Dyshimet rreth golit të parë të Anglisë në ndeshjen ndaj Norvegjisë vazhdojnë të jenë temë diskutimi, pasi është pretenduar se topi preku kabllon e kamerës mbi fushë dhe ndryshoi drejtim para se të niste aksioni që solli golin e Jude Bellinghamit.

Megjithatë, FIFA ka hedhur poshtë kategorikisht këto pretendime, duke insistuar se nuk ka pasur asnjë kontakt mes topit dhe kabllos.

“Pamjet nga kamera në fjalë tregojnë qartë se kamera nuk dridhet dhe nuk lëviz, çka dëshmon se topi nuk ka prekur kabllon”, thuhet në deklaratën e FIFA-s për mediumin gjerman Sportschau.

Dyshimet lindën pasi goditja e portierit të Norvegjisë, Orjan Nyland, pati një trajektore të pazakontë. Fluturimi i topit dukej më i shkurtër se zakonisht, duke nxitur spekulime se ai mund të kishte prekur kabllon e kamerës dhe më pas kishte rënë pothuajse vertikalisht.

Pas kësaj situate, topi përfundoi te futbollistët anglezë, të cilët ndërtuan aksionin që u mbyll me golin e barazimit 1:1 nga Jude Bellingham.

Sipas FIFA-s, edhe të dhënat e regjistruara nga çipi i vendosur brenda topit konfirmojnë se nuk ka pasur asnjë kontakt me kabllon. Federata thekson se, nëse një prekje e tillë do të ishte konstatuar, loja do të ishte ndërprerë dhe goli nuk do të ishte pranuar.

D.L

Polemikat rreth pezullimit të dënimit të sulmuesit amerikan, Folarin Balogun, kanë marrë një kthesë dramatike. Mediat më të fuqishme botërore, duke u bazuar në një hulumtim të “The Times”, kanë zbuluar se vendimi për të lejuar Balogunin të luante ndaj Belgjikës – ndonëse në ndeshjen paraprake u ndëshkua me karton të kuq direkt – u mor ekskluzivisht nga kryetari i Komisionit Disiplinor të FIFA-s, Mohammad Al-Kamali, pa përfshirjen e 17 anëtarëve të tjerë të komisionit. Ky zbulim ka goditur rëndë integritetin e procesit disiplinor të FIFA-s, pasi rregullorja përcakton se kartoni i kuq sjell mungesë automatike në ndeshjen pasuese.

Balogun u ndëshkua me të kuq në ndeshjen ndaj Bosnjë-Hercegovinës dhe duhej të mungonte në fazën nokaut të Botërorit kundër Belgjikës. Megjithatë, Al-Kamali e ktheu pezullimin në dënim me kusht për një vit. Ky vendim skandaloz erdhi menjëherë pasi presidenti i SHBA-së, Donald Trump, i kërkoi personalisht kreut të FIFA-s, Gianni Infantino, rishikimin e rastit. Ndonëse SHBA-ja u eliminua duke humbur 4:1 nga Belgjika (me Balogunin në fushë), rasti mbetet një nga pikat më të errëta të turneut. Trump e mbrojti ndërhyrjen e tij duke thënë se thjesht kërkoi rishikim pasi nuk i u duk faul, ndërsa arbitrin brazilian të ndeshjes e quajti “pak të dyshimtë”.

Në anën tjetër, Infantino ka mohuar çdo ndikim, duke insistuar se organet gjyqësore të FIFA-s janë të pavarura dhe autonome. Megjithatë, dyshimet janë shtuar pasi “Fox Sports” raportoi se nga më shumë se 100 raste të ngjashme ku vendimet merren nga një anëtar i vetëm (zakonisht zëvendëskryetari Jorge Palacio), kjo ishte hera e parë që Al-Kamali veproi si vendimmarrës i vetëm. Ky veprim ka nxitur reagime të ashpra nga UEFA dhe personalitete të shumta të futbollit, ndërsa vetë FIFA ka refuzuar të publikojë arsyet zyrtare të këtij ndryshimi, duke shtuar edhe më tej dyshimet për favorizim politik. /D.L/

Kupa e Botës 2026 vazhdon të dhurojë emocione, ndërsa sonte vëmendja e gjithë botës së futbollit do të jetë e përqendruar te superpërballja mes Spanjës dhe Belgjikës, një duel që shumë e cilësojnë si “finale para finales”.

Dy nga kombëtaret më cilësore të turneut do të zbresin në fushë në orën 21:00, me vetëm një objektiv: sigurimin e një vendi në gjysmëfinale.

Spanja vjen në këtë sfidë me moral të lartë, pasi eliminoi Portugalinë me një fitore minimale 1-0, duke dëshmuar edhe një herë forcën dhe organizimin e saj. Në anën tjetër, Belgjika dha një sinjal të qartë për rivalët, duke shkatërruar Shtetet e Bashkuara me rezultatin bindës 4-1.

Përballja pritet të jetë një betejë taktike mes dy skuadrave të mbushura me yje, ku çdo gabim mund të kushtojë shtrenjtë. Ritëm i lartë, duele të forta dhe futboll spektakolar janë elementet që premtojnë një nga ndeshjet më të bukura të këtij Botërori.

Fituesi i këtij dueli do të përballet në gjysmëfinale me Francën, e cila tashmë ka siguruar kualifikimin, duke e bërë edhe më të madhe peshën e kësaj sfide.

Gjithçka është gati për 90 minuta që premtojnë spektakël. Mbetet të shihet nëse do të festojë “Furia e Kuqe” apo “Djajtë e Kuq” belgë.

D.L

Jurgen Klopp ka zbuluar se Liverpooli ishte shumë pranë transferimit të Kylian Mbappes në fillimet e karrierës së sulmuesit francez, duke rrëfyer prapaskenat e një operacioni që, sipas tij, ishte më i madhi në historinë e klubit në atë periudhë.

Ish-trajneri i “The Reds”, gjatë një paraqitjeje si analist në kanalin gjerman Magenta TV për ndeshjen Francë–Marok në Kupën e Botës 2026, tregoi se drejtuesit e Liverpoolit kishin bërë një përpjekje të jashtëzakonshme për ta bindur Mbappen të zgjidhte “Anfieldin”, kur ai ishte ende pjesë e Monacos.

“Ky ishte transferimi më i shtrenjtë në të cilin investoi Liverpooli. Fluturuam nga Blackpool në Nice, ku e gjithë familja Mbappe u bashkua me ne në një avion privat. Kaluam kohë së bashku, biseduam, darkuam dhe zhvilluam takime larg syrit të publikut. Ishte një eksperiencë fantastike… por në fund ai zgjodhi Parisin”, rrëfeu Klopp.

Pavarësisht përpjekjeve të klubit anglez, gara për nënshkrimin e talentit francez u fitua nga Paris Saint-Germain. Në verën e vitit 2017, klubi parisien e transferoi Mbappen nga Monaco në një marrëveshje fillestare huazimi, ndërsa një vit më vonë aktivizoi blerjen përfundimtare për 180 milionë euro, duke e bërë atë një nga transferimet më të shtrenjta në historinë e futbollit.

Pas shtatë sezonesh të suksesshme te PSG, Mbappe realizoi ëndrrën e tij në verën e vitit 2024, kur iu bashkua Real Madridit si lojtar i lirë.

Sulmuesi francez nuk e ka fshehur asnjëherë respektin dhe admirimin për Liverpoolin dhe Jurgen Kloppin. Në një intervistë për BBC Sport në vitin 2020, ai e cilësoi skuadrën angleze si një nga më të mirat në botë.

“Ajo që po bën Liverpooli është e mahnitshme. Ata funksionojnë si një makinë, kanë gjetur ritmin e tyre dhe gjithçka duket e lehtë kur i shikon, edhe pse nuk është aspak kështu. Luajnë çdo tre ditë dhe vazhdojnë të fitojnë. Janë një ekip fantastik me një trajner të shkëlqyer”, kishte deklaruar Mbappe.

Dy vite më vonë, në vitin 2022, francezi konfirmoi se kishte pasur kontakte me Liverpoolin, por theksoi se bisedimet nuk kishin avancuar shumë.

“Folëm pak me Liverpoolin, por jo shumë. Në fund gjithçka ishte mes Real Madridit dhe PSG-së. Kam folur me Liverpoolin sepse e kuqja është ngjyra e preferuar e nënës sime dhe ajo e do Liverpoolin. Nuk e di pse, por është e vërtetë. U takuam edhe kur isha te Monaco. Është një klub i madh”, kishte thënë ai.

Rrëfimi i Kloppit hedh dritë mbi një nga transferimet që mund ta kishte ndryshuar historinë e Liverpoolit. Edhe pse marrëveshja nuk u realizua, interesimi i klubit anglez për Mbappen ishte real dhe shumë më i avancuar sesa ishte bërë i ditur publikisht.

D.L