Dogana e Kosovës ka njoftuar se gjatë një operacioni ka ndaluar një 1 kilogram ari të padeklaruar në aeroport, me pastërti prej 14 karatësh.

Sipas njoftimit të Doganës, gjatë kontrollit të udhëtarëve, imazhet e skenerëve treguan indikacione për mallra të padeklaruara brenda një çante.

“Pas hapjes së çantës, u zbuluan mallrat e fshehura së bashku me dokumentacionin përkatës që shoqëronte mallrat. Pas një vlerësimi të hollësishëm nga Dogana e Kosovës, u konstatua se vlera reale e arit të ndaluar është 59,294.12 euro”.

“Rasti është duke u trajtuar në bashkëpunim të ngushtë me Sektorin e Hetimeve të Doganës së Kosovës dhe Prokurorin e Shtetit, për të analizuar të gjitha detajet dhe për të ndërmarrë veprimet e duhura ligjore ndaj individëve përgjegjës”, thuhet në njoftim

Më tej, në njoftim thuhet se përmes kontrolleve të vazhdueshme dhe bashkëpunimit me institucionet relevante, Dogana luan një rol kyç në mbrojtjen e integritetit të kufijve dhe tregut të Kosovës.

Të paktën 45 palestinezë janë vrarë në valën e fundit të sulmeve izraelite në të gjithë Gazën ndërsa rrethimi i veriut nga Izraeli vazhdon me ushtrinë që vendos fuçi të mbushura me eksploziv për të hedhur në erë shtëpitë.

Në ditën e 11-të të pushtimit tokësor të Gazës veriore, ushtria izraelite nisi një sulm të madh në lagjen al-Faluja në kampin e rrethuar të refugjatëve Jabalia.

Paqeruajtësit e OKB-së do të qëndrojnë në pozicionet e tyre në Libanin jugor, thotë shefi i misionit, pasi trupat e UNIFIL u plagosën në sulmet izraelite. Të paktën 21 persona janë vrarë në një sulm ajror izraelit në fshatin Aitou, kryesisht të krishterë, në veri të Libanit.

Në Gaza, të paktën 42,289 njerëz janë vrarë dhe 98,684 janë plagosur në sulmet izraelite që nga tetori 2023. Të paktën 1,139 njerëz u vranë në sulmin e Hamasit ndaj Izraelit më 7 tetor 2023, dhe më shumë se 200 njerëz u zunë robër./UBTNews/

Inteligjenca artificiale është një mjet i fuqishëm në luftimin e terrorizmit dhe krijimin e një bote më të sigurt, por nuk duhet injorohet fakti që ky mjet përdoret edhe nga organizatat terroriste për qëllimet dashakeqe. Kështu u tha në debatin e organizuar nga Qendra Amerikane për Luftimin e Ekstremizmit dhe Terrorizmit (AÇET) me temën “Roli i Inteligjencës Artificiale (IA) në Luftën Kundër Terrorizmit dhe Sigurinë Kombëtare”.

Ministër i Punëve të Brendshme, Xhelal Sveçla theksoi se Kosova viteve të fundit është përballur me numër të madh të rasteve terroriste, ndërsa shtoi se si ministri kanë zhvilluar strategjitë që parashohin kapacitetet për luftimin e terrorizmit.

Ministri, Sveçla theksoi se inteligjenca artificiale është një mjet i fuqishëm në luftimin e terrorizmit. Por, ai shtoi se nuk duhet të injorohet fakti që ky mjet përdoret edhe nga organizatat terroriste për qëllimet dashakeqe.

“Roli i inteligjencës artificiale në luftimin e terrorizmit bëhet jetik, ne tashmë kemi pranuar se inteligjenca artificiale është një mjet i fuqishëm në luftimin e terrorizmit në shumë dimensione. Fillimisht neve na ofron mundësinë të menaxhojmë të dhëna që janë jashtëzakonisht të mëdha dhe të punojmë në mënyrë më efikase dhe efektive. Inteligjenca artificiale mund të bëjë në mënyrë automatike detyrat e vazhdueshme duke hequr barrën nga zyrtarët tanë dhe sigurisht duke gjurmuar të gjithë terroristët në një mjedis të tillë, dhe të gjitha këto shkathtësi mund të jenë jetike në mbrojtjen e qytetarëve tanë nga sulmet kibernertike…. Ne mendojmë që inteligjenca artificiale mund të ndihmoj hetimet financiare që t’i identifikojmë transaksionet e dyshimta dhe mund të japim indikacione për financimin e terrorizmit… Nuk mund ta injorojmë faktin që organizatat terroriste janë duke e shfrytëzuar inteligjencën artificiale për qëllimet dashakeqe për të krijuar dezinformata dhe për të bërë identitete sintetike për të sulmuar me sulme kibernetike”, tha ai.

Dwaine Lee, zëvendëspresident në Qendrën Amerikane për Luftimin e Ekstremizmit dhe Terrorizmit u shpreh se inteligjenca artificiale mund të ketë ndikim pozitiv në zbulimin e terrorizmit.

Duke theksuar se ky mjet mund të përdoret edhe nga vetë terroristët, Lee deklaroi se duhet parë se si inteligjenca artificiale mund të përdoret për të mbajtur vendin e sigurt.

“Inteligjenca artificiale me të vërtetë mund të ketë ndikim pozitiv në zbulimin dhe prapësimin e terrorizmit, por gjithashtu është edhe e pritshme se edhe terroristët e përdorin po ashtu për radikalizimin dhe shënjestrimin e njerëzve të caktuar. Prandaj, detyra jonë dhe diskutimi i sotshëm është që të kemi një debat të frytshëm një bashkëbisedim të frytshëm në atë se si mund ta përdorim si mjet të ri që më së miri ta mbajnë Kosovën dhe këtë regjion dhe synimi unë ta kemi krejt botën një vend të sigurt për ne”, theksoi ai.

Drejtor i Departamentit për Siguri dhe Siguri Publike në OSBE, Edward Anderson këshilloi se inteligjenca artificiale duhet të përdoret me një ekuilibër. Sipas tij ky mjet duhet të përdoret për të mirë dhe sundim të ligjit.

“Të kemi një zingjir të ruajtjes dhe një zingjir të intervenimit dhe Kosova po bëhet një vend historik se sa herë kur po kthehem këtu po merrni shumë gjëra për sipër në një kohë të shkurtër do të thotë gjithmonë duke përdorur më të mirën e sundimit të ligjit. Duhet ta pranoj se duhet të ketë një përcaktim për ta bërë këtë….Mos e përdorni inteligjencën artificiale për gjithçka, por vetëm kur është e rëndësishme duhet të ketë një ekuilibër të tillë, dhe kur flasim për intervenimet kundër terrorizmit është çështje që nga përvoja ime jam i frustruar duhet të punojmë shumë shpejt me ata kundërshtarët tanë ta kapim hapim dhe besoj që edhe në Kosovë është e njëjta”, deklaroi Anderson.

Shqipëria ka hapur kapitullin e parë të negociatave për anëtarësim me Bashkimin Evropian më 15 tetor.

Kryeministri i Shqipërisë, Edi Rama, në konferencën e përbashkët me ministrin hungarez të Punëve të Jashtme dhe Tregtisë, Peter Szijjarto, në Luksemburg, e vlerësoi si historik këtë moment.

“Çelja e kapitujve përbën arritje të madhe dhe shënon gurthemel historik në rrugëtimin e përbashkët. Çdo sukses që Shqipëria në procesin e BE-së duhet të shihet si hap për të gjithë rajonin. Për Shqipërinë nuk ka tjetër të ardhme”, tha Rama.

Sipas metodologjisë së re, në procesin e zgjerimit fillimisht është hapur grupi i parë ku janë kapitujt që kanë të bëjnë me sundimin e ligjit. Progresi në këtë fushë do të diktojë edhe përparimin në tërë procesin negociator.

Kryediplomati hungarez Szijjarto tha se procesi i zgjerimit të BE-së duhet të përshpejtohet.

“Na duhet energjia e re dhe kjo do të vijë nga hapësira e Ballkanit Perëndimor. Është në interes të BE-së që zgjerimi të përshpejtohet. Na duhet të marrim hapa urgjente për të ruajtur besueshmërinë e politikës së zgjerimit. Duhet të përshpejtojmë procedurën e zgjerimit tani“, tha ai.

Szijjarto theksoi se Shqipëria është gati për t’iu bashkuar BE-së, duke shtuar se shpreson që Brukseli të bëjë “detyrat burokratike”, dhe që një tjetër konferencë të realizohet brenda presidencës hungareze.

Edhe komisioneri për zgjerimin e BE-së, Oliver Varheyli nënvizoi rëndësinë e zgjerimit të BE-së.

“Dua të falënderoj presidencën e Hungarisë që vendosi zgjerimin si përparësi politike dhe bëri përpjekje të jashtëzakonshme për ta nxitur më tej. Na duhet zgjerimi, që BE-ja të bëhet më e forte”, tha Varheyli.

Shqipëria ka pritur disa vite që të hapë negociatat për anëtarësim. Tani, pas hapjes së kapitujve të parë pritet që procesi të jetë më i shpejtë.

Me hapjen e grupit të parë të kapitujve, është zyrtarizuar ndarja e paketës ku Tirana ishte së bashku me Maqedoninë e Veriut.

Për disa vite vendimet janë marrë paralelisht për Shqipërinë dhe Maqedoninë e Veriut, ndërsa tash rrugët janë ndarë.

Rruga e Shkupit drejt BE-së vazhdon të jetë e bllokuar nga Bullgaria, për shkak të mosmarrëveshjeve dypalëshe.

Lidhur me ndarjen e rrugës evropiane të Tiranës dhe Shkupit, Rama shprehu keqardhje.

“Ndihem në siklet sepse më duhet të mendoj për poshtërimin e Maqedonisë së Veriut që u detyrua të ndryshonte edhe emrin për t’u futur në këtë proces. U qëndroj të njëjtave gjëra që kam thënë për miq tanë bullgarë, sepse historia nuk mund të jetë arsyeja për të ndaluar bisedimet e anëtarësimit për asnjë vend“, tha Rama.

Arsyeja e ndarjes së Shqipërisë në këtë rrugëtim drejti BE-së, është se Maqedonia e Veriut nuk e ka përmbushur kushtin e vendosur nga Bullgaria, që të përfshijë në preambulën e Kushtetutës minoritetin bullgar. Ky kusht është futur në kornizën negociuese që Parlamenti maqedonas votoi në korrik të vitit 2022, propozim që njihet edhe si “propozimi francez”.

Vendimi për hapjen e kapitullit të parë u mirëprit nga presidenti shqiptar, Bajram Begaj, i cili tha se mbush me shpresë shqitarët për realizimin “e ëndrrës së kahershme ‘E duam Shqipërinë si gjithë Evropa'”.

Shqipërinë e ka uruar edhe presidenja e Kosovës, Vjosa Osmani. Ajo tha se Shqipëria, Kosova dhe vendet e tjera demokratike të rajonit duhet të vazhdojnë të bëjnë përparim në rrugën evropiane “që është thelbësore për të siguruar paqe të qëndrueshme dhe stabilitet, jo vetëm për rajonin, por gjithë Evropën”./REL/