Ka përfunduar aventura e Kosovës në padel në Lojërat Mesdhetare “Taranto 2026”.

Të mërkurën paradite, ekipi miks i Kosovës u eliminua në fazën çerekfinale, pasi pësoi humbje 2:0 në sete ndaj Italisë.

Ekipi italian ishte dukshëm më dominues dhe i fitoi të dy setet me rezultat identik 6:0. Për Kosovën në këtë përballje u paraqitën Donika Bashota dhe Lavdrim Krasniqi.

Megjithatë, përfaqësimi i Kosovës në padel në këto Lojëra Mesdhetare ishte pozitiv, me ekipin e parë të meshkujve dhe ekipin miks që regjistruan nga një fitore para se të ndaleshin në ndeshjet e dyta.

Ndërkohë, dy ekipet e femrave dhe ekipi i dytë i meshkujve u eliminuan që në përballjet e tyre të para.

Kështu, Kosova e përmbyll garën në padel në “Taranto 2026”, me paraqitje që i japin përvojë të rëndësishme sportistëve kosovarë në arenën ndërkombëtare.

D.L

Manchester City ka bërë një tjetër goditje të madhe në merkato, duke zyrtarizuar transferimin e supertalentit 18-vjeçar, Ayyoub Bouaddi.

Mesfushori maroken është larguar nga Lille dhe i është bashkuar kampionëve anglezë, në një transferim që, sipas raportimeve, kap shifrën e 100 milionë eurove. Bouaddi ka firmosur kontratë pesëvjeçare me Manchester Cityn.

Pavarësisht moshës së re, Bouaddi tashmë ka krijuar një përvojë të konsiderueshme në futbollin elitar. Ai ka regjistruar 96 paraqitje me fanellën e Lille dhe tetë paraqitje me Kombëtaren e Marokut.

Debutimin në nivelin senior e bëri në moshën vetëm 16-vjeçare, duke tërhequr vëmendjen e shumë klubeve të mëdha evropiane.

Pas zyrtarizimit të transferimit, Bouaddi shprehu emocionet për aventurën e re në Angli.

“Është një ditë e veçantë për mua dhe familjen time. Manchester City është klubi më i mirë në botë. Është ëndërr të jem këtu dhe ta quaj veten lojtar të Cityt”, ka deklaruar 18-vjeçari.

Tashmë mbetet të shihet se çfarë roli do të ketë Bouaddi në skuadrën e Pep Guardiolës dhe nëse do ta dëshmojë shpejt potencialin e madh që e bëri një prej talenteve më të kërkuara në Evropë.

D.L

Al Nassr ka regjistruar fitoren e tretë radhazi në kampionatin e Arabisë Saudite, pasi triumfoi 2-3 ndaj Al Ettifaq, në një ndeshje spektakolare ku përmbysi disavantazhin prej dy golash.

Ndeshja nisi në mënyrën më të keqe të mundshme për mysafirët, të cilët mbetën me një lojtar më pak që në minutën e 12-të. Bento u ndëshkua me karton të kuq të drejtpërdrejtë, duke i dhënë Al Ettifaq një avantazh të madh numerik.

Skuadra vendase e shfrytëzoi këtë epërsi dhe deri në fund të pjesës së parë shënoi dy herë. Ondrej Duda dhe Alvaro Medran realizuan për ta çuar Al Ettifaq në pushim me avantazhin 2-0.

Në pjesën e dytë, trajneri i Al Nassr, Ange Postecoglou, bëri një zëvendësim befasues, duke e lënë Cristiano Ronaldon në bankinë dhe duke aktivizuar Abdullah Al Khaibarin.

Megjithatë, ndryshimet dhe reagimi i mysafirëve dhanë rezultat. Në minutën e 74-të, Joao Felix asistoi për Sadio Manen, i cili ngushtoi rezultatin në 2-1.

Vetëm tri minuta më vonë, Felix regjistroi asistimin e dytë, ndërsa Abdulelah Al Amri shënoi për ta barazuar rezultatin në 2-2.

Kur gjithçka po shkonte drejt një barazimi, Al Nassr goditi në minutën e 90-të. Sami Al Najei asistoi Sadio Manen, i cili realizoi golin e tij të dytë personal dhe i dha skuadrës së tij një përmbysje spektakolare.

Me këtë fitore, Al Nassr regjistron tri fitore në tri ndeshjet e para dhe qëndron në krye të tabelës. Në anën tjetër, Al Ettifaq pësoi humbjen e parë të sezonit dhe mbetet në vendin e gjashtë me gjashtë pikë.

D.L

Ekipi ynë ka përpara një ditë të ngjeshur me sfida të rëndësishme sportive, ku vëmendja kryesore është e përqendruar në tri përballje me mikpritësen, Italinë.

Në qendër të vëmendjes është boksierja Donjeta Sadiku, e cila do të ngjitet në ring për gjysmëfinalen e kategorisë deri në 60 kilogramë. Sadiku do të përballet me greken Sofia Legaki, në një duel që pritet të jetë tejet i luftuar dhe që mund t’i sigurojë asaj një vend në finale.

Ndërkohë, vajzat e ekipit të volejbollit do të kenë përballë Turqinë, në një sfidë vendimtare për kualifikimin në gjysmëfinale. Përfaqësueset tona synojnë një rezultat pozitiv dhe do të kërkojnë të bëjnë mrekullinë përballë një kundërshtari të fortë.

Ekipi ynë do të kërkojë të japë maksimumin në këto përballje të rëndësishme.

D.L