipas tij, as organizatorët nuk e kishin vënë në pah natyrën problematike të përzgjedhjes gjatë shqyrtimit të programit.

“U kërkoj sinqerisht falje të gjithë atyre që janë prekur nga kjo ngjarje”, ka deklaruar muzikanti.

Hatlak ka bërë të ditur se kërkimfaljen ua ka dërguar drejtpërdrejt edhe ambasadorit të Kosovës në Slloveni, Valdet Sadiku, ambasadorit të Kosovës në Belgjikë, Agron Bajrami, kryenegociatorit për Integrimin Evropian, Jeton Zulfaj, si dhe komisioneres evropiane për Zgjerim, Marta Kos.

Ai ka theksuar se nuk kishte pasur qëllim të ofendonte askënd dhe se nuk do ta kishte interpretuar këngën po ta kishte ditur kontekstin e saj.

“Po ta kisha ditur kontekstin dhe domethënien e saj, sigurisht që nuk do ta kisha interpretuar. Gjatë gjithë karrierës sime, jam përpjekur që përmes muzikës t’u sjell njerëzve vetëm gëzim dhe paqe të brendshme. Nuk ka qenë kurrë qëllimi im të fyej askënd”, ka shkruar ai.

Në fund, Hatlak ka shprehur keqardhje për situatën e krijuar, duke shpresuar që kërkimfalja e tij të pranohet./A.K/

Continue Reading

Lajmet

Studimi i profesorëve të UBT-së publikohet në revistën ndërkombëtare “Pharmacoepidemiology”

Published

on

By

Punimi shkencor i profesorëve të Shkencave Mjekësore në UBT, Prof. Dr. Fitim Alidema dhe Prof. Dr. Zejdush Tahiri, në bashkëautorësi me Mr. Ph. Flakron Alidema, është publikuar në revistën prestigjioze ndërkombëtare Pharmacoepidemiology.

Ky studim vëzhgues retrospektiv ka analizuar të dhënat e 4.668 pacientëve të trajtuar me aspirinë 100 mg në kujdesin parësor shëndetësor. Gjetjet kryesore të hulumtimit tregojnë se përdorimi potencialisht i papërshtatshëm i aspirinës është dukshëm më i lartë në parandalimin parësor kardiovaskular (52,3%) krahasuar me atë dytësor (1,8%).

Kontributi i veçantë i këtij punimi të profesorëve të UBT-së qëndron në vlerësimin e përbashkët të indikacionit mjekësor, profilit të rrezikut për gjakderdhje dhe barnave shoqëruese, në raport me ndërprerjen e dokumentuar të terapisë. Sipas analizës, historia e gjakderdhjes gastrointestinale rezultoi të jetë faktori kryesor i lidhur me ndërprerjen e trajtimit me aspirinë, duke nxjerrë në pah nevojën për rivlerësim individual të raportit përfitim–rrezik te secili pacient.

Revista Pharmacoepidemiology, e botuar nga MDPI, renditet në kuartilin Q2 sipas SCImago 2025 në kategorinë e farmakologjisë dhe toksikologjisë, indeksohet në platformat e njohura Scopus dhe Web of Science (ESCI), dhe ka faktor ndikimi 1,6 sipas Clarivate.

Continue Reading

Të kërkuara