Lajmet

​100 ditët e Qeverisë Kurti

Published

on

Qeveria Kurti sot bën 100 ditë prej se është votuar në Kuvendin e Kosovës. Pas konstituimit të Kuvendit dhe mes diskutimeve të shumta, kabineti qeveritar i kryeministrit Kurti mori besimin e të zgjedhurve të popullit, më 22 mars të këtij viti.

Prej kur mori detyrën, një ditë më pas, ekzekutivi në krye me kryeministrin Kurti mbajti gjithsej 17 mbledhje qeveritare, e tek në mbledhjen e 11, miratoi programin qeverisës dhe agjendën legjislative, derisa ende nuk e ka miratuar planin e punës.

Vëmendje dhe prioritet të veçantë në këta tre muaj iu kushtua dialogut Kosovë-Serbi dhe diplomacisë kosovare.

Kryeministri Kurti u takua për herë të parë me presidentin serb Vuçiq më 15 qershor, paraprakisht kishte refuzuar një takim të tillë më 11 maj. Gjatë këtyre ditëve, i pari i qeverisë, aktiv ishte edhe në vizitat zyrtare jashtë vendit.

Për dallim prej të kaluarës, Kurti vizitën e parë e bëri në Bruksel gjatë fundit të muajit prill, derisa pak ditë më vonë, ia mësyu sërish kryeqendrës evropiane për një darkë joformale me liderët rajonalë. Takim me këta të fundit, kryeministri Kurti zhvilloi gjatë samitit të Tiranës dhe Vjenës në muajin qershor. Teksa së fundmi u prit me ceremoni shtetërore nga presidenti i Francës, Emanuel Macron.

Edhe këtë 100 ditësh, kreu i ekzekutivit nuk ia la keq shkarkimeve dhe emërimeve në bordet e ndërmarrjeve publike. Ndërkohë, inicioi koncept-dokumentin për çështjen e pasurisë së fituar në mënyrë të pajustifikueshme dhe fillimin e hartimit të procesit të vetingut.

Ndërsa së fundmi miratoi rishikimin e buxhetit për vitin 2021. Në mbledhjen e kësaj jave, Qeveria e Kosovës miratoi disa projektligje, ndër to mori vendim të mbulojë obligimet e Primit të sigurimit kufitar për të gjithë bashkatdhetarët dhe të huajt që janë subjekt i policës kufitare dhe vijnë në Kosovë deri në fund të vitit 2021.

Deputeti i Lëvizjes Vetëvendosje, Artan Abrashi, duke folur ditë më parë për KosovaPress për 100 ditëshin e Qeverisë Kurti, tha se është në rrugë të mbarë për implementimin e premtimeve gjatë fushatës zgjedhore.

“Pjesa e ç ‘kapjes së shtetit, çka është shumë e rëndësishme për ne është në rrugë të duhur. Ka shumë institucione të pavarura që po iu kthehet kredibiliteti i humbur si rezultat i ndikimeve partiake dhe politike, e për fat të keq të njëjtën akuzë po e bënë opozita ndaj neve, por e cila nuk qëndron. Pra po shohim dita ditës që gjërat kanë filluar të kthehen në binar, por duhet ende shumë punë. Në këto tre muaj të kësaj qeverisje i konsideroj si shumë produktive dhe presim që ditëve në vijim të shtohet ky intesitet i punës dhe t’i shohim të realizuar të gjitha premtimet e fushatës”, kishte deklaruar Abrashi.

Partia Demokratike e Kosovës adresoi një varg kritikash për 100 ditëshin e Qeverisë Kurti II. Në partinë më të madhe opozitare, thonë se ekzekutivi, i udhëhequr nga kryeministri Albin Kurti është i dobët, pasi në këta tre muaj nuk ka pasur asnjë vendim ose politikë që e ka shtyrë përpara për qytetarët.

“Kjo qeveri është më e dobët se sa kanë menduar edhe më skeptikët. Përfshirë edhe mua si opozitar, kam pritur më shumë prej saj. Fillimisht nuk arriti për më shumë se dy muaj të miratojë programin qeverisës dhe programin që e miratoi ngjante më shumë një hartimi shkollor se sa një program i mirëfilltë qeverisës, ishte i ndryshëm prej asaj që kishte premtuar në fushatë zgjedhore. Mandej, u shoqërua për këto 100 ditë me gafe dhe skandale të shumta si në rrafshin e brendshëm, ashtu edhe të jashtëm. Ende edhe sot jemi vendi që kemi më së paku vaksina për kokë banori. Derisa është dashur të merret me vaksina, kjo qeveri është marrë me fushatë zgjedhore në një vend tjetër. Mandej kemi pa një trajtim skandaloz në aspektin ndërkombëtar nga ministrja e Punëve të Jashtme, por edhe me deklarata në aspektin e brendshëm. Kemi parë një tendencë për të kapur të gjitha institucionet, për më pak se 100 ditë të gjitha ndërmarrjet publike i ka kapur kjo qeveri, ka filluar edhe tek institucionet e pavarura”, deklaroi anëtari i kryesisë së PDK-së, Betim Gjoshi.

Lidhja Demokratike e Kosovës kritikoi Qeverinë Kurti për keqmenaxhim dhe mungesë të dijës në udhëheqje. Anëtarja e kryesisë së Lidhjes Demokratike të Kosovës, Teuta Sahatqija tha për KosovaPress, se në rreth 100 ditë qeverisje u panë se gjitha kauzat e Lëvizjes Vetëvendosje kanë qenë vetëm për përftime elektorale.

“Sa i përket këtyre 100 ditëve kemi parë një menaxhim jo të mirë të shëndetësisë, kemi parë një qasje jo të mirë diplomatike, kanë qenë skandalet e njëpasnjëshme në diplomacinë kosovare, ka pasur një ndryshim të fjalëve, jo CEFTA, jo premtimeve. Në fakt nuk e di a është realizuar një prej panumërt premtimeve të cilat zotëri Kurti kanë fituar këto zgjedhje. Prandaj këto 100 ditë janë karakterizuar me mohimin e të gjithë atyre premtimeve që janë dhënë, jo vetëm gjatë fushatës, por gjatë shumë viteve si parti në Kuvendin e Kosovës. Po ashtu edhe një mungesë e dijës së menaxhimit, që shumë kush e ka quajtur qeveri e praktikantëve”, thotë Sahatqija.

Aleanca për Ardhmërinë e Kosovës e konsideroi Qeverinë Kurti më të dobëtën që nga shpallja e pavarësisë. Nënkryetari i AAK-së, Pal Lekaj, deklaroi për KosovaPress, se përveç shkarkimeve dhe “ngarkimeve”, Qeveria Kurti nuk ka bërë asgjë në këta tre muaj qeverisje.

“Me veprimet e deri të tanishme mund ta quaj qeverinë̈ më të dobët që e ka pasur Kosova pas pavarësisë̈. Kjo më jep me kuptuar që këta kanë ardhur më shumë me inate, çka ka qenë në të kaluarën mos me pranuar, por të jenë në kuptimin që 20 vjet këta kanë bërë të këqija dhe tash po të njëjtat po i veprojnë me institucionet e pavarura… ata po sjellën në arrogancën e numrave dhe po sillet sikur opozitë, në vend që me vepruar dhe përmirësu jetën e qytetarëve dhe mbështetjen e atyre që kanë humbur vendet e punës, këta po vendnumërojnë. Për këtë e thash, me dashamirësinë më të madhe kisha dashur të gjejë diçka pozitive për këtë qeveri…përpos shkarkimeve dhe ngarkimeve, këta nuk kanë bërë diçka të mirë edhe ato shkarkime që po i bëjnë pa pasur një raport paraprak”, tha Lekaj.

Shoqëria civile e velrësoi sit ë ngadalshme dhe pa vendime të mëdha punën 100 ditore të Qeverisë Kurti.

Drejtoresha e Lëvizjes FOL, Mexhide Demolli-Nimani tha për KosovaPress se krahas pritjeve të qytetarëve dhe premtimeve në fushatë të Lëvizjes Vetëvendosje nuk janë përmbushur të njëjtat, derisa, shqetësuese sipas saj është mos publikimi i planit vjetor të punës.

“Mund të them se ka qenë një 100 ditësh më i ngadaltë nga ajo që është pritur nga kjo qeveri. Nuk ka pasur ndonjë vendim, ta quaj ashtu më madhor që prek interesin qytetar për këto 100 ditë, në krahasim me pritjet shumë të mëdha të qytetarëve, por edhe premtimeve të kësaj qeverie. Për dallim prej Kurti I që kishte vendime më të mëdha se kjo qeveri, tash Kurti II ka më pak. Çka mund të vërej është një mbyllje, pavarësisht se qeveria ka emëruar dy zëdhënës, kemi dikastere të ministrive që janë po thuajse totalisht të mbyllura…Çka është për neve më shqetësuese është mos publikimi i planit vjetor të punës. Do thotë Qeveria Kurti ka prezantuar programin 4 vjeçar, por jo planin e punës”, thotë ajo.

Ndërsa, Arbër Fetahu nga Grupi për Studime Juridike dhe Politike (GLPS) i vlerësoi hibride 100 ditët e qeverisjes Kurti.

“Kemi parë një performancë hibride edhe nga kjo qeveri. Në kuptimin se ka pasur në disa fusha përparim dhe në disa fusha edhe ngecje. Vlen të përmendet që kemi parë një agjendë ambicioze legjislative me mbi 190 projektligje të parapara. Disa janë dërguar në këtë periudhë, disa jo. Një iniciativë më mirë dhe pozitive është parë në fushën e sundimit të ligjit tek iniciativa për veting dhe ligji për konfiskimin e pasurisë. Ani pse në këtë drejtim ka pasur një tërheqje apo një stepje prapa. Por procesi po shkon mirë. Kemi parë edhe tek pandemia një rezultat miks, ka pasur një lojë ping-pongu mes ministrit të kaluar dhe ministrit Vitia dhe një ambiguitet në menaxhimin e pandemisë, sigurimin e vaksinave dhe të tjera. Pastaj gradualisht kemi pasur një përmirësim të gjendjes edhe në menaxhimin e Covdi 19”, thotë Fetahu.

Më 22 mars, Kuvendi i Republikës së Kosovës, pas konstituimit të Legjislaturës VIII, me kërkesën e 52 deputetëve mbajti seancë të jashtëzakonshme, me të vetmen pikë të rendit të ditës, zgjedhjen e Qeverisë së Republikës së Kosovës. Me 67 vota për, 30 kundër dhe me asnjë abstenim, Kuvendi i dha besimin qeverisë së re me kryeministër Albin Kurtin.

Qeveria e re e Republikës së Kosovës, e drejtuar nga Kryeministri Albin Kurti, zhvilloi një ditë më pas mbledhjen e parë ceremoniale, në të cilën u zotua për angazhim dhe veprime konkrete në përballje me sfidat që po kalon vendi ynë dhe qytetarët e Republikë së Kosovës.

Lajmet

Ja se si ndikon orari i mëngjesit në shëndetin tuaj

Published

on

Shpesh thuhet se mëngjesi është vakti më i rëndësishëm i ditës dhe studimi i ri në Massachusetts, ka sugjeruar të njëjtën gjë.

Sipas studimit, koha kur konsumohet ushqimi i mëngjesit ka shumë rëndësi dhe ndikon në shëndet e jetëgjatësi, thuhet në uebfaqen e kuzhinieres së famshme, Martha Stewart.

Ky studim ka analizuar lidhjen mes orarit të vakteve dhe shëndetit tek të moshuarit, ku studiuesit kanë ndjekur për më shumë se 20 vjet 2,945 persona të moshës 42 deri 94 vjeç në Britani, duke analizuar edhe mostrat e gjakut.

Ata vunë re se me kalimin e viteve, të moshuarit fillonin të hanin më vonë mëngjesin dhe darkën, ndërkohë që ngushtonin orarin e përgjithshëm të ushqimit gjatë ditës.

Mëngjesi i vonuar dhe rreziqet për shëndetin

Studimi tregoi se ngrënia e mëngjesit më vonë lidhej rregullisht me probleme shëndetësore fizike dhe mendore, si depresioni, lodhja dhe problemet me shëndetin oral. Gjithashtu, u vu re se oraret e vona të ushqimit lidhen me vështirësi në përgatitjen e vakteve, gjumë më të dobët dhe, më së shumti, me rrezik më të lartë të vdekshmërisë gjatë periudhës së studimit.

Edhe pasi studiuesit morën parasysh faktorët e moshës, ata zbuluan se koha e mëngjesit të vonuar ishte e lidhur me rrezik më të lartë të sëmundjeve të shumta dhe mortalitetit.

“Studimi ofron informacionin që ka munguar mbi mënyrën si ndryshon koha e ushqimit në jetën e mëvonshme dhe se si ky ndryshim ndikon në shëndet dhe jetëgjatësi. Ne gjetëm se oraret e vona të vakteve, veçanërisht mëngjesi i vonuar, lidhen me sfida shëndetësore dhe rritje të vdekshmërisë tek të moshuarit”, ka thënë Hassan Dashti, shkencëtar e biolog në spitalin e Massachusetts.

Pse ka rëndësi koha e ushqimit?

Tradicionalisht, hulumtimet mbi ushqyerjen janë përqendruar tek ajo që hamë, por ky studim nxjerr në pah rëndësinë e shkencës që studion kohën e vakteve, si faktor i mundshëm për të parandaluar probleme shëndetësore.

“Studimi ynë sugjeron se ndryshimet në kohën kur të moshuarit hanë, veçanërisht mëngjesin, mund të shërbejnë si tregues i thjeshtë për gjendjen e tyre të përgjithshme shëndetësore”, ka shpjeguar Dashti.

Ai ka shtuar se inkurajimi i të moshuarve për të pasur orare të qëndrueshme vaktesh mund të bëhet pjesë e strategjive më të gjera për të nxitur plakje të shëndetshme dhe jetë më të gjatë./S.K/EO/

Continue Reading

Lajmet

​Rohde jep lamtumirën: Do të vazhdojmë të jemi partner i madh i Kosovës

Published

on

By

Ambasadori gjerman, Jorn Rohde, i cili po e përfundon misionin e tij në Kosovë, ka ndarë një video lamtumirëse në të cilën ka folur për përvojën e tij gjatë qëndrimit pesë vjeçar këtu. Ai ka theksuar se Gjermania do të mbetet partner i madh i Kosovës.

Koha ime në Kosovë së shpejti do të përfundojë. Pas pesë vitesh këtu, duhet të them lamtumirë, dhe do të më mungojë Kosova. Jo vetëm moti, por edhe mirësjellja e njerëzve, shëtitjet, kur shikoj majtas drejt Parkut të Gërmisë ku shpesh përdor biçikletën malore, këto gjëra do të më mungojnë para se të kthehem në Berlin. Ka qenë një kohë e mrekullueshme këtu”, ka thënë Rohde.

Ai ka përmendur edhe pasardhësin e tij, Rainder Rudolph, të cilit ka thënë se po ia “pason topin”.

Kemi parë shumë zhvillime – liberalizimi i vizave në vitin 2024 ishte një arritje e madhe. Ka edhe gjëra që nuk janë realizuar, si anëtarësimi i Kosovës në Këshillin e Evropës. Lidhjet mes vendeve tona janë unike – 600.000 kosovarë ose gjermanë me prejardhje kosovare jetojnë në Gjermani. Ky numër po rritet, dhe jam i sigurt që lidhjet tona do të vazhdojnë të rriten. Ne do të jemi një partner i madh i Kosovës. Ne kemi qenë një partner i madh që nga pavarësia. Dhe në këtë kuadër, do të doja t’ju kërkoja të shtrini mirësjelljen dhe miqësinë tuaj edhe ndaj pasardhësit tim, Rainer Rudolph, i cili do të mbërrijë këtu së shpejti. Dhe, duke qëndruar në gjuhën e futbollit, së shpejti do t’ia pasoj topin pasardhësit tim, Rainer Rudolph”, theksoi Rohde./D.B/KP

Continue Reading

Lajmet

​Ish-lojtari i Arsenalit ndërron jetë në moshën 21 vjeçare

Published

on

Futbollisti i Chichester City dhe ish-lojtari i akademisë së Arsenalit, Billy Vigar, ka ndërruar jetë në moshën 21-vjeçare pas një lëndimi të rëndë në tru të pësuar gjatë një ndeshjeje kundër Wingate & Finchley.

Sulmuesi u përplas jashtë fushës në përpjekje për ta shpëtuar topin, duke pësuar dëmtime serioze.

Ai u vendos në koma të induktuar dhe iu nënshtrua një operacioni, por nuk arriti të mbijetojë.

Klubi i Chichester City, Arsenal dhe bota e futbollit kanë shprehur ngushëllimet për humbjen e tij, ndërsa ndeshja e radhës e Chichesterit është shtyrë në shenjë respekti./S.K/KP/

Continue Reading

Lajmet

Policia e Kosovës shkatërron mbi 760 armë ilegale

Published

on

By

Policia e Kosovës ka organizuar sot ceremoninë e shkatërrimit të armëve të vogla dhe të lehta ilegale, mbi 760 sosh, në fshatin Prelez të Ferizajt. Pas shkatërrimit, nga materiali i armëve që shkrihen do të krijohen kapak të pusetave.

Drejtori i Përgjithshëm i Policisë së Kosovës, Gazmend Hoxha tha se procesi i shkatërrimit të armëve bëhet me qëllim për të ofruar sa më shumë siguri për qytetarët. Hoxha potencoi se nuk janë të rralla rastet ku armët ilegale janë përdorur gjatë rasteve kriminale.

Ai u bëri thirrje qytetarëve të Kosovës që të përdorin sa më pak armët. Hoxha bëri të ditur se nga viti 1999 deri më tani, janë konfiskuar mbi 36 mijë armë ilegale.

Ndërkaq, nga viti 2005 deri tani janë shkatërruar rreth 16 mijë armë të gjata dhe të shkurta.

Është një proces i vazhdueshëm që Policia e Kosovës, Ministria e Punëve të Brendshme, në mbështetje të vazhdueshme te UNDP-së, por edhe vendeve partnere mike të Kosovës po vazhdoj me shkatërrimin e armëve të vogla dhe të mesme me qëllim që të krijohet sa më shumë siguri për qytetarët dhe vendin tonë…Gjatë këtyre viteve nuk kemi pasur jo pak raste kur armët ilegale janë përdorur gjatë rasteve dhe veprave kriminale. Shumë jetë janë humbur për shkak të përdorimit të armëve ilegale. Iu bëjmë thirrje gjithë qytetarëve tonë që të qëndrojnë larg armëve ilegale…Policia e Kosovës që nga viti ‘99 e deri më sot ka konfiskuar rreth 36 mijë e 36 armë. Përafërsisht i bie rreth 1 mijë e 100 armë që janë konfiskuar çdo ditë. Që nga viti 2005 e deri më sot ka shkatërruar 15 mijë e 904 armë të shkurtra dhe të gjata”, tha Hoxha.

Përfaqësues i Përhershëm i UNDP-së në Kosovë, Nuno Queiros tha se qëllimi i shkatërrimit të armëve është promovimi i një shoqërie paqësore, të drejtë dhe gjithëpërfshirëse.

Ai potencoi se armët e vogla dhe të lehta të paligjshme shkaktojnë pasiguri, dëmtojnë civilët, minojnë institucionet dhe shpesh përdoren në dhunë bazuar në gjini dhe dhunë në familje.

Qëllimi ynë është të promovojmë shoqëri paqësore, të drejta dhe gjithëpërfshirëse, dhe kjo kërkon një reduktim të konsiderueshëm të flukseve të paligjshme të armëve në të ardhmen tonë…Vetëm gjatë kohës që kemi qenë këtu, janë kryer dy akte dhune me armë, pa llogaritur luftërat dhe situata të tjera. Kjo tregon se armët e vogla dhe të lehta të paligjshme shkaktojnë pasiguri, dëmtojnë civilët, minojnë institucionet dhe shpesh përdoren në dhunë bazuar në gjini dhe dhunë në familje. Policia, Ministria e Punëve të Brendshme dhe autoritetet e tjera relevante kanë treguar një angazhim të jashtëzakonshëm për të luftuar trafikun e paligjshëm, posedimin dhe keqpërdorimin e armëve. Por mund të jeni të sigurt se ne, si UNDP, dhe ekipi im i pranishëm sot, do të vazhdojmë t’ju mbështesim dhe jemi shumë krenarë që jemi partneri juaj i besuar në këto përpjekje”, tha Queiros.

Ky aktivitet mbështetet nga Programi i Kombeve të Bashkuara për Zhvillim (UNDP) përmes Programit për Siguri dhe Siguri në Kosovë (KSSP), me mbështetje financiare nga Gjermania, Suedia, Mbretëria e Bashkuar, Franca, Holanda dhe Norvegjia, si dhe përmes Vendimit të Këshillit (PESK) 2024/3006 të datës 2 dhjetor 2024, në mbështetje të aktiviteteve të çarmatimit dhe kontrollit të armëve të SEESAC në Evropën Juglindore, me qëllim zvogëlimin e kërcënimit nga armët e vogla dhe armët e lehta (SALW) të paligjshme dhe municionit të tyre./D.B/KP

Continue Reading

Të kërkuara