Dy avionë gjermanë Eurofighter u ngritën të dielën për të ndaluar një avion rus mbi Detin Baltik, pasi Estonia njoftoi se do të thërrasë një mbledhje urgjente të Këshillit të Sigurimit të OKB-së pas shkeljes së hapësirës së saj ajrore nga avionët rusë.

Avioni rus i zbulimit Il-20M kishte fikur transponderët dhe nuk iu përgjigj thirrjeve, sipas forcës ajrore gjermane. Incidenti pasoi shkeljen e hapësirës ajrore të Estonisë nga tre MiG-31 rusë, që u cilësua “provokim i qëllimshëm”.

Ministri i jashtëm estonez, Margus Tsahkna, tha se këto veprime janë pjesë e një modeli të gjerë përshkallëzimi të Rusisë, duke përfshirë edhe Poloninë e Rumaninë. Estonia ka kërkuar konsultime nën nenin 4 të NATO-s, shkruan The Guardian.

Ndërkohë, presidenti amerikan Donald Trump tha se SHBA do të mbronte vendet e BE-së nga agresioni rus, edhe pse tha se nuk ishte informuar plotësisht për incidentin.

Në Poloni, dronë rusë ranë në territorin e saj dhe fragmente u gjetën nga civilë. Ndërkohë, Rusia njoftoi se një sulm me dron ukrainas në Krime vrau dy persona.

Udhëheqës evropianë, përfshirë presidentin çek Petr Pavel dhe presidentin letonez Edgars Rinkēvičs, paralajmëruan për rrezik të madh konflikti dhe bënë thirrje për përgjigje të bashkuar të NATO-s.

Kremlini, nga ana tjetër, akuzoi perëndimin, sidomos Britaninë, se po udhëheq kampin “pro-luftë”. Ukraina mbetet e vendosur për të vazhduar rezistencën, ndërsa Zelensky shprehu gatishmëri për bisedime, por Rusia kushtëzon me dorëzimin e Ukrainës./D.B/KP

Banka Qendrore e Kosovës (BQK) dhe Banka Qendrore Evropiane (BQE) nënshkruajnë Marrëveshje Bashkëpunimi në fushën e luftimit të falsifikimit të kartëmonedhave euro, duke forcuar më tej përkushtimin institucional për ruajtjen e integritetit të parasë së gatshme euro në qarkullim dhe sigurimin e stabilitetit financiar të vendit.

Marrëveshja është nënshkruar nga Guvernatori i BQK-së, Ahmet Ismaili dhe presidentja e BQE-sëChristine Lagarde.

Sipas njoftimit të BQK-së, kjo marrëveshje shënon një moment të rëndësishëm në përafrimin me standardet dhe praktikat më të mira të Bashkimit Evropian në luftën kundër falsifikimit të parasë, dhe vendos bazat për një bashkëpunim teknik të strukturuar, përfshirë shkëmbimin e informacionit përmes Sistemit të Monitorimit të Falsifikimeve të BQE-së (CMS), i cili mbështet identifikimin dhe analizën e kartëmonedhave euro të falsifikuara.

“Përmes kësaj Marrëveshjeje, BQK do të ketë qasje në mekanizmat operativë të BQE-së të dizajnuar për të parandaluar dhe luftuar falsifikimin e kartëmonedhave euro dhe do të integrohet në rrjetin profesional të bashkëpunimit me bankat qendrore të Eurosistemit dhe institucione partnere jashtë zonës euro, përfshirë vendet e rajonit të Ballkanit Perëndimor”, thuhet në njoftim.

Më tej thuhet se ky bashkëpunim është rezultat i një përpjekjeje ndërinstitucionale në Republikën e Kosovës, e udhëhequr nga BQK, në koordinim me partnerët ndërkombëtarë, veçanërisht Zyrën e Bashkimit Evropian në Kosovë, për të ndërtuar një kornizë të qëndrueshme dhe gjithëpërfshirëse kundër falsifikimit.

Sipas BQK-së, marrëveshja forcon objektivat e përcaktuara në legjislacionin e përgatitur për luftimin e parasë të falsifikuar, i zhvilluar me mbështetjen e Bankës Kombëtare të Kroacisë dhe institucioneve relevante vendore, në kuadër të projektit TAIEX të BE-së, i cili parasheh nisma për krijimin e Qendrës Kombëtare Kundër Falsifikimit dhe të Sistemit Kombëtar për Monitorimin e Falsifikimeve në Kosovë, në përputhje me Planin Strategjik të BQK-së.

Po ashtu BQK shpreh mirënjohje të veçantë për ekipin e ekspertëve që kanë punuar në këtë projekt, me vlerësim të veçantë për Bankën Qendrore Evropiane, e cila, përmes kësaj marrëveshjeje bashkëpunimi, ka hapur rrugën për avancimin e kapaciteteve tona institucionale, teknike dhe operacionale, në një përpjekje të përbashkët për të luftuar një dukuri që kërkon angazhim të vazhdueshëm dhe qasje sistematike.

“BQK riafirmon përkushtimin e saj për forcimin e kapaciteteve të brendshme, modernizimin dhe automatizimin e përpunimit të parasë në përputhje me standardet e Eurosistemit, rritjen e vetëdijes publike dhe avancimin e mëtejshëm drejt integrimit të plotë në praktikat e përbashkëta të Bashkimit Evropian”, thuhet në komunikatë./D.B/KP

Në Paris sonte  do të zbulohet fituesi i Topit të Artë 2025 në një ceremoni prestigjioze e cila do të zhvillohet në “Théâtre du Châtelet” duke nisur nga ora 20:00.

Emri i triumfuesit mbetet ende i fshehtë dhe njihet vetëm nga një person, kryeredaktori i “France Football”, Vincent Garcia.

Pas rregullit të ri të vendosur që nga viti i kaluar, nuk ka më paralajmërime paraprake për fituesin.

Në garë janë 30 kandidatë, por dy emra shihen si favoritët kryesorë: Ousmane Dembélé i PSG-së dhe Lamine Yamal i Barcelonës.

Francezi, i cili sezonin e kaluar fitoi tripletën me klubin parisien, konsiderohet me një epërsi të vogël, megjithatë shumë besojnë se adoleshenti i talentuar Yamal mund të marrë trofeun falë paraqitjeve të jashtëzakonshme me katalanasit dhe kombëtaren spanjolle.

Këtë vit çmimi bazohet në performancën përgjatë një sezoni të plotë dhe jo më në vitin kalendarik, duke vënë në plan të parë kontributin individual, talentin dhe sportivitetin.

Ceremoninë e kësaj mbrëmjeje do ta udhëheqë Ronaldinho, i cili gjithashtu do të ketë nderin t’ia dorëzojë trofeun fituesit.

Krahas Topit të Artë, do të ndahen edhe çmimet për portierin më të mirë, golashënuesin më të mirë dhe futbollistin më të mirë të ri./S.K/KP/

Delegacioni i Bashkimit Evropiane në Shqipëri ka përgëzuar Kryeministrin Edi Rama dhe kabinetin e ri qeveritar pas betimit te Presidenti, për detyrën në katër vitet e ardhshme në qeverisjen e vendit.

Me një postim në rrjetin social X, delegacioni i BE-së deklaron se miratimi dhe zbatimi i reformave të nevojshme, do duhet të jetë transparent dhe gjithëpërfshirës. Vetëm përmes këtyre proceseve, sipas delegacionit, Shqipëria do arrijë qëllimin për mbylljen e negociatave deri në vitin 2027 dhe anëtarësimin në familjen e madhe europiane brenda 2030-ës.

“Urime Kryeministrit @ediramaal dhe të gjithë Ministrave me rastin e marrjes së detyrës. Me një përpjekje të vazhdueshme në miratimin dhe zbatimin e reformave të nevojshme përmes proceseve transparente dhe gjithëpërfshirëse, Shqipëria mund të arrijë qëllimin e saj ambicioz për mbylljen e negociatave të pranimit në BE deri në fund të vitit 2027. Ne mezi presim të punojmë së bashku me të gjithë palët e interesuara shqiptare për të arritur këtë moment të rëndësishëm në dobi të popullit shqiptar”, thuhet në postim.

Më 12 shtator, Edi Rama u dekretua nga presidenti Bajram Begaj për herë të katërt si kryeministër i Shqipërisë, prej ngjitjes në krye të pushtetit ekzekutiv në vitin 2013./D.B/KP