Lajmet

​Gashi: Pozicionimi i Kurtit është i dëmshëm dhe i rrezikshëm në bisedime me Serbinë

Ai ka komentuar deklarimet e sotme të Albin Kurtit, i cili është shprehur se marrëveshja e cila po negociohet nuk është finale.

Published

3 years ago

on

Shefi i Grupit Parlamentar të LDK-së, Arben Gashi ka thënë se pozicionimi i kryeministrit është i dëmshëm dhe i rrezikshëm në bisedime me Serbinë.

Ai ka komentuar deklarimet e sotme të Albin Kurtit, i cili është shprehur se marrëveshja e cila po negociohet nuk është finale. Gashi në konferencë për media tha se katër faktet e përmendura nga ai, kanë lëvizur në mënyrë drastike boshtin e qëndrimeve institucionale të Kosovës.

“Sot e kemi thirrë në vazhdën e seancës e cila pat zhvillime të paparashikueshme dhe deklarime te jashtëzakonshme nga ana e kryeministrit. I cili deklaroi se marrëveshja e cila po negociohet nuk është marrëveshje finale, nuk është ligjërisht e obligueshme dhe nuk ka garanci ndërkombëtare sa i përket njohjes reciproke. Këto ishin katër fakte për të cilat ne i morëm vesh sot zyrtarisht nga kryeministri i Kosovës. Të cilat e lëvizin në mënyrë drastike boshtin e qëndrimeve politike dhe qëndrimeve institucionale të Kosovës dhe të cilat ne vlerësojmë që e dëmtojnë shumë pozicionin e Republikës së Kosovës në bisedime me Serbinë”, ka thënë Gashi.

Gashi theksoi se do të kërkojnë që të hënën të diskutohet në seancë plenare për këto çështje dhe se për këtë mund të diskutohet edhe me dyer të mbyllura.

“Ne kërkuam dhe propozuam në mënyrë formale pas deklarimeve të kryeministrit që është i gatshëm të diskutojë çështjen në detaje, propozuam që të kemi pikë të rendit të ditës çështje të karakterit urgjent sipas rregullores së punës së kuvendit dhe të diskutojmë lidhur me bisedimet me Serbinë por e çuditshme edhe pse kryeministri e premtoi publikisht qe është i gatshëm të bisedojë, refuzoi duke i kërkuar deputetëve të LVV-së që të votojnë kundër këtij propozimi për të trajtuar këtë çështje, e cila ishte e karakterit urgjent sepse këto katër fakte kanë qenë të paditura për opinionin publik dhe për politikën në Kosovë. Ne jemi insistues që debati të mbahet sa më shpejtë dhe do të kërkojmë përsëri që debati të mbahet ditën e hënë dhe besojmë që në këtë debat do të marrim më shumë informacione…. Do të shohim për çështjen e sensibilitetit a do të jetë me dyer te hapura apo të mbyllura”, u shpreh ai në konferencë për media.

Shefi i deputetëve të LDK-së shtoi se deri më tani kërkesat kanë qenë për njohje reciproke por këtë e ka ndryshuar vet kryeministri Kurti.

“Propozimi që ka qenë në tavolinë deri më tash ka qenë propozim për marrëveshje finale, ligjërisht të obligueshme, me garanci ndërkombëtare, me njohje reciproke. Në momentin kur kryeministri ka filluar të rihap të 33 marrëveshjet e negociuara, prej tyre tri i ka hapur, i ka rinegociuar dje i ka mbyll me të njëjtin proces pa asnjë ndryshimi, ka ndryshuar baza e negocimit dhe mënyra e platformës se Kosovës dhe bashkësisë ndërkombëtare. Dëmi qe i është bërë Kosovës ne këtë rast është nga kryeministri i Kosovës sepse ka kërkuar një proces tjetër dhe të ndryshëm nga ajo që ka qenë në marrëveshje me bashkësinë ndërkombëtare e pranuar nga Serbia”, ka përfunduar ai.

Gashi ka komentuar edhe deklaratën e Kurtit, i cili ka thënë se opozita duhet të deklarohet para Escobarit ashtu siç po shprehet para tij. Ai tha se LDK është deklaruar kudo në takime ndërkombëtare.

Related Topics:
Continue Reading

Lajmet

Maqedonci merr pjesë në Forumin e Sigurisë në Varshavë

Published

28 minutes ago

on

September 29, 2025

By

Ministri në detyrë i Mbrojtjes, Ejup Maqedonci po merr pjesë në Forumin e Sigurisë së Varshavës. Nga ministria kanë bërë të ditur se Maqedonci do të jetë edhe folës në panelin që titullohet me “Të lidhur por të mbrojtur: shtylla digjitale e demokracisë modern”.

“Sesioni i këtij viti është fokusuar në veçanti në sfidat e shumëfishta dhe komplekse të sigurisë me të cilat po përballet kontinenti ynë, duke filluar nga kërcënimet konvencionale tek sulmet kibernetike, disinformimi dhe lufta hibride. Në margjinat e kësaj konference, përveç pjesëmarrjes në sesionet punuese, ministri Maqedonci do të  realizoj edhe takime bilaterale me homologë si dhe përfaqësues të tjerë politik dhe ushtarak të vendeve partnere.  Thellimi i bashkëpunimit ndërmjet aleatëve dhe partnerëve që përfaqësojnë vlerat e njëjta demokratike është thelbësor për frenimin e kërcënimeve që vijnë nga regjimet autokratike”, thuhet në njoftimin e ministrisë./D.B/EO

Continue Reading

Lajmet

Llapi mposht Gjilanin, fitojnë edhe Ballkani e Malisheva

Published

1 hour ago

on

September 29, 2025

By

Llapi ka shijuar fitoren në sezonin e ri në Superligë duke shënuar fitore të thellë 4:1 ndaj Gjilanit.

Me këtë fitore, Llapi shkon në kuotën e gjashtë pikëve, aq sa kanë edhe Prishtina e re dhe Ferizaj në fundin e tabelës. Kurse, Gjilani mbetet me shtatë pikë në vendin e shtatë.

Fitore sot shënoi edhe Ballkani që lehtësisht mposhti Prishtinën e Re 0:3 në ndeshjen që u zhvillua në Lipjan.

Me këtë fitore, Ballkani shkon në kuotën e 15 pikëve, një më pak se Prishtina që prin. Ndërsa, Prishtina e Re bie në vendin e nëntë me gjashtë pikë.

Ndërkohë, ndeshje shumë dramatike u zhvillua në Skënderaj, atje ku Malisheva shënoi fitore 3:4 në sekondat e fundit të ndeshjes.

Tani, Malisheva shkon në 10 pikë në vendin e pestë, kurse Drenica mbetet e katërta me një pikë më shumë./S.K/EO/

Continue Reading

Lajmet

FFK shpall më të mirin e xhiros së shtatë në Superligë

Published

1 hour ago

on

September 29, 2025

By

Federata e Futbollit e Kosovës, ka shpallur futbollistin e KF Llapit, Axel Gnapi, si “Ylli i Javës” për javën e shtatë të sezonit. Gnapi shkëlqeu në fitoren 4:1 të skuadrës së tij kundër SC Gjilanit, duke shënuar dy gola – hapjen dhe mbylljen e serisë së golave.

Vlerësimi për futbollistin më të dalluar të javës u bë nga Komisioni i Veteranëve të Futbollit, i përbërë nga Selajdin Jerliu, Enis Zabërgja dhe Fatmir Mehmeti.

Pas marrjes së çmimit, Gnapi shprehu kënaqësinë e tij:

“Është një ndjenjë e mirë sepse fillimi i sezonit nuk ishte ashtu siç kemi pritur dhe siç kemi merituar. Kjo fitore e parë është një kënaqësi në momentin e duhur për të gjithë ekipin dhe për stafin. Atmosfera në ekip është shumë e mirë dhe çdo lojtar po e mban këtë frymë pozitive. Besoj se do të kemi një sezon shumë të mirë dhe shpresoj të fitoj edhe shpërblime të tjera”, tha ai.

Ky çmim vjen si një motiv shtesë për KF Llapin pas një fillimi të vështirë sezoni, duke rritur shpresat për rezultate pozitive në vazhdim./S.K/KP/

Continue Reading

Lajmet

​Protestë edhe në Shqipëri: Kërkohet drejtësi për ish-krerët e UÇK-së që po gjykohen në Hagë

Published

1 hour ago

on

September 29, 2025

By

Në Shqipëri do të protestohet më 17 tetor me kërkesën për drejtësi për ish-eprorët e Ushtrisë Çlirimtare të Kosovës (UÇK).

Protesta do të mbahet në sheshin “Skënderbeu”, u bë e ditur në një konferencë për media të Organizatës së Veteranëve të Luftës së Ushtrisë Çlirimtare të Kosovës.

Kryetari i OVL-UÇK-së, Hysni Gucati nga Tirana tha se kjo protestë vjen pas asaj të mbajtur në Prishtinë dhe tjetrës në Hagë – qyteti holandez ku e ka selinë Gjykata Speciale.

“Sot nga kjo tryezë ju drejtohemi të gjithë shqiptarëve, partive politike bashkoheni me ne në këtë protestë paqësore në Tiranë. Le të ngrihemi të gjithë si një vend i vetëm që të ju kundërvihemi padrejtësive”, deklaroi ai. /D.B/KP

Continue Reading

Të kërkuara