Presidenti i SHBA-së, Donald Trump, ka thënë se nuk është i kënaqur për sulmin ajror të Izraelit në Katar, dhe se sulmi i Izraelit ndaj objektivave të Hamasit në Katar nuk i çon përpara qëllimet e Izraelit apo të Amerikës.

Kryeministri izraelit, Benjamin Netanyahu, tha se sulmi ishte plotësisht i justifikuar sepse kishte në shënjestër udhëheqësit e lartë të Hamasit që organizuan sulmin e 7 tetorit 2023 ndaj Izraelit, i cili shkaktoi luftën në Gaza shkruan BBC.

Mediat izraelite raportuan se operacioni përfshinte 15 avionë luftarakë izraelitë, të cilët qëlluan 10 municione kundër një objektivi të vetëm.

Grupi i armatosur palestinez ka thënë se pesë anëtarë të tij u vranë në një sulm ajror izraelit në kryeqytetin e Katarit, por pretendoi se një përpjekje për të vrarë ekipin e tij negociator dështoi.

Katari është një aleat kyç i SHBA-së në rajon, ku ndodhet një bazë e madhe ajrore amerikane.

I pyetur për sulmet e Izraelit kundër Katarit, Trump tha: “Epo, nuk jam i kënaqur… Thjesht nuk jam i kënaqur me të gjithë situatën. Nuk është një situatë e mirë. Por do ta them këtë, ne duam që pengjet të kthehen, por nuk jemi të kënaqur me mënyrën se si ndodhi sot”, tha Trump për mediat./S.K/BBC/

Gjashtë persona u vranë në sulmin izraelit në Doha, por Hamasi pretendon se ekipi i tij negociator mbijetoi.

Hamasi thotë se midis të vrarëve ishte edhe djali i negociatorit kryesor të grupit, Khalil al-Hayya.

Ai i liston emrat e tyre si: Humam El-Hajja (Ebu Jahja) – djali i el-Hajjes, Xhihad Labad (Abu Bilal) – drejtor i zyrës së al-Hayya, Abdullah Abdul Vahid (Ebu Khalil), Moamen Hassouna (Abu Omar), Ahmed Al-Mamluk (Abu Malik).

Personi i gjashtë i vrarë, thuhet se ishte një anëtar i forcave të sigurisë së brendshme të Katarit, Kaporali Badr Saad Mohammed Al-Humaidi.

Ushtria izraelite e përshkroi sulmin e saj ndaj një kompleksi banimi në qendër të Dohas, Katar, si një sulm “të saktë”.

Raketat goditën Dohan ndërsa Izraeli shënjestroi udhëheqësit e Hamasit mes përpjekjeve për armëpushim dhe Katari e quajti këtë një shkelje të sovranitetit./S.K/KP/Al Jazeera/

Ministria e Punëve të Jashtme dhe Diasporës e Republikës së Kosovës konfirmon arrestimin e qytetarit të Republikës së Kosovës, Hazir (Arif) Haziri, nga autoritetet e Serbisë, më 8 shtator 2025, në pikën kufitare në Merdarë, gjatë hyrjes së tij në territorin serb me automjet privat.

Sipas njoftimit të MPJD-së, menjëherë pas marrjes së informacionit për këtë rast, Zyra Ndërlidhëse e Republikës së Kosovës në Serbi është angazhuar përmes kanaleve zyrtare dhe diplomatike për të siguruar informacione të sakta dhe të plota mbi ndalimin e Haziri.

“Zyra Ndërlidhëse e Republikës së Kosovës ka adresuar një kërkesë zyrtare autoriteteve të Qeverisë së Serbisë për të konfirmuar arrestimin e Haziri dhe për të sqaruar arsyet ligjore të ndalimit të tij. Lidhur me rastin, është njoftuar edhe Delegacioni i Bashkimit Evropian në Serbi, si dhe përfaqësuesit diplomatikë të vendeve të Quint-it. Nëse ndaj Haziri vendoset masa e paraburgimit dhe iniciohet procedurë penale, Zyra Ndërlidhëse e Republikës së Kosovës në Serbi do të bëj kërkesën për vizitë zyrtare në qendrën e ndalimit. Në këtë fazë, Ministria e Punëve të Jashtme dhe Diasporës u bën thirrje të gjithë qytetarëve të Republikës së Kosovës që të shmangin udhëtimet nëpërmjet territorit të Serbisë, me qëllim të garantimit të sigurisë dhe mirëqenies së tyre. MPJD gjithashtu nënvizon nevojën urgjente për reagim nga ana e Bashkësisë Ndërkombëtare ndaj praktikave represive të autoriteteve serbe, të cilat bien ndesh me parimet themelore të së drejtës ndërkombëtare dhe me konventat ndërkombëtare për të drejtat e njeriut. Rritja e rasteve të ndalimeve dhe maltretimeve të qytetarëve të Republikës së Kosovës nga autoritetet serbe përbën shkelje të frymës së dialogut dhe të marrëveshjeve të nënshkruara mes dy palëve”, thuhet në njoftim.

Ministria e Punëve të Jashtme dhe Diasporës zotohet se do të vazhdojë të angazhohet me përkushtim për mbrojtjen e të drejtave dhe interesave të qytetarëve të Republikës së Kosovës, kudo që ndodhen./S.K/KP/MPJD/

Avokati serb, Cedomir Stojkoviq ka reaguar pas raportimit se dy spiunë kanë ikur nga arresti shtëpiak në Serbi, për çka ka thënë se ata janë larguar sipas planit të presidentëve Aleksandër Vuçiq dhe Xi Jinping.

Kinezi Cuj Guanghaj dhe britaniku Xhon Miler, ekstradimin e të cilëve e kërkojnë Shtetet e Bashkuara të Amerikës nën akuzat për spiunazh dhe kontrabandë të teknologjisë ushtarake, kanë ikur nga arresti shtëpiak në Beograd pasi hoqën byzylykët elektronikë.

“Spiunët kinezë që u arrestuan në Serbi me kërkesë të SHBA-së u nxorën nga vendi nga agjentët e Agjencisë së Sigurisë dhe Informacionit (BIA), sipas një marrëveshjeje të mëparshme mes Aleksandar Vuçiq dhe Xi Jinping”, ka shkruar Stojkoviq në X.

Sipas tij, shërbimet e sigurisë së Serbisë kanë organizuar largimin e tyre nga Serbia.

“Para kësaj, Cuj Guanghaj dhe John Miller, edhe pse të arrestuar me urdhër arresti ndërkombëtar dhe me kërkesë për ekstradim, në vend që të mbaheshin në paraburgim u vendosën në arrest shtëpiak, një precedent deri atëherë krejtësisht i panjohur në sistemin gjyqësor. Sepse, sigurisht, spiunët për të cilët një shtet tjetër kërkon ekstradimin do të arratisen nga arresti shtëpiak”, ka shkruar tutje ai.

Stojkoviq ka shtuar se një gjë e tillë edhe pritej.

“Nuk ka asnjë dilemë që të dy kanë fluturuar me avion nga aeroporti i Beogradit direkt për në Kinë ose përmes Rusisë. BIA i kaloi jashtë kontrollit kufitar dhe i futi në avion. Dikun rreth 99% është pikërisht kështu si ka ndodhur. Ai 1% i mbetur lidhet po me BIA-n, por duke kaluar përmes kufirit të zakonshëm”, ka përfunduar ai.

Cuj dhe Miler u arrestuan më 24 prill 2025 në hotelin “Hajat” mbi bazën e urdhër-arrestit ndërkombëtar të SHBA-së.

“Për personat në fjalë është urdhëruar lëshimi i fletarrestimit, të cilin do ta zbatojë Drejtoria e Policisë së Beogradit, Departamenti për Kërkime”, thuhet në vendimin e Gjykatës së Lartë në Serbi./S.K/KP/