Xhiro e 14-të në Superligën e Kosovës në futboll do të përmbyllet sot. Në Gjilan zhvillohet derbi mes Dritës dhe Llapit. Kjo ndeshje pritet të jetë mjaft interesante.

Skuadra me trajnerin Tahir Batatina kërkon të ri-gjejë rrugën e fitores ngase nuk di për një gjë të tillë në pesë ndeshje e fundit. Klubi pati tri humbje dhe dy barazime, kurse skuadra e Dritës kërkon tri pikë të reja për ta përforcuar kreun e tabelës.

Kjo ndeshje fillon sot nga ora 13:00. /UBT News/

Islanda do të takohet me Kosovën në play-off të Ligës së Kombeve. Ndeshja e parë do të zhvillohet më 20 mars dhe e dyta më 23 mars.

Skuadra që fiton ndeshjen luan në divizionin B të Ligës së Kombeve, ndërsa skuadra humbëse luan në divizionin C.

Åge Hareide, trajneri i ekipit islandez, tha se nevojiten një paraqitje shumë e mirë në të dy ndeshjet pasi Kosova është rival shumë i vështirë.

“Është kaq e shkurtër në futbollin ndërkombëtar dhe nuk mendoj se ka ndonjë ndryshim të madh mes shumicës së skuadrave në ligat B dhe C. Thënë këtë, është e rëndësishme për ne që të ruajmë vendin tonë në Divizionin B dhe për ta bërë këtë na duhen dy paraqitje të mira kundër një kundërshtari të vështirë. Sigurisht, do të kisha dashur të luaja ndeshjen tonë në shtëpi në Reykjavík, por kjo fatkeqësisht nuk është e mundur. Kemi një grup të mirë lojtarësh dhe shpresoj që të gjithë të jenë gati për të luajtur në mars”.

Pas një beteje të gjatë dhe të mundimshme ligjore, Zvonimir Boban, ish-drejtuesi i Milanit dhe aktualisht komentator në televizion, ka fituar përfundimisht gjyqin ndaj klubit italian. Kjo betejë ka qenë një përplasje e fortë ligjore që ka përfunduar me një vendim të Gjykatës së Lartë, e cila e ka cilësuar shkarkimin e Bobanit si të paligjshëm dhe ka detyruar Milanin të paguajë një shumë të konsiderueshme.

Në vitin 2019, Boban u emërua si Kryeshef i Futbollit në Milan, por pas një periudhe të shkurtër ai u shkarkua nga klubi me efekt të menjëhershëm. Arsyeja e këtij vendimi të papritur ishte një intervistë e dhënë nga kroati për një gazetë, e cila u konsiderua nga Milani si paautorizuar dhe në kundërshtim me politikën e klubit. Kjo shkaktoi një grindje të ashpër ligjore, pasi Boban e konsideroi këtë veprim si të padrejtë dhe të paarsyeshëm, duke e çuar çështjen në gjykatë.

Në shkallën e parë të gjykatës, Boban fitoi dhe Milani u detyrua të dëmshpërblente atë me 5.37 milionë euro. Megjithatë, situata u përmbys në apel, ku gjykata ul shifrën e dëmshpërblimit dhe vendosi që Boban të paguajë rreth 1.2 milionë euro. Pas këtij vendimi, gjithçka e priste një vendim përfundimtar nga Gjykata e Lartë.

Në një vendim të shpallur të enjten, Gjykata e Lartë ka vendosur se shkarkimi i Bobanit ka qenë i paligjshëm dhe ka urdhëruar Milanin të paguajë 4.82 milionë euro si dëmshpërblim. Kjo shifër është regjistruar në bilancin financiar të klubit, që do të përbëjë një rëndesë për financat e Milanit.

Ky vendim është një fitore e rëndësishme për Bobanin, i cili ka pasur një karrierë të gjatë dhe të suksesshme si futbollist dhe drejtor, dhe është një moment i rëndësishëm në luftën e tij për drejtësi kundër trajtimit të padrejtë nga klubi ku kaloi pjesën më të madhe të karrierës së tij si lojtar./UBTNews/

Në selinë e UEFA-s në Nyon është hedhur sot shorti për play-off të Ligës së Kombeve, ku Kombëtarja e Kosovës do të përballet me Islandën. Dy ndeshjet vendimtare për promovimin në Ligën B do të zhvillohen më 20 mars dhe 23 mars 2025.

Pas shortit, presidenti i Federatës së Futbollit të Kosovës, Agim Ademi dhe përzgjedhësi i Kombëtares, Franco Foda dhanë opinionet e tyre mbi këtë përballje.

I pari i FFK-së e vlerësoi shortin si korrekt dhe pret që kësaj radhe Kosova të tregohet më e suksesshme se sa Islanda.

“Edhe pse me Islandën i kemi zhvilluar dy ndeshje dhe të dyja i kemi humbur, tani është një format tjetër i ekipit tonë dhe unë vetëm uroj që futbollistët tanë të jenë me kondicion e shëndet të mirë dhe të mos kemi të lënduar dhe as të pezulluar. Shpresoj shumë që në mars do të fillojmë me fitore në ndeshjen e parë dhe sigurisht se do të shkojmë tashmë vetëm për fitore sepse këto janë dy ndeshje kualifikuese dhe ekipi që fiton do të ngjitet në Ligën B. Mendoj se Kosova ka ekip dhe ka potencial për të shkuar tutje”, ka theksuar Ademi.

Ndërkaq, përzgjedhësi Franco Foda shprehu optimizmin e tij për këtë përballje.

“Tani jemi të lumtur për ndeshjen kundër Islandës. Personalisht, nuk kam qenë kurrë në Islandë, por dihet që ata kanë një skuadër shumë të fortë. Megjithatë, edhe ne jemi në një formë dhe gjendje shumë të mirë. Mendoj se shanset janë 50 me 50, dhe do të bëjmë gjithçka për të kaluar në Ligën B”, tha Foda.