Ministrja e Drejtësisë, Albulena Haxhiu ka njoftuar se janë zhdukur mostrat e Astrit Deharit, që ndodheshin në Institutin e Mjekësisë Ligjore. Siç ka thënë Haxhiu, ajo është njoftuar mbrëmë dhe më pas ka njoftuar kryeprokurorin e shtetit dhe ushtruesin e detyrës së Policisë së Kosovës. Në konferencë të jashtëzakonshme për media, ka deklaruar se në laboratorin ku ruhen epruvetat kanë qasje vetëm tre persona, për të cilët tha se i di emrat. Po ashtu, ajo theksoi se gjatë ditës pritet të ketë suspendime, bazuar në kërkesën e dërguar ndaj Institutit të Mjekësisë Ligjore. Ministrja e Drejtësisë ka shprehur dyshimet se kjo ka ndodhur për shkak të raporteve ndër-kolegiale, meqë gjendja në këtë institut është e rëndë.
Para gazetarëve, Haxhiu gjatë së enjtes deklaroi se ky është një akt i rëndë dhe kriminal.
“Mbrëmë në orët e vona jam njoftuar se janë zhdukur mostrat e Astrit Deharit, nga laboratori i Toksikologjisë në kuadër të Institutit të Mjekësisë Ligjore. Ky është një akt i rëndë, ky është një akt kriminal dhe për këtë arsyeje menjëherë mbrëmë kam njoftuar kryeprokurorin e shtetit, Besim Kelmendi si dhe drejtorin e Policisë, Fehmi Hotin. Sot në mëngjes e kam vizituar Institutin e Mjekësisë Ligjore dhe nga zyrtarët kompetentë jam njoftuar si në vijim: në raksat apo mbajtëset e epruvetave kanë qenë 15 epruveta me gjak, një epruvetë e urinës dhe një epruvetë e lukthit. Nga këto, IML dy epruveta me gjak ia ka dhënë Institutit Zviceran dhe një Policisë së Kosovës për ADN. Aktualisht, sipas informacioneve, sepse unë nuk kam qasje në vendin ku ruhen mostrat, mungojnë 12 epruveta me gjak, një e urinës dhe një e lukthit”, ka thënë ajo.
E pyetur se sa mund të dëmtojë kjo procesin e hetimit të rastit të vdekjes së Astrit Deharit, e para e Drejtësisë tha se ka përfunduar marrja e mostrave dhe janë bërë raportet. Ajo u zotua se ky rast do të zbardhet me çdo kusht, ani pse beson se ky akt ka një motiv për të dëmtuar procesin e zbardhjes së rastit të Deharit.
“Në vendin ku ruhen epruvetat kanë qasje vetëm tre persona. Pra, sipas informacioneve vetëm tre persona i kanë çelësat në vendin ku ruhen mostrat. Çdo kush që ka ndjekur pak rastin mbi vrasjen e Astrit Deharit dhe procesin hetimor për të, e ka të qartë se prej gjashtë vitesh të gjitha të dhënat, provat, dëshmitarët dhe çdo rrethanë e faktor është synuar të shtrembërohet, zhduket apo të eliminohet. Njëjtë ka ndodhur edhe me këdo që ka pasur vullnet për ta zbardhur këtë rast”, ka shtuar Haxhiu.
Më tej ministrja Haxhiu tha se nuk ka gjurmë se dikush nga jashtë e ka kryer këtë akt kriminal.
“Nuk ka thyerje të derës, nuk ka thyerje të vendit ky hyn çelësi. Asnjë dyshim në raport me forcën që është përdorur për ta kryer një akt të tillë kriminal. Prandaj po them që dikush nga zyrtarët përgjegjës, një person, dy, tre, kushdo qofshin ata, janë përgjegjës për këtë akt kriminal”, ka vijuar Haxhiu.
Ministrja e Drejtësisë, Albulena Haxhiu potencoi se gjatë ditës së djeshme është kuptuar që janë zhdukur këto mostra gjatë bartjes së mostrave nga frigoriferët e vjetër në të rinj. Ajo para gazetarëve ka thënë se që nga tetori i vitit të kaluar nuk janë kryer kontrolla nëse janë mostra.
“Ky akt i rëndë është vërejtur dje gjatë bartjes së mostrave nga frigoriferët e vjetër në ata të rinj, por jam e bindur që ka qenë çështje kohe që ata që e kanë orkestruar do ta plasonin si një veprim dëmtues të procesit në përgjithësi. Situata e krijuar është tepër e rëndë dhe vendos hije dyshimi në gjithë Institutin e Mjekësisë Ligjore, por edhe në veprimtarinë e tij. Jo vetëm për të tashmen, por veçanërisht në atë çfarë ka ndodhur në të kaluarën. Protokolli i vendit ku ruhen mostrat është shumë strikt dhe nëse ai ndiqet, kuptohet qartë se kush janë përgjegjësit për këtë krim. Por, në këtë rast ata që kanë pasur guximin të veprojnë në këtë mënyrë, as nuk zbrapsen nga protokolli dhe ndalesat ligjore e as nga përfshirja në një vepër të rëndë penale”, shtoi Haxhiu.
Megjithatë Haxhiu deklaroi se autorët do të gjenden dhe rasti do të zbardhet. Sipas saj, personat kanë dalë në vendin e punës sot dhe kanë pasur komunikimin me prokurorinë.
Po ashtu, theksoi se para pesë ditësh komisioni përzgjedhës e ka zgjedhur Flutura Gogën, si drejtuese të Institutit të Mjekësisë Ligjore.
“Ka edhe shumë rrethana të tjera të raporteve ndër kolegiale në këtë institucion nga e kaluara e errët, e që japin indicie që mund të jetë vepruar për të fajësuar njëri-tjetrin, me qëllime e motive të ulëta duke ditur se çfarë peshe dhe ndjeshmëri ka raste Dehari, prandaj janë marrë edhe me këtë rast. Por, këtë mbesin ta hetojnë prokuroria dhe policia. Me rëndësi që është që janë njoftuar institucionet përgjegjëse. Nga aspekti administrativ, menjëherë pas kësaj konference do të merren masa në përputhje me përgjegjësitë”, ka theksuar në konferencë për media.
Haxhiu ka shtuar se janë interesuar edhe për kamerat, por i është thënë se filmimet nuk mund të qëndrojnë më shumë se një muaj.
Më tej shtoi se siguria në IML as më herë nuk ka qenë në nivel, por edhe me gjitha përpjekjet as tani nuk është në nivelin e duhur.
“Më duhet të theksoj që unë i di emrat e personave të cilët kanë qasje në këtë institucion, në laboratorin e Toksikologjisë por unë nuk mund t’i them ata. Për faktin se tashmë të njëjtit i di edhe policia edhe prokuroria. Sa i përket masave, neve na takon që të ndërmarrim masa disiplinore ndaj zyrtarëve përgjegjës. Pra, komisioni disiplinor i Institutit të Mjekësisë Ligjore tashmë ka marrë kërkesë për adresim të veprimeve. Unë besoj që sot do të përfundojë puna me suspendimin. Sepse legjislacioni në fuqi nuk lejon menjëherë shkarkimin, por suspendimin deri në një procedurë përfundimtare. Sigurisht në përputhje me kompetencat e mia do t’i ndërmarrë edhe unë përgjegjësitë e mia apo do të ndërmarrë masa ndaj atyre të cilët kanë qenë në krye të institucionit”, ka përfunduar ajo.
Ministrja e Drejtësisë, Albulena Haxhiu ka thënë se për këtë rast është njoftuar mbrëmë para fillimit të koncertit të Filharmonisë nga udhëheqësja e Departamentit të Laboratorit të Toksikologjisë.
Lajmet nga UBT1 month ago
Rajoni3 months ago
Lajmet nga UBT3 months ago
Vendi1 month ago