

Lajmet
Gjashtë muaj nga vërshimet, qytetarët në veri ende pa kompensim
Disa prej familjeve janë kthyer në shtëpitë e tyre ku po vazhdojnë të jetojnë në kushte jashtëzakonisht të rënda.
Published
2 years agoon
By
Betim GashiEdhe pse kanë kaluar gjashtë muaj prej kur vërshimet ua dëmtuan shtëpitë dhe bizneset, banorët e veriut të Mitrovicës ende po presin kompensim për dëmet.
Disa prej familjeve janë kthyer në shtëpitë e tyre ku po vazhdojnë të jetojnë në kushte jashtëzakonisht të rënda, ndërsa shumë të tjera akoma nuk po mund të kthehen dhe po jetojnë te familjarët në jug të qytetit dhe gjithandej.
Të prekurit e “Lagjes së boshnjakëve”, ku dëmet edhe sot janë të dukshme, thonë se po ballafaqohen me gjendje të rëndë, ndërsa ankohen në institucione për mos interesim total ndaj tyre.
Avni Peci, përfaqësues i “Lagjes së boshnjakëve” në veri të Mitrovicës, njëherësh anëtar i komisionit vlerësues për dëmet nga vërshimet, është njëri prej atyre, shtëpia e të cilit pësoi dëme të mëdha dhe i cili nuk po mund të kthehet ende në shtëpinë e tij. Ai bën të ditur se me njëmbëdhjetë anëtarë të familjes jeton në banesën e dhëndrit në jug të qytetit, i cili këto ditë kthehet nga diaspora për pushime dhe duhet ta lirojë banesën, ndërkohë që thotë se nuk di nga t’ia mbajë.
Sipas tij, janë 67 familje të cilat janë detyruar të shpërngulen nga shtëpitë e tyre për shkak të dëmeve të pësuara dhe të cilat akoma nuk po mund të kthehen. Ai thotë se në mesin e të shpërngulurve ka të sëmurë kronikë, ndërsa potencon se janë drejtuar për ndihmë tek të gjitha institucionet lokale e qendrore, por deri tash nuk kanë marrë ndonjë përgjigje.
Peci thotë se në rast se shqiptarët e veriut janë peng të politikës, të paktën të informohen, në mënyrë që banorët të vendosin nëse duan të vazhdojnë të jetojnë në veri, ose ta braktisin atë pjesë përgjithmonë.
“I kemi 97 shtëpi së bashku me biznese të cilat janë të dëmtuara. Ka prej tyre që janë kthyer nëpër shtëpi, por e kanë gjendjen të mjerueshme… Edhe më e dhimbshme është se ka të shpërngulur në jug, ku tash kemi ardhur në fazën e pushimeve… kanë me ardh familjarët (nga diaspora) dhe ka me ardh në pikëpyetje edhe banimi i tyre tash, atyre duhet me ua liru banesat dhe ku me u sistemu tash…Unë jam 11 anëtarë, me dy vëllezër dhe fëmijët e tyre, si dhe nëna. Jetojmë në jug… në banesën e dhëndrrit…. Ka shtëpi… të cilat janë konstatuar se nuk guxojmë me u kthy sepse shtëpitë kanë ‘fjetë’, janë qarë dhe ka rrezik për anëtarët e familjes… 67 familje i kemi të shpërngulura nga veriu i Mitrovicës, dhe tash nuk po e di a jemi ne peng i një politike të gabuar, apo jemi të shfrytëzuar për një politikë të gabuar si peng. Thjesht këtu janë të dëmtuara të gjitha komunitetet… Është e mjerueshme sepse prej të dëmtuarve kemi njerëz me sëmundje kronike, janë në dializë, me diabet etj… Kemi kontaktuar me pushtetin lokal, Ministrinë e Administrimit dhe Pushtetit Lokal, Agjencinë për Menaxhimin e Emergjencave, veç në Ministrinë e Financave nuk kemi arritur për me i drejtu problemet tona… Në qoftëse ne jemi peng i politikës, të paktën me na informu në mënyrë që ne të vendosim nëse do të vazhdojmë të jetojmë në veri të Mitrovicës dhe me u sakrifiku, apo me gjetë një zgjidhje të dytë”, thotë Peci.
Bajram Kuçi, banor i veriut të Mitrovicës, tha se së bashku me katër anëtarët e familjes jeton në shtëpinë e kushëririt në jug të qytetit, sepse shtëpia e tij ka pësuar dëme të mëdha nga vërshimet dhe nuk është e sigurtë për banim.
Nuk ka mundësi për ta rregulluar vetë shtëpinë, vazhdoi ai, ndërsa tha se ka tentuar ta takojë kryetarin e ri të Mitrovicës Veriore për këtë cështje, por sic tha, ai nuk ka dashur ta takojë.
“Jemi katër anëtarë të familjes, në këtë shtëpi kemi jetuar, por tash pas vërshimeve askund nuk jemi… S’kemi para ta rregulluar shtëpinë… Jam duke jetuar tek një kushëri i imi në jug… Jam interesuar gjithkah, ‘sot’, ‘nesër bëhet’, ‘bëhet’, s’ka asgjë qe gjashtë muaj… Po, kemi provuar me fol (me kryetarin e Komunës), nuk ka dashtë me dalë”, thotë Kuçi.
Edhe banori tjetër i kësaj lagjeje, Halil Hakaj, thotë se ende nuk është kthyer në shtëpinë e tij të dëmtuar, ndërsa shton se nuk ka mundësi vetë ta rregullojë atë.
Duke treguar se është i sëmurë, nuk mund të ecë dhe se është operuar dy herë nga boshti kurrizor, ai ankohet në institucionet, për të cilat thotë se edhe pas gjashtë muajsh nuk ju kanë dalë në ndihmë.
“Po bëhen gjashtë muaj, sendet janë ende në oborr duke u pastruar… Dyert ende nuk i kam montuar, nuk kam të holla, nuk na kanë ndihmuar absolutisht as nga 2 mijë e 500 që kanë thënë komuna, as asgjë. Nuk po di pse po flejnë, nuk po di kujt me ju drejtu. Jam te vëllau duke banuar, vij shpesh herë këtu e ruaj shtëpinë mos po vjedhë dikush ndonjë gjë… Dy herë jam operuar prej kurrizit, s’mundem me lëvizë, nuk mundem me ecë…Ato të holla sado pak që na i premtuan, as ato nuk na i dhanë, kemi mbetur në mëshirën e askujt”, shprehet Hakaj.
Veton Syla, së bashku me bashkëshorten qe gjashtë muaj është duke jetuar te vjehrra në Vushtrri. Ai sqaron se përkundër dëshirës së madhe për t’u kthyer në shtëpinë e tij, një gjë e tillë është e pamundur për shkak të rrezikut nga dëmtimet e mëdha të mureve të cilat janë qarë.
“Për momentin jemi duke jetuar në Vushtrri te vjehrra, sepse shtëpia na është qarë që gjashtë muaj nga vërshimet dhe ende s’kemi pasur ndonjë ndihmë nga askush. Po presim çdo ditë… Dy anëtarë jemi, unë dhe shoqja, por s’kemi siguri këtu sepse shtëpia është qarë aq shumë sa është rrezik këtu me jetu. Prej Vushtrrisë vij këtu nganjëherë me u kujdes për shtëpi sepse po më kushton zemra, por me jetu nuk po guxoj se shtëpia është mjaft e dëmtuar”, tha ai.
Ndërkaq, një familje katër anëtarëshe e komunitetit serb e cila jeton poashtu në “Lagjen e boshnjakëve” në veri të Mitrovicës dhe shtëpia e tyre është prekur nga vërshimet, ka bërë të ditur se është kthyer para një muaji në shtëpi. Siç pretendon zonja e shtëpisë, kjo falë ndihmës që ju ka ofruar komuna paralele e Mitrovicës Veriore, e cila vepron sipas sistemit të Serbisë. Sipas saj, është dashur t’iu dalë në ndihmë edhe Qeveria e Kosovës ose Komuna.
“Jemi katër anëtarë të familjes, unë, bashkëshorti dhe dy fëmijë, ndërsa jemi kthyer në shtëpi para një muaji… Një shtrat e kemi blerë për fillim dhe bashkëshorti diçka po renovon, po lyen.. Akoma nuk kemi përfunduar, për çdo ditë ngapak po punojmë… Kam shkuar te kryetari i ri i komunës, por s’kam mundur ta gjej, nuk ka qenë aty… Ky është tash muaji i shtatë, dhe mendoj se është dashur ndonjë ndihmë të na jap Qeveria e Kosovës ose komuna këtu”, thotë ajo.
Në anën tjetër, i kontaktuar nga KosovaPress, kryetari i Komunës së Mitrovicës së Veriut, Erden Atiq, nuk ka pranuar të flasë për këtë çështje.
“Është temë e ndjeshme dhe nuk mund të deklarohem”, ka thënë shkurt Atiq prapa kamerës.
KosovaPress-i ka dërguar pyetje në adresë të MAPL-së dhe Ministrisë së Financave, për të marrë një sqarim rreth kësaj problematike, mirëpo deri në momentin kur po raportojmë ata nuk kanë kthyer përgjigje.
Ndryshe, vlera e dëmit nga vërshimet e janarit të këtij viti në veri të Mitrovicës, ku janë përfshirë 97 familje së bashku me biznese, llogaritet të ketë qenë mbi 800 mijë euro, ndërsa kompensimi i dëmit nuk është bërë as nga fondi komunal i destinuar për të prekurit, ku në muajin maj ishin ndarë 300 mijë euro.
Aktualitet
Nora Gjakova nis rrugëtimin si trajnere e xhudos
Published
1 hour agoon
August 28, 2025By
UBT News
Federata e Xhudos së Kosovës ka nisur një kapitull të ri me përfshirjen e kampiones olimpike, Nora Gjakova, në rolin e trajnere asistente të ekipit të meshkujve. Ajo tashmë i është bashkuar stafit teknik dhe po punon me plot energji e përkushtim në stërvitjet që po mbahen në Bordeaux të Francës.
Në këtë grumbullim, ekipi i meshkujve po përgatitet intensivisht për garat e rëndësishme që i presin në muajt e ardhshëm. Nën drejtimin e trajnerëve dhe me mbështetjen e Norës, xhudistët Akil Gjakova, Shpati Zekaj, Dardan Cena dhe Anes Veseli po zhvillojnë seanca të forta stërvitore, duke dhënë maksimumin në çdo hap të përgatitjeve.
Përfshirja e Nora Gjakovës në stafin e trajnerëve shihet si një vlerë e madhe për ekipin, duke sjellë përvojën e saj të pasur ndërkombëtare dhe frymën e suksesit që ka shoqëruar karrierën e saj si sportiste.
Kosova shpreson se ky kombinim i përvojës dhe energjisë së re do të sjellë rezultate të reja pozitive për xhudon kosovare në arenën ndërkombëtare.
Bota
Presidenti serb Vuçiq do të jetë pjesëmarrës në paradën ushtarake në Kinë
Published
2 hours agoon
August 28, 2025By
UBT News
Presidenti i Serbisë Aleksandar Vuçiq do të jetë pjesë e paradës ushtarake në Kinë, duke dëshmuar kështu lidhjet e ngushta të Beogradit zyrtar me regjimin komunist në Pekin.
Me ftesë të presidentit kinez Xi Jinping, 26 liderë të huaj do të marrin pjesë në përkujtimet e Ditës së Fitores në Pekin, njoftoi të enjten ndihmës ministri i Jashtëm Hong Lei.
Kina do të organizojë një paradë masive ushtarake më 3 shtator për të përkujtuar 80-vjetorin e fitores ndaj Japonisë dhe përfundimin zyrtar të Luftës së Dytë Botërore.
Në mesin e shumë liderëve që do të marrin pjesë janë edhe lideri rus Vladimir Putin, me të cilin regjimi në Beograd mban lidhje të ngushta, lideri veri-korean Kim Jong-Un dhe përfaqësues nga Vietnami, Laosi Mongolia, Nepali, Kazakistani, Uzbekistani, Irani, Kongo, Zimbabveja, Sllovakia, Kuba etj.
Aktualitet
Gjykata Supreme refuzon ankesën e Korab Mushkolajt për certifikim në zgjedhjet lokale
Published
2 hours agoon
August 28, 2025By
UBT News
Gjykata Supreme e ka hedhur poshtë ankesën e kandidatit të Partisë Demokratike të Kosovës për kryetar të Deçanit, Korab Mushkolaj, paraqitur kundër vendimit të PZAP-së pasi iu refuzua certifikimi për zgjedhjet e 12 tetorit.
“Ankesa është e pa themeltë”, ka vendosur Supremja.
Zyra për Regjistrim, Certifikim dhe Kontrollin Financiar të Subjekteve Politike pas vërtetimit se Mushkolaj është i angazhuar me aktemërim të përhershëm të Ministrisë së Jashtme si zyrtar i lartë, i pati kërkuar PDK-së që ta zëvendësojë atë, por partia pati refuzuar ta bëjë këtë gjë. Zyra më pas ka rekomanduar certifikimin e të gjithë kandidatëve të tjerë të PDK-së, përveç Mushkolajt. PZAP po ashtu ia ka refuzuar ankesën Mushkolajt, siç parashihet me Ligjin për Shërbimin e Jashtëm, i cili nuk lejon kandidimin e një anëtari të shërbimit të jashtëm.
Gjykata Supreme e ka pranuar konstatimin e PZAP-së, teksa ka theksuar se moscertifikimi i Mushkolajt nuk është i kundërligjshëm.
“Prandaj, nga këtu, kjo Gjykatë, konsideron se në rastin konkret juridik, është marrë vendim i drejtë, me të cilin nuk është bërë diskriminim dhe lidhur me rastin konkret nuk është cenuar e drejta zgjedhore dhe ndonjë e drejtë themelore e paraparë me Ligj dhe me Kushtetutën e Republikës së Kosovës, nuk janë shkelur parimet themelore të procesit zgjedhor të parapara shprehimisht me dispozitat e nenit 4 të Ligjit Për Zgjedhjet e Përgjithshme në Republikën e Kosovës dhe me dispozitat përkatëse të Konventës Evropiane të Drejtave të Njeriut”, thuhet në vendim.
Aktualitet
Aktakuzë ndaj një personi për nxitje të përçarjes mes grupeve të ndryshme politike në Klinë
Published
2 hours agoon
August 28, 2025By
UBT News
Prokuroria Speciale e Kosovës ka dorëzuar aktakuzë në Gjykatën Themelore në Prishtinë ndaj K.M për veprën penale “Nxitje e përçarjes dhe mosdurimit”.
Sipas aktakuzës, më 23 janar 2025, në qytetin e Klinës, i pandehuri K.M. ka ndërmarrë veprime që dyshohet se kanë pasur për qëllim nxitjen e urrejtjes, përçarjes dhe mosdurimit mes grupeve me bindje të ndryshme politike.
“Prokuroria Speciale i ka propozuar Gjykatës Themelore në Prishtinë që, pas shqyrtimit gjyqësor, i pandehurit të shpallet fajtorë, dhe ndaj tij të shqiptohet dënim konform ligjeve në fuqi”, thuhet në njoftim.

Nora Gjakova nis rrugëtimin si trajnere e xhudos

Presidenti serb Vuçiq do të jetë pjesëmarrës në paradën ushtarake në Kinë

Gjykata Supreme refuzon ankesën e Korab Mushkolajt për certifikim në zgjedhjet lokale

Aktakuzë ndaj një personi për nxitje të përçarjes mes grupeve të ndryshme politike në Klinë

Gjyqtari Avdullah Mecinaj gjendet pa shenja jete, Policia po e heton rastin

OVL e UÇK-së kërkon shkarkimin e kryetarit të Kuvendit, Dimal Basha

AAK: Adem Hoxha nuk është më pjesë e grupit tonë parlamentar

Lista Serbe do t’i drejtohet Gjykatës Kushtetuese

Presioni mbi Ruben Amorim rritet, Manchester United përgatit plan emergjent për trajnerin
Të kërkuara
-
Lajmet nga UBT3 months ago
UBT organizon debat rreth zgjerimit të BE-së dhe ruajtjes së vlerave evropiane
-
Lajmet nga UBT3 months ago
UBT – Institucioni privat me më së shumti programe të akredituara nga Agjencia e Akreditimit të Kosovës
-
Lajmet nga UBT3 months ago
UBT rilicencohet nga MAShTI për ofrimin e arsimit profesional në katër drejtime të rëndësishme shëndetësore
-
Kërkime2 months ago
Profesori i UBT-së, Musa Sabedini, publikon punim shkencor në revistën ndërkombëtare JGPSCD në SHBA