Të enjten nga ora 19:00 do të mbahet Gala Mbrëmja “Laureatët 2024”. Në këtë mbrëmje festive, që organizohet nga Federata e Basketbollit e Kosovës do të nderohen më të mirët e këtij viti.

Në “Laureatët 2024” do të shpallen Basketbollisti më i miri i vitit 2024, Basketbollistja më e mirë e Vitit 2024, Top 5 te meshkujt dhe femrat.

Po ashtu do të shpallen klubet më të mira te meshkujt dhe femrat, Trajneri i Vitit, Gjyqtari i Vitit, Punëtori Sportiv i Vitit, Shpresa e Vitit te djemtë dhe vajzat, kontribuues i basketbollit, veteran dhe veterane, etj.

Në vitin e kaluar, çmimi i më të mirit i takoi Drilon Hajrizit, derisa më e mira ishte shpallur Arbnore Përquku.

Sulmuesi i Manchester United, Marcus Rashford thotë se është “gati për një sfidë të re” pasi u pyet për të ardhmen e tij në klubin anglez. Rashford, 27 vjeç, upërjashtua nga skuadra për derbin e së dielës, të cilin United e fitoi 2-1 kundër Manchester City.

Trajneri i ri Ruben Amorim konfirmoi se nuk kishte probleme disiplinore pas vendimit të tij, por ai duket se ka lënë të kuptohet se kishte shpresuar të shihte më shumë nga lojtari anglez brenda dhe jashtë fushës gjatë javëve të tij të para në krye “Djajve të kuq”.

Në një intervistë me gazetarin e futbollit Henry Ëinter të botuar në X, Rashford tha: “Nëse e di që një situatë tashmë është e keqe, nuk do ta përkeqësoj atë. Unë kam parë se si lojtarët e tjerë janë larguar në të kaluarën dhe nuk dua të jem ai person. Kur të largohem do të bëj një deklaratë dhe do të jetë nga unë. Kur të largohem do të ketë ‘ndjenja të vështira’. Nuk do të keni asnjë koment negativ nga unë për Manchester United. Ky jam unë si person. Për mua, personalisht, mendoj se jam gati për një sfidë të re dhe hapat e ardhshëm”, ka thënë Rashdord.

Rashford ka shënuar 138 gola në 426 paraqitje për klubin që nga debutimi i tij në vitin 2016, pasi ka kaluar në radhët e të rinjve të United.

Kombëtarja e Kosovës në futsall ka shënuar fitore të merituar në ndeshjen e dytë të kualifikimeve për Euro 2026 në fazën ‘Main Round’. Pas disfatës si mysafirë në duel me Gjeorgjinë (3:1), Dardanët e futsallit shkëlqyen në Pallatin e Rinisë dhe Sportit, duke mposhtur Bullgarinë me rezultat të thellë 6:2.

Serinë e golave për Kosovën e nisi Ramadan Alaj, në minutën e 3-të, për ta vazhduar Ylli Mazreku (7’), Shefki Kameri (11’), Drilon Maxharaj (24’), Malush Qerimi (35’) dhe Fitim Krasniqi (38’), teksa të dy golat për bullgarët i realizoi Martin Stoykov, në minutat 13’ dhe 32’. Me këtë fitore, Dardanët konfirmuan formën e mirë dhe synimin për të vazhduar drejt objektivit madhor të kualifikimit në Euro 2026.

Pas ndeshjes, përzgjedhësi i Kosovës Agon Ramadani, tha se lojtarët treguan angazhim të madh në fushë, por se tani duhet qëndruar më këmbë në tokë.

“Ne jemi përgatitur që ta bëjmë maksimumin në këtë ndeshje sepse nuk donim të lejonim befasi. Jam shumë i kënaqur me angazhimin e lojtarëve. Angazhimi i tillë nuk ka munguar as në Gjeorgji, por atje nuk shkoi gjithçka qysh e kishim parashikuar. Normalisht se gëzimi i fitores para tifozëve tanë është shumë i madh. Lojtarët patën dëshirë të flaktë për fitore dhe e realizuan atë. Ne treguam se më nuk jemi autsajder. Dihet se në grup e kemi Francën që ishte në vend të tretë dhe Gjeorgjinë që ka qenë në çerekfinale në Evropianin e kaluar, por ne do të vazhdojmë të punojmë me përkushtim për të ndjekur objektivin për dy vendet e para në grup. Natyrisht se nuk është e lehtë, duhet të qëndrojmë me këmbë në tokë dhe të luftojmë deri në fund. Na pret një pushim prej një muaji dhe duhet ta mbajmë formën që të paraqitemi denjësisht kundër Francës”.

Federata e Futbollit të Kosovës ka ndarë çmimin “Ylli i Javës”. Ky çmim, për javën e 17-të në Albi Mall Superligë, i është ndarë futbollistit të SC Gjilanit, Armend Thaqi.

Thaqi ishte heroi i “Skifterave”, me golin e vetëm në ndeshje, duke mposhtur rivalin e qytetit, FC Dritën, me rezultat 1:0 dhe duke arkëtuar 3 pikë të rëndësishme për skuadrën e tij.

Pasi mori këtë çmim, Thaqi u shpreh i lumtur që u vlerësua si më i miri i javës: “Po, tradicionalisht dihet që është derbi, një nga më të mëdhenjtë në rajonin tonë. Është një ndeshje që çdo futbollist do të donte ta luante, pasi është ajo që të bën të ndihesh futbollist. Fitimi i tij sjell shumë benefite, përfshirë rikthimin e besimit në skuadër. Edhe pse ishim në një moment të vështirë në tabelë dhe bëmë disa gabime, fitorja na solli tri pikë të rëndësishme që na kthyen qetësinë dhe atmosferën pozitive. Kur fiton derbin, jo vetëm që mposht rivalin në tabelë, por gjithashtu fiton rivalitetin e qytetit, që është një motiv i jashtëzakonshëm për ndeshjen e ardhshme. Kjo fitore na jep besim për ndeshjet që na presin edhe për sezonin pranveror. Klubi ka bërë investime të mëdha dhe ne jemi të motivuar të arrijmë një vend në garat evropiane, që do të ishte një objektiv shumë i merituar. Për mua, ky çmim individual është shumë i rëndësishëm, por nuk është vetëm meritë e imja. Ky është një çmim që ia dedikoj trajnerit Ardian Nuhiu dhe të gjithë futbollistëve, pasi ky sukses është rezultat i angazhimit të gjithsecilit”, tha ai për faqen zyrtare të FFK-së.