Zëdhënësi për punë të jashtme i Bashkimit Evropian, Peter Stano, deklaroi dje se Kosova ende nuk e ka dorëzuar një raport të plotë hetimi në lidhje me sulmin e 24 shtatorit, në Banjskë.

“Në lidhje me hetimin (për Banjskën): Fillimisht, hetimi duhet të bëhet nga autoritetet kosovare. Nëse po i referoheni incidentit në Banjskë, të 24 shtatorit, kjo është diçka që ka ndodhur në territorin e Kosovës dhe autoritetet kosovare janë përgjegjëse për hetimin dhe ofrimin e një raporti të plotë hetimi. Kjo nuk ka ndodhur ende, kështu që nuk mund të vazhdojmë pa pasur rezultatet e hetimit”, ka thënë Stano.

Lidhur me këtë, ambasadori i Kosovës në Belgjikë, Agron Bajrami, ka bërë një kronologji të informatave të cilat thotë ai që Kosova ia ka dërguar BE-së pas asaj që ndodhi me 24 shtator.

Sipas tij, Kosova ka dërguar jo një, po disa raporte.

Ai thotë se Ambasada e Kosovës në Bruksel zyrtarisht ka informuar BE-në dhe shtetet anëtare për sulmin në Banjskë, nëpërmjet disa dokumenteve. Ai ka renditur të gjitha procedurat që ka ndërrmarrë Kosova menjëherë pas sulmit.

Më 24 shtator, ditën e sulmit, Bajrami thotë se janë dërguar informacione urgjente për sulm terrorist. Dokumenti kishte dy faqe.

Dy ditë më vonë, më 26 shtator, është dërguar dokumenti prej 12 faqesh me informacion fillestar.

Më 28 shtator është dërguar dokumenti 10 faqor me informacione faktike, teksa më 9 tetor është dërguar kopje fizike e gjetjeve preliminare, dokument ky prej 46 faqesh, që i është dorëzuar delegacionit të EEAS-it.

Më 18 tetor, Bajrami thotë se gjetjet u janë dërguar të gjitha shteteve anëtare të BE-së dhe NATO-s.

“Më 20 tetor, raporti preliminar (51 faqe) iu dërgua BE-së, NATO-s dhe të gjitha shteteve të tyre anëtare. Gjatë dhjetorit 2023 dhe gjatë periudhës janar-shkurt 2024, u ndanë versionet e përditësuara të raportit. Informacionet e përfshira në këto dokumente janë faktike, të vërtetuara dhe bindëse përtej dyshimit të arsyeshëm” shkroi Bajrami në profilin e tij në “X”.

Eduard Pujol Bonell, Grupi “Bashkë për Kataluninë” (Junts), i cili e prezantoi dje pikën për njohjen e Kosovës në Parlamentin e Spanjës, para deputetëve ka deklaruar se duhet të tregohet pjekuri në këtë aspekt. Ai para deputetëve theksoi se Kosova duhet të njihet, sepse është shtet demokratik dhe sovran.

“Junts propozon që Qeveria spanjolle të njohë Republikën e Kosovës si shtet të pavarur. Por ne po pyesim edhe se kush prej ju është pro njohjes së Kosovës. Ne kërkojmë nga ju të tregoni pjekuri dhe maturi në këtë çështje dhe të zbatoni bindjet demokratike tuajat”.

Deputeti Bonell ka thënë se “shteti i spanjoll duhet ta njohë Kosovën, sepse Kosova është shtet legal dhe demokratik që e shpalli pavarësinë e vet. Drejtësia nuk duhet të jetë një mjet pazari. Ku është Palestina? Palestina është primare e Kosova në rend të dytë? A po flasim për këtë drejtësi?”.

Ndërsa, deputetja socialiste nga partia e kryeministrit Sanchez, Obdulia Tbaoadela Alvarez, ka thënë se pozicioni i Qeverisë së Spanjës sa i përket pavarësisë së Kosovës është i njohur dhe s’ka ndryshuar.

“Pozicioni është publik dhe i njohur. Spanja mbanë pozicionin e saj mosnjohjes për Kosovën”, ka thënë ajo në Parlamentin e Spanjës.

Ajo ka thënë se ndonëse vazhdojnë të mos e njohin Kosovën, Spanja angazhohet për një zgjidhje në mes të Kosovës dhe Serbisë përmes dialogut të lehtësuar nga BE-ja.

Shtetet e Bashkuara pritet të njoftojnë të martën një paketë të re ndihme ushtarake për Ukrainën prej 150 milionë dollarësh. Lajmi u konfirmua për Zërin e Amerikës nga dy zyrtarë amerikanë që folën në kushte anonimiteti.

Ndihma e re Kievit jepet si pjesë e kompetencave që gëzon presidenti për të ofruar ndihmë urgjente ushtarake një vendi tjetër në rast krizash.

Një nga zyrtarët tha se ndihma e re do të përfshinte municione për sistemet e raketave ‘HIMARS’ si dhe municione të tjera të rëndësishme. I njëjti zyrtar tha se paketa nuk përfshinte bomba thërrmuese.

I pyetur nëse pjesë e paketës do ishin edhe raketat me rreze të gjatë veprimi të njohura si ‘ATACMS’, zyrtari amerikan tha se “për arsye sigurie, nuk do të hynte në detaje të mëtejshme”.

Raketat taktike ‘ATACMS’ mund të godasin deri në 300 kilometra distancë, rreth dyfishi i distancës së raketave që ka Ukraina.

I pyetur nga Zëri i Amerikës më 12 qershor nëse Shtetet e Bashkuara i kishin dhënë Ukrainës të tjera raketa taktike ‘ATACMS’ që nga mesi i muajit mars, Shefi i Shefave të Shtabit të Bashkuar, gjenerali Charles Q. Brown tha se “Uashingtoni po vazhdon t’i ofrojë ato përmes autoritetit që gëzon presidenti për t’i dhënë ndihmë ushtarake një vendi tjetër në rast krizash”.

Rusia ka akuzuar Ukrainën për përdorimin e disa prej raketave taktike të këtij lloji të ofruara nga SHBA-ja gjatë sulmeve të kryera këtë javë brenda rajonit të Krimesë, të cilin Rusia e aneksoi në mënyrë të paligjshme në vitin 2014, si dhje ndaj rajonit rus të Belgorodit, që shtrihet në kufi me Ukrainën.

Të hënën Rusia thirri ambasadorin amerikan në Moskë për të protestuar mbi përdorimin e këtyre raketave./VOA/

Në Bruksel sot zhvillohet takimi në mes kryeministrit të Kosovës, Albin Kurti dhe presidentit të Serbisë, Aleksandar Vuçiq. Kurti tha dje se ka konfirmuar pjesëmarrjen për të parë se në çfarë gjendje ndodhet Kosova në kuadër të dialogut me Serbinë. Ai ka theksuar se marrëveshja bazike e 27 shkurtit të vitit të kaluar me pjesën integrale, aneksin e zbatimit nga Oher i 18 marsit e bënë normalizimin e raporteve ndërmjet të Kosovës dhe Serbisë, me njohje de-fakto.

Sipas tij, takimi i bilateral e trelateral do të jetë në funksion të rekapitullimit të procesit të dialogut dhe të shihet se cilat janë idetë e ecjes përpara.

“E kam konfirmuar pjesëmarrjen time. Nuk ka pasur takim të nivelit të lartë që nga shtatori vitit të kaluar dhe në këtë qershor janë bërë tre vjet të dialogut të nivelit të lartë që marr pjesë si kryeministër. Besoj se përveç tjerash takimi i nesërm edhe bilateral edhe trelateral do të jetë në funksion të rekapitullimit të këtij procesi tre vjeçar, të shohim se në çfarë gjendje ndodhemi dhe cilat janë ide se si duhet të mund të ecim përpara. Marrëveshja bazike e 27 shkurtit të vitit të kaluar me pjesën integrale aneksin e zbatimit nga Ohër i 18 marsit e bënë normalizimin e raporteve ndërmjet të Kosovës dhe Serbisë, me njohje de-fakto, së paku de-fakto në qendër. Kjo është zgjidhja më e evropiane e fqinjësisë së mirë e cila nuk është realizuar deri më sot, për shkak se para se të kemi edhe zbatim të marrëveshjes, kemi pasur shkelje sistematike të saj që ka kulmuar me letrën e ish kryeministres Bërnabiq, ku Serbia u tërhoq nga marrëveshja bazike dhe prej aty na vinë gjitha problemet, pra nga mosrespektimi, nga shkelja e marrëveshjes bazike”, ka deklaruar Kurti.

Kreu i ekzekutivit ka nënvizuar se dje janë bërë nëntë muaj prej që është vrarë rreshteri policor, Afrim Bunjaku, dhe siç tha ai nëntë muaj prej që “kryekrimineli i paramilitarëve terrorist, Milan Radjoçiq ndodhet në liri”. Ai shtoi se vazhdimisht ka pasur eskalime e deeskalime e që të gjitha këto e kanë adresën në Beograd.

“Dje janë bërë nëntë muaj prej që është vrarë rreshteri policor, Afrim Bunjaku, që d.m.th se janë bërë nëntë muaj që kryekrimineli i paramilitarëve terrorist, Milan Radjoçiq ndodhet në liri. Ndërkaq nesër do të bëhen një vit prej se janë liruar tre policet të cilët u patën rrëmbyer në afërsi të kufirit me Serbinë, por gjithsesi në territorin e Kosovës, pasi që u mbajtën peng për 12 ditë. Kemi pasur vazhdimisht tensione nganjëherë edhe eskalime, që të gjitha e kanë adresën, sepse përgjegjësinë e fajësinë e ka Beogradi zyrtar”, tha Kurti.