E Përditësuar:

13:35 – Gjatë shtatorit të vitit 1999, Hashim Thaçi kishte marrë rrugë drejt fshatit të Prekazit për të kërkuar mbështetje nga Rifat Jashari, në kohën kur ai e kishte menduar formimin e një partie politike.

Kështu lexohej në një dokument të datës së lartpërmendur, e për të cilin u fol sot gjatë dëshmisë së Jock Covey në Dhomat e Specializuara të Kosovës në Hagë.

Pos Jasharit, në dokument thuhej se Thaçi shkoi ta takonte edhe një komandant të UÇK-së në Drenicë.

“Lidershipi i UÇK-së është shpërbërë në disa parti, partia PBD që drejtohej nga Bardhyl Mahmuti dhe e cila binte më shumë në sy që ia ka dalë të tërheq mbështetjen e shumë përfaqësuesve dhe komandantëve të respektuar në terren të UÇK-së. Hashim Thaçi kryeministër i përkohshëm i Kosovës, e cila nuk njihej nga UNMIK, njoftoi se edhe ai do të formonte partinë e tij politike pa dhënë hollësi. Ai vizitoi fshatin e Prekazit ku u takua me Rifat Jasharin, që është i vetmi vëlla i mbijetuar i familjes së Adem Jasharit. Mbështetja e familjes së Jasharëve do të ishte avantazh në zgjedhje. Ai u takua edhe me komandantin e Drenicës së UÇK-së, por kishte ndasi midis Thaçit dhe Mahmutit i cili ka mbështetës të tij brenda segmentit të UÇK-së. Megjithatë këto janë lojtarë politik të rinj dhe nuk është e qartë çfarë agjende politike do të jenë ato”, lexohej në dokument.

Dëshmitari amerikan, Jock Covey tha: “Mund të pritej që një politikan të takohej me zgjedhësit megjithatë në qoftë se do të kisha lexuar një informacion të tillë në atë kohë, do të isha befasuar sepse nuk më dukej një gjë e natyrshme”.

Pos kësaj, Covey konfirmoi se gjatë asaj kohe, kishte informacione se kishte një lloj përçarje brenda UÇK-së.

“Kishim informacione që nuk kishte konsensus të qartë ndërmjet individëve të lartë të UÇK-së, kishte një lloj përçarje por nuk e dinim deri në çfarë mase ishte kjo përçarje. Ishim të informuar që nuk kishte konsensus ndërmjet udhëheqësve të lartë të UÇK-së”, tha Covey./D.B/EO

11:09 – Dëshmitari i katërt i mbrojtjes së ish-presidentit Hashim Thaçi, Jock Covey derisa foli për UÇK-në tha para Gjykatës Speciale në Hagë se nuk ka pasur komandë qendrore.

Në ditën e parë të dëshmisë së tij në gjykatoren e Dhomave të Specializuara të Kosovës, ai tha se “UÇK-ja ishte më shumë një lëvizje sesa ushtri”.

Ai foli për një takim i cili sipas tij ishte mbajtur për t’i bindur komandantët e zonave për marrëveshjen për çarmatim. Aty sipas tij, është vërejtur se marrëdhënia e Thaçit me komandantët e zonave ishte “e ndërlikuar”.

“Dukej sikur po konfirmonte fuqishëm atë që besonim që në fillim lidhur me zotëri Thaçin, kur jemi njohur me të, pra që ai kishte një marrëdhënie të ndërlikuar me komandantët në terren, dhe se ata kishin pak kohë, ose më mirë thënë, kishin shfaqur mungesë respekti ndaj tij, në këtë rast për të cilin po flasim, po të shohim këtë vizatim, më lejoni të kthehem pak prapa. Gjenerali Jackson i cili kishte mospajtim me gjeneralin Clark sa i takon përpjekjeve të rusëve për të marrë aeroportin përpara se KFOR-i të hynte në Kosovë dhe unë, gjenerali Clark dhe gjenerali Jackson, dhe është meritë e tyre kjo, kishim tejkaluar këtë mosmarrëveshje serioze dhe gjenerali Jackson pati nevojë që të sjelltë komandantët e UÇK-së dhe t’i rivendoste, t’i bindte ata që t’i pranonin kushtet e zbatimit të marrëveshjes, konkretisht marrëveshje për krijimin e një force mbrojtëse të Kosovës, si organizatë civile e paarmatosur, KFOR-i ishte afër afatit kohor, dhe i duhej ndihmë për t’i bindur komandantët për përgjigje pozitive”, tha ai.

“Zotëri Thaçi nuk kishte marrëdhënie të rëndësishme me këtë trupë të komandantëve në terren dhe kishte shumë pak gjasa që ata të kërkonin udhëzimet e tij, aq më pak urdhrat e tij, apo që të raportonin aktivitetet e tij te ai”, shtoi dëshmitari.

Duke folur për periudhën e vitit 1999, ai tha se e kishin kuptuar që në UÇK nuk ka pasur komandë qendrore.

“Ashtu siç e kemi kuptuar në atë kohë, nuk ka pasur komandë qendrore. Gjeneral Ceku ishte individi me më ndikim në UÇK, me shumë ndikim se të tjerët, megjithatë nuk duhej të ishte në një pozitë të tillë që të merrte përsipër këtë dhe kishte nevojë të dinte që kishte marrëveshje midis tyre. Gjatë takimit ne mund të shihnim gjeneral Çekun shumë të qetë i cili shikonte prapa për t’u siguruar që komandantët e mbështesnin, që mbështesnin hollësitë e marrëveshjes që po diskutohej. Neve na dhanë përshtypje që Çeku kishte nevojë të sigurohej që kishte konsensus që merrte pra mbështetje nga komandantët në terren. Dhe kjo ishte tërësish në përputhje me atë që kuptonim ne, sepse ne kuptonim që UÇK-ja ishte më shumë një lëvizje sesa një ushtri ku secili individ në zona apo komandant në terren kishte autonomi të gjerë, qoftë kjo në realitet apo imagjinatën e tyre, por ata kishin këtë autonomi, ata mendonin që mund të bënin atë që vendosnin të bënin në zonën e tyre, që ishin të pavarur”, tha ai.

Jock Covey është dëshmitari i katërt në Hagë në mbrojtje të ish-presidentit të Kosovës, Hashim Thaçi.

Ai ka shërbyer në Kosovë si zëvendës i përfaqësuesit special të sekretarit të OKB-së në Kosovë, Bernard Kushner.

Dëshmia e tij vjen pasi në gjykatore u dëgjuan dëshmia e ish-sekretarit amerikan të Shtetit, James Rubin, ajo e ish-këshilltarit ligjor të ekipit të Kosovës në Rambuje, si dhe dëshmia e ish-diplomatit britanik John Stewart Duncan./D.B/KP

10:18 – Jock Covey është dëshmitari i radhës në Hagë në mbrojtje të ish-presidentit të Kosovës, Hashim Thaçi. Amerikani e ka nisur dëshminë para Dhomave të Specializuara sot, më 30 tetor.

Ai ka shërbyer në Kosovë si zëvendës i përfaqësuesit special të sekretarit të OKB-së, Bernard Kushner.

Dëshmia e tij vjen pasi në gjykatore u dëgjuan dëshmia e ish-sekretarit amerikan të Shtetit, James Rubin, ajo e ish-këshilltarit ligjor të ekipit të Kosovës në Rambuje, si dhe dëshmia e ish-diplomatit britanik John Stewart Duncan./D.B/KP

07:45

Në Dhomat e Specializuara të Kosovës në Hagë sot vazhdon procesi gjyqësor ndaj ish-krerëve të Ushtrisë Çlirimtare të Kosovës Hashim Thaçit, Kadri Veselit, Rexhep Selimit dhe Jakup Krasniqit, ku do vazhdojë paraqitja e provave të mbrojtjes me thirrjen e dëshmitarëve në këtë rast të gjykimit.

Specialja njofton se në këtë çështje gjyqësore pritet që dy dëshmitarë të japin dëshmi në sallë të gjyqit këtë javë.

Gjatë dy javëve të kaluar kanë dëshmuar tre dëshmitarë të thirrur nga Mbrojtja, si John Duncan i cili ishte dëshmitari i tretë i cili ishte një ish-punonjës i shërbimit diplomatik të Britanisë së Madhe.

Ai dha dëshmi kryesisht në seancë publike.

Në çështjen gjyqësore Thaçi dhe të tjerët për krime lufte, Trupi Gjykues më 18 shtator urdhëroi vazhdimin e paraburgimit për Rexhep Selimin, Kadri Veselin dhe Jakup Krasniqin, duke konstatuar se vazhdojnë të ekzistojnë rreziqet që të akuzuarit mund të pengojnë ecurinë e procesit ose të kryejnë vepra penale të tjera.

Trupi Gjykues gjykoi se lirimi i të akuzuarve në posedim të informacionit të ndjeshëm nuk do të ndihmonte mbrojtjen efikase të dëshmitarëve që kanë dhënë dëshmi tashmë ose të atyre që mund të dëshmojnë në procese paralele.

Në rastin e z. Selimi, Trupi Gjykues rikujtoi se duket se z. Selimi nxori informacion konfidencial për palë të treta të paautorizuara, çka përforcoi konstatimin e Trupit Gjykues se ekziston rreziku që z. Selimi të pengojë ecurinë e procesit.

Trupi Gjykues tha se të akuzuarit gjenden në paraburgim për një kohë të gjatë, por vazhdimin e paraburgimit e gjykoi të arsyeshëm bazuar në faktet se ndaj të akuzuarve janë ngritur akuza për krime të rënda ndërkombëtare, ku pretendohet se ata luajtën rol të rëndësishëm dhe mund të përballen me burgim të gjatë në qoftë se shpallen fajtorë./S.K/EO/

Në Tiranë të Shqipërisë do të protestohet më 17 tetor me kërkesën për drejtësi për ish-eprorët e Ushtrisë Çlirimtare të Kosovës (UÇK).

Protesta do të mbahet në sheshin “Skënderbej”, u bë e ditur në një konferencë për media të Organizatës së Veteranëve të Luftës së Ushtrisë Çlirimtare të Kosovës. Kjo protestë organizohet nga kategoritë e dala nga lufta të Ushtrisë Çlirimtare të Kosovës.

Kryetari i OVL-UÇK-së, Hysni Gucati, nga Tirana tha se kjo protestë vjen pas asaj të mbajtur në Prishtinë dhe tjetrës në Hagë – qyteti holandez ku e ka selinë Gjykata Speciale.

“Arsyet tashmë janë të qarta [për protestë] dhe tashmë të njohura për opinionin publik, padrejtësia që po ushtrohet në Gjykatën Speciale kundër ish-krerëve të Ushtrisë Çlirimtare të Kosovës. Ne, bashkëluftëtarë dhe përfaqësues të kategorive të dala nga lufta shprehim mirënjohje të përhershme për qeverinë e shtetit shqiptar, për kujdesin dhe përkrahjen e vazhdueshme ndaj kësaj çështje madhore kombëtare. Mesazhi ynë është i thjesht dhe i qartë: Drejtësi për çlirimtarët kundër padrejtësisë që po u bëhet atyre. Prandaj, sot nga kjo tryezë ju drejtohemi të gjithë shqiptarëve kudo që jetojnë, veprojnë, partive politike shqiptare, sidomos Shqipëri, Kosovë, Mal i Zi bashkoheni me ne në këtë protestë paqësore në Tiranë. Kjo nuk është vetëm çështje e disa individëve, por është çështje e të gjithë neve, është çështje e dinjitetit, sakrificës dhe e vërtetës tonë historike. Le të ngrihemi të gjithë si një zë i vetëm, për të kërkuar drejtësi për çlirimtarët tanë dhe të ju kundërvihemi padrejtësive”, deklaroi ai.

Ai pret që kjo protestë të mbështetet nga partitë shqiptare atje, meqë u shpreh se Ushtria Çlirimtare e Kosovës (UÇK) gjenezën e ka në Shqipëri.

“Tirana është duke bërë shumë për pjesëtarët e Ushtrisë Çlirimtare të Kosovës, sidomos kryeministri Edi Rama. Ne jemi dëshmitarë se kemi qenë vet burg atje në Hagë dhe e di punën edhe aktivitetin e Tiranës që është duke e bërë për pjesëtarët e Ushtrisë Çlirimtare të Kosovës. Mirë është të punohet ende më shumë, por është duke u punuar. Qeveria shqiptare është duke punuar më shumë në këtë drejtim, është duke na ndihmuar shumë, ne e dimë që Qeveria e Shqipërisë ka kërkuar edhe një rezolutë të përbashkët Kosovë-Shqipëri që ta kemi edhe një rezolutë që ta dërgojmë në Këshillin e Evropës sepse ka të drejtë vetëm Shqipëria ta dërgojë, ne nuk kemi të drejtë si shtet i Kosovës sepse nuk jemi të anëtarësuar. Por unë besoj dhe shpresoj se qeveria shqiptare nuk do të mungojë fare në këtë drejtim por do të jap kontributin e vet për aq sa mundet dhe ka kapacitete”, u shpreh ai.

Kryetari i Shoqatës së Familjeve të Dëshmorëve të UÇK-së, Xhavit Jashari tha se Specialja po “sulmon e po bën përpjekje për të njollosur luftën tonë të drejtë dhe të pastër”.

“Ne, në vazhdën e protestave për të kundërshtuar padrejtësinë, jo vetëm pse krerët e UÇK-së mbahen padrejtësisht atje, por nga kjo gjykatë është duke u sulmuar dhe duke bërë përpjekje për të njollosur dhe barazuar luftën tonë të drejtë dhe të pastër të Ushtrisë Çlirimtare të Kosovës dhe mendoj që populli dhe kombi shqiptar kudo që janë duhet të reagojnë sepse lufta e lavdishme e UÇK-së ka përmasë kombëtare. Dhe jo vetëm kjo luftë, por gjithherë gjatë historisë, shqiptarët kurdo herë që janë organizuar për të mbrojtur, për të luftuar, për t’i bërë përpjekjet, nuk e kanë bërë vetëm për liri dhe çlirim por edhe për bashkim”, u shpreh Jashari.

Në konferencë për media në Tiranë, Jashari tha se institucionet vendore por edhe të Tiranës e Shkupit “obligohen që të reagojnë e kërkojnë drejtësi për ish-krerët e UÇK-së”.

“Këtu obligohen edhe institucionet kudo që janë, Tiranë, Prishtinë dhe Shkup që të reagojnë dhe kërkojnë, jo të përzihen në punët e drejtësisë por kur ke parasysh se si është kërkuar kjo gjykatë aty, pra nga një rezolutë e Këshillit të Evropës dhe duke i dhënë mundësi një raporti të shpifur të Dick Martyt, gjoja se UÇK ka bërë trafikim organesh. Mendoj se në radhë të parë se institucionet ku do që janë duhet të kërkojnë dhe është dashur të kërkojnë sepse nuk është argumentuar dhe nuk është faktuar asgjë mbi këtë shpifje, mbi të cilën është krijuar kjo gjykatë. Dhe në momentin që nuk është vërtetuar, faktuar, argumentuar asgjë në këtë drejtim, kjo gjykatë do të ishte dashur të jetë inekzistente”, deklaroi Jashari.

Bashkëorganizatori i protestës, Azgan Haklaj ka bërë thirrje që shqiptarët nga të gjitha vendet të bëhen bashkë më 17 tetor.

“Sot është një moment historik, çlirimtarët ndodhën në Hagë përballë disa akuzave të fabrikuara, ndërkohë Radoiçiqi me shokë është i lirë. Ndaj sot është mision shumë i rëndësishëm i shqiptarëve dhe ju drejtohemi me një thirrje tepër vëllazërisht dhe shumë shqiptarisht – të gjithë sot jemi UÇK, motoja jonë është edhe unë jam UÇK, drejtësi dhe liri për çlirimtarët. Besoj që më datën 17 tetor, këtu në sheshin ‘Skënderbej’ që mban emrin e simbolit shtetëror dhe kombëtar të shqiptarëve, Gjergj Kastriotit Skënderbeu, të gjithë shqiptarët do të vijnë dhe do të japin një mbështetje të fuqishme Ushtrisë Çlirimtare të Kosovës dhe drejtuesve të saj që ndodhën nën akuzat të fabrikuara, me dëshmitarë të rremë në Hagë”, përfundoi ai.

Një tjetër protestë është mbajtur në Hagë, më 14 shtator, një ditë para fillimit të dëgjimit të dëshmitarit të parë të mbrojtjes, ish-ndihmës sekretarit amerikan të Shtetit, James Rubin. Protesta është mbajtur në afërsi të ndërtesës së Gjykatës Speciale, ku morën pjesë rreth 10 mijë shqiptarë nga e gjithë bota.

Po ashtu, Organizata e Veteranëve të Luftës së UÇK-së ka mbledhur më 7 gusht në Prishtinë, ish-luftëtarë e qytetarë të tjerë në një protestë kundër padrejtësisë që vlerësojnë se po i bën Gjykata Speciale në Hagë.

Në Shqipëri do të protestohet më 17 tetor me kërkesën për drejtësi për ish-eprorët e Ushtrisë Çlirimtare të Kosovës (UÇK).

Protesta do të mbahet në sheshin “Skënderbeu”, u bë e ditur në një konferencë për media të Organizatës së Veteranëve të Luftës së Ushtrisë Çlirimtare të Kosovës.

Kryetari i OVL-UÇK-së, Hysni Gucati nga Tirana tha se kjo protestë vjen pas asaj të mbajtur në Prishtinë dhe tjetrës në Hagë – qyteti holandez ku e ka selinë Gjykata Speciale.

“Sot nga kjo tryezë ju drejtohemi të gjithë shqiptarëve, partive politike bashkoheni me ne në këtë protestë paqësore në Tiranë. Le të ngrihemi të gjithë si një vend i vetëm që të ju kundërvihemi padrejtësive”, deklaroi ai. /D.B/KP