E përditësuar

11:14

Ish-kryeministri Avdullah Hoti ka kujtuar Marrëveshjen e Uashingtonit të 4 shtatorit, 2020, mes Kosovës dhe Serbisë në Shtëpinë e Bardhë. Hoti, këtë marrëveshje e konsideron arritje historike për vendin, por edhe mundësi të humbur.

Mundësi të humbur për faktin se, sipas tij, nuk janë zbatuar projektet e mëdha infrastrukturore që ishin arritur në atë marrëveshje.

“Sot bëhen pesë vjet nga nënshkrimi i Marrëveshjes së Uashingtonit, një arritje historike për Kosovën që krijonte mundësi unike për: (1) fuqizimin e partneritetit strategjik mes Kosovës dhe SHBA-së, si dhe (2) vendosjen e Kosovës në qendër të zhvillimeve ekonomike në rajon përmes projekteve madhore infrastrukturore”, tha ai.

Fajin për mos-zbatimin e kësaj marrëveshjeje, Hoti ia vë qeverisë Kurti.

“Për fatin e keq të Kosovës dhe të secilit qytetar, marrëveshja u neglizhua nga institucionet e Kosovës të dala nga zgjedhjet e vitit 2021. Kur u nënshkrua kjo marrëveshje, u kritikua ashpër nga opozita e atëhershme. Sot, pas pesë vitesh, të gjithë pa përjashtim janë të bindur për rëndësinë e saj strategjike, përfshirë ata që e cilësonin si tradhti kombëtare”, theksoi ai.

08:40

Janë bërë pesë vite që kur në Shtëpinë e Bardhë në Uashington, Kosova dhe Serbia kanë nënshkruar një marrëveshje për normalizim ekonomik, me ndërmjetësimin e presidentit të atëhershëm amerikan, Donald Trump. Ky dokument u konsiderua një hap i rëndësishëm drejt uljes së tensioneve mes dy vendeve dhe një moment i veçantë në politikën e jashtme të Kosovës.

Marrëveshja u përpilua në katër gjuhë  shqip, anglisht, serbisht dhe hebraisht dhe përfshinte një sërë zotimesh të ndërsjella, përfshirë edhe një element të rëndësishëm: njohjen reciproke ndërmjet Kosovës dhe Izraelit.

Si rezultat, më 14 mars 2021, Kosova hapi ambasadën e saj në Jerusalem, duke u bërë vendi i parë me shumicë myslimane që ndërmori një hap të tillë.

Në përputhje me marrëveshjen, Kosova pranoi të respektojë një moratorium njëvjeçar për mosaplikim në organizata ndërkombëtare, gjë të cilën e ka zbatuar gjatë periudhës së përcaktuar.

Po ashtu, Serbia u zotua të ndalë përkohësisht fushatën për tërheqjen e njohjeve të shtetësisë së Kosovës.

Në vijim janë pikat kryesore të marrëveshjes së firmosur më 4 shtator 2020:

Zbatimi i marrëveshjeve ekzistuese për autostradën dhe hekurudhën Beograd-Prishtinë, si dhe studimi i fizibilitetit për lidhjen e tyre me një port në det të thellë në Adriatik.

Bashkëpunimi me Korporatën Ndërkombëtare të SHBA-së për Zhvillim Financiar dhe EXIM në projekte infrastrukturore, kredi për ndërmarrjet e vogla dhe të mesme, si dhe prani të plotë të korporatës në Serbi.

Hapja dhe operacionalizimi i pikëkalimit të përbashkët kufitar në Merdare.

Anëtarësimi i të dyja vendeve në nismën “Mini-Schengen” të shpallur nga Serbia, Shqipëria dhe Maqedonia e Veriut në 2019.

Njohja reciproke e diplomave dhe certifikatave profesionale.

Studimi për shfrytëzim të përbashkët të Liqenit të Ujmanit për ujë dhe energji.

Ndalimi i përdorimit të teknologjisë 5G nga furnizues të pasigurt dhe largimi i pajisjeve ekzistuese të tilla.

Përmirësimi i kontrolleve të udhëtimit ajror dhe ndarja e të dhënave përmes sistemeve të siguruara nga SHBA.

Promovimi i lirive fetare dhe zbatimi i vendimeve gjyqësore që lidhen me Kishën Ortodokse Serbe, si dhe kthimi i pronave hebraike pa trashëgimtarë.

Angazhimi për gjetjen dhe identifikimin e personave të zhdukur dhe zgjidhje për çështjet e refugjatëve dhe të zhvendosurve.

Përkrahja e iniciativës për dekriminalizimin e homoseksualitetit në vendet ku është ende i ndaluar.

Shpallja e Hezbollahut organizatë terroriste dhe kufizimi i aktiviteteve të tij në juridiksionin e të dyja palëve.

Të gjitha pikat e marrëveshjes hynë në fuqi menjëherë pas nënshkrimit, por pas pesë vitesh, shumë prej tyre mbeten të pazbatuara ose të pjesshme, ndërsa çështjet politike mes Kosovës dhe Serbisë vazhdojnë të mbeten të tensionuara.

/S.K/EO/

15 persona kanë vdekur kur një ashensor i pjerrët doli nga shinat në Lisbonë, dhe departamenti i vrasjeve i policisë gjyqësore është thirrur menjëherë për të hetuar shkakun e aksidentit 

Sipas CNN Portugal, Zyra e Prokurorit Publik do të hapë një hetim për incidentin në Departamentin e Policisë së Lisbonës (DIAP), ndërkohë, qeveria ka shpallur një ditë zie kombëtare. Këshilli i Qytetit të Lisbonës ka shpallur tashmë tre ditë zie komunale.

Zyra për Parandalimin dhe Hetimin e Aksidenteve Ajrore dhe Hekurudhore (GPIAAF) ka konfirmuar gjithashtu se do të hapë një hetim për tragjedinë.

Organizata publike i shpjegoi agjencisë së lajmeve Lusa se për shkak të burimeve të kufizuara njerëzore në zonën hekurudhore, mbledhja e provave në vendngjarje do të fillojë vetëm të enjten në mëngjes.

Siç raportohet nga BBC vonë mbrëmë, vlerësimet fillestare sugjerojnë se diçka shkoi keq me sistemin e frenimit, i cili përfshin një kabllo që kalon nën sipërfaqen e rrugës së pjerrët, dhe se kjo është arsyeja pse ndodhi aksidenti.

Pedro Bogas, kreu i Carris, kompanisë që menaxhon autobusët, tramvajet dhe ashensorët në Lisbonë, shpjegoi se mirëmbajtja e përgjithshme e ashensorit bëhet çdo katër vjet, dhe e fundit ishte në vitin 2022.

Ai shton se funikulari inspektohej çdo ditë.

“Ne kemi protokolle të rrepta, ekspertë të shkëlqyer për shumë vite dhe duhet të përcaktojmë se çfarë ka ndodhur”, vuri në dukje ai.

Siç raportohet nga CNN Portugal, pasagjerët duhej të hidheshin nga dritaret kur ndodhi aksidenti dhe kjo nuk është hera e parë që një ashensor i pjerrët del nga shinat, por ky aksident është më i madhi deri më tani.

Ashensori da Glória, një ashensor që mund të mbajë deri në 42 persona, është një nga ikonat e Lisbonës dhe është shumë i popullarizuar tek turistët që vizitojnë qytetin.

/S.K/EO/

Një ndër momentet që tërhoqi vëmendjen e mediave ndërkombëtare gjatë zhvillimeve për paradën ushtarake kineze ishte takimi i udhëheqësit të Koresë së Veriut, Kim Jong Un, me presidentin rus Vladimir Putin.

Pas bisedës, e konsideruar prej të dyve si vëllazërore, stafi i liderit koreano-verior hyri në sallën ku u mbajt takimi dhe pastroi të gjitha mobiliet që ishin prekur nga Kim.

Në një video të postuar në rrjetet sociale, një pjesëtar i stafit të tij shfaqet duke pastruar krahët prej druri të karriges dhe tavolinën. Ndërsa punonjësja tjetër merr gotën e tij të ujit.

Kjo me qëllimin për të zhdukur çdo gjurmë të ADN-së së udhëheqësit të tyre, por mbetet e pazbuluar arsyeja pse Kim Jong Un urdhëroi këtë veprim

Kjo praktikë nuk është e panjohur pasi mediat ndërkombëtare kanë publikuar më herët një raport i cili tregon se edhe Vladimir Putin kujdeset për mbrojtjen e ADN-së.

Sa herë udhëton jashtë, truprojat e presidentit rus mbledhin mbetjet e nevojave personale në një valixhe të posaçme për t’i kthyer më pas në Moskë.

Një praktikë që aplikohet prej vitesh nga Putini dhe synon parandalimin e mbledhjes së informacionit në lidhje me shëndetin e tij përmes lëngjeve trupore.

/S.K/EO/

Policia në Mal të Zi ka arrestuar shtetasin e kërkuar M. D., 31-vjeç, pasi ky i fundit ishte shpallur në kërkim nga policia shqiptare për veprën penale kultivimi i bimëve narkotike.

Arrestimi i M.D. u krye si pjesë e operacionit ndërkombëtar “The Wanted”, për arrestimin me qëllim ekstradimin, të shtetasve të shpallur në kërkim ndërkombëtar.

Shtetasi shqiptar ishte shpallur në kërkim ndërkombëtar pasi Gjykata e Shkallës së Parë e Juridiksionit të Përgjithshëm Lezhë, me vendimin e datës 23 prill 2025, i ka caktuar masën e sigurisë arrest me burg, për kultivim të bimëve narkotike, i kryer në bashkëpunim, raporton KosovaPress.

Dyshohet se M. D. ka bashkëpunuar me një shtetas të arrestuar më herët si pjesë e operacionit Vakumi, për kultivimin e 1640 bimëve narkotikëve, në Gocaj e Rraboshte të bashkisë Lezhë.

Gjatë operacionit policor janë sekuestruar rreth 34 kilogramë lëndë e dyshuar narkotike kanabis sativa, e paketuar për shitje.

Interpol Tirana, në bashkëpunim me autoritetet e Malit të Zi, vijon punën për finalizimin e procedurave të ekstradimit të shtetasit M. D. në Shqipëri./D.B/KP