Federata e Futbollit e Kosovës, së bashku me sponsorin e Superligës, Albi Mall, ka ndarë çmimin “Ylli i Javës” për javën e gjashtëmbëdhjetë të sezonit. Fitues është shpallur futbollisti i FC Malisheva, Arlind Veliu, i cili pati një paraqitje shumë të fortë në ndeshjen kundër Drenicës.

Edhe pse mbrojtës, Veliu shënoi dy gola dhe ishte lojtari kyç në fitoren 2:0 të Malishevës. Vlerësimi u bë nga Komisioni i Veteranëve të Futbollit.

Pas marrjes së çmimit, Veliu u shpreh i lumtur për vlerësimin dhe tha se skuadra po përmirësohet me trajnerin e ri. Ai theksoi se objektivi kryesor mbetet renditja në tri vendet e para dhe dalja në garat evropiane.

“Gëzohem që kam mundur ta ndihmoj ekipin me dy gola dhe falënderoj bashkëlojtarët për angazhimin”, tha Veliu për faqen zyrtare të FFK-së./S.K/KP/

Bashkimi Evropian ka miratuar sot qëndrimin e tij për dy akte të rëndësishme ligjore që ndryshojnë mënyrën se si trajtohen kërkesat për azil brenda bllokut. Në një komunikatë zyrtare, Këshilli Evropian njoftoi se Kosova, së bashku me shtatë vende të tjera, është futur zyrtarisht në listën e “vendeve të sigurta të origjinës”.

Sipas Këshillit, këto rregulla të reja synojnë të krijojnë procedura më të shpejta dhe më efikase për personat që vlerësohet se nuk kanë të drejtë për mbrojtje ndërkombëtare në BE.

“Sot, Këshilli ka miratuar qëndrimin e tij mbi dy aktet ligjore të BE-së, të cilat do të forcojnë zbatimin praktik të koncepteve kryesore mbi vendet e sigurta në rregullat e azilit të BE-së. Këto ligjie të reja për migracionin synojnë të vendosin procedura më të shpejta dhe më efektive të azilit për ata që nuk duhet të marrin mbrojtje brenda BE-së” thuhet në komunikatë.

Çfarë nënkupton lista e re?

Përfshirja e Kosovës në listën e vendeve të sigurta nënkupton se aplikimet për azil nga qytetarët kosovarë do të trajtohen më shpejt dhe, në shumicën e rasteve, pritet të përfundojnë me refuzim. Kjo për shkak se BE vlerëson se Kosova garanton mbrojtje të mjaftueshme kundër persekutimit dhe shkeljeve të rënda të të drejtave themelore.

Megjithatë, autoritetet evropiane theksojnë se asnjë kërkesë nuk refuzohet automatikisht. Çdo rast individual mbetet i hapur për shqyrtim, nëse aplikanti paraqet rrethana specifike që justifikojnë nevojën për mbrojtje.

Për herë të parë, BE ka hartuar një listë të unifikuar të vendeve të sigurta të origjinës. Përveç Kosovës, në këtë listë janë përfshirë edhe: Bangladeshi, Kolumbia, Egjipti, India, Maroku, Tunizia

Kësisoj, kërkesat për azil nga qytetarët e këtyre vendeve do t’i nënshtrohen procedurave të përshpejtuara, që shpesh pritet të çojnë në refuzim ose në transferim të shqyrtimit në një “vend të tretë të sigurt”.

Rregullorja e re zgjeron përdorimin e konceptit të “vendit të sigurt të tretë”, i cili u mundëson shteteve anëtare të refuzojnë kërkesat për azil nëse aplikanti ka mundur të kërkojë mbrojtje në një vend tjetër të sigurt jashtë BE-së para se të mbërrinte në territorin evropian. Po ashtu, rregullorja hap rrugën që disa kërkesa të shqyrtohen drejtpërdrejt në vende të treta të sigurta.

Me këtë vendim, BE synon të reduktojë numrin e kërkesave të pabazuara, të rrisë efikasitetin e procedurave dhe të ketë një qasje më të unifikuar ndaj migracionit./UBTNews

Trajneri i Real Madridit, Xabi Alonso, i bëri thirrje ekipit të tij të rikuperohet shpejt pas një humbjeje të dhimbshme nga Celta Vigo, kur ata përballen me Manchester Cityn në Ligën e Kampionëve.

“Los Blancos” kanë fituar vetëm dy nga shtatë ndeshjet e tyre të fundit në të gjitha garat dhe u mposhtën 2-0 në shtëpi nga Celta në La Liga, duke i lënë katër pikë prapa liderëve Barcelonës.

Madridi e mbylli ndeshjen me nëntë lojtarë pas kartonëve të kuq për Fran Garcian dhe Alvaro Carrerasin, përpara përballjes me Cityn e Pep Guardiolës në Evropë të mërkurën .

“Jemi të gjithë të zemëruar, me sa duket kjo nuk ishte ndeshja që donim, nuk ishte rezultati që donim. Duhet të përpiqemi ta kthejmë faqen sa më shpejt të jetë e mundur. Janë vetëm tre pikë. Kemi ndeshjen e Ligës së Kampionëve kundër Cityt për të reaguar dhe për të hequr këtë shije të keqe nga goja jonë, “u tha Alonso gazetarëve në Bernabeu.

Skuadra e Alonsos ka pasur probleme me formën në javët e fundit, duke çuar në spekulime për të ardhmen e tij në klub në mediat spanjolle.

I pyetur nëse po luante për të ardhmen e tij kundër Cityt, Alonso këmbënguli se në lojë ishin vetëm pikët.

“Po luajmë për tre pikë në Ligën e Kampionëve, në një garë ku jemi në një pozicion të mirë, dhe për këtë po luajmë “, përfundoi Alonso./S.K/KP/

Neymar do t’i nënshtrohet një operacioni në gju pasi luajti me dhimbje për të ndihmuar Santosin të shmangë rënien nga kategoria me një fitore 3-0 ndaj Cruzeiros të dielën.

Kjo ka ngritur më shumë dyshime rreth shanseve të anësorit për të luajtur në Kupën e Botës të vitit të ardhshëm.

33-vjeçari u rikthye te klubi i fëmijërisë, Santos, në janar, pas një periudhe në Arabinë Saudite dhe pati një ndikim vendimtar në mbijetesën e ekipit të tij në ligën e parë braziliane, duke shënuar pesë gola në katër ndeshjet e fundit.

“Erdha për këtë, për të ndihmuar sa më mirë që mundem. Këto kanë qenë javë të vështira për mua”, u tha gazetarëve Neymar, i cili luajti vetëm në 20 nga 38 ndeshjet e tyre në ligë.

“I falënderoj ata që ishin me mua për të më ngritur në këmbë. Po të mos ishin ata, nuk do t’i kisha luajtur këto ndeshje për shkak të këtyre lëndimeve, këtij problemi me gjurin. Më duhet të pushoj dhe pastaj do të bëjmë këtë operacion në gju.”

Ai nuk dha detaje mbi operacionin ose një afat kohor për shërimin e tij të pritur dhe nuk është paraqitur për Brazilin prej dy vitesh për shkak të një sërë lëndimesh.

Në tetor, trajneri i ekipit kombëtar, Carlo Ancelotti, tha se sulmuesi duhet të rifitojë formën e plotë fizike nëse do të rikthehet në skuadër për Kupën e Botës që do të zhvillohet nga 11 qershori deri më 19 korrik në Kanada, Meksikë dhe Shtetet e Bashkuara./S.K/KP/