Klubi i basketbollit KB Vëllaznimi është sanksionuar nga Tribunali i Arbitrazhit në Basketboll (BAT), vendim i publikuar në faqen zyrtare të FIBA më 13 prill.

Sanksioni nënkupton që klubi gjakovar aktualisht nuk mund të regjistrojë lojtarë të rinj, derisa të zgjidhë çështjen financiare me palën që ka fituar rastin në BAT ose të arrijë marrëveshje.

Ky vendim vjen si pasojë e mos përmbushjes së obligimeve kontraktuale ndaj të paktën një lojtari apo trajneri, duke e futur klubin në një situatë të vështirë administrative dhe sportive.

Rasti i Vëllaznimit vjen në një periudhë kur disa klube të tjera kosovare kanë pasur përballje me BAT-in, përfshirë edhe KB Peja, e cila më herët këtë sezon ishte nën sanksione të ngjashme, por më pas arriti marrëveshje për t’i zgjidhur obligimet.

Ndërkohë, Sigal Prishtina gjithashtu ka pasur raste të raportuara në BAT, por pa sanksione të konfirmuara.

Në aspektin sportiv, Vëllaznimi e mbylli stinorin e rregullt në Superligën e Kosovës në vendin e fundit, pas një përfundimi të komplikuar të garës ku disa skuadra kishin pikë të barabarta dhe renditja u vendos sipas bilancit të ndeshjeve të ndërsjella.

Klubi gjakovar kishte shpresuar të mbijetonte në elitë pas fitores në xhiron e fundit ndaj Pejës, por interpretimi zyrtar i rregullave nga Federata e Basketbollit të Kosovës (FBK) nuk i favorizoi, duke e çuar në Ligën e Parë për sezonin e ardhshëm.

Vëllaznimi synon rikthimin e shpejtë në Superligë, por fillimisht duhet të zgjidhë çështjen në BAT për të normalizuar situatën me transferimet dhe funksionimin e klubit.

Xhudisti kosovar Akil Gjakova ka zhvilluar një përballje të fortë në çerekfinale të Kampionatit Evropian, ku u ndesh me legjendën gjeorgjiane dhe kampionin olimpik Lasha Shavdatuashvili.

Gjakova ishte për një kohë të gjatë në epërsi dhe tregoi paraqitje shumë të mirë, por ritmi i lartë dhe lodhja nga dueli paraprak – që zgjati mbi shtatë minuta – ndikuan në vazhdimësinë e tij në kohën shtesë.

Këtë e shfrytëzoi përvoja e Shavdatuashvilit, i cili arriti të përmbysë situatën dhe të sigurojë fitoren, duke kaluar në gjysmëfinale.

Megjithatë, Gjakova mbetet në garë për medalje. Ai tani do të vazhdojë në repesazh dhe për të arritur medaljen e bronztë i nevojiten edhe dy fitore.

Xhudisti kosovar Akil Gjakova ka vazhduar me paraqitje të mira në Kampionatin Evropian, duke siguruar kualifikimin në çerekfinale të kategorisë deri në 73 kilogramë.

Në rundin e radhës, ai u përball me britanikun Benjamin Levy, në një duel shumë të fortë dhe të balancuar që zgjati mbi shtatë minuta.

Pas një lufte të gjatë dhe taktike, Gjakova arriti të gjejë momentin vendimtar, duke realizuar një hedhje të bukur që i siguroi fitoren me “Ippon”.

Me këtë triumf, ai vazhdon garën mes tetë më të mirëve dhe mbetet një nga pretendentët për medalje në këtë kampionat.

Xhudistja kosovare Laura Fazliu ka përfunduar garën pa arritur të afrohet te zona e medaljeve në Kampionatin Evropian të xhudos që po mbahet në Tbilisi.

Fazliu e nisi garën nga xhiroja e dytë e kategorisë deri në 63 kilogramë, pasi në rundin e parë ishte e lirë. Në përballjen e saj të parë, ajo u ndesh me sllovenen Kaja Kajzer, e cila u tregua më e saktë dhe më dominuese në tatami.

Kajzer kaloi në epërsi që në fillim me “Yuko”, ndërsa më pas e përmbylli luftën me “Ippon”, duke mos i lënë shumë hapësirë Fazliut për reagim.

Nga xhudistja kosovare pritej një paraqitje më e fortë dhe luftë për medalje, por këtë herë ajo nuk arriti të gjejë ritmin e duhur dhe e mbylli garën më herët se sa pritej.