Treqind ushtarë holandezë me dy sisteme mbrojtjeje ajrore Patriot dhe sisteme antidronë do të dërgohen në fillim të dhjetorit në Poloni, për të mbrojtur dërgesat e pajisjeve ushtarake në Ukrainë nga sulmet ruse, raporton televizioni holandez NOS.

Këto sisteme mbrojtjeje ajrore nuk kanë për qëllim të zmbrapsin sulmet në territorin ukrainas.

Ministri holandez i Mbrojtjes, Ruben Brekelmans, tha se vendosja synon mbrojtjen e krahut lindor të NATO-s, i cili shërben si një bazë ushtarake kyçe për mbështetjen e Ukrainës, si dhe pengimin dhe dekurajimin e Rusisë.

Misioni holandez do të zgjasë të paktën deri në fund të majit dhe vërehet se kur dy sistemet Patriot të vendosen përkohësisht në Poloni, njëri do të mbetet në Holandë, gjë që do të lejojë ruajtjen e sigurisë kombëtare.

Ruben Brekelmans shtoi gjithashtu se aktivitetet e NATO-s në Poloni dhe parandalimi i Rusisë kontribuojnë në mbrojtjen e Holandës.

Më parë, Holanda ra dakord të vendoste avionë luftarakë F-35 në Poloni, të cilët do të patrullojnë hapësirën ajrore të NATO-s së bashku me homologët e tyre norvegjezë nga 1 shtatori deri më 1 dhjetor.

Drejtoria për Hetimin e Krimit të Organizuar dhe Krimeve të Rënda, pas zhvillimit të veprimeve hetimore në bashkëpunim me Prokurorinë Themelore Prishtinë, ka realizuar operacionin policor nën dyshimin për veprën penale fajde, ku ka arrestuar personat B.F. (48) dhe A.F. (39), ndërsa B.B. (39) është vënë në kërkim.

Të dyshuarit kanë detyruar viktimën të paguajë shuma të ndryshme të parave si interes për fajde, po ashtu kanë kërkuar nga viktima marrjen e njësive banesore që janë në ndërtim ku viktima është pronar i tyre.

I dyshuari B.F. është arrestuar në flagrancë duke i pranuar paratë si interes nga fajdeja, ndërsa A.F. është arrestuar në vendbanimin e tij, teksa B.B., nuk është hasur në shtëpinë e tij dhe ndaj të njëjtit është lënë ftesë për paraqitje në polici.

Me urdhëresë nga gjykata janë kontrolluar tri vendbanimet e të dyshuarve me ç’rast janë gjetur dhe sekuestruar dëshmi materiale, të cilat do të përdoren në procedurën penale ndaj të dyshuarve.

Ndaj dy të dyshuarve B.F., A.F., prokurori i Shtetit ka lëshuar aktvendim për ndalim.

Në Shtime është përuruar në mënyrë solemne Unazën e vogël në rrugën “12 qershori”, projekt ky i Ministrisë së Infrastrukturës në vlerë rreth gjysmë milionë euro. Në ceremoni kjo rrugë me trotuar e ndriçim publik, u përmend ndër më modernet në komunën e Shtimes.

Kryeministri në detyrë Albin Kurti tha se kjo rrugë do të lehtësojë qarkullimin e banorëve të kësaj ane dhe më gjerë.

“Shpesh vijmë e kthehemi në shtime për shkak të investimeve të vlefshme, të cilat po i bëjmë edhe si Qeveri e Republikës së Kosovës, por edhe si komunë e Shtimes. Rrugë në gjatësi 375 metra, e cila e lidh rrugën ‘William Walker’ me atë “12 Qershori”, është rrugë me ndriçim publik dhe gjithashtu është rrugë, e cila rrit jo vetëm investimin në komunën e Shtimes, por në të njëjtën kohë, në mënyrë të prekshme edhe kushtet e jetesës e të qarkullimit për banorët këtu. Kostoja e gjithmbarshme ka qenë afro gjysmë milioni euro”, tha Kurti.

Ndryshe, kryetari Qemajl Aliu ka paralajmëruar se gjatë tridhjetë ditëve të ardhshme do të përurohen edhe tetë projekte të ngjashme në Komunën e Shtimes, të cilat po shkojnë drejt finalizimit të tyre.

Kurse në rrugën “Ibrahim Shabani” në Vojnoc të Shtimes, dy kilometra e gjatë, kanë filluar punimet, investim ky i Ministrisë se Mjedisit në vlerë 420 mijë euro, përmes së cilës do të ndihmohen qytetarët që të lidhen më lehtë me Lipjanin, Shtimen dhe Ferizajn.

Kryetari i Shtimes Qemajl Aliu tha se rregullimi i kësaj rruge ka qenë kërkesë e banorëve të kësaj ane tash e sa kohë dhe se punimet do të përfundojnë në fillim të muajit tetor.

“Fshati Vojnoc, hir së vërtetës në të kaluarën nuk ka qenë shumë i respektuar në aspektin e investimeve. Edhe unë e kam kënaqësinë dhe jam i hapur me qenë para miqve të mi, para bashkëvendësve të mi për të përuruar fillimin e një investimi tjetër të radhës, një rrugë ku është investuar menjëherë pas luftës dhe nuk është mirëmbajtur asnjëherë në një rrugë të demoluar. Ka qenë kërkesë e banorëve të fshatit Vojnoc, po edhe fshatrave përreth. Të mos harrojmë, kjo rrugë e lidh qytetin e Lipjanit, Shtimes dhe Ferizajt, përkatësisht fshatin Grackë, Vojnoc dhe fshatin Tërrn. Projekti kushton diku 420 mijë euro, mbi dy kilometra rrugë. Sipas operatorit kjo rrugë mund të përfundojë diku nga fillimi i tetorit”, tha Aliu.

Shtetet e Bashkuara të Amerikës kanë vendosur sanksione ndaj gjyqtarit francez Nicolas Yann Guillou, i cili pati një rol kyç në procedurën paraprake të rastit të ish-presidentit Hashim Thaçi në Hagë.

Departamenti Amerikan i Shtetit theksoi në një deklaratë se Guillou ka autorizuar lëshimin e urdhërarresteve ndërkombëtare për kryeministrin izraelit Benjamin Netanyahu dhe ish-ministrin e Mbrojtjes Yoav Gallant, në lidhje me akuza për krime lufte.

Përveç Guillou, janë sanksionuar edhe tre persona të tjerë të Gjykatës Ndërkombëtare Penale: Kimberly Prost, Nazhat Shameem Khan dhe Mame Mandiaye Niang.

Zëvendësprokurorët Shameem Khan dhe Niang po emërohen për vazhdimin e mbështetjes së veprimeve të paligjshme të Gjykatës Ndërkombëtare Penale kundër Izraelit, duke përfshirë mbështetjen e urdhër-arresteve të Gjykatës Ndërkombëtare Penale që synojnë kryeministrin Netanyahu dhe ish-ministrin e Mbrojtjes Gallant që kur ata morën drejtimin e Zyrës së Prokurorit të Gjykatës Ndërkombëtare Penale.

Si rezultat i veprimeve të sotme që lidhen me sanksionet, të gjitha pronat dhe interesat në pronën e personave të sanksionuar të përshkruar më sipër që janë në Shtetet e Bashkuara ose në zotërim ose kontroll të personave amerikanë janë bllokuar dhe duhet të raportohen në Zyrën e Kontrollit të Pasurive të Huaja (OFAC) të Departamentit të Thesarit, thuhet në deklaratë.

Përveç kësaj, të gjithë individët ose subjektet që janë në pronësi, drejtpërdrejt ose tërthorazi, individualisht ose në total, 50 për qind ose më shumë nga një ose më shumë persona të bllokuar janë gjithashtu të bllokuara.