Jurgen Klopp është emëruar zyrtarisht përzgjedhës i Kombëtares së Gjermanisë. Trajneri i njohur u prezantua të premten nga Federata Gjermane e Futbollit, duke nisur një kapitull të ri në karrierën e tij.

Klopp zëvendëson Julian Nagelsmannin, i cili dha dorëheqje pas eliminimit zhgënjyes të Gjermanisë në Kupën e Botës.

Trajneri 59-vjeçar ka nënshkruar kontratë katërvjeçare, e cila hyn në fuqi më 15 gusht. Ai do ta udhëheqë Gjermaninë në kualifikimet dhe fazën finale të Euro 2028, si dhe në Kupën e Botës 2030. Në stafin e tij teknik do të jenë Peter Krawietz, Pepijn Lijnders dhe Sven Bender.

Gjatë prezantimit, Klopp tha se drejtimi i përfaqësueses gjermane është një nder i madh dhe premtoi të ndërtojë një skuadër të bashkuar dhe konkurruese.

“Ekipi kombëtar mund ta bashkojë Gjermaninë si asgjë tjetër. Për këtë arsye kjo detyrë është shumë e veçantë për mua. Do të zhvillojmë një ekip me lojtarë që luftojnë për njëri-tjetrin, që e shijojnë futbollin dhe në të cilin njerëzit e vendit tonë mund të besojnë”, deklaroi Klopp.

Presidenti i Federatës Gjermane të Futbollit, Bernd Neuendorf, e cilësoi Kloppin si zgjedhjen ideale për këtë post.

“Jurgen Klopp, si pak të tjerë, përfaqëson pasionin, besueshmërinë dhe aftësinë për të frymëzuar njerëzit. Pas largimit të Nagelsmannit, ai ishte zgjedhja jonë e parë për drejtimin e ekipit kombëtar”, tha Neuendorf.

Klopp rikthehet në profesionin e trajnerit pas një periudhe në kompaninë Red Bull, ku kishte rolin e drejtuesit global të futbollit.

Gjatë karrierës së tij, ai drejtoi Mainzin, Borussia Dortmundin dhe Liverpoolin, duke fituar trofe të shumtë. Me Dortmundin fitoi dy tituj të Bundesligës, Kupën e Gjermanisë dhe dy Superkupa, ndërsa me Liverpoolin triumfoi në Premier League, Ligën e Kampionëve, Kupën FA, Kupën e Ligës, Superkupën e Evropës dhe Kupën e Botës për Klube.

Debutimi i Kloppit në stolin e Gjermanisë do të jetë në fund të shtatorit, kur “Panzerët” do të përballen me Holandën në Amsterdam në kuadër të Ligës së Kombeve të UEFA-s.

D.L

Futbollisti i kombëtares së Australisë, Cristian Volpato, dyshohet se ka rezultuar pozitiv në testin për përdorim të kokainës, pasi u ndalua nga policia për tejkalim të shpejtësisë në Sydney.

Mesfushori 22-vjeçar, i cili ka qenë pjesë e Australisë në Kupën e Botës, u ndalua nga policia teksa drejtonte një veturë të tipit “BMW Coupe”. Sipas raportimeve, në një zonë ku shpejtësia e lejuar ishte 60 kilometra në orë, Volpato dyshohet se po voziste me shpejtësi nga 86 deri në 94 kilometra në orë.

Testi për alkool, të cilit iu nënshtrua në vendngjarje, rezultoi negativ.

Megjithatë, sipas raportimeve të BBC, futbollisti dyshohet se doli pozitiv për kokainë gjatë një kontrolli të dytë, pasi u ndalua përsëri në të njëjtën natë. Në këtë rast, ai po drejtonte automjetin me shpejtësi prej 109 kilometrash në orë në të njëjtën zonë.

Si pasojë e incidentit, patentë-shoferi i Volpatos është pezulluar për gjashtë muaj, ndërsa atij i është marrë edhe një mostër për një test të dytë konfirmues.

Volpato ka qenë pjesë e përfaqësueses së Australisë në Kupën e Botës, ku është paraqitur në tri nga katër ndeshjet e ekipit të tij.

D.L

Pep Guardiola ka refuzuar mundësinë për të marrë drejtimin e përfaqësueses së Italisë, ka raportuar të premten Sky Italia.

Sipas mediumit italian, trajneri spanjoll i ka kthyer përgjigje negative Federatës Italiane të Futbollit pas kontaktit të bërë të enjten mbrëma. Vendimi i Guardiolas lidhet me arsye personale që shkojnë përtej aspektit sportiv.

Drejtuesit e federatës italiane ishin takuar me trajnerin spanjoll dhe kishin tentuar ta bindnin që të merrte drejtimin e “Azzurrëve”. Madje, sipas raportimeve, ishin të gatshëm të bënin përjashtime për të përballuar kërkesat financiare të Guardiolas.

Pas refuzimit të tij, kandidatët kryesorë për postin e përzgjedhësit të Italisë janë bërë Roberto Mancini dhe Andrea Pirlo. Federata kishte kontaktuar edhe Carlo Ancelottin, por ai ka vendosur të vazhdojë punën si trajner i Brazilit.

Guardiola aktualisht është pa angazhim pas largimit nga Manchester City në fund të sezonit të kaluar. Me klubin anglez, trajneri spanjoll arriti suksese të mëdha dhe hyri në historinë e futbollit evropian.

D.L

Ndihmëstrajnerja e përfaqësueses U17 të Kosovës në konkurrencën e femrave, Trendelina Gashi, e ka vlerësuar si shumë të rëndësishëm organizimin e Kampionatit Ballkanik në Kosovë, duke theksuar se një ngjarje e tillë është dëshmi e kapaciteteve organizative të vendit.

Sipas saj, organizimi i këtij kampionati jo vetëm që promovon volejbollin kosovar, por shërben edhe si motivim për gjeneratat e reja që të merren me sport.

“Është shumë e rëndësishme për Kosovën, sepse tregon që kemi kapacitet me organizu gara ndërkombëtare. Kjo e promovon volejbollin tonë dhe i motivon edhe gjeneratat e reja”, u shpreh Gashi.

Ajo shtoi se besimi i fituar nga organizimet ndërkombëtare po reflektohet edhe në ngjarjet e mëdha sportive që e presin Kosovën në të ardhmen.

“Gjithashtu, fakti që Kosova do t’i organizojë edhe Lojërat Mesdhetare 2030 tregon se sporti ynë po zhvillohet dhe po fitojmë besimin për organizime gjithnjë e më të mëdha”, theksoi ndihmëstrajnerja e Kosovës.

Kampionati Ballkanik U17 në konkurrencën e femrave po zhvillohet në Kosovë, duke mbledhur ekipet më të mira të rajonit dhe duke i ofruar volejbollit kosovar një mundësi të rëndësishme për promovim në arenën ndërkombëtare.

D.L