Hetuesit policorë nga Drejtoria për Hetimin e Trafikimit me Narkotikë në Gjilan, me qëllim të zbardhjes së një rasti, ku një person dyshohet se merrej me trafikim të narkotikëve, kanë ndërmarrë veprime operative dhe hetimore.

Policia e Kosovës gjatë trajtimit të rastit ka ardhur te konstatimi se i dyshuari, E. F., (viti i lindjes 1979, mashkull kosovar), me veprimet e tij ka konsumuar veprën penale ‘blerja, posedimi, shpërndarja dhe shitja e paautorizuar e narkotikeve, substancave psikotrope dhe analoge’.

Sipas Policisë, i dyshuari gjatë veprimtarisë së shpërndarjes së lëndëve narkotike (kokainës), me qëllim që të mos bije në sy të Policisë, ka përdorur një shtëpi me qira dhe njëkohësisht ka shfrytëzuar vetura nga ‘rent a car’.

“Sot, më 22.09.2023, Policia ka arrestuar personin e dyshuar. Në koordinim me organet e drejtësisë është bërë kontrolli i banesës së të dyshuarit ku janë konfiskuar: 6.4 gramë substancë, që dyshohet të jetë kokainë, 1.5 gramë, dyshohet të jetë marihuanë, para të gatshme, një veturë dhe pesë telefona celularë. Në konsultim me prokurorin kompetent, i njëjti ka urdhëruar që pas intervistimit i dyshuari të ndalohet për 48 orë”, thuhet në njoftim.

Njësitë policore kanë ndaluar një veturë me targa të Serbisë me drejtues të dyshuarin mashkull kosovar, ku dyshohet se vetura është futur në territorin e Republikës së Kosovës, duke iu shmangur pikë kalimeve të rregullta kufitare.

Rasti ka ndodhur në Bërnjak. Lidhur me rastin është konsultuar prokurori i shtetit i cili ka rekomanduar që ndaj të dyshuarit të iniciohet rasti kalim i paautorizuar i vendkalimeve kufitare apo vijës kufitare dhe të procedohet në procedurë të rregullt.

Kurse, në fshatin Bistricë të Leposaviqit, njësitë policore gjatë një pike kontrolli kanë ndaluar një motoçikletë me drejtues mashkull kosovar, ku dyshohet se ka hyrë në Republikën e Kosovës, duke iu shmangur pikë kalimeve kufitare.

I dyshuari është arrestuar dhe pas intervistimit me vendim të prokurorit është liruar dhe rasti procedohet në procedurë të rregullt. 

Njësia policore gjatë një pike kontrolli ka ndaluar veturën që drejtohej nga i dyshuari mashkull kosovar dhe gjatë kontrollit ka gjetur dhe sekuestruar një pistoletë me 5 fishekë.

Rasti ka ndodhur mbrëmë në Prishtinë, ku në konsultim me prokurorin është bastisur banesa e të dyshuarit ku janë gjetur dhe sekuestruar: 2.8 gramë kokainë, 15.1 gramë marihuanë, një revole, 45 fishekë të kalibrave të ndryshëm, një peshore digjitale dhe disa qese për paketimin e lëndëve narkotike.

Me vendim të prokurorit i dyshuari pas intervistimit është dërguar në mbajtje.

Si pasojë e një zjarri që ka shpërthyer për shkaqe të panjohura janë djegur dy objekte përcjellëse, po ashtu janë djegur ushqim për bagëti, disa pajisje të punës si dhe janë dëmtuar dy sera.

Sipas Policisë, rasti ka ndodhur mbrëmë rreth orës 18:35 në Lipjan, ku në vendin e ngjarjes përveç njësive policore kanë dalë edhe zjarrfikësit që e kanë lokalizuar zjarrin.

Rasti është në hetime.