Gjykata Themelore në Prishtinë ka shpallur aktgjykim dënues ndaj Hysri Selimit, duke e dënuar me 6 vjet burgim për veprën penale të spiunazhit.

Sipas aktakuzës së Prokurorisë Speciale të Republikës së Kosovës, e ngritur më 9 shtator 2025, Selimi dyshohej se nga nëntori 2009 deri në arrestimin e tij më 6 maj 2025 ka bashkëpunuar me Agjencinë e Inteligjencës dhe Sigurisë së Serbisë (BIA), duke mbledhur dhe dërguar informacione të ndryshme me interes për këtë shërbim.

Në aktakuzë thuhet se ai ka raportuar për ish-pjesëtarë të UÇK-së, zhvillimet gjatë luftës, si dhe për persona të radikalizuar dhe pjesëmarrjen e tyre në konfliktin në Siri. Po ashtu, pretendohet se ai ka udhëtuar në Siri në vitin 2015 dhe më pas ka vazhduar komunikimin me zyrtarë të BIA-s pas kthimit në Kosovë.

Prokuroria ka pretenduar se për këto veprime ai është shpërblyer financiarisht dhe është pajisur me mjete komunikimi për kontakt me zyrtarët e shërbimit serb të inteligjencës.

Gjykata ka bërë të ditur se dënimi me burg do të ekzekutohet pas plotfuqishmërisë së aktgjykimit.

/A.K/

Policia e Kosovës ka njoftuar se në pikën kufitare “Dheu i Bardhë” janë arrestuar tre shtetas serbë, të cilëve gjatë kontrollit të veturës u është gjetur substancë narkotike dhe dy mullinj që shërbejnë për bluarjen e tyre.

“Gjatë kalimit në pikën e kalimit kufitar policia ka ndaluar dhe kontrolluar një automjet me targa të Serbisë në të cilën ndodheshin tre persona meshkuj shtetas të Serbisë. Gjatë kontrollit brenda në veturë  janë gjetur dhe konfiskuar dy mullinj që shërbejnë për bluarjen e substancave narkotike dhe 1 gram substancë e dyshuar narkotike e llojit marihuanë” – thuhet në njoftimin e Policisë.

Po ashtu bëhet e ditur se i dyshuari dhe dy dëshmitarët janë intervistuar dhe të njëjtit me urdhër të prokurorit janë liruar në procedurë të rregullt.

/A.K/

Liderët e Bashkimit Evropian kanë përshëndetur marrëveshjen e arritur mes Shteteve të Bashkuara të Amerikës dhe Iranit për përfundimin e luftës në të gjitha frontet, përfshirë Libanin, si dhe për rihapjen e Ngushticës së Hormuzit, një nga rrugët më të rëndësishme për furnizimet globale me energji, raporton “Euronews”.

Presidenti i Këshillit Evropian, António Costa, e ka cilësuar marrëveshjen si një hap të rëndësishëm drejt stabilitetit rajonal, duke theksuar nevojën për ndaljen e menjëhershme të konflikteve.

Edhe presidentja e Komisionit Evropian, Ursula von der Leyen, ka bërë thirrje për zbatim të shpejtë të marrëveshjes dhe respektim të sovranitetit të Libanit, duke paralajmëruar se nuk mund të ketë paqe të qëndrueshme pa stabilitet në rajon.

Përfaqësuesja e Lartë e BE-së për Politikë të Jashtme, Kaja Kallas, ka deklaruar se ministrat e jashtëm të BE-së do të diskutojnë rolin e bllokut në fazat e ardhshme të procesit të paqes.

Ndërkohë, presidenti francez Emmanuel Macron ka njoftuar se misioni ushtarak i Francës dhe Mbretërisë së Bashkuar për sigurinë detare në Ngushticën e Hormuzit është i gatshëm për dislokim, duke theksuar rëndësinë e lirisë së lëvizjes detare për ekonominë globale.

Sipas raportimeve, Ngushtica e Hormuzit ishte bllokuar në mënyrë efektive që nga fillimi i konfliktit, ndërsa ceremonia e nënshkrimit të marrëveshjes pritet të mbahet të premten në Zvicër.

/A.K/

Policia Rajonale e Ferizajt ka bërë të ditur se gjatë javës së kaluar, nga 08 deri më 14.06.2026, ka ndërmarrë aktivitete të shtuara për parandalimin e aksidenteve në komunikacion.

Gjatë kësaj periudhe janë shqiptuar gjithsej 1.279 gjoba kundërvajtëse, ndërsa janë pezulluar 12 patentë shoferë për shkelje të rënda në trafik.

Sipas të dhënave, janë regjistruar gjithsej 24 aksidente, prej të cilave 15 me lëndime ku janë lënduar 21 persona, si dhe 9 aksidente me dëme materiale.

Policia ka apeluar tek shoferët që të respektojnë rregullat e trafikut dhe të kenë kujdes të shtuar gjatë ngasjes, duke theksuar se do të vazhdojë me kontrolle të intensifikuara në terren.

Qytetarët janë ftuar të bashkëpunojnë me policinë dhe të raportojnë çdo kundërvajtje përmes stacioneve policore, aplikacionit “Lajmëro Policinë” dhe numrit 192.

/A.K/