Sport

​Në prag të startit të Superligës, Plepolli: Dominojnë Drita e Ballkani, Prishtina jashtë garës për titull

Sezonin e kaluar kampion i Superligës u shpall Ballkanin.

Published

4 years ago

on

Të shtunën pasdite Superliga e Kosovës do të startojë me edicionin e ri garues 2022/23.

Dhjetë skuadra të elitës së futbollit kosovar do të hyjnë në këtë garë me qëllimin për t’i arritur objektivat e tyre, derisa pritet që të zhvillohet një kampionat edhe më cilësor se ai i vitit të kaluar për shkak të përforcimit të shumicës së klubeve.

Analisti, Arsim Plepolli thotë se pjesëmarrja e katër skuadrave në garat evropiane ka bërë që cilësia e kampionatit tonë të rritet dukshëm dhe kjo detyrimisht do të sjellë edhe një garë më të fortë ndërmjet klubeve.

“Po sigurisht pres të jetë një kampionat më interesant se tjerët, duke marrë parasysh se këtë vit kemi pasur katër skuadra që kanë marrë pjesë në garat evropiane dhe këto ekipe e dinë të gjithë që janë përforcuar, sidomos për këto gara. Kanë marrë lojtarë cilësorë, kanë marrë lojtarë ku kanë çaluar më shumë. Kur marrim parasysh në përgjithësi kampionatin, mendoj që po të jetë një kampionat shumë i vështirë për të gjitha ekipet sepse do të thoja anashkaloje këtu Dritën dhe Ballkanin, mendoj që ekipet tjera do të jenë të nivelit të barabartë sepse e kemi parë edhe më herët që nuk ka pasur për shembull kur ka luajtur vendi i parë me vendin e parafundit niveli ka qenë dhe nuanca shumë të vogla e kanë përcaktuar fituesin, lojtarët individual më shumë e kanë përcaktuar atë fitues”, tha Plepolli.

Edhe në këtë edicion, Plepolli thotë se Superliga e Kosovës do të dominohet nga Drita dhe Ballkani, teksa Prishtinën e Ismet Munishit e përjashton nga lufta për titullin kampion.

“Prapë mendoj që ligën tonë do ta dominojnë këto ekipet që kanë dalur në Evropë, duke e përfshirë ndoshta pak edhe Prishtinën. Në çoftë se Prishtina fillon t’i kryejë të gjitha obligimet dhe në çoftë se iu qëndron lojtarëve gati, atëherë mendoj që edhe Prishtina mund të futet në garë ndër katër apo pesë ekipet më të mira, por për titull kampion, është mendimi im personal, nuk e shoh sepse Drita dhe Ballkani janë shumë të forta. E dimë që kanë bërë shumë përforcime por edhe financiarisht kanë marrë fonde nga UEFA dhe FIFA, plus nga ky transferi, kështu që ata janë edhe financiarisht, edhe me kuadro të lojtarëve, janë shumë më të mirë”, theksoi më tutje Plepolli.

Trepça ’89 dhe Ferizaj janë klubet që e kanë freskuar Superligën në këtë edicion, por, sipas Plepollit, të dy këto skuadra do të kenë vështirësi par ta siguruar mbijetesën.

“Do të jetë shumë vështirë. Është evidente që këto ekipe do të luftojnë deri në fund, por në futboll gjithmonë ka befasi, nuk dihet asnjëherë. Varet gjithçka se ku janë përforcuar, ku kanë parë se kanë çaluar, si e kanë kryer fazën përgatitore, çfarë mendojnë tutje. Sepse ka ekip që nuk dëshiron të dal në Evropë por dëshiron të jetë në mes të tabelës dhe gradualisht të ngritet sepse nuk ka financa të paguajë lojtarë cilësorë për ta ndjekur titullin. Këto ekipe që i përmende si Dukagjini, është përforcuar, Ferizaj me një kryesi të re, me një trajner shumë të mirë që e aktivizoi në ligë, mandej e kemi Malishevën që është pak më e zymtë, nuk dihet se çfarë po bëhet, ende nuk kemi dika risi, e kemi një Drenicë që deri dje e ka pasur merkaton e mbyllur, këto ekipe që kanë probleme do të luftojnë për mbijetesë”, shtoi Plepolli.

Mungesa e tifozëve në stadiume është një dukuri që po i përcjellë klubet e Superligës së Kosovës dhe kjo sipas Plepollit po ndodhë për shkak se po mungon loja tërheqëse. Sipas tij, stadiumet nuk mbushen me anë të thirrjeve të ndryshme nga ana e trajnerëve të klubeve, por me lojë kualitative.

“Për t’i sjellë tifozët nuk duhet të flasësh hiç, tifozin e sjellë fusha brenda, loja. Në çoftë se ju luani mirë, jep kënaqësi publikut, medeomos ai do të vijë t’iu shikojë, tifozi i zemrës. E tani që i bëjnë këto analizat mediatike, dikush që di ta menaxhojë këtë sistem, është tjetër gjë, por atëherë mbushet stadioni, një lojë ose dy por për të pasur vazhdimësi, duhet aplikuar lojë të mirë. Unë i pari, kur të më jep kënaqësi një ekip që luan mirë, unë patjetër do të shkojë ta shikojë sepse ai të jep adrenalinë, e sheh si po funksionon, e sheh sa mirë po luan, të jep shpresë për të ardhmen, e sheh që po e ndjekë titullin, shikuesi do të vijë patjetër”, tha Plepolli në fund.

Sezonin e kaluar kampion i Superligës u shpall Ballkanin.

Related Topics:
Continue Reading

Sport

Java e spektaklit në Champions League, PSG–Barcelona dhe Bayern–Arsenal në qendër të vëmendjes

Published

9 minutes ago

on

October 20, 2026

By

Liga e Kampionëve rikthehet këtë javë me përballje të mëdha, ku vëmendja kryesore do të jetë te dueli mes Paris Saint-Germainit dhe Barcelonës, si dhe sfida mes Bayern Munichut dhe Arsenalit.

Barcelona po kalon një formë të jashtëzakonshme, duke regjistruar 11 fitore në po aq ndeshje këtë edicion dhe duke realizuar plot 48 gola. Skuadra katalanase, e udhëhequr në sulm nga Lamine Yamal dhe Raphinha, synon të vazhdojë serinë pozitive edhe ndaj PSG-së.

Nga ana tjetër, parisienët vijnë pas gjashtë fitoreve radhazi dhe kanë treguar efikasitet të lartë në sulm. Përballja e së martës pritet të jetë një test i rëndësishëm për të dy skuadrat, që konsiderohen ndër favoritet kryesore për trofeun evropian.

Sipas agjencisë së lajmeve Associated Press, kjo javë pritet të jetë një provë e rëndësishme për Barcelonën, e cila synon të dëshmojë se është rikthyer në mesin e skuadrave më të fuqishme të Evropës.

Një tjetër duel i madh zhvillohet të mërkurën në Munih, ku Bayerni pret Arsenalin. Gjermanët mbështeten te forma e shkëlqyer e Harry Kanet dhe fuqia sulmuese, ndërsa londinezët synojnë të ruajnë mbrojtjen e tyre solide, pasi ende nuk kanë pësuar gol në këtë edicion të Championsit.

Ndërkohë, Aston Villa synon të vazhdojë ecurinë pozitive përballë Vikingut, ndërsa Manchester City mund ta pushojë sulmuesin Erling Haaland në ndeshjen ndaj AEK-ut, pas shqetësimeve fizike.

Në anën tjetër, skuadrat italiane kërkojnë rezultate pozitive pas një fillimi të dobët në garën evropiane. Interi, Napoli, Roma dhe Como do të luajnë para tifozëve të tyre, me synimin për të përmirësuar pozitat në renditje.

Xhiroja e tretë e Ligës së Kampionëve premton spektakël, me përballje që mund të ndikojnë ndjeshëm në garën për kreun e tabelës.

D.L

Continue Reading

Sport

Muriq në qendër të kritikave pas humbjes së Sassuolos

Published

30 minutes ago

on

October 20, 2026

By

Portieri i Përfaqësueses së Kosovës, Arijanet Muriq, është vënë në qendër të kritikave pas humbjes së Sassuolos me rezultat 4:2 ndaj Frosinones.

Paraqitja e portierit 27-vjeçar ka nxitur reagime në mediat italiane, të cilat kanë kritikuar edhe trajnerin Alberto Aquilani për vendimin që ta mbajë Muriqin titullar, pavarësisht gabimeve në ndeshjet e mëparshme.

Mediumi lokal “SassuoloNews” e ka cilësuar besimin e vazhdueshëm të trajnerit te portieri kosovar si një nga vendimet e gabuara, duke theksuar se gabimet e tij ndikuan drejtpërdrejt në rezultatin e ndeshjes.

Muriq pati një mbrëmje të vështirë, duke u përfshirë në disa nga aksionet që përfunduan me gola për kundërshtarët. Sulmuesi Antonio Raimondo përfitoi nga gabimet në mbrojtje dhe realizoi tre gola.

Pavarësisht kritikave, trajneri Aquilani i doli në mbrojtje portierit kosovar, duke deklaruar se vazhdon të ketë besim të plotë tek ai dhe se një gabim nuk është arsye e mjaftueshme për ta larguar nga formacioni titullar.

Muriq është përballur me kritika edhe gjatë karrierës së tij në klube të ndryshme evropiane. Megjithatë, ai vazhdon të mbetet zgjedhja kryesore në portën e Përfaqësueses së Kosovës, ku krahas gabimeve ka regjistruar edhe paraqitje të rëndësishme.

D.L

Continue Reading

Sport

Tottenhami shënon fitoren e parë në Premier League

Published

35 minutes ago

on

October 20, 2026

By

Tottenhami ka regjistruar fitoren e parë këtë edicion në Premier League, duke mposhtur Coventryn me rezultat 3:1.

Pas një fillimi të vështirë të sezonit, me tri barazime dhe tri humbje, skuadra londineze arriti të sigurojë tri pikët e para të fitores të hënën mbrëma.

James Maddison, Omar Marmoush dhe Ben Davies realizuan golat për vendasit, ndërsa Jack Rudoni shënoi golin e vetëm për mysafirët.

Me këtë fitore, Tottenhami ngjitet në pozitën e 16-të në tabelë me gjashtë pikë, ndërsa Coventry renditet një pozitë më poshtë me pesë pikë.

Ndërkohë, Sunderlandi i mesfushorit kosovar Granit Xhaka zbret në vendin e fundit të tabelës me katër pikë.

D.L

Continue Reading

Sport

Sigal Prishtina triumfon në fund dramatik ndaj Bashkimit

Published

1 day ago

on

October 19, 2026

By

Sigal Prishtina ka regjistruar një fitore të rëndësishme në Superligën e Kosovës në basketboll, duke mposhtur Bashkimin me rezultat të ngushtë 79:77, në ndeshjen e zhvilluar të dielën mbrëma në Pallatin e Rinisë, pa praninë e shikuesve.

Përballja e fundit e xhiros së pestë solli rivalitet dhe emocione deri në sekondat e fundit. Bashkimi, që vinte pas gjashtë fitoreve radhazi dhe konsiderohej favorit, hasi në rezistencën e fortë të prishtinasve, të cilët luftuan deri në fund për ta siguruar fitoren.

Minuta e fundit nisi me epërsinë 78:77 të Prishtinës. Pas disa tentimeve të pasuksesshme nga të dyja skuadrat, Malcolm Armstead realizoi një gjuajtje të lirë, duke çuar rezultatin në 79:77. Bashkimi pati mundësinë e fundit për ta përmbysur rezultatin, por Shanon Shorter nuk arriti të shënonte nga distanca për tri pikë.

Më i dalluari te Prishtina ishte Vincent Golson me 30 pikë dhe gjashtë asistime, ndërsa Bryson Dawkins kontribuoi me 14 pikë e tetë kërcime. Kontribut të rëndësishëm dhanë edhe Daniel Hankins Sanford, Malcolm Armstead dhe Edmond Azemi.

Në anën tjetër, Shanon Shorter ishte më efikasi te Bashkimi me 19 pikë, ndërsa Adrio Bailey dhe Lejson Zeqiri realizuan nga 15 pikë secili.

Pavarësisht humbjes, Bashkimi mbetet lider i tabelës me nëntë pikë, ndërsa Sigal Prishtina regjistron fitoren e tretë të sezonit, duke pasur bilanc prej tri fitoreve dhe dy humbjeve, njëjtë si Golden Eagle Ylli, Trepça dhe Bora.

D.L

Continue Reading

Të kërkuara