Sport

Gjonbalaj: Problemet në Kombëtare nuk zgjidhen me trajnerin e ri, duhet strategji zhvillimore

Gjonbalaj thotë se ka pasur zhvillime pozitive brenda Kombëtares së Kosovës, por që në vitin e fundit pati ngecje dhe rezultate negative.

Published

5 years ago

January 6, 2022

Betim Gashi

Ish-futbollisti i njohur, Malsor Gjonbalaj ka kërkuar nga Federata e Futbollit të Kosovës që të bëjë kujdes në përzgjedhjen e trajnerit të ri të Kombëtares. Sipas tij, përzgjedhësi i ri duhet të ketë njohuri për mentalitetin e skuadrës si dhe të kontribuojë në zhvillimin e një strategjie që do të çonte përpara futbollin e Kosovës.

Gjonbalaj thotë se ka pasur zhvillime pozitive brenda Kombëtares së Kosovës, por që në vitin e fundit pati ngecje dhe rezultate negative, që sollën edhe shkarkimin e trajnerit.

“Nuk i kisha ndarë paraqitjet e Kombëtares vetëm në këtë vit sepse ajo ka qenë një vazhdimësi, një periudhë e vazhdueshme prej konsolidimit të saj. Unë mendoj që ka pasur shumë zhvillime pozitive, por që së fundmi, sidomos vitin e fundit ose periudhën e fundit kishte ngecje, kishte disa probleme të cilat rezultuan edhe me largimin e trajnerit të Kosovës. Mbetet një punë e madhe për t’u bërë kryesisht në përzgjedhjen e trajnerit i cili duhet të jetë për mendimin tim një profil që e njeh mirë mentalitetin tonë dhe e cili do të kalojë më shumë kohë në Kosovë në kuptimin që ta analizojë më mirë Ligën e Kosovës, futbollin e Kosovës dhe në këtë aspekt të kontribuojë me idetë e tij në zhvillimin e një strategjie përparimtare për futbollin e Kosovës në përgjithësi”, tha fillimisht Gjonbalaj.

Gjonbalaj bën thirrje që drejtuesit e FFK-së nuk duhet të përjashtojnë emrat e trajnerëve vendorë kur të marrin vendimin për trajnerin e ri, por tërhoqi vëmendjen që problemi nuk qëndron vetëm te trajneri.

Sipas tij, Kosova ka nevojë për hartimin e një strategjie zhvillimore afatgjate në mënyrë që pastaj secili trajner që do të jetë në krye të ekipit të ketë një bazë për ta rritur dhe zhvilluar pikërisht atë strategji.

“Ne duhet të luftojmë që të sjellim cilësi në radhë të parë, edhe futbollistë cilësorë edhe trajnerë cilësorë, prandaj në këtë aspekt unë mendoj që duhet të mendohet që të sillet një trajner shumë cilësor i cili do të mund të kontribuonte, por në të njëjtën kohë absolutisht të mos anashkalohen edhe trajnerët kosovarë oshe shqiptarë. Unë mendoj që kemi kualitete edhe të trajnerëve shqiptarë të cilët mund të udhëheqin, por nuk mendoj se është ky problemi i zgjedhjes së një trajneri. Mendoj që problemi është, ose në fakt si do të duhet të përparohej futbolli i Kosovës dhe të eliminohet ky problem është në krijimin e një strategjie zhvillimore e cila do të ishte disavjeçare dhe në kuadër të kësaj edhe nëse trajnerët ndryshohen, cilido që vjen do të ketë një bazë strategjike të mirë dhe në skuadër të kësaj do të mund ta plotësonte, qoftë me futbollistë të rinj, qoftë me ide për të zhvilluar futbollin e të rinjve në Kosovë në mënyrë që Kombëtarja të prosperonte”, ka thënë më tutje Gjonbalaj.

Gjonbalaj komentoi edhe shortin e Kosovës në Ligën e Kombeve për të cilin tha se nuk pajtohet aspak me të tjerët që e konsiderojnë si një grup të lehtë sepse skuadra si Greqia dhe Irlanda e Veriut janë kundërshtarë shumë të fortë dhe nevojitet një punë e përbashkët për t’u treguar të suksesshëm në këtë kompeticion.

“I kam parë shumë komente të cila thonë që grupi nuk është shumë i fortë e kështu me radhë. Unë mendoj që e kanë gabim, Irlanda nuk është skuadër që duhet të nënçmohet, madje as Greqia pavarësisht që kemi luajtur me ta. Prandaj nuk janë ekipe këto të dobëta, duhet punë e madhe në mënyrë që ta kalojmë këtë grup, prandaj nuk e shoh si një grup të lehtë, do të varet shumë nga ana jonë, nga puna jonë si dhe në të njëjtën kohë do të varet shumë se futbollistët tanë që luajnë në klubet evropiane a do ta kenë minutazhën e plotë apo jo, a do të jenë në formë apo jo. Pra janë disa faktorë të cilët ndërlidhen me rezultatet pozitive dhe këtu nëse njëra prej këtyre hallkave dështon, më pas sukseset do të mungojnë”, theksoi Gjonbalaj.

Trajneri Gjonbalaj gjithashtu vlerësoi lartë nivelin e Superligës së Kosovës duke thënë se po zhvillohet një kampionat shumë cilësor, përkundër mungesës së infrastrukturës e cila vazhdon të mos jetë në nivelin e duhur. Ai kërkoi më shumë përgjegjësi nga skuadra që shpallet kampione që ta përfaqësojë sa më denjësisht Kosovën në arenën ndërkombëtare.

Related Topics:kombetarja Malsor Gjonbalaj

Up Next

Covid-19 shpërthen te Manchester City

Don't Miss

Chelsea shumë i fortë për Conten

Sport

Dembele zbulon tre favoritët e tij për Topin e Artë

Published

1 hour ago

September 8, 2026

UBTNews

Ousmane Dembele ka zbuluar tre zgjedhjet e tij kryesore për Topin e Artë, duke përfshirë edhe bashkëlojtarin e tij te Paris Saint-Germaini, Khvicha Kvaratskhelia.

Sulmuesi francez, i cili fitoi Topin e Artë në vitin 2025 pas një sezoni të jashtëzakonshëm me PSG-në, shënoi 35 gola dhe regjistroi 16 asistime në të gjitha garat gjatë sezonit 2024/25.

Përveç trofeut prestigjioz individual, Dembele fitoi edhe disa çmime të tjera, përfshirë atë të “Lojtarit të Sezonit” në Ligue 1 dhe në Ligën e Kampionëve.

Megjithatë, francezi nuk e sheh veten në mesin e favoritëve për ta fituar sërish Topin e Artë. Para publikimit të listës së kandidatëve, Dembele u pyet nga France Football, organizatori i çmimit, për tre lojtarët që ai i konsideron më të mirët.

“Kvara dhe Harry Kane, të cilët patën një sezon shumë, shumë të mirë, dhe mendoj se Kylian Mbappe”, deklaroi Dembele.

29-vjeçari refuzoi të përfshinte veten në listën e tij, duke theksuar se preferon të vlerësojë bashkëlojtarët dhe kundërshtarët e tij.

“Unë? Oh jo, unë kurrë nuk e përfshij veten në çështje të tilla. Nuk votoj fare për veten time. Nëse do të isha unë ai që do të fliste, nuk do të votoja për veten time”, tha ai.

Dembele më pas përmendi edhe disa emra të tjerë që, sipas tij, e meritojnë të jenë në garë për çmimin prestigjioz.

“Ka edhe shumë lojtarë të tjerë. Michael Olise mund të ishte në listë, sepse pati një sezon të mrekullueshëm dhe ishte lojtari më i mirë në ligën gjermane. Po ashtu, Lamine Yamal, Fabian Ruiz dhe Pacho”, shtoi ai.

Në fund, Dembele veçoi bashkëlojtarin e tij te PSG-ja, William Pacho, duke kërkuar që mbrojtësi ekuadorian të mos anashkalohet.

“E harrojmë këtë të fundit, Pacho. Shpresoj të mos e harrojmë këtë vit, sepse e meriton”, përfundoi ylli francez.

D.L

Sport

Gjilani – Ballkani, derbi i xhiros së pestë

Published

1 hour ago

September 8, 2026

UBTNews

Me përballjet Drenica – Prishtina dhe Vushtrria – Llapi nis xhiroja e pestë e Superligës së Kosovës në futboll.

Të dyja ndeshjet zhvillohen të martën, me fillim nga ora 16:00.

Derbi i kësaj xhiroje zhvillohet në Gjilan, ku të mërkurën skuadra e Gjilanit pret Ballkanin në stadiumin me bari sintetik.

Po të mërkurën, Drita do të udhëtojë në Drenas, ku përballet me Feronikelin ’74.

Xhiroja e pestë mbyllet me duelin ndërmjet Dukagjinit dhe Malishevës, i cili zhvillohet të mërkurën nga ora 19:00.

D.L

Sport

Vojvoda luan tërë ndeshjen në humbjen e Udineses ndaj Lazios

Published

2 hours ago

September 8, 2026

UBTNews

Mërgim Vojvoda e ka luajtur tërë ndeshjen për Udinesen, e cila të hënën mbrëma u mposht 2:1 në shtëpi nga Lazio, në kuadër të javës së tretë të Serie A.

Mbrojtësi kosovar ishte titullar dhe e kompletoi ndeshjen në krahun e djathtë të mbrojtjes.

Udinese kaloi në epërsi në minutën e 49-të, por Lazio reagoi në pjesën e dytë dhe përmbysi rezultatin.

Mysafirët e barazuan rezultatin në minutën e 75-të, ndërsa golin e fitores e shënuan në minutën e 88-të për tri pikë të plota.

Pas kësaj fitoreje, Lazio është në kuotën e nëntë pikëve, aq sa kanë edhe Roma dhe Interi.

Ndërkohë, Udinese mbetet me katër pikë pas tri ndeshjeve të zhvilluara.

D.L

Sport

FSHF shmang Serbinë në komunikime, por përgatitet për Evropianin e përbashkët U21

Published

3 hours ago

September 8, 2026

UBTNews

Ndonëse në komunikimet e saj publike përpiqet maksimalisht ta shmangë përmendjen e Serbisë, Federata Shqiptare e Futbollit (FSHF) po vazhdon përgatitjet për Kampionatin Evropian U21, të cilin vitin e ardhshëm do ta organizojë së bashku me Federatën e Futbollit të Serbisë.

Organizimi i përbashkët vjen në një kohë kur Serbia vazhdon të jetë në qendër të kritikave për qëndrimet e saj ndaj Kosovës, ndërsa në skenën sportive nuk kanë munguar rastet e glorifikimit të figurave të dënuara për krime lufte.

Rasti i fundit ishte ai i Ratko Mlladiqit, ish-komandantit të Ushtrisë së Republika Srpskas, i dënuar për krime lufte. Të dielën mbrëma, tifozët e dy klubeve më të mëdha serbe, Cërvena Zvezdës dhe Partizanit, shpalosën koreografi gjigante në nderim të tij. Edhe Cërvena Zvezda e përkujtoi Mlladiqin përmes faqes së saj zyrtare. Për një nderim të ngjashëm, klubi ishte dënuar javën e kaluar nga UEFA.

Megjithatë, këto zhvillime nuk kanë ndikuar në përgatitjet për Kampionatin Evropian U21, i cili në vitin 2027 do të zhvillohet në Shqipëri dhe Serbi. Ndeshjet do të organizohen në Tiranë, Elbasan e Shkodër, si dhe në Beograd, Baçka Topolë, Loznicë e Leskovc.

Shorti i fazës finale të Evropianit do të hidhet më 26 nëntor në Beograd.

Të hënën, përfaqësues të UEFA-s nisën një seri të re inspektimesh në stadiumet ku do të zhvillohen ndeshjet e turneut. Lajmin e bëri të ditur FSHF-ja, por në njoftimin e saj nuk përmendi organizimin e përbashkët me Serbinë.

“Përgatitjet për Kampionatin Evropian U21, që do të zhvillohet në Shqipëri në vitin 2027, po hyjnë në një tjetër fazë të rëndësishme. Përfaqësues të UEFA-s kanë nisur sot turin e inspektimeve në stadiumet që do të presin ndeshjet e këtij kompeticioni. Stacioni i parë është stadiumi ‘Loro Boriçi’ në Shkodër, ndërsa vizitat do të vijojnë në ‘Elbasan Arena’ dhe më pas në Tiranë, në ‘Arena Kombëtare’ dhe ‘Arena e Demave’”, thuhet në njoftimin e FSHF-së.

Shmangia e përmendjes së Serbisë në komunikimet e tilla është një praktikë që FSHF-ja e ka përdorur edhe më herët, pavarësisht se bëhet fjalë për një organizim të përbashkët të një prej ngjarjeve më të rëndësishme të futbollit evropian për grupmoshat.

Në fillim, vendimi për organizimin e Evropianit së bashku me Federatën Serbe të Futbollit u kundërshtua fuqishëm, sidomos nga tifozët shqiptarë në Shqipëri dhe Kosovë. Vendimi shkaktoi reagime të shumta, ndërsa pati kritika të ashpra ndaj FSHF-së për bashkëpunimin me Serbinë. Megjithatë, federata nuk u tërhoq nga projekti dhe vazhdoi përgatitjet për organizimin e përbashkët të Kampionatit Evropian U21.

D.L