Një person është plagosur mëngjesin e sotëm te tregu i gjelbër në Mitrovicë, ndërsa pas trajtimit në spitalin e këtij qyteti, është dërguar në Qendrën Klinike Universitare të Kosovës në Prishtinë. Megjithatë viktima edhe pas përpjekjeve maksimale nga stafi i Klinikës Emergjente nuk ka arritur t’i mbijetoj plagës. Kjo është konfirmuar nga zëdhënësi i QKUK-së, Shpend Fazliu.

“Zyra për informim e QKUK-së, ju konfirmon se përkundër përpjekjeve maksimale nga stafi i Klinikës Emergjente, një person i plagosur në Mitrovicë, nuk ka arritur të mbijetojë, për shkak të plagëve që ka pasur dhe gjendjes së rënduar shëndetësore”, shtoi Fazliu.

Ndërsa lajmin për gjuajtjen me armë zjarri dhe plagosjen e një personi e ka konfirmuar zëdhënësi i policisë në Mitrovicë, Avni Zahiti. Ai nuk ka pranuar të flasë para kamerës me arsyetimin se nuk ka informacione të mjaftueshme, por ka bërë të ditur përmes telefonit rrethanat e përgjithshme të këtij incidenti pa dhënë detaje.

“Një person është lënduar nga arma e zjarrit të premten rreth orës 09:42 në Mitrovicë të Jugut. Rasti ka ndodhur në rrugën ‘Fatime Hetemi’ dhe se i plagosuri, i cili është i moshës madhore, është dërguar për tretman mjekësor”, ka thënë Zahiti.

Dëshmitarët e rastit kanë rrëfyer se pak kanë parë nga ngjarja, përveç që kanë dëgjuar të shtëna zjarri, sepse siç thanë ata, gjithçka ka ndodhur shumë shpejtë.

Reshit Musaj, i cili punon në furrën krejt afër vendit ku ka ndodhur ngjarja, tha se ka dëgjuar disa të shtëna nga arma e zjarrit dhe se gjithçka është zhvilluar shumë shpejt, ndërsa gëzhojat e plumbave kanë depërtuar edhe në lokalin ku punon.

“Fillimisht kemi dëgjuar të shtëna, sepse kemi qenë duke punuar në punëtori poshtë. Kur kemi dalë lart kemi parë një person të plagosur. Ka qenë në këmbë të veta, por në shpinë ka pasur gjakderdhje… Dorasin nuk e kemi parë… Shumë shpejtë ka ndodhë, derisa kam dalë nalt e kam pa vetëm të lënduarin dhe kam pa predhat në lokal… Besoj 4-5 (të shtëna kam dëgjuar)”, theksoi Musaj.

Në anën tjetër, Gëzim Berisha, u.d. të drejtorit mjekësor në spitalin ‘Sami Haxhibeqiri’ në Mitrovicë, u shpreh se pacienti është pranuar i lënduar me armë zjarri dhe me dy plagë në gjoks. Sipas tij, gjendja e pacientit është serioze dhe pas trajtimit dhe pas marrjes së masave të nevojshme, ai është dërguar në QKUK.

“Sot në orën 09:45 në emergjencën e spitalit të Mitrovicës është sjellur një pacient i lënduar me armë zjarri me dy plagë në gjoks. I kemi marrë të gjitha masat e nevojshme reanimatore dhe pas stabilizimit të gjendjes shëndetësore, pacienti është udhëzuar në QKUK për trajtimin e tij… Gjendja është serioze, stabile ka qenë, shpresoj se do të vazhdojë mirë”, tha Berisha.

Gjyqtarja shqiptare Emanuela Rusta ka vendosur të mbyllë llogarinë e saj në Instagram, duke shprehur frustrimin për vëmendjen e tepërt që i është dhënë pamjes së saj në vend të aftësive të saj profesionale. Pas përvojës së saj si gjyqtare në Ligën e Kampionëve për femra, Rusta ka theksuar se është lodhur duke u quajtur “gjyqtare seksi”.

Në moshën 30-vjeçare, ajo bëri histori si gruaja e parë që drejtoi një ndeshje të Superligës shqiptare dhe është aktivizuar në arenën evropiane muajt e fundit. Megjithatë, përballë mesazheve seksiste në rrjetet sociale, Rusta ka vendosur të distancohet nga kjo atmosferë, duke u tërhequr nga platforma për të ruajtur fokusin në karrierën e saj.

“Arbitrimi nuk është çështje gjinie, por kompetence,” theksoi Rusta. Ajo përmendi se Shoqata e arbitrave shqiptare ka mbështetur gjithmonë promovimin e femrave në këtë fushë dhe shpreson për një të ardhme ku do të shohim më shumë gra duke gjykuar ndeshje të nivelit të lartë, përfshirë ato të meshkujve.

Rusta, e cila do të gjykojë sonte ndeshjen e femrave të Ligës së Kampionëve mes Sporting Lisbonës dhe Real Madridit, shprehu besimin se mund të bëhet një shembull për të tjera gra në arbitrazh, pavarësisht ambientit tradicionalisht mashkullor. “Edhe pse duket si një fushë e tillë, ndihem e respektuar dhe e vlerësuar për punën time në fushë,” përfundoi ajo./UBTNews/

Për më shumë se tri orë, ka përfunduar intervistimi i Koordinatores së Komiteteve të Vetëvendosjes, Dejona Mihali nga Prokuroria Speciale.

Mihali nuk ka pranuar të flasë për media, veçse ka thënë se ka ardhur “për t’i ndihmuar Prokurorisë Speciale”.

“Nga prokurori u intervistova për ta zbardhur të vërtetën”, tha ajo derisa nuk pranoi që t’iu përgjigjej pyetjeve të gazetarëve.

Prokuroria Speciale gjatë ditës ka bërë të ditur se Dejona Mihali është intervistuar në cilësinë e dëshmitares për disa çështje penale, të cilat kjo Prokurori i ka në hetim.

“Pas interesimit për të marr informacion nga një numër i madh i gazetarëve, Prokuroria Speciale informon se sot, Dejona Mihali, është paraqitur në Prokurorinë Speciale me ftesë të kësaj prokurorie. E njëjta është duke u intervistuar në cilësinë e dëshmitares për disa çështje penale, të cilat kjo prokurori i ka në hetim”, thuhet në njoftimin e PSRK-së.

Tensionet në Lindjen e Mesme po rriten pas një serie sulmesh që kanë shkaktuar dhjetra viktima dhe mijëra të plagosur, duke sjellë në qendër të vëmendjes marrëdhëniet mes Izraelit dhe Hezbollahut. Sulmet, të cilat besohet të jenë kryer nga Izraeli, përfshinin shpërthime të pajisjeve elektronike të lidhura me anëtarët e Hezbollahut, duke rezultuar në vdekjen e 37 personave dhe plagosjen e rreth 3,000 të tjerëve.

Izraeli bombardoi Libanin jugor në një moment kritik, përpara një takimi të Këshillit të Sigurimit të OKB-së, ndërsa analistët paralajmërojnë për rrezikun e një lufte gjithëpërfshirëse. Një ekspert gjeopolitik izraelit theksoi se “asnjëherë më parë nuk kemi qenë kaq afër një lufte”.

Hezbollah ka përjetuar humbje të mëdha, me shpërthimet e fundit që kanë vrarë të paktën 12 njerëz në Liban dhe Siri. Udhëheqësi i Hezbollahut, Hassan Nasrallah, i quajti sulmet “krime lufte”, por nuk dha detaje mbi përgjigjen e grupit.

Rreth 60,000 njerëz janë evakuuar nga Izraeli verior për shkak të kërcënimeve nga Hezbollah. Diplomacia është në qendër të vëmendjes, me Shtëpinë e Bardhë që paralajmëron të gjitha palët kundër një përshkallëzimi të situatës.

Analistët parashikojnë se ndërhyrja ushtarake e Izraelit është një mundësi reale, por jo e pashmangshme. Roli i Iranit dhe mbështetje ndaj Hezbollahut gjithashtu do të ndikojnë në zhvillimet e ardhshme, duke nxitur diskutime për një zgjidhje diplomatike që mund të ndalojë përshkallëzimin e mëtejshëm të konfliktit./UBTNews/