Lajmet

Zelanda e Re i përgjigjet gazetares shtatzënë që u ndihmua nga talibanët

Ministri Chris Hipkins tha se kishte një vend për “njerëz me rrethana të veçanta” si Charlotte Bellis.

Publikuar

Zelanda e Re ka mbrojtur kontrollet e saj kufitare pasi një gazetare shtatzënë tha se duhej t’i drejtohej talibanëve për ndihmë pasi nuk ishte në gjendje të fluturonte në shtëpi.

Ministri Chris Hipkins tha se kishte një vend për “njerëz me rrethana të veçanta” si Charlotte Bellis.

Historia e saj ka hedhur në qendër të vëmendjes masat e ashpra kufitare të Wellington-it, të krijuara për të mbajtur larg koronavirusin. Disa të tjerë kundërshtuan raportin e saj “të privilegjuar” me talibanët.

Talibanët janë kritikuar rregullisht për shtypjen brutale të të drejtave të grave duke arrestuar, torturuar dhe madje vrarë disa aktiviste.

Çfarë i pyeti Charlotte Bellis talibanët?

Në një kolonë të shkruar për gazetën New Zealand Herald, zonja Bellis tha se qeveria e Zelandës së Re kishte refuzuar javën e kaluar kërkesën e saj për t’u kthyer në shtëpi për të lindur, transmeton UBT News.

Aktualisht, Wellington lejon qytetarët dhe banorët e përhershëm të hyjnë, por vetëm nëse kalojnë 10 ditë të izoluar në hotele karantine. Meqenëse ka kërkesë të lartë për objekte të tilla dhe një numër të kufizuar vendesh, shumë qytetarë nga Zelanda e Re që dëshirojnë të kthehen, janë mbyllur jashtë vendit të tyre.

Ajo e krahasoi atë përvojë me mënyrën se si u trajtua nga talibanët, me të cilët kishte kontaktuar për të pyetur nëse do të ishte e mirëpritur në Afganistan si një grua shtatzënë e pamartuar.

Zonja Bellis dhe partneri i saj, një fotoreporter belg, kishin qenë në Afganistan vitin e kaluar duke mbuluar tërheqjen e trupave amerikane dhe ishte i vetmi vend ku ajo dhe partneri i saj kishin viza.

“Mund të vini dhe nuk do të keni problem. Thjesht tregoni njerëzve se jeni e martuar dhe nëse përshkallëzohet [situata], na telefononi”, citoi zonja Bellis zyrtarët talibanë të paidentifikuar të cilët iu përgjigjën kërkesës së saj.

“Kur talibanët të ofrojnë ty – një gruaje shtatzënë, të pamartuar – një strehë të sigurt, dijeni që situata juaj është e ngatërruar”, shkroi ajo.

Nuk është e qartë se çfarë ndodh me gratë shtatzëna të pamartuara në Afganistan. Megjithatë, nënat beqare afgane kanë raportuar se janë ngacmuar shpesh nga zyrtarët talibanë, ku iu është bërë presion për të hequr dorë nga fëmijët e tyre dhe se të drejtat e tyre të kujdestarisë janë kërcënuar.

Cili ka qenë reagimi për rubrikën e saj?

Që nga publikimi i letrës së zonjës Bellis, ka pasur thirrje për autoritetet e Zelandës së Re që të rregullojnë kriteret e caktimit të karantinës emergjente për t’u kujdesur në mënyrë specifike për gratë shtatzëna.

Ministri Hipkins mbrojti politikën duke thënë se sistemi “i ka shërbyer jashtëzakonisht mirë Zelandës së Re, ka shpëtuar jetë dhe pranime në spitale dhe ka mbajtur sistemin tonë shëndetësor të mos ‘fundoset'”.

Ai shtoi megjithatë se zyrtarët e Zelandës së Re e kishin ftuar zonjën Bellis të aplikonte përsëri për vizë nën një kategori të veçantë emergjence.

Zonja Bellis thotë se asaj i është ofruar gjithashtu azil në një vend tjetër të paidentifikuar që kur doli publikisht. Megjithatë, historia e saj është kritikuar edhe nga vëzhguesit, aktivistët e të drejtave të njeriut dhe vetë afganët.

Emran Feroz, gazetar austro-afgan shkroi në Twitter duke thënë se “Historia është vetëm një vazhdim i mënyrës sesi jo-afganët trajtohen ndryshe nga talibanët”.

“Gazetarët që shiheshin si afganë shpesh përballeshin me kërcënime, rrahje, tortura dhe vrasje, ndërsa joafganët… kishin shumë privilegje, mirëpriteshin dhe trajtoheshin butësisht nga të gjitha anët”, shtoi ai.

Së fundmi, ka pasur thirrje që talibanët të lirojnë një numër aktivistesh për të drejtat e grave, të cilat nuk janë parë prej kur talibanët kanë bastisur shtëpitë e tyre dhe u arrestuan./UBTNews/

Lajmet

Gërvalla merr pjesë në takimin e Ministrave të Jashtëm

Kështu njoftoi Ministria e Jashtme.

Publikuar

nga

Zëvendëskryeministrja dhe ministrja e Punëve të Jashtme dhe Diasporës, Donika Gërvalla, me ftesë të Presidencës belge të Këshillit të BE-së, ministres së Punëve të Jashtme, Çështjeve Evropiane dhe Tregtisë së Jashtme, Hadja Lahbib, po merr pjesë në takimin ministror të BE-së në Bruksel, në 20-vjetorin e zgjerimit, kur dhjetë shtete të reja anëtare iu bashkuan Bashkimit Evropian në vitin 2004.

“Gjatë sesioneve do të diskutohet rreth sfidave, nevojave dhe praktikave më të mira dhe reformave të sundimit të ligjit në kuadër të procesit të zgjerimit të BE-së”, thuhet në njoftimin e lëshuar nga ministria.

Tutje thuhet se Kosova do të paraqes të arriturat e saj në procesin e integrimit në BE, reformat e thella të ndërmarra në sundim të ligjit dhe fusha të tjera.

“Ministrja Gërvalla do të realizojë edhe takime bilaterale me Ministra të Jashtëm dhe të Çështjeve të BE-së për të diskutuar rreth marrëdhënieve dypalëshe dhe proceset nëpër të cilat po kalon Kosova, në veçanti rreth procesit të anëtarësimit në Këshillin e Evropës”, thuhet në njoftim.

Vazhdo të lexosh

Lajmet

Sot në Kuvendin e Kosovës bëhen homazhe për ish-deputetin Ali Lajçi

Homazhet do të bëhen nga ora 10:00 deri në ora 12:00 në hollin e Kuvendit.

Publikuar

nga

Sot në Kuvendin e Kosovës do të bëhen homazhe për ish-deputetin Ali Lajçi. Homazhet do të bëhen nga ora 10:00 deri në ora 12:00 në hollin e Kuvendit. Lajçi ka vdekur ditën e hënë.

Lajçi ka përfunduar gjimnazin në Pejë dhe Fakultetin Filologjik në Prishtinë. Ai ishte ish i dënuar politik nga regjimi i Serbisë. Në vitin 1981 ai ka qenë organizator i demonstratave, arsye për të cilën është dënuar me 15 vite burg.

Që nga viti 2001 deri në vitin 2007 ai ka qenë kryetar i Komunës së Pejës, ndërsa nga viti 2007 deri në vitin 2010 deputet i Kuvendit të Republikës së Kosovës.

Ngushëllime për vdekjen e tij kanë shprehur udhëheqësit e vendit si dhe liderët politikë.

Vazhdo të lexosh

Lajmet

​25 vjet nga rënia heroike e Ilaz Kodrës

Ai ka qenë pjesë e celulave të para të UÇK-së dhe pjesëmarrës i të gjitha luftërave në Drenicë dhe rrethinë.

Publikuar

nga

Sot bëhen 25 vjet nga rënia heroike e komandantit të Ushtrisë Çlirimtare të Kosovës, Ilaz Kodra, i cili ka qenë pjesë e celulave të para të UÇK-së dhe pjesëmarrës i të gjitha luftërave në Drenicë dhe rrethinë.

Ilaz Ismajl Kodra u lind më 3 maj 1966 në lagjen Kodra të Prekazit. Shkollën fillore e kreu në vendlindje, ndërsa tetëvjeçaren dhe shkollën e mesme, Gjimnazin, i ka kryer në Skenderaj. Pas kryerjes së shkollës së mesme, regjistrohet në Shkollën e Lartë Komerciale në Pejë. Shërbimin e detyrueshëm ushtarak e ka kryer në Slloveni.

Ndikimi atdhetar, që kishte ushtruar te rinia përparimtare dhe revolucionare e Prekazit e më gjerë, akti heroik dhe qëndresa e Tahir dhe Nebih Mehës, më 13 maj të vitit 1981, kundër policisë jugosllave, i kishte dhënë impulse idesë së vazhdimit pa kthim të rezistencës së armatosur kundër pushtuesit.

Edhe Ilazi, ashtu si më parë Adem dhe Hamëz Jashari kishin mendime identike lidhur me nevojën e fillimit të luftës së armatosur, në kohën kur po shihej mirëfilli se Jugosllavia do të shpërbëhej dhe kur tashmë kishte filluar shkatërrimi i saj me ndarjen e Sllovenisë dhe me fillimin e luftës në Kroaci e më vonë edhe në Bosnje e Hercegovinë.

Ilaz Kodra mbante kontakte ilegaliteti me komandantin Adem Jashari dhe me pjesëtarët e bërthamës së parë çlirimtare të Drenicës. Ata, në vitin 1991 kishin kaluar kufirin edhe ishin futur ilegalisht në Shqipëri, me qëllim për t’u stërvitur dhe për t’ u armatosur.

Në periudhën para fillimit të luftës së hapur kundër forcave pushtuese serbe, Ilaz Kodra mori pjesë aktive në forcimin e njësiteve luftarake të UÇK-së, në mobilizimin e vullnetarëve. Po ashtu, ai mori pjesë edhe betejën e njohur të Rezallës së Re, betejë kjo që u zhvillua më 26 nëntor të vitit 1997.

Pas betejës së Adem Jashari dhe të Jasharëve të tjerë në Prekaz më 5, 6 dhe 7 mars të vitit 1998, bashkëluftëtarët e komandantit vazhdojnë veprimet luftarake duke e zgjeruar UÇK-në po thuajse në çdo fshat të kësaj ane.

Ilaz Kodra, Fehmi Lladrovci, Abedin Rexha e të tjerë ishin kthyer në Drenicë së bashku me familjet e tyre. Po ashtu, frontet e luftës ishin zgjeruar edhe në Dukagjin, Anadrin, Neredime, në Shalë e në Llap.

Ilaz Kodra ishte pjesëtar i kreut të luftës në Drenicë. Së bashku me Sami Lushtakun, Hashim Thaçin, Sylejman Selimin, Mujë Krasniqin, Rexhep Selimin, Nuredin Lushtakun, Fehmi Lladrovcin, Xhevë Krasniqin-Lladrovci, Abedin Rexhën, Musë Jasharin, Sahit Jasharin, Shaban Shalën, Fadil Kodrën, Zenun Kodrën, Ilaz Dërgutin, Asllan Fazliun, Besim Malën, Sabit Llardovcin e shumë të tjerë, komandant Ilaz Kodra ka marrë pjesë si në organizimin dhe strukturimin e luftës çlirimtare, ashtu edhe në zhvillimin e saj në terren, në malet e Qyqavicës dhe gjithandej në Drenicën Qendrore.

Pas rënies së Fehmi Lladrovcit dhe Xheva Krasniqit-Lladrovci më 22 shtator 1998, Ilaz Kodra u caktua komandant i kësaj brigade, e cila mori emrin e komandantit të saj të parë, Fehmi Lladrovci.

Rrezja e veprimit luftarak e Brigadës 114, “Fehmi Lladrovci” e Zonës Operative të Drenicës shtrihej në një pjesë të Qyqavicës, prej Kronit të Mbretit, në Vasilevë në Drenas, Verboc Shtuticë, Baks, Qirez, Morinë, Dashevc, Prekaz, Polac, Prelloc, Skenderaj e deri në Tërnac.

Në prill të vitit 1999, forcat okupatore serbe të goditura ashpër nga aeroplanët e NATO-s mllefin dhe zemërimin po e derdhnin kundër popullatës civile duke pushkatuar e masakruar kudo ku ata bënin përpjekje të mbijetonin, në kushte dhe rrethana të një rrethimi të hekurt.

Me të marrë lajmin se forcat serbe po bënin përpjekje të mësynin popullatën civile në fshatin Verboc e Shtuticë, Ilaz Kodra niset për t i shkuar në ndihmë popullatës.

Herët në mëngjes fillon sulmi i forcave armike, të cilat kishin rrethuar vendi në formë patkoi. Ilaz Kodra ka luftuar fyt për fyt kundër forcave serbe. Ai ra në altarin e lirisë më 30 prill 1999, në fshatin Shtuticë”.

Në vitin 2012 është zbuluar busti i heroit dhe është inauguruar kulla-muze e tij.

Vazhdo të lexosh

Lajmet

Kurti sot bën homazhe në përkujtim të masakrave në Gllobar, Verboc, Shtuticë dhe Marinë

Homazhet do të fillojnë nga ora 08:30.

Publikuar

nga

Kryeministri i Kosovës, Albin Kurti, sot bën homazhe në përkujtim të masakrave në Gllobar, Verboc, Shtuticë dhe Marinë.

Homazhet do të fillojnë nga ora 08:30. Ato mbahen në Gllobar, Verboc, Shtuticë dhe Marinë.

Vazhdo të lexosh

Të kërkuara