Moderatori i njohur amerikan, Jimmy Kimmel, ka zbuluar se ka marrë shtetësinë italiane. Lajmi vjen pak pasi ai ka kritikuar publikisht Donald Trump, pas fitores së këtij të fundit në zgjedhjet presidenciale amerikane.

Kimmel, 57 vjeç, ka origjinë italiane nga nëna e tij dhe ka vendosur të pajiset me shtetësinë e Italisë, duke shprehur zhgënjimin e thellë me gjendjen e Shteteve të Bashkuara nën presidencën e Trump.

Gjatë një interviste në podcastin e Sarah Silverman, ai tha: “E mora shtetësinë italiane, e kam tani. Ajo që po ndodh… Sado keq të mendosh që është, në fakt është shumë më keq. Është e pabesueshme. Mendoj se gjendja është madje edhe më e keqe nga sa do të dëshironte vetë Trump”.

Moderatori i “Jimmy Kimmel Live!” theksoi se njerëzit duhet të mbështesin ata që kanë ndryshuar mendim për Trump, edhe pse më parë e kishin mbështetur.

“Ka shumë njerëz të tillë. Për shembull, Joe Rogan ka thënë: ‘Pse po e bën këtë? Nuk duhet të deportosh njerëz’, dhe menjëherë i shkruajnë: ‘Mos fol, se e mbështete’. Mendoj se duhet ta lëmë derën hapur. Ndryshimi i mendimit është i vështirë, dhe të pranosh se ke gabuar është edhe më e vështirë – shumica nuk e bëjnë kurrë”.

Ndërkohë, Donald Trump, në Truth Social, ka parashikuar se Jimmy Kimmel dhe Jimmy Fallon mund të jenë pasardhësit e radhës të Stephen Colbert, pas lajmit se “Late Show” do të mbyllet në maj 2026.

“Thuhet me forcë se Jimmy Kimmel do të jetë i radhës për t’u përfshirë në lotarinë e natës së vonë për ‘talentet pa talent’ dhe menjëherë pas tij, Fallon do të largohet. Këta janë njerëz pa talent, që marrin miliona dollarë për të shkatërruar atë që dikur ishte televizion i shkëlqyer. Është kënaqësi t’i shoh larg, dhe shpresoj që kam luajtur një rol kryesor në këtë”, shkroi Trump.

Kontrata për “Jimmy Kimmel Live!” përfundon më 2026, dhe ende nuk dihet nëse do të rinovohet. Në nëntor të vitit të kaluar, pas rikthimit të Trump në presidencë, Kimmel e quajti atë “kriminel”.

“Më shumë se gjysma e vendit votoi për një kriminel që planifikon ta falë veten për krimet e tij,” tha ai gjatë emisionit. Ai shtoi se kjo ishte “një natë e tmerrshme” për gratë, fëmijët, qindra mijëra emigrantë punëtorë që mbajnë gjallë ekonominë e SHBA-së, për kujdesin shëndetësor, klimën, shkencën, gazetarinë, drejtësinë dhe lirinë e fjalës.

Sipas tij, të prekurit më shumë janë të varfërit, klasa e mesme, të moshuarit që varen nga sigurimet shëndetësore, aleatët në Ukrainë, NATO, e vërteta, demokracia dhe vetë mirësjellja.

“Një natë e tmerrshme për të gjithë ata që votuan kundër tij, besoni apo jo, edhe për ata që votuan për të, thjesht ende nuk e kanë kuptuar,” përfundoi Kimmel.

Aktorja 50-vjeçare Angelina Jolie pritet të shesë shtëpinë e saj në Los Angeles dhe të zhvendoset jashtë vendit vitin e ardhshëm, pasi binjakët Knox dhe Vivienne të mbushin 18 vjeç.

“Angelina nuk ka dashur ë jetojë me kohë të plotë në Los Angeles. Ajo nuk kishte zgjedhje për shkak të marrëveshjes së kujdestarisë me Bradin. Planifikon të zhvendoset sapo Knox dhe Viv të mbushin 18 vjeç vitin e ardhshëm. Po shikon disa vende jashtë vendit. Do të jetë e lumtur kur të mund të largohet nga Los Angelesi”, ka thënë një burim për revistën People.

Jolie dhe ish-bashkëshorti i saj, aktori, Brad Pitt, me të cilin ka gjashtë fëmijë: Maddox, 24 vjeç, Pax, 21, Zahara, 20, Shiloh, 19, dhe binjakët, arritën marrëveshjen për divorc në muajin dhjetor 2024, pas një beteje ligjore tetëvjeçare.

Jolie ka blerë vilën historike të vitit 1913 më 2017 për 24.5 milionë dollarë. Shtëpia ka mbi 1,000 metra katrorë hapësirë, me 6 dhoma gjumi dhe 10 banjo, dikur ka qenë në pronësi të regjisorit Cecil B. DeMille. Aktorja ka folur më herët për dëshirën e saj për të lënë Los Angelesin dhe për të kaluar më shumë kohë në Kamboxhia, vendi ku ka lindur djali i saj i madh, Maddox.

“Unë jam rritur në këtë qytet. Jam këtu sepse më duhet të jem këtu për shkak të divorcit, por sapo ata të bëhen 18, do të mund të largohem”, tha Jolie për The Hollywood Reporter. Ajo ka thënë tutje se kur dikush ka familje të madhe, do që ata të kenë privatësi, qetësi e siguri.

“Kam një shtëpi tani për t’i rritur fëmijët, por ndonjëherë ky vend mund të jetë… ai humanitet që e kam gjetur nëpër botë nuk është ajo me të cilën jam rritur këtu. Pas Los Angelesit, do të kaloj shumë kohë në Kamboxhia. Do të vizitoj familjarët e mi kudo që të jenë në botë”, ka thënë ajo.

Ylli ka thënë se i pëlqen të jetë me njerëzit që i do.

“Nuk jam dikush që lutet të rrijë vetëm. Nuk jam ai lloj personi që mendon, ‘Ah, do të doja të isha vetëm për të pasur kënaqësitë e mia të fshehta’. Sepse zakonisht kënaqësia ime e fshehtë është të jem me dikë. Më pëlqen të bëj diçka që i bën ata të lumtur. Kjo me të vërtetë më bën të lumtur”, ka thënë Jolie.

Vajza e ish-presidentit Joe Biden, Ashley Biden, ka paraqitur kërkesë për divorc nga bashkëshorti i saj, kirurg plastik, dr. Howard Krein, pas më shumë se 13 vjetësh martesë.

Ashley, 44 vjeç, i paraqiti dokumentet në Gjykatën Bashkiake të Filadelfias të hënën, konfirmoi “The Post”.

Biden dhe Krein u martuan në Greenville, Delaware, në qershor 2012 – dy vjet pasi u prezantuan nga vëllai i saj i madh i ndjerë, Beau Biden. Detajet rreth shkakut të divorcit nuk dihen.

Krein është otorinolaringolog dhe kirurg plastik në spitalet universitare “Thomas Jefferson” në Filadelfia. Përpara divorcit të tyre, çifti jetonte në Filadelfia.

Taylor Swift do të rikthehet me një album. Këngëtarja bëri të ditur se shpejt do të vijë “The Life of a Showgirl”, i 12-i në karrierën e saj muzikore.

Tay njoftoi publikun në podkastin e të dashurit të saj, Travis Kelce dhe vëllait të tij, Jason. Taylor, u shpreh në podkastin “New Heights”: “A mund të tregoj diçka?”. Jason, 37 vjeç, e pyeti: “Ok. Çfarë kemi? Një valixhe? Në ngjyrë të gjelbër, me nistoret T.S. mbi të”, ndërsa Tay aprovoi.

“Çfarë ka brenda?” pyeti Jason, i çuditur. “Ky është albumi im i ri, “The Life of a Showgirl”, zbuloi këngëtarja.

“T.S 12!” tha Travis, goxha entuziast.

Kopertina nuk u zbulua, ndërsa website i Taylor tregon një kopertinë misterioze të albumit me ngjyrë portokalli dhe të gjelbër, me opsionet për blerjen në vinyl, kasetë dhe CD. Edicioni CD do të vijë me një poster. Lista e këngëve nuk është bërë ende e ditur.

Albumi i ri vjen disa muaj pasi Taylor rifitoi të drejtat e masterave të gjashtë albumeve të para: “Taylor Swift”, “Fearless”, “Speak Now”, “Red”, “1989” dhe “Reputation” nga Shamrock Capital në maj. Data e lansimit mbetet mister, megjithëse në website thuhet se kopjet do të dërgohen para 13 tetorit.