Në kuadër të angazhimit të vazhdueshëm të UBT-së për ndërkombëtarizimin e arsimit, fuqizimin e përvojës praktike dhe krijimin e mundësive konkrete për zhvillim profesional të studentëve, studentët e Fakultetit Shkenca të Ushqimit dhe Bioteknologjisë zhvilluan një vizitë akademike në İstanbul Nişantaşı Üniversitesi, një eksperiencë e rëndësishme studimore që synon zgjerimin e njohurive dhe lidhjen e studentëve me standardet ndërkombëtare të arsimit dhe kërkimit shkencor.

Gjatë kësaj vizite, studentët patën mundësinë të vizitojnë nga afër laboratorët e shkencave ushqimore, të njihen me infrastrukturën moderne laboratorike, teknologjitë bashkëkohore të përdorura në analizat shkencore, si dhe me aktivitetet akademike dhe kërkimore që zhvillohen në këtë institucion prestigjioz.

Programi përfshiu prezantime të specializuara akademike, përmes të cilave studentët u njohën me praktikat moderne në fushën e shkencës ushqimore, bioteknologjisë dhe inovacionit shkencor, ndërsa informacion të detajuar mbi laboratorët, metodologjitë kërkimore dhe punën shkencore prezantoi Prof. Dr. Ali Paşazade, duke ofruar një perspektivë të avancuar mbi zhvillimet më të fundit në këtë sektor strategjik.

Vizita nuk u fokusua vetëm në aspektin studimor, por shërbeu edhe si një platformë e rëndësishme institucionale për zgjerimin e bashkëpunimit ndëruniversitar. Në këtë kuadër, Dekani i Fakultetit të Shkencave Ushqimore dhe Bioteknologjisë në UBT, Prof. Dr. Fidan Feka, zhvilloi një takim zyrtar me Rektoren e İstanbul Nişantaşı Üniversitesi, Prof. Dr. Ayşegül Komsuoğlu Çıtıpıtıoğlu, ku u diskutuan mundësitë e bashkëpunimit akademik, shkëmbimeve studentore, mobilitetit të stafit dhe projekteve të përbashkëta kërkimore ndërmjet dy institucioneve.

Pjesë e delegacionit akademik të UBT-së në këtë vizitë ishin edhe Cengiz Çesko dhe Gani Kastrati, duke dëshmuar përkushtimin institucional për krijimin e urave të reja të bashkëpunimit ndërkombëtar në funksion të avancimit të programeve akademike.

Programi Shkencat e Ushqimit dhe Bioteknologji në UBT vazhdon të dëshmojë vizionin e tij modern dhe orientimin drejt ekselencës, duke u ofruar studentëve jo vetëm arsim teorik cilësor, por edhe përvoja ndërkombëtare, qasje në laboratorë modernë, partneritete strategjike dhe ekspozim të drejtpërdrejtë ndaj praktikave globale të industrisë dhe kërkimit shkencor.

Përmes aktiviteteve të tilla, UBT forcon pozitën e tij si institucion lider në rajon, duke krijuar një model edukimi ku teoria, praktika, inovacioni dhe ndërkombëtarizimi ndërthuren për të përgatitur profesionistë të rinj të gatshëm për sfidat e tregut global.

Në kuadër të aktiviteteve informuese dhe orientimit në karrierë për maturantët, Drejtori i Qendrës së UBT-së në Prizren, Vehbi Sofiu, realizoi një vizitë në Shkolla Profesionale “Abdyl Ramaj”, ku takoi nxënësit maturantë dhe i informoi ata për mundësitë e studimit në UBT.

Gjatë prezantimit, profesor Sofiu prezantoi programet më inovative që ofron UBT, duke vënë theks të veçantë në ndërlidhjen e studimeve me tregun e punës, zhvillimin profesional dhe mundësitë për avancim në karrierë.

Maturantët u njoftuan me drejtimet akademike që UBT ofron në fusha të ndryshme, përfshirë teknologjinë, biznesin, inxhinierinë, mediat, artin dhe shkencat moderne, si dhe me mundësitë për praktikë profesionale, pjesëmarrje në projekte ndërkombëtare dhe qasje në ekosistemin inovativ të UBT-së.

UBT vazhdon të mbetet i përkushtuar në mbështetjen e të rinjve përmes ofrimit të edukimit bashkëkohor, programeve të avancuara studimore dhe krijimit të mundësive konkrete për zhvillim akademik e profesional.

Në kuadër të Ditëve të Artit dhe Dizajnit 2026, një nga ngjarjet më të rëndësishme artistike dhe kulturore në kuadër të 25-vjetorit të UBT-së, Fakulteti i Artit dhe Dizajnit, në bashkëpunim me Gran Fest, do të mirëpresë në UBT artistin e njohur francez Dominique Bertail, një prej emrave më të rëndësishëm ndërkombëtarë në fushën e ilustrimit, storytelling-ut vizual dhe romanit grafik.

Ky aktivitet i veçantë do të mbahet sot, më 8 maj, në Bibliotekën e UBT-së në Kampusin Inovativ në Lipjan, duke sjellë për studentët dhe komunitetin krijues një mundësi të rrallë për të bashkëbiseduar dhe mësuar drejtpërdrejt nga një artist me përvojë të gjerë ndërkombëtare.

Dominique Bertail, i njohur për kontributin e tij të shquar në ilustrim dhe roman grafik, do të ndajë me pjesëmarrësit procesin e tij krijues, eksperiencat profesionale në skenën ndërkombëtare dhe qasjet bashkëkohore në zhvillimin e narrativës vizuale, duke ofruar një perspektivë të avancuar mbi ndërthurjen e artit, tregimit dhe dizajnit modern.

Përmes kësaj punëtorie ekskluzive, studentët e Fakultetit të Artit dhe Dizajnit, si dhe të gjithë të interesuarit, do të kenë mundësinë të eksplorojnë dimensione të reja të ilustrimit bashkëkohor, të zhvillojnë inspirim të ri artistik dhe të angazhohen në shkëmbim idesh me një nga figurat më të rëndësishme të industrisë kreative evropiane.

Ky organizim dëshmon përkushtimin e UBT-së për të sjellë në Kosovë përvoja ndërkombëtare të nivelit të lartë dhe për të krijuar ura të fuqishme bashkëpunimi ndërmjet studentëve dhe profesionistëve globalë të artit dhe dizajnit.

Në mesnatën e 7 majit ka përfunduar afati zyrtar që partitë e regjistruara në Kosovë të njoftojnë Komisionin Qendror të Zgjedhjeve mbi pjesëmarrjen e tyre në zgjedhjet e ardhshme dhe formimin e koalicioneve parazgjedhore. Zëdhënësi i KQZ-së, Valmir Elezi, bëri të ditur se nga 53 partitë e regjistruara, 22 prej tyre kanë konfirmuar pjesëmarrjen, ndërsa 9 parti kanë njoftuar mospjesëmarrjen. Gjithashtu, janë zyrtarizuar 3 koalicione të përbëra nga gjithsej 9 parti politike.

Partitë që kanë njoftuar garimin në zgjedhje janë Partia Socialdemokrate, Kosovaki Nevi Romani Partia, Partia Socialdemokrate e Ashkalinjve, Za Slobodu Pravdu i Opstanak, Lista Serbe, Yenilikçi Türk Hareket Partisi, Lidhja Demokratike e Kosovës, Fjala, Lëvizja Përparimtare e Romëve të Kosovës, Partia Rome e Bashkuar e Kosovës – PREBK, Socialdemokratska Unija, Jedinstvena Goranska Partija, Kosova Demokratik Türk Partisi, Nova Demokratska Stranka, Iniciativa e Re Demokratike e Kosovës, Kosovski Savez, Partia Balliste, Partia Qytetare për Mirëqenie Sociale, Partia Liberale Egjiptiane, Aleanca për Ardhmërinë e Kosovës, Stranka Demokratske Akcije dhe Partia Demokratike e Kosovës.

Në anën tjetër, mospjesëmarrjen e kanë njoftuar Partia Demokratike e Unitetit, Balli Kombëtar i Kosovës, Lëvizja Qytetare Vatra, Bashkimi për Ndryshim Anamorava, Partia e Drejtësisë, Srpski Narodni Pokret, Partia Reforma Demokratike, Aleanca Kosova e Re dhe Nisma Socialdemokrate. Sa i përket koalicioneve, janë regjistruar koalicioni VAKAT, Ashkalitë e Bashkuar dhe koalicioni rreth Lëvizjes Vetëvendosje që përfshin edhe subjektet Guxo, Alternativa dhe PSHDK.

KQZ sqaron se ky njoftim është proces i ndarë nga certifikimi i subjekteve të reja, i cili përfundon më 10 maj, ndërsa afati i fundit për dorëzimin e listave të kandidatëve për deputetë nga të gjitha subjektet është data 12 maj 2026./Ekonomia online/