Unioni Demokristian (CDU) i qendrës së djathtë dhe udhëheqësi i saj Friedrich Merz ishin fituesit e mëdhenj të zgjedhjeve federale gjermane të dielën me 28% të votave, konfirmuan rezultatet e përkohshme.

Ndërkohë, Alternativa për Gjermaninë (AfD) ishte e dyta me 20%, duke dyfishuar pjesën e saj të votave nga zgjedhjet e fundit në Gjermani në vitin 2021.

Këto rezultuan të ishin rezultati më i mirë për një parti të ekstremit të djathtë në vend që nga Lufta e Dytë Botërore, shkruajnë mediat e huaja, përcjell Telegrafi.

Dhe Alice Weidel dhe Tino Chrupalla, liderë të AfD-së, janë deklaruar për shtypin në Berlin.

E pyetur nëse ishte kontaktuar nga Elon Musk pas rezultatit të fortë zgjedhor të AfD-së, ajo tha: “Sot në mëngjes, kur ndeza telefonin, pashë se kisha marrë telefonata dhe mesazhe nga SHBA, përfshirë edhe nga Elon Musk me urime personale”.

”… Ne jemi fuqia në Gjermani që njihet ndërkombëtarisht. Ne jemi në kontakt me të gjitha palët dhe kjo përfshin administratën e (Donald) Trump”.

Chrupalla më pas hyri për të shtuar i emocionuar se edhe ai kishte marrë një numër të madh mesazhesh urimi, duke përfshirë “dy lojtarë të kombëtares gjermane, dy ish-lojtarë të Bayern Munichut”.

Kush saktësisht, nuk tha ai, por tani me siguri mediat në Gjermani do të jenë në kërkim për identifikimin e tyre.

Masat ndëshkuese të Bashkimit Evropian nuk e kanë detyruar Qeverinë e Kosovës të ndryshojë kursin e saj, por kanë pasur ndikim në mirëqenien e qytetarëve. Pa një konsensus të qartë brenda BE-së se kur mund të hiqen, pasiguria vazhdon të formësojë situatën.

Njëzet muaj pas ngrirjes së fondeve për Kosovën dhe pezullimit të vizitave të nivelit të lartë, Bashkimi Evropian vazhdon të refuzojë heqjen e këtyre masave, pavarësisht kërkesave të vazhdueshme të Prishtinës, por edhe të Parlamentit Evropian.

Në një përgjigje dhënë Radios Evropa e Lirë, një zëdhënës i bllokut tha se “masat e përkohshme të BE-së janë të kthyeshme dhe Këshilli tashmë ka vendosur kushte për heqjen graduale të tyre, të cilat lidhen me marrjen e hapave nga Kosova për uljen e tensioneve në veri”.

Klisman Kadiu, nga Zyra e zëvendëskryeministrit të parë të Kosovës, Besnik Bislimi, nuk iu përgjigj pyetjes së Radios Evropa e Lirë nëse Qeveria e vendit ka ndonjë sinjal se kur do të hiqen masat e BE-së. Ngjashëm, nuk u përgjigj as sa llogaritet të jenë humbjet nga to.

BE-ja e ndëshkoi Kosovën në qershor të vitit 2023, për shkak të, siç vlerësoi, rolit të kryeministrit Albin Kurti në nxitjen e tensioneve etnike në veri të vendit – zonë e banuar me shumicë serbe.

Në disa raste, ai i cilësoi si të padrejta masat e BE-së, duke thënë se nuk mund të bëjë kompromise me sundimin e ligjit dhe kushtetutshmërinë e vendit.

BE-ja nuk bëri të ditur se cilat projekte konkretisht janë prekur nga pezullimi i fondeve për Kosovën. Por, burime të Radios Evropa e Lirë morën vesh se ato variojnë nga kultura deri tek infrastruktura dhe se vlera e tyre arrin deri në 100 milionë euro.

Fisnik Osmani, kryeshef ekzekutiv i Ngrohtores së Qytetit të Prishtinës “Termokos”, konfirmon se një projekt i ndërmarrjes për dyfishimin e kapaciteteve të ngrohjes në kryeqytet, është pezulluar, për shkak të ngrirjes së një granti prej 17.6 milionë eurosh nga Bashkimi Evropian.

Këto mjete, thotë ai, ishin pjesë e programit IPA, që u ofron asistencë financiare dhe teknike vendeve që synojnë BE-në, por që në rastin e Kosovës është bllokuar.

“Sanksionet e BE-së e kanë dëmtuar në masë të madhe zhvillimin ekonomik të Kosovës. Në këtë rast, fatkeqësisht, është dëmtuar edhe Ngrohtorja e Qytetit, e rrjedhimisht edhe qyteti i Prishtinës dhe qytetarët e tij”, thotë Osmani për programin Expose të Radios Evropa e Lirë.

Presidentja e Kosovës, Vjosa Osmani, uroi udhëheqësin e CDU-së në Gjermani, Friedrich Merz, dhe atë të CSU-së, Markus Soeder, për fitoren në zgjedhjet federale të 23 shkurtit.

“Vendet tona ndajnë një histori të gjatë të marrëdhënieve të shkëlqyera dhe mezi pres t’i thellojmë lidhjet tona të ngushta në vitet në vazhdim”, shkroi Osmani në platformën X.

Aleanca CDU/CSU i fitoi zgjedhjet me 28.5 për qind të votave.

Udhëheqësi i saj, Merz, pritet të nisë tani bisedimet për të zgjedhur partnerin e koalicionit.

Ai e ka përjashtuar mundësinë e bashkëpunimit me partinë e ekstremit të djathtë, Alternativa për Gjermaninë, e cila doli e dyta në zgjedhje.

Tre vjet më parë, Merz është takuar me kryeministrin e Kosovës, Albin Kurti, në margjina të Konferencës së Sigurisë në Munih.

Temë e atij takimi ishin integrimet evropiane dhe Ballkani Perëndimor, sipas një njoftimi të atëhershëm të Kryeministrisë së Kosovës.

Gjermania është ndër mbështetëset kryesore të Kosovës në Bashkimin Evropian.

Me mbi 260 ushtarë aktualisht, ajo është pjesë e misionit paqeruajtës të NATO-s në Kosovë, që nga përfundimi i luftës më 1999.

Gjermania, po ashtu, është ndër vendet e para që ka njohur pavarësinë e Kosovës në vitin 2008.

Në këtë vend jeton edhe pjesa më e madhe e diasporës së Kosovës./REL/

Faik Rexhepi, një figurë e njohur dhe simbol i qëndresës kundër regjimit të Sllobodan Millosheviqit, ka ndërruar jetë. Lajmin e bëri të ditur aktivisti i njohur i të drejtave të njeriut, Belgzim Kamberi, i cili njoftoi gjithashtu se varrimi i Faik Rexhepit do të bëhet nesër, më 25 shkurt 2025, në varrezat e qytetit në Dragodan, Prishtinë, në orën 15:00.

Faik Rexhepi ishte një burim frymëzimi për shumë njerëz, sidomos për guximin dhe qëndrimin e tij gjatë periudhës më të vështirë të okupimit. Në gusht të vitit 1990, Rexhepi, në atë kohë punonjës i ndërmarrjes “Feronikeli” në Drenas, së bashku me kolegët e tij, organizoi një protestë për të pritur një delegacion të Kongresit amerikan. Protesta, e cila ishte një akt i madh i rezistencës paqësore, u ndërpre ashpër nga policia serbe, e cila tentoi të shpërndante turmën me forcë.

Ndërkohë, Faik Rexhepi nuk u lëkund dhe qëndroi i palëkundur, duke u ulur këmbëkryq midis turmës, një veprim që simbolizonte qëndrimin e tij të palëkundur ndaj shtypjes dhe padrejtësisë. Ky moment mbeti në kujtesën kolektive, dhe disa vjet më vonë, në atë vend u vendos një monument në nderim të tij, i cili mban emrin “Burri që s’luajti vendit!”, si një përkujtim i veprës dhe guximit të tij.

Vdekja e Faik Rexhepit lë një boshllëk të madh në zemrat e atyre që e njohën si një njeri të guximshëm dhe simbol të luftës për liri dhe të drejta. Ai do të mbahet mend gjithmonë për kontributin e tij të pazëvendësueshëm në luftën kundër dhunës dhe padrejtësisë.

Në përkujtim të veprës dhe trashëgimisë së tij, kryetari i Këshillit Nacional të Shqiptarëve (KNSH), Enkel Rexhepi, ka shkruar:
“Fotografia e tij, ulur mes kaosit, me qetësinë e një njeriu që sfidon dhunën me dinjitet, ishte dhe do të mbetet përgjithmonë një dëshmi e guximit dhe e shpirtit të pathyeshëm të popullit tonë. Pusho në paqe, baca Faik!”

Po ashtu, kryetarja e Komunës së Preshevës, Ardita Sinani, ka shkruar në postimin e saj:
“Sot i japim lamtumirën Faik Rexhepit, njeriut që me një akt të thjeshtë, por të madh, u bë pjesë e historisë sonë të qëndresës. Në gusht të vitit 1990, në mes të dhunës shtypëse serbe, ai nuk u tërhoq. Kur të gjithë u shpërndanë, ai qëndroi, i ulur dhe i palëkundur, duke u bërë simbol i vendosmërisë shqiptare. Sot, Prishtina e kujton me një monument përballë Hotelit ‘Grand’, si një shenjë nderimi për guximin e tij. Presheva, Bujanoci dhe Medvegja kanë dhënë shumë për lirinë e Kosovës dhe mbeten në zemrën e çdo shqiptari.
Pusho në paqe, Faik Rexhepi! Emri yt do të mbetet përjetë në kujtesën tonë!”

Me këto mesazhe, shumë qytetarë dhe institucione kanë nderuar dhe kujtuar guximin e Faik Rexhepit, duke e cilësuar atë si një hero të pashoq dhe një simbol të qëndresës shqiptare./UBTNews/