Skuadra e Bora Prishtina ka vazhduar formën e shkëlqyer në plejof, duke eliminuar Sigal Prishtina dhe duke siguruar një vend në gjysmëfinale të elitës së basketbollit kosovar.

Në ndeshjen e zhvilluar të enjten mbrëma në Pallati i Rinisë dhe Sportit, Bora triumfoi me rezultat të thellë 101:60, duke e mbyllur serinë çerekfinale me rezultat të përgjithshëm 2:0. Edhe ndeshjen e parë e kishte fituar bindshëm, 105:67.

Ndeshja u vendos që në pjesën e parë, ku Bora krijoi epërsi të madhe prej 51:23. Në vazhdim, skuadra vetëm e menaxhoi avantazhin, duke e thelluar diferencën deri në 41 pikë në fund të takimit.

Më i dalluari në këtë fitore ishte Jordan Dingle me 24 pikë, dy kërcime dhe dy asistime. Kontribut të rëndësishëm dha edhe Carlton Bragg Jr. me 12 pikë dhe pesë kërcime.

Në anën tjetër, te Sigal Prishtina u veçuan vetëm Arbër Sinani dhe Jon Ismajli me paraqitje dyshifrore. Sinani realizoi 17 pikë, tri kërcime dhe tri asistime, ndërsa Ismajli shtoi 13 pikë, tri kërcime dhe një asistim.

Kjo fitore ka edhe më shumë peshë duke pasur parasysh se vetëm një vit më parë Bora luftonte për mbijetesë në elitë, duke siguruar qëndrimin përmes plejautit. Tani, skuadra prishtinase është shndërruar në një pretendente serioze për titull.

Në gjysmëfinale, Bora do të përballet me Bashkimi, që sezonin e rregullt e përfundoi në vendin e dytë me 48 pikë dhe do të ketë përparësinë e terrenit vendas. Bora e mbylli sezonin e rregullt në pozitën e tretë me 42 pikë, ndërsa Sigal Prishtina u kualifikua në plejof nga vendi i gjashtë me 38 pikë.

Bota e futbollit është tronditur nga lajmi për ndarjen nga jeta të Alexander Manninger në moshën 48-vjeçare. Ish-portieri austriak raportohet se ka humbur jetën në një aksident ku makina e tij u godit nga një tren në një kalim hekurudhor.

Manninger kishte një karrierë të pasur në futbollin evropian, duke lënë gjurmë të veçanta te Juventusi, ku ishte pjesë e skuadrës nga viti 2008 deri në vitin 2012. Ai e nisi rrugëtimin e tij profesional te Austria Salzburg, ndërsa në vitin 1997 hyri në histori si austriaku i parë që u transferua te Arsenal në Premier League.

Gjatë kohës së tij në Londër, ai regjistroi 39 paraqitje dhe ishte pjesë e sezonit të artë 1997/98, ku Arsenal fitoi si titullin e Premier League, ashtu edhe FA Cup.

Në vazhdim të karrierës së tij, Manninger mbrojti edhe ngjyrat e AC Siena dhe më pas u rikthye në nivele të larta me Juventusin. Në fund të karrierës, ai kaloi edhe një periudhë dyvjeçare nën kontratë me Liverpool.Në nivel ndërkombëtar, Manninger zhvilloi 33 ndeshje me përfaqësuesen e Austrisë. Në Kampionatin Evropian të vitit 2008, të zhvilluar në Austri, ai ishte portier rezervë i Jurgen Macho.

Ndarja e tij nga jeta lë një boshllëk të madh në botën e futbollit dhe kujtimi i tij do të mbetet i gjallë për kontributin dhe sukseset e arritura gjatë karrierës.

Xhudistja nga Kosova, Distria Krasniqi, ka fituar medaljen e artë në Kampionatin Evropian që po mbahet në Tbilisi të Gjeorgjisë, ku po marrin pjesë rreth 400 garues nga 46 shtete.

Në kategorinë deri në 52 kilogramë, Krasniqi e nisi garën me paraqitje bindëse, duke kaluar me sukses raundin e dytë dhe më pas çerekfinalen. Në përballjen e parë, ajo triumfoi ndaj çekes Tereza Bodnarova , ndërsa në çerekfinale mposhti polaken Aleksandra Kaleta, duke siguruar kështu gjysmëfinalen.

Në gjysmëfinale, kampionia kosovare tregoi edhe një herë formë të lartë, duke e mposhtur italianen Odette Giuffrida. Në finalen e madhe, Krasniqi u përball me francezen Amandine Buchard, të cilën e mposhti për të rrëmbyer medaljen e artë dhe për t’u shpallur kampione e Evropës.

Ndërkohë, xhudistet tjera nga Kosova, Fatjona Kasapi dhe Erza Muminoviq, u eliminuan më herët gjatë garave.

Klubi zviceran Lausanne ka ndërmarrë ndryshime në stafin teknik pas largimit të trajnerit Peter Zeidler.

Skuadrën e parë përkohësisht do ta udhëheqë një dyshe e përbërë nga Markus Neumayr dhe ish-kapiteni i Kombëtares së Shqipërisë, Migjen Basha.Basha, i lindur në Lausanne dhe pjesë e klubit që nga viti 2022, aktualisht mban rolin e Menaxherit të Talenteve dhe tashmë do të ketë përgjegjësi edhe në drejtimin e skuadrës së parë deri në fund të sezonit.

Së bashku me Neumayr, ish-futbollist dhe pjesë e stafit teknik të klubit, ata do të udhëheqin ekipin në ndeshjet e mbetura, deri në emërimin e trajnerit të ri.

“Për të mbyllur sezonin, ekipi i parë do të drejtohet nga një dyshe e përbërë nga Markus Neumayr dhe Migjen Basha, të dy anëtarë të stafit teknik të ekipit të parë”, ka njoftuar klubi.Ky zhvillim e vendos Migjen Bashën në një rol të rëndësishëm brenda strukturës së Lausanne, duke marrë përkohësisht edhe përgjegjësinë e drejtimit të skuadrës në nivelin më të lartë.