Në kuadër të festivalit të madh ndërkombëtar “Global UBT Fest 2026”, Fakulteti i Inxhinierisë Ndërtimore dhe Infrastrukturës në UBT ka hapur zyrtarisht punimet e Akademisë Verore nën moton mjaft aktuale “Green Buildings and Green Infrastructure”.

Ky program katërditor vjen si një platformë dinamike që bën bashkë botën akademike dhe liderët e industrisë, duke u ofruar studentëve një mundësi unike për të zhvilluar kompetencat e tyre profesionale përmes ndërlidhjes së teorisë me praktikat më të avancuara të ndërtimit të qëndrueshëm.

Ceremonia e hapjes dhe fjala e mirëseardhjes u udhëhoq nga Dekani i Fakultetit, Prof. Visar Krelani, i cili theksoi rëndësinë e këtij edicioni për trajtimin e sfidave dhe trendeve të reja të inxhinierisë së qëndrueshme.

Menjëherë pas hapjes zyrtare, dita e parë e akademisë i është kushtuar tërësisht praktikës në terren, me një vizitë studimore në Fabrikën për Prodhimin e Çimentos “Sharrcem” në Han të Elezit.

Vizitën e udhëhoqën Prof. Visar Krelani, Dekan i Fakultetit të Ndërtimtarisë, Prof. Naser Morina, si dhe Agron Parduzi nga zyra e Shitjes në UBT.

Gjatë kësaj vizite, studentët u pritën nga stafi teknik dhe menaxherial i fabrikës, ku patën mundësinë të shohin nga afër proceset e prodhimit, laboratorët dhe teknologjinë e përdorur në ndërtimtari.

Lidhur me këtë eksperiencë, Dekani Krelani u shpreh se kjo vizit për studentet është një mundësi e mirë që të njihen nga afër me aspektet teknike dhe aplikimin e teknologjisë në prodhimin e çimentos.

“Studentët patën mundësinë që përmes Menaxherit të Prodhimit, z. Pasion Suma, dhe z. Teodor të njihen nga afër me aspektet teknike dhe aplikimin e teknologjisë në prodhimin e çimentos. Përmes vizitave në laboratorë, ku panë provat kimike, fizike e mekanike që realizohen çdo orë, ata morën informata direkte nga përgjegjësit e sektorëve dhe kuptuan rëndësinë e kësaj industrie për sektorin tonë. Dita e dytë nesër vazhdon në orën 09:00, ku së bashku me Fakultetin e Energjisë Efiçiente do të trajtojmë mbetjet e ndërtimit, efiçiencën e energjisë dhe të drejtat ujore”, shprehet Krelani.

Akademia Verore do të vazhdojë me ligjërata të ngjeshura dhe sesione të tjera akademike edhe në ditët në vazhdim, duke trajtuar tema kyçe për zhvillimin e infrastrukturës së gjelbër. /E.A/

Turqia do të jetë mikpritëse e Samitit të NATO-s për herë të parë pas 22 vitesh, duke mbledhur në Ankara liderët e vendeve anëtare në një periudhë të shënuar nga sfida të mëdha të sigurisë globale.

Samiti i 36-të i krerëve të shteteve dhe qeverive të NATO-s konsiderohet një nga takimet më të rëndësishme të aleancës, ku pritet të diskutohen çështje kyçe që lidhen me të ardhmen e sigurisë ndërkombëtare dhe forcimin e bashkëpunimit mes vendeve anëtare.

Zyrtarët turq e kanë cilësuar samitin si një takim që zhvillohet në një “epokë pasigurish”, duke theksuar se ai synon të forcojë koordinimin dhe unitetin brenda aleancës.

Ankaraja e sheh organizimin e samitit si një mundësi për të theksuar rolin e saj diplomatik dhe ndikimin në rritje brenda NATO-s, si dhe për të prezantuar kontributin në fushën e mbrojtjes, industrinë ushtarake, menaxhimin e krizave dhe diplomacinë.

Një nga temat kryesore të diskutimit pritet të jetë ndarja e barrës financiare dhe ushtarake mes vendeve anëtare të NATO-s.

Në samit pritet të marrin pjesë liderët e 32 shteteve anëtare të aleancës, përfshirë presidentin e Shteteve të Bashkuara, Donald Trump, si dhe ministrat e Jashtëm dhe të Mbrojtjes.

Të ftuar do të jenë edhe partnerët indo-paqësorë të NATO-s – Australia, Japonia, Zelanda e Re dhe Koreja e Jugut – duke zgjeruar diskutimet mbi sfidat globale të sigurisë./A.K/

Policia e Kosovës ka arrestuar një person zyrtar në Kaçanik, i dyshuar për veprën penale “Keqpërdorim i pozitës apo autoritetit zyrtar”.

Sipas njoftimit të Policisë, hetimet janë iniciuar pas pranimit të informatave se i dyshuari, duke shfrytëzuar pozitën zyrtare, përveç dokumentacionit të rregullt për pajisje me leje ndërtimi, i kishte kërkuar një qytetari dokumente shtesë, duke i premtuar se do t’i siguronte përmes një kompanie private gjeodezike.

Viktima dyshohet se kishte paguar mbi 600 euro për këto dokumente, por pasi kishte marrë lejen e ndërtimit, kishte vërejtur se ato nuk figuronin fare në dosjen zyrtare, me ç’rast kishte njoftuar Policinë.

Pas pranimit të rastit, hetuesit e Drejtorisë për Hetimin e Krimeve Ekonomike dhe Korrupsionit ndërmorën veprimet e nevojshme hetimore në koordinim me Prokurorinë Themelore.

I dyshuari u intervistua në prani të avokatit mbrojtës, nën dyshimin për veprën penale “Keqpërdorim i pozitës apo autoritetit zyrtar”, sipas nenit 414 të Kodit Penal të Republikës së Kosovës.

Me aktvendim të prokurorit, ai është ndaluar për 48 orë./A.K/

Punimet për ndërtimin e Shtëpisë së Kulturës në Kishnicë po vazhdojnë, ndërsa projekti synon të krijojë një hapësirë moderne në shërbim të komunitetit.

Objekti do të shërbejë për zhvillimin e aktiviteteve artistike, edukative dhe shoqërore, duke u shndërruar në një qendër të rëndësishme të jetës kulturore në këtë zonë.

Sipas autoriteteve, investimi synon të përmirësojë infrastrukturën kulturore dhe të krijojë kushte më të mira për promovimin e artit dhe kulturës.

Qëllimi mbetet që çdo komunitet të ketë hapësira dinjitoze për zhvillimin e aktiviteteve kulturore, artistike dhe shoqërore./A.K/