Ish-sulmuesi i Barcelonës, Cristian Tello, ka njoftuar tërheqjen nga futbolli profesionist në moshën 35-vjeçare.

Tello, i formuar në akademinë e njohur të Barcelonës, La Masia, u bë i njohur gjatë periudhës së tij me gjigantin katalanas.

Gjatë karrierës, spanjolli ka veshur fanellat e disa klubeve, përfshirë Porton, Fiorentinën, Real Betisin, Al-Fateh, Al-Orobah dhe Los Angeles, ndërsa aventura e tij e fundit ishte te Palm City në Emiratet e Bashkuara Arabe.

Me Barcelonën, Tello fitoi titullin e LaLigës, ndërsa me Real Betisin triumfoi në Kupën e Mbretit. Ai gjithashtu fitoi MLS Cup me Los Angeles.

Në një mesazh për largimin nga futbolli, Tello ka falënderuar sportin që i dha mundësinë të luante në nivelin më të lartë për 16 vjet.

“Sot është një nga ato ditë të vështira për çdo lojtar. Është koha t’i them lamtumirë futbollit profesionist. Nuk do ta kisha imagjinuar kurrë se do të mund të shijoja atë që dua, në nivelin më të lartë, për 16 vjet. E konsideroj veten vërtet të privilegjuar. Tani fillon një kapitull i ri në jetën time.”

Me fanellën e Barcelonës, ish-sulmuesi i krahut regjistroi 86 paraqitje, duke shënuar 20 gola dhe 14 asistime.

Tello largohet nga futbolli profesionist pas një karriere 16-vjeçare, në të cilën pati mundësinë të luante në disa prej kampionateve më të njohura të Evropës dhe më gjerë.

D.L

Edon Zhegrova do të ketë një tjetër mundësi për të fituar besimin te Juventusi, pasi transferimi i mundshëm i tij te skuadra saudite Al-Ittihad nuk do të realizohet.

Ylli i Kombëtares së Kosovës ka qenë në qendër të vëmendjes gjatë kësaj vere, për shkak të spekulimeve të vazhdueshme për një largim nga “Zonja e Vjetër”.

Në ditët e fundit, situata u bë edhe më e paqartë pasi trajneri Luciano Spalletti vendosi të mos e përfshijë Zhegrovën në listën e lojtarëve për Ligën e Evropës.

Një nga destinacionet e përfolura për sulmuesin kosovar ishte Al-Ittihad, por kjo mundësi tashmë është mbyllur.

Sipas ekspertit të transferimeve Fabrizio Romano, ishte pikërisht klubi saudit ai që vendosi të mos vazhdonte me negociatat për transferimin e Zhegrovës.

“Edon Zhegrova nuk do t’i bashkohet Al-Ittihadit. Afati kalimtar në Arabinë Saudite tashmë është mbyllur dhe Al-Ittihad vendosi të mos e vazhdojë marrëveshjen për Zhegrovën. Ai ishte i treti në listën e tyre, por në fund zgjodhën të mos e realizonin këtë transferim”, ka raportuar Romano.

Kësisoj, Zhegrova do të mbetet te Juventusi dhe tashmë sfida e tij kryesore është të bindë Spallettin se meriton më shumë hapësirë në skuadër.

Sulmuesi kosovar u aktivizua edhe në derbin ndaj AC Milanit, por pati shumë pak kohë për të treguar vlerat e tij, pasi u inkuadrua në lojë vetëm në minutën e 89-të.

Tani, me mundësinë e largimit nga Torino të mbyllur, Zhegrova duhet të shfrytëzojë çdo minutë në dispozicion për të rikthyer veten në planet e trajnerit italian.

D.L

Fabio Grosso është bërë trajneri i parë i shkarkuar në sezonin 2026/27 në pesë ligat kryesore të futbollit evropian.

Trajneri italian u largua nga drejtimi i Fiorentinës pas një starti katastrofal në Serie A, ku skuadra i humbi të tri ndeshjet e para të kampionatit.

Fiorentina pësoi humbje ndaj Romës, Frosinones dhe Torinos, ndërsa disfata e fundit duket se ishte vendimtare për të ardhmen e Grossos në stolin e klubit.

“ACF Fiorentina konfirmon se Fabio Grosso është liruar nga detyrat si trajner i ekipit të parë”, thuhet në njoftimin zyrtar të klubit pas humbjes ndaj Torinos.

Largimi i Grossos vjen në një moment veçanërisht të rëndësishëm për Fiorentinën, e cila këtë vit po shënon 100-vjetorin e themelimit.

Tashmë drejtuesit e klubit duhet të gjejnë një trajner të ri, me synimin për ta kthyer skuadrën në rrugën e rezultateve pozitive pas një fillimi zhgënjyes të sezonit.

D.L

Raphinha po përjeton një fillim spektakolar të sezonit 2026/27 në LaLiga, duke hyrë në histori si vetëm lojtari i dytë në shekullin XXI që arrin të shënojë gjashtë gola në katër ndeshjet e para të kampionatit.

Sulmuesi brazilian i Barcelonës e kompletoi këtë statistikë në fitoren bindëse 5-0 ndaj Valencias, të dielën, duke shënuar edhe një tjetër gol pas dy dopietave ndaj Elches dhe Rayo Vallecanos, si dhe golit kundër Athletic Bilbaos.

Para Raphinhas, këtë arritje e kishte regjistruar vetëm një futbollist: Lionel Messi.

Legjenda argjentinase e Barcelonës e kishte bërë këtë në dy sezone radhazi, duke shënuar nga gjashtë gola në katër javët e para të LaLiga-s në sezonet 2012/13 dhe 2013/14.

Tashmë, Raphinha i është bashkuar Messit në këtë listë ekskluzive, pasi ka gjetur rrugën e rrjetës në secilën prej katër paraqitjeve të tij në kampionat.

Raphinha kryeson garën për Pichichi

Me gjashtë gola, braziliani aktualisht kryeson listën e golashënuesve të LaLiga-s.

Pas tij renditet Sergio Camello i Rayo Vallecanos me pesë gola, ndërsa në garën e hershme për trofeun Pichichi është edhe ylli i Real Madridit, Kylian Mbappé.

Megjithatë, ajo që e bën edhe më mbresëlënës startin e Raphinhas është fakti se këto shifra po i regjistron në një pozicion të ri në fushë, pasi këtë sezon po aktivizohet si sulmues qendror, ndryshe nga vitet e kaluara kur luante kryesisht në krah.

D.L