

Lajmet
Mbi 60% e gastronomëve të vaksinuar, presin masat e reja
Published
4 years agoon
By
Betim GashiQeveria e Kosovës mbajti mbledhje paraditen e së mërkurës, por asgjë nuk u diskutua rreth masave të reja të cilat janë paralajmëruar. Ndër masa, u përmenden zgjatja e orarit të punës për lokalet e gastronomisë e klubet e natës, si dhe kufizime për qytetarët e pavaksinuar. Hyrja në këto lokale nga 20 gushti u paralajmërua se do të jetë i mundur vetëm me librezën që dëshmon se qytetari të paktën ka marrë dozën e parë të vaksinës anti-COVID. Infektologët shpresojnë që të njëjtat masa të funksionojnë, pasi aktualisht në klubet e natës ka shumë njerëz dhe pa distancë.
Siç bëhet e ditur, identifikimi i qytetarëve të vaksinuar pritet të bëhet edhe përmes QR Code. Këto masa janë mirëpritur nga Oda e Hotelerisë dhe Turizmit dhe Shoqata e Gastronomëve të Kosovës, të cilët premtojnë se po bëjnë të pamundurën nga ana e tyre që masat kurdo që ato zyrtarizohen të respektohen dhe të parandalojnë një mbyllje të serishme të ekonomisë.
Me hyrjen në fuqi të këtyre masave të paralajmëruara, klubeve të natës do t’u mundësohet operimi përtej orës 23:00, më saktë deri në orën 03:00 pas mesnate, ndërsa zgjatje të orarit të punës do të ketë edhe për lokalet e gastronomisë.
Visar Demolli, drejtor ekzekutiv në Odën e Hotelerisë dhe Turizmit, tregon se është paraparë edhe vaksinimi i tërësishëm i stafit të cilët punojnë në sektorin e gastronomisë. Ai thotë se këto masa janë përkrahur edhe nga vet ata, me qëllimin e vetëm që të shmanget një tjetër mbyllje.
“Gastronomë, hotelierë, kamerierë, banakierë, kuzhinierë, shefa, duhet të kenë të paktën dozën e parë të vaksinës. Është shumë e lehtë dhe kemi bërë apel. Jemi duke bërë një fushatë vetëdijesimi që duhet t’i kenë ato për shkak të shëndetit dhe për shkak të mundësisë së rimbylljes të serishme në shtator apo tetor. E dyta, është edhe për klientët, për mysafirët të cilët i frekuentojnë restorantet, baret, diskotekat, klubet e natës me një fjalë edhe salla dasmash nga data 20 gusht duhet ta kenë edhe ata të paktën dozën e parë të vaksinimit që të hyjnë në këto ambiente. E treta është që jemi dakorduar që për klube nate ta zgjatim orarin nga ora 23:00 deri në orën 03:00 pas mesnate”, u shpreh Demolli.
Deri më tash, Demolli potencon se janë mbi 60 përqind e stafit të sektorit të gastronomisë të vaksinuar, derisa thekson se një rimbyllje e sërishme do të ishte fatale për ta.
“Mbi 63 përqind e stafit është vaksinuar … po shpresojmë që shumë shpejt do të kryhen dozat e para, se kemi dalë edhe vet në vizita dhe jemi duke bërë një vetëdijesim se pse duhet të bëhet vaksinimi. Shkurt, qëllimi ynë është që të mos ketë më një vendim të rimbylljes së sërishme se ajo do të ishte fatale për ne, ishim mbështetur për muri se nuk kishim mundur t’ia dalim”, thekson ai.
Këto masa janë mirëpritur edhe nga Shoqata e Gastronomëve të Kosovës, ku përfaqësuesi nga kjo shoqatë Arian Vranica, potencon se janë pajtuar që vetëm vaksinimi mund të eliminojë opsionin e mbylljes pas rritjes së rasteve të reja me COVID-19.
Sa i përket verifikimit të qytetarëve të vaksinuar që frekuentojnë lokalet e gastronomisë, Vranica thotë se secili lokal duhet ta caktojë një përgjegjës që do të kryejë këtë verifikim.
“Kanë qenë disa variante të ndryshme të masave të cilat mund të aplikoheshin dhe duke dashur të evitojmë një mbyllje eventuale ne jemi pajtuar se vaksinimi është e vetmja zgjidhje, në mënyrë që të dalim nga kjo gjendje me pasoja sa më të lehta si për shëndetin publik, si për shëndetin ekonomik. Ndoshta nuk ka qenë më e lehta si lloj kompromisi që të bëhet në raport me këto masa, sepse kemi një kohë relativisht të shkurtër për të mundësuar operimin e të gjithë sektorit të gastronomisë dhe të pajisjes së tyre me vaksina… Ka qenë një masë e cila ndër të gjitha variantet ka qenë varianti më i mirë dhe më i përshtatshëm për funksionimin e ekonomisë në përgjithësi”, thotë Vranica.
Duke qenë se ditëve të fundit është rritur numri i rasteve të reja me COVID-19, e sidomos shtimi i rasteve me variantin Delta, marrja e këtyre masave sipas infektologut Ilir Tolaj është e vetmja zgjidhje që të frenohet infektimi i popullatës. Ai tërheq vëmendjen se nuk ka distancë në klube nate si dhe duhet të shmanget qëndrimi për kohë të gjatë në një ambient të mbyllur i shumë njerëzve njëkohësisht.
“Çfarë kishin mundur të bëjnë autoritetet në këtë rast për pengimin e përhapjes masive të variantit Delta ndoshta që të kufizohej në vendet ku po grumbullohen me mijëra njerëz për kohë të gjatë në ambiente të mbyllura siç janë klubet e natës, të cilat edhe me gjasë janë vendi kryesor ku tash po përhapen këto infeksione. Në anën tjetër gjithashtu të kufizojnë edhe numrin në lokale, në kafiteri ku po shihet që nuk ka asnjë lloj kufizimi as të distancës. Në qoftë se këto pak veprime do të bëheshin atëherë mendoj që rrjedhimisht do ta ngadalësonin përhapjen e variantit delta dhe do t’i jepte kohë vaksinimit që ta bëjë punën e vet”, potencon Tolaj.
Të martën në Kosovë janë shënuar 562 raste të reja me COVID-19 dhe janë shënuar edhe dy raste të vdekjes.
Lajmet
Ja se si ndikon orari i mëngjesit në shëndetin tuaj
Published
38 minutes agoon
September 26, 2025By
UBT News
Shpesh thuhet se mëngjesi është vakti më i rëndësishëm i ditës dhe studimi i ri në Massachusetts, ka sugjeruar të njëjtën gjë.
Sipas studimit, koha kur konsumohet ushqimi i mëngjesit ka shumë rëndësi dhe ndikon në shëndet e jetëgjatësi, thuhet në uebfaqen e kuzhinieres së famshme, Martha Stewart.
Ky studim ka analizuar lidhjen mes orarit të vakteve dhe shëndetit tek të moshuarit, ku studiuesit kanë ndjekur për më shumë se 20 vjet 2,945 persona të moshës 42 deri 94 vjeç në Britani, duke analizuar edhe mostrat e gjakut.
Ata vunë re se me kalimin e viteve, të moshuarit fillonin të hanin më vonë mëngjesin dhe darkën, ndërkohë që ngushtonin orarin e përgjithshëm të ushqimit gjatë ditës.
Mëngjesi i vonuar dhe rreziqet për shëndetin
Studimi tregoi se ngrënia e mëngjesit më vonë lidhej rregullisht me probleme shëndetësore fizike dhe mendore, si depresioni, lodhja dhe problemet me shëndetin oral. Gjithashtu, u vu re se oraret e vona të ushqimit lidhen me vështirësi në përgatitjen e vakteve, gjumë më të dobët dhe, më së shumti, me rrezik më të lartë të vdekshmërisë gjatë periudhës së studimit.
Edhe pasi studiuesit morën parasysh faktorët e moshës, ata zbuluan se koha e mëngjesit të vonuar ishte e lidhur me rrezik më të lartë të sëmundjeve të shumta dhe mortalitetit.
“Studimi ofron informacionin që ka munguar mbi mënyrën si ndryshon koha e ushqimit në jetën e mëvonshme dhe se si ky ndryshim ndikon në shëndet dhe jetëgjatësi. Ne gjetëm se oraret e vona të vakteve, veçanërisht mëngjesi i vonuar, lidhen me sfida shëndetësore dhe rritje të vdekshmërisë tek të moshuarit”, ka thënë Hassan Dashti, shkencëtar e biolog në spitalin e Massachusetts.
Pse ka rëndësi koha e ushqimit?
Tradicionalisht, hulumtimet mbi ushqyerjen janë përqendruar tek ajo që hamë, por ky studim nxjerr në pah rëndësinë e shkencës që studion kohën e vakteve, si faktor i mundshëm për të parandaluar probleme shëndetësore.
“Studimi ynë sugjeron se ndryshimet në kohën kur të moshuarit hanë, veçanërisht mëngjesin, mund të shërbejnë si tregues i thjeshtë për gjendjen e tyre të përgjithshme shëndetësore”, ka shpjeguar Dashti.
Ai ka shtuar se inkurajimi i të moshuarve për të pasur orare të qëndrueshme vaktesh mund të bëhet pjesë e strategjive më të gjera për të nxitur plakje të shëndetshme dhe jetë më të gjatë./S.K/EO/
Lajmet
Rohde jep lamtumirën: Do të vazhdojmë të jemi partner i madh i Kosovës
Published
1 hour agoon
September 26, 2025By
UBTnews
Ambasadori gjerman, Jorn Rohde, i cili po e përfundon misionin e tij në Kosovë, ka ndarë një video lamtumirëse në të cilën ka folur për përvojën e tij gjatë qëndrimit pesë vjeçar këtu. Ai ka theksuar se Gjermania do të mbetet partner i madh i Kosovës.
“Koha ime në Kosovë së shpejti do të përfundojë. Pas pesë vitesh këtu, duhet të them lamtumirë, dhe do të më mungojë Kosova. Jo vetëm moti, por edhe mirësjellja e njerëzve, shëtitjet, kur shikoj majtas drejt Parkut të Gërmisë ku shpesh përdor biçikletën malore, këto gjëra do të më mungojnë para se të kthehem në Berlin. Ka qenë një kohë e mrekullueshme këtu”, ka thënë Rohde.
Ai ka përmendur edhe pasardhësin e tij, Rainder Rudolph, të cilit ka thënë se po ia “pason topin”.
“Kemi parë shumë zhvillime – liberalizimi i vizave në vitin 2024 ishte një arritje e madhe. Ka edhe gjëra që nuk janë realizuar, si anëtarësimi i Kosovës në Këshillin e Evropës. Lidhjet mes vendeve tona janë unike – 600.000 kosovarë ose gjermanë me prejardhje kosovare jetojnë në Gjermani. Ky numër po rritet, dhe jam i sigurt që lidhjet tona do të vazhdojnë të rriten. Ne do të jemi një partner i madh i Kosovës. Ne kemi qenë një partner i madh që nga pavarësia. Dhe në këtë kuadër, do të doja t’ju kërkoja të shtrini mirësjelljen dhe miqësinë tuaj edhe ndaj pasardhësit tim, Rainer Rudolph, i cili do të mbërrijë këtu së shpejti. Dhe, duke qëndruar në gjuhën e futbollit, së shpejti do t’ia pasoj topin pasardhësit tim, Rainer Rudolph”, theksoi Rohde./D.B/KP
Lajmet
Ish-lojtari i Arsenalit ndërron jetë në moshën 21 vjeçare
Published
1 hour agoon
September 26, 2025By
UBT News
Futbollisti i Chichester City dhe ish-lojtari i akademisë së Arsenalit, Billy Vigar, ka ndërruar jetë në moshën 21-vjeçare pas një lëndimi të rëndë në tru të pësuar gjatë një ndeshjeje kundër Wingate & Finchley.
Sulmuesi u përplas jashtë fushës në përpjekje për ta shpëtuar topin, duke pësuar dëmtime serioze.
Ai u vendos në koma të induktuar dhe iu nënshtrua një operacioni, por nuk arriti të mbijetojë.
Klubi i Chichester City, Arsenal dhe bota e futbollit kanë shprehur ngushëllimet për humbjen e tij, ndërsa ndeshja e radhës e Chichesterit është shtyrë në shenjë respekti./S.K/KP/
Lajmet
Policia e Kosovës shkatërron mbi 760 armë ilegale
Published
1 hour agoon
September 26, 2025By
UBTnews
Policia e Kosovës ka organizuar sot ceremoninë e shkatërrimit të armëve të vogla dhe të lehta ilegale, mbi 760 sosh, në fshatin Prelez të Ferizajt. Pas shkatërrimit, nga materiali i armëve që shkrihen do të krijohen kapak të pusetave.
Drejtori i Përgjithshëm i Policisë së Kosovës, Gazmend Hoxha tha se procesi i shkatërrimit të armëve bëhet me qëllim për të ofruar sa më shumë siguri për qytetarët. Hoxha potencoi se nuk janë të rralla rastet ku armët ilegale janë përdorur gjatë rasteve kriminale.
Ai u bëri thirrje qytetarëve të Kosovës që të përdorin sa më pak armët. Hoxha bëri të ditur se nga viti 1999 deri më tani, janë konfiskuar mbi 36 mijë armë ilegale.
Ndërkaq, nga viti 2005 deri tani janë shkatërruar rreth 16 mijë armë të gjata dhe të shkurta.
“Është një proces i vazhdueshëm që Policia e Kosovës, Ministria e Punëve të Brendshme, në mbështetje të vazhdueshme te UNDP-së, por edhe vendeve partnere mike të Kosovës po vazhdoj me shkatërrimin e armëve të vogla dhe të mesme me qëllim që të krijohet sa më shumë siguri për qytetarët dhe vendin tonë…Gjatë këtyre viteve nuk kemi pasur jo pak raste kur armët ilegale janë përdorur gjatë rasteve dhe veprave kriminale. Shumë jetë janë humbur për shkak të përdorimit të armëve ilegale. Iu bëjmë thirrje gjithë qytetarëve tonë që të qëndrojnë larg armëve ilegale…Policia e Kosovës që nga viti ‘99 e deri më sot ka konfiskuar rreth 36 mijë e 36 armë. Përafërsisht i bie rreth 1 mijë e 100 armë që janë konfiskuar çdo ditë. Që nga viti 2005 e deri më sot ka shkatërruar 15 mijë e 904 armë të shkurtra dhe të gjata”, tha Hoxha.
Përfaqësues i Përhershëm i UNDP-së në Kosovë, Nuno Queiros tha se qëllimi i shkatërrimit të armëve është promovimi i një shoqërie paqësore, të drejtë dhe gjithëpërfshirëse.
Ai potencoi se armët e vogla dhe të lehta të paligjshme shkaktojnë pasiguri, dëmtojnë civilët, minojnë institucionet dhe shpesh përdoren në dhunë bazuar në gjini dhe dhunë në familje.
“Qëllimi ynë është të promovojmë shoqëri paqësore, të drejta dhe gjithëpërfshirëse, dhe kjo kërkon një reduktim të konsiderueshëm të flukseve të paligjshme të armëve në të ardhmen tonë…Vetëm gjatë kohës që kemi qenë këtu, janë kryer dy akte dhune me armë, pa llogaritur luftërat dhe situata të tjera. Kjo tregon se armët e vogla dhe të lehta të paligjshme shkaktojnë pasiguri, dëmtojnë civilët, minojnë institucionet dhe shpesh përdoren në dhunë bazuar në gjini dhe dhunë në familje. Policia, Ministria e Punëve të Brendshme dhe autoritetet e tjera relevante kanë treguar një angazhim të jashtëzakonshëm për të luftuar trafikun e paligjshëm, posedimin dhe keqpërdorimin e armëve. Por mund të jeni të sigurt se ne, si UNDP, dhe ekipi im i pranishëm sot, do të vazhdojmë t’ju mbështesim dhe jemi shumë krenarë që jemi partneri juaj i besuar në këto përpjekje”, tha Queiros.
Ky aktivitet mbështetet nga Programi i Kombeve të Bashkuara për Zhvillim (UNDP) përmes Programit për Siguri dhe Siguri në Kosovë (KSSP), me mbështetje financiare nga Gjermania, Suedia, Mbretëria e Bashkuar, Franca, Holanda dhe Norvegjia, si dhe përmes Vendimit të Këshillit (PESK) 2024/3006 të datës 2 dhjetor 2024, në mbështetje të aktiviteteve të çarmatimit dhe kontrollit të armëve të SEESAC në Evropën Juglindore, me qëllim zvogëlimin e kërcënimit nga armët e vogla dhe armët e lehta (SALW) të paligjshme dhe municionit të tyre./D.B/KP

18 nga librat më të mirë të vitit sipas gazetarëve të BBC

Ylli amerikan Luke Combs tregon se si e bëri Britaninë të dashurohej me muzikën country

Filmi për oficerin indian që kapi dy herë një vrasës famëkeq, tani edhe në Netflix

Ky gabim në larje mund t’i bëjë rrobat tuaja të mbajnë erë të lagësht

Ja se si ndikon orari i mëngjesit në shëndetin tuaj

Rohde jep lamtumirën: Do të vazhdojmë të jemi partner i madh i Kosovës

Ish-lojtari i Arsenalit ndërron jetë në moshën 21 vjeçare

Policia e Kosovës shkatërron mbi 760 armë ilegale

Gazmend Hoxha: Dronë të dyshuar nga Serbia kanë fluturuar në veri të Kosovës, Policia në koordinim me KFOR-in
Të kërkuara
-
Aktualitet1 month ago
Profesori i UBT-së, Bahri Gashi, pjesë e rrjetit prestigjioz ndërkombëtar të recensimit shkencor në Taylor & Francis
-
Aktualitet2 months ago
BSc në Shëndet Publik dhe Shkenca Mjekësore në UBT – Investim për të ardhmen e shëndetit të popullatës
-
Kërkime3 months ago
Profesori i UBT-së, Musa Sabedini, publikon punim shkencor në revistën ndërkombëtare JGPSCD në SHBA
-
Lajmet nga UBT3 months ago
UBT shpall konkurs për pranimin e studentëve të rinj për vitin akademik 2025/26