Gjatë një bisede me investitorët e kompanisë Meta, drejtori ekzekutiv Mark Zuckerberg tha se “beson që njerëzit që nuk do të kenë syze me inteligjencë artificiale do të jenë në një disavantazh në të ardhmen”.

“Vazhdoj të mendoj se syzet do të jenë forma ideale për AI-në, sepse mund të lejoni që inteligjenca artificiale të shohë dhe të dëgjojë të njëjtat gjëra si ju, dhe të komunikojë me ju,” theksoi Zuckerberg.

“Shtimi i një ekrani në syze do t’i bëjë ato edhe më të vlefshme, qoftë përmes një fushe pamjeje holografike si ajo e syzeve AR të gjeneratës së ardhshme ‘Orion’ nga Meta, apo përmes një ekrani më të vogël që mund të përdoret në syzet e zakonshme me AI,” shtoi ai.

“Mendoj se në të ardhmen, nëse nuk keni syze që përmbajnë inteligjencë artificiale, apo ndonjë mënyrë për të ndërvepruar me të, ndoshta do të mbeteni dukshëm prapa në aspektin kognitiv krahasuar me njerëzit e tjerë,” përfundoi drejtori i Metës.

Meta është përqendruar në zhvillimin e syzeve të zgjuara dhe në këtë drejtim ka bashkëpunuar me kompani si Ray-Ban dhe Oakley.

Këto syze u mundësojnë përdoruesve të dëgjojnë muzikë, të bëjnë fotografi ose video dhe të bëjnë pyetje për Meta AI-në, përfshirë pyetje mbi ato që shohin.

Këto pajisje janë kthyer në një sukses të papritur për kompaninë, pasi të ardhurat nga shitja e syzeve Ray-Ban Meta janë më shumë se trefishuar krahasuar me vitin e kaluar.

TikTok tani do t’i njoftojë prindërit kur fëmija i tyre poston një video publike, si pjesë e mjeteve të reja të sigurisë të lansuara këtë javë.

Vetëm disa ditë pasi Mbretëria e Bashkuar prezantoi rregulla të reja gjithëpërfshirëse të sigurisë në internet, TikTok njoftoi më shumë mbrojtje për përdoruesit e rinj, shkruan skynews. Një veçori e re njofton prindërit kur fëmija i tyre bën një postim publik.

Prindërit gjithashtu mund të njoftohen kur fëmija i tyre raporton një video, megjithëse nuk do të jenë në gjendje ta shohin përmbajtjen e raportuar.

Bëhet e ditur se TikTok ka pasur opsione kontrolli prindëror për llogaritë e adoleshentëve për më shumë se pesë vjet, dhe aplikacione tjera si Instagram gjithashtu kanë mundësinë që prindërit dhe fëmijët të lidhin llogaritë e tyre.

Australia njoftoi të mërkurën se do të përfshijë YouTube në ndalimin për përdoruesit nën 16 vjeç, duke ndryshuar vendimin e mëparshëm që e kishte përjashtuar platformën nga kjo masë.

Kjo masë vjen pas një studimi që tregoi se 37% e të miturve hasën përmbajtje të dëmshme në YouTube, më shumë se në platformat e tjera sociale.

Kryeministri Anthony Albanese theksoi se vendimi është për të mbrojtur mirëqenien e fëmijëve australianë.

YouTube argumenton se është një platformë video dhe jo rrjet social, pasi kryesisht ofron përmbajtje të lirë dhe me cilësi.

Megjithatë, qeveria kërkon që të gjitha platformat të marrin masa për të mbrojtur të rinjtë nga përmbajtjet e papërshtatshme.

Ndalimi pritet të hyjë në fuqi në dhjetor dhe do të lejojë vetëm prindërit dhe mësuesit të përdorin platformën për fëmijët nën 16 vjeç.

Për herë të parë në historinë e saj 130-vjeçare, Skoda është renditur si marka e tretë më e shitur e veturave në Evropë. Gjatë gjashtë muajve të parë të 2025, dërgesat në këtë kontinent arritën në 409,100 njësi, që paraqet rritje prej 10.5 për qind krahasuar me të njëjtën periudhë të vitit të kaluar.

Prodhuesi çek e ka vendosur si synim të forcojë pozicionin e tij në mesin e tri markave kryesore në Evropë deri në fund të dekadës.

Me rritjen e shitjeve në gjysmën e parë të këtij viti, Skoda tejkaloi rezultatin e vitit të kaluar, kur ishte në vendin e katërt. Më 2022 ishte në vendin e dhjetë, ndërsa në 2023 u rendit e shtata në listën e markave më të shitura në Evropë.

Skoda ka bërë përmirësim të vazhdueshëm dhe këtë vit është ngjitur në vendin e tretë, pas Volkswagen dhe Toyota, duke lënë pas marka si BMW dhe Renault. Tregu më i madh i kompanisë është Gjermania, ku janë dorëzuar 100,700 vetura.

Skoda Octavia mbetet modeli më i shitur me mbi 80,000 njësi të dorëzuara. Veturat elektrike të Skodas po vazhdojnë të jenë shumë të pëlqyera, veçanërisht modelet Enyaq dhe Elroq.

Kompania ka dorëzuar 72,000 vetura elektrike dhe 21,400 modele hibride me rrymë (plug-in) në Evropë. Ato përbëjnë 22.8 për qind të shitjeve totale –rritje krahasuar me 9.4 për qind sa ishte vitin e kaluar.