Kur temperaturat bien dhe shtëpia mbushet me nxehtësinë e thatë që vjen nga radiatorët, hapësira jonë e përditshme shndërrohet në një strehë të ngrohtë kundër të ftohtit.

Perdet ulen, qirinjtë ndizen, aroma e kafesë përhapet në ajër – por shpesh diçka mungon. Në atë qetësi të ngrohtë, ajri i thatë dhe mungesa e dritës fillojnë të ndihen, duke ndikuar në energjinë e shtëpisë.

Bimët e shtëpisë, këta “rojtarë” të vegjël të natyrës, janë të parat që e ndiejnë këtë ndryshim. Gjethet vyshken, toka thahet, ajri i ngrohtë bëhet sfidues për to.

Disa bimë jo vetëm që përballojnë këtë periudhë, por edhe lulëzojnë në të – duke sjellë jetë dhe harmoni në çdo cep të shtëpisë.

Ato duan ngrohtësinë e radiatorëve dhe pastrojnë ajrin, gjallërojnë atmosferën, sipas feng shui-t, nxisin energji pozitive, qetësi e mirëqenie. Nëse doni që shtëpia të mbetet e gjallë, e gjelbër e plot jetë gjatë dimrit, njihuni me pesë bimë që janë aleatët idealë të sezonit të ftohtë.

 Lulja e fierit – zonja klasike e gjelbërimit

Një ndër bimët më të vjetra në botë, është simbol i qëndrueshmërisë së natyrës. Me gjethe të buta e të harlisura, sjell në shtëpi ndjesinë e një pylli. Edhe pse pëlqen lagështinë, përshtatet me ngrohjen qendrore, mjafton t’i spërkatni gjethet herë pas here dhe ta mbani larg burimeve të drejtpërdrejta të nxehtësisë. Fierët sjellin freski, qetësi dhe ekuilibër energjik, prandaj janë idealë për dhomën e ndenjes apo korridorin.

Orkideja – mbretëresha elegante që dashuron ngrohtësinë

Delikate në pamje, por e fortë në natyrë. Orkideja lulëzon edhe kur shumica e bimëve ndalojnë së rrituri. Kërkon temperaturë të qëndrueshme dhe dritë të moderuar, por jo diell të drejtpërdrejtë. Me kujdes minimal e pak spërkatje, sjell elegancë dhe qetësi në çdo ambient. Në ditët gri të dimrit, lulet e saj janë kujtesë se bukuria kurrë nuk shuhet – thjesht merr forma të reja.

Aloe Vera – minimalizëm dhe fuqi në një vazo të vetme

E njohur si “bima që shëron”, Aloe Vera ruan ujë e energji në gjethet e trasha, duke e bërë të përsosur për ajrin e that. Ajo kërkon pak ujë e shumë dritë. Në feng shui simbolizon pastrim, mbrojtje dhe forcë të brendshme. Vendoseni pranë kompjuterit ose në dhomën e gjumit për të balancuar energjinë dhe për të lehtësuar stresin.

Pahira – pema e fatit dhe begatisë

E quajtur ndryshe “druri i parave”, Pachira aquatica është simbol i harmonisë familjare dhe stabilitetit financiar. Edhe pse tropikale, është e lehtë për t’u mbajtur: i pëlqen drita e shpërndarë dhe lagështia e moderuar. Vendoseni në një qoshe të ndriçuar të dhomës së ndenjes dhe do të ndjeni se sjell energji të mirë dhe lehtësi në hapësirë.

Monstera – hijeshi tropikale që e do ngrohtësinë

Një ndër bimët më trend të viteve të fundit, Monstera është simbol i rritjes dhe vitalitetit. Ajo duron ajrin e thatë, mjafton t’i fshihen gjethet dhe të spërkatet herë pas here. Në feng shui përfaqëson vetëbesim dhe zhvillim. Edhe kur jashtë bie borë, gjethet e saj të mëdha mbeten kujtesë se ngrohtësia e vërtetë buron nga brenda nesh.

 Si t’i ndihmoni bimët gjatë sezonit të ngrohjes?

Kujdesuni për to duke:

Fshirë gjethet me një leckë të butë e pak të lagur.

Spërkatur me ujë të qëndruar në temperaturë dhome.

Shmangur vendosjen e saksive mbi radiatorë.

Vendosur një enë me ujë pranë radiatorit për të shtuar lagështinë.

Duke i dhënë kujdes bimëve, ushqeni edhe energjinë e shtëpisë suaj. Ato nuk janë vetëm dekor – janë terapeutë të heshtur, që sjellin qetësi, frymëmarrje dhe jetë në çdo stinë.

Në një dimër pa gjelbërim jashtë,  mbeten kujtesa më e bukur se jeta e rritja vazhdojnë edhe brenda katër mureve. /A.Z/UBT News/

Thuhet se të paktën një herë në vit duhet të vizitosh një vend ku nuk ke qenë më parë.

Çdo udhëtim ka potencialin të jetë unik dhe të ndryshëm nga i tjetri. Ja disa nga mësimet jetësore që mund të nxirren nga udhëtimet:

Zgjerimi i dijes dhe kuriozitetit

Udhëtimet na mësojnë gjëra të reja dhe zgjojnë brenda nesh shpirtin kërkues. Studimet tregojnë se të rinjtë që studiojnë jashtë vendit janë më të informuar dhe më të hapur ndaj ideve të reja sesa ata që mbeten në vendin e tyre.

Rritja e besimit tek njerëzit

Eksperimentet dhe kërkimet kanë treguar se udhëtimet shtojnë besimin tek njerëzimi. Të takosh njerëz nga kultura të ndryshme dhe të dëgjosh historitë e tyre, shpesh të ndryshme nga të tuat, të bind se çdo njeri ka një anë të mirë që mund të ndikojë pozitivisht tek të tjerët.

Nxitja e kreativitetit

Njohja me kultura të reja dhe përballja me mënyra të ndryshme jetese stimulon imagjinatën dhe kreativitetin. Studimet e “Academy of Management Journal” tregojnë se ata që punojnë ose studiojnë jashtë vendit kanë një kreativitet më të zhvilluar, duke krahasuar dhe përzgjedhur më të mirën nga kultura e tyre dhe ajo që vizitojnë.

Rritja e lumturisë dhe empatisë

Psikologët kanë zbuluar se njerëzit që udhëtojnë janë më të lumtur dhe më të hapur ndaj të tjerëve. Ato mësojnë të dëgjojnë me durim dhe të kuptojnë perspektiva të ndryshme, duke u bërë më empatikë dhe të ndjeshëm ndaj botës që i rrethon.

Udhëtimet fillimisht të lënë pa fjalë, por me kalimin e kohës ato të transformojnë në rrëfyes, duke të dhënë histori, mësime dhe përvoja që mbeten përjetësisht. /A.Z/UBT News/

Violinisti i njohur ndërkombëtarisht, Giuseppe Gibboni, fitues i çmimit Paganini, performoi mbrëmjen e së enjtes në Teatrin Kombëtar të Operas dhe Baletit, duke përdorur violinën e tij të vitit 1734, një Stradivari të rrallë.

Gibboni magjepsi publikun duke interpretuar krijime të Rimskij Korsakov, Paganini, Rachmaninov dhe Stravinskij, duke ofruar një eksperiencë të paharrueshme muzikore në skenën e TKOB.

Ky koncert në Tiranë erdhi pak pas pjesëmarrjes së tij në dy koncerte me Orkestrën Filarmonike të Teatrit “La Scala” të Milanos.

Në kryeqytet, ai interpretoi nën shoqërimin e Orkestrës Simfonike të TKOBAP-së, në bashkëpunim me Orkestrën Simfonike të Forcave të Armatosura, të udhëhequr nga dirigjenti i njohur Sergio Alapont.

Giuseppe Gibboni konsiderohet një nga violinistët më të jashtëzakonshëm të brezit të tij, i njohur për teknikën brilante, ndjeshmërinë interpretuese dhe pjekurinë artistike, karakteristika të rralla për moshën e tij. /A.Z/UBT News/

Një nderim i veçantë i është bërë shkrimtarit të madh shqiptar Ismail Kadare në zemër të Parisit.

Këshilli Bashkiak ka votuar unanimisht për vendosjen e një pllaka përkujtimore me emrin e tij në adresën “63 boulevard Saint-Michel”, vendi ku Kadare dhe familja e tij jetuan për shumë vite, dhe ku autori krijoi disa prej faqeve më të rëndësishme të letërsisë moderne shqipe.

Lajmin e ka bërë të ditur Ambasada e Shqipërisë në Francë, e cila e ka cilësuar këtë vendim si një homazh të gjallë dhe prekës ndaj kolosit të letrave shqipe dhe, nëpërmjet tij, ndaj Shqipërisë dhe kulturës shqiptare.

“Faleminderit Parisit, faleminderit Francës”, – është shprehur Ministria, duke e vlerësuar këtë si një gjest mirënjohjeje dhe respekti për kontributin e Kadaresë në letërsinë botërore.

Parisi, qyteti ku Kadare zgjodhi të jetonte për dekada, ka qenë gjithmonë një hapësirë frymëzimi për krijimtarinë e tij – një vend ku fjala shqipe u bë universale përmes artit të tij.

Ky homazh i ri e vendos përjetësisht emrin e Ismail Kadaresë në rrugët e kryeqytetit francez, si simbol i miqësisë kulturore franko-shqiptare dhe i trashëgimisë së përbashkët letrare që ai la pas. /A.Z/UBT News/