Deputetët do të mblidhen sërish sot për një tentim të radhës për konstituim të Kuvendit të Kosovës. Kjo është përpjekja e njëzet me radhë që prejj 15 prillit kur ka filluar seanca konstituive. Vazhdimi i seancës konstituive bëhet në orën 11:00 dhe nuk pritet ndonje ndryshim nga ditët e mëparshme.

Në vazhdimin e seancës ditën e mërkurë nuk pati kuorum për vendimmarrjen mbi komisionin për votimin e fshehtë.

Çështja e konstituimit të legjislaturës së nëntë ka ngecur te votimi i kryetarit të Kuvendit pasi partia e parë e dalë nga zgjedhjet e nëntë shkurtit, Lëvizja Vetëvendosje – në koalicion me Guxo dhe Alternativa nuk po arrin t’i sigurojë 61 votat e nevojshme për të zgjedhur Albulena Haxhiun kryeparlamentare.

Partia Demokratike e Kosovës dhe Aleanca për Ardhmërinë e Kosovës kanë kërkuar ndërrim të kandidatit të propozuar ndërkaq, Lidhja Demokratike e Kosovës është shprehur kundër çdo propozimi të Lëvizjes Vetëvendosje.

Propozimi – për disa herë me radhë – i kryesuesit të seancës, Avni Dehari, që procesi i votimit të bëhet në mënyrë të fshehtë, nuk po merr përkrahje nga partitë e tjera parlamentare.

Nga Lëvizja Vetëvendosje, kanë propozuar edhe që vazhdimet e seancave të mos bëhen çdo 48 orë – siç e kërkon rregullorja e Kuvendit, por të bëhen një herë në javë.

Në përpjekje për të zhbllokuar situatën, javën që shkoi, presidentja Vjosa Osmani takoi përfaqësuesit e partive politike, por as aty nuk pati pajtim për konstituim të Kuvendit.

Thirrje për dalje nga ngërçi ka bërë edhe shefja e diplomacisë e Bashkimit Evropian, Kaja Kallas, e cila po qëndron për vizitë në Kosovë.

Të enjten, më 22 maj, Kallas u bëri thirrje politikanëve që janë në Kuvend që të bashkëpunojnë për të zhbllokuar situatën.

Në një konferencë për media në Prishtinë, Kallas kujtoi se formimi i institucioneve të reja është “thelbësor për stabilitetin dhe të ardhmen evropiane të Kosovës”.

Punëtorët e Kompanisë Rajonale të Mbeturinave “Pastrimi” kanë hyrë në ditën e dytë të grevës, duke qëndruar para ndërtesës së Komunës së Prishtinës në një tendë të vendosur për të vazhduar protestën. Ata kërkojnë zgjidhje emergjente për gjendjen e rëndë financiare në të cilën, sipas tyre, ndodhet ndërmarrja për shkak të mospagesës së borxhit prej 2.7 milionë euro nga Komuna.

“Pastrimi” ka pezulluar shërbimin e grumbullimit të mbeturinave, duke e cilësuar situatën si të paqëndrueshme financiarisht. Ndërkohë, Komuna e Prishtinës ka mohuar ekzistencën e borxhit dhe ka akuzuar menaxhmentin e ndërmarrjes për sabotim dhe keqpërdorim të punëtorëve për qëllime politike.

Kryeqyteti tashmë është përballur me grumbullim të madh mbeturinash nëpër rrugë, gjë që ka ngritur shqetësime për rrezik të mundshëm shëndetësor për qytetarët.

Ndërkohë, Prokuroria ka nisur të mbledhë informacione lidhur me situatën për të shqyrtuar mundësinë e hetimeve më të thelluara. Sindikata e “Pastrimit” ka theksuar se greva është akt i domosdoshëm për të tërhequr vëmendjen mbi situatën alarmante financiare të ndërmarrjes.

Kryetari i Aleancës për Ardhmërinë e Kosovës (AAK), Ramush Haradinaj, ka pritur në një takim zyrtar Përfaqësuesen e Lartë dhe Zëvendëspresidente të Komisionit Evropian, znj. Kaja Kallas, e cila po qëndron për vizitë në Prishtinë.

Haradinaj u shpreh i nderuar për takimin dhe vlerësoi angazhimin e znj. Kallas dhe të Bashkimit Evropian për mbështetjen ndaj Kosovës dhe stabilitetit në rajon. Ai kërkoi heqjen urgjente të masave ndëshkuese ndaj Kosovës, duke e cilësuar këtë si një hap të rëndësishëm drejt normalizimit të marrëdhënieve me BE-në.

“Shpreha nevojën urgjente për heqjen e sanksioneve ndaj Kosovës dhe njëkohësisht nënvizova rëndësinë e mbështetjes së vazhdueshme të Bashkimit Evropian në rrugëtimin tonë drejt integrimit evropian,” deklaroi Haradinaj pas takimit.

Ai theksoi përkushtimin e AAK-së ndaj vlerave perëndimore dhe synimit për integrim të plotë të Kosovës në strukturat euroatlantike, duke e cilësuar partneritetin me Bashkimin Evropian si thelbësor për të ardhmen politike dhe ekonomike të vendit.

Pas grevës së zhvilluar sot nga punëtorët e Kompanisë Rajonale të Mbeturinave “Pastrimi”, Komuna e Prishtinës ka reaguar duke fajësuar menaxhmentin për situatën dhe duke e cilësuar protestën si të panevojshme.

Në një reagim të publikuar, Komuna shpreh shqetësim për atë që e quan keqpërdorim të punëtorëve për arsye politike.

“Përderisa Kryeqyteti, është duke bërë gjithcka për tejkalimin e kësaj gjendje konsiderojmë se grumbullimi i punëtorëve të KRM “Pastrimi” para objektit të Komunës është i panevojshëm, keqpërdorimi i tyre për qëllime politike nga menaxhmenti është i papranueshëm dhe nuk duhet të vazhdojë” thuhet në deklaratë.

Komuna ka bërë të ditur se ka nënshkruar një kontratë në vlerë prej 1.5 milionë euro me ndërmarrjen “Pastrimi”, për pastrimin dhe mirëmbajtjen e hapësirave publike në kryeqytet.

“Kryeqyteti ka nënshkruar kontratën me Kompaninë Regjionale të Pastrimit, në vlerë prej 1.5 milion euro, për mirëmbajtjen dhe pastrimin e hapësirave publike në qytet”, përfundon reagimi.