Kryetari i Kuvendit të Republikës së Kosovës, Glauk Konjufca, ka pritur sot në takim Ministrin e Brendshëm të Izraelit, Moshe Arbel.

Në takim u diskutuan çështje të ndryshme të interesit të përbashkët, që përfshijnë bashkëpunimin ekonomik, marrëdhëniet diplomatike dhe kulturore, çështje të sigurisë dhe mundësitë për të forcuar edhe më tej raportet mes dy vendeve.

Kryetari Konjufca e falënderoi ministrin izraelit, Moshe Arbel, për punën e bërë për të arritur deri te heqja e vizave nga shteti i Izraelit, për qytetarët e Republikës së Kosovës. Palët vlerësuan se kjo gjë përbën një hap shumë domethënës në zhvillimin e raporteve mes dy shteteve, si dhe është një mundësi shumë e mirë për të rritur shkëmbimet e dyanshme, ku qytetarët e dy vendeve tona do të jenë ata që do të përfitojnë më së shumti.

Ndihma e saj gjatë dhe pas luftës për Kosovën dhe popullin e saj, janë arsyeja pse komuna e Podujevës ka emërtuar një rrugë në qytet me emrin e ish-eurodeputetës, Doris Pack.

Ish-eurodeputetja, Pack, e cila ndjehej krenare për këtë ngjarje, ka thënë se do të ketë kontakte me kolegët e saj në Parlamentin Evropian për ta ndihmuar popullin e Kosovës. Sipas saj, Kosova meriton të jetë anëtar i Këshillit të Evropës dhe shpreson se do të ndodhë së shpejti.

“Ndihem shumë e përulur, por jam shumë krenare dhe mendoj se është e vetmja rrugë në botë që ka emrin tim. Kjo tregon se njerëzit e Kosovës e dinë se unë jam shumë afër zemrës dhe jetës së tyre, dhe që jam këtu që nga viti 1990. Viti 1990 ishte hera ime e parë në Kosovë dhe nga kjo kohë po ndjej me popullin, po vuaj me popullin dhe ndonjëherë kam qenë e lumtur me popullin. Por gjërat shkuan në një drejtim të mirë. Dhe shpresoj shumë që një e ardhme e tillë të jetë më e mirë se e kaluara. Nuk mund të bëj aq shumë sepse nuk jam më në post aktiv, por mendoj se do të jem zëri i Kosovës në pjesën perëndimore dhe do të kem gjithmonë kontakte me kolegët e mi në Parlamentin Evropian për t’u dhënë atyre një ide se çfarë do të thotë të ju ndihmoj juve, sepse ata ndihmojnë një vend shumë demokratik i cili meriton të jetë anëtar i Këshillit të Evropës dhe shpresoj se do të ndodhë së shpejti”, është shprehur Pack.

Ndërsa, kryetari i Komunës së Podujevës, Shpejtim Bulliqi ka theksuar se me rastin e 25 vjetorit të çlirimit të Podujevës, njëri nga aktivitetet e 19 qershorit është shpallja si qytetare nderi ish-eurodeputetën Doris Pack. Bulliqi ka shtuar se populli i Kosovës gjithmonë do të jetë “borxhli” ndaj kontributit të Pack, e kjo sipas tij është më e pakta që mundet me e bërë ky shtet për ish-eurodeputetën.

“Është një veprim më e vogël që kemi mundur me e bë për një njeri kaq të madhe që ka dhënë kaq shumë për Kosovën e cila ka kontribuar në aspektin e internacionalizimin e çështjes së Kosovës, por jo vetëm sepse kontributi i saj ka vazhduar edhe pas luftës në njohjen e pavarësisë së Kosovës, prandaj si Kuvend Komunal kemi marrë vendim që të shpallim qytetare nderi të komunës sonë dhe njëkohësisht në vazhdën e krejt këtyre aktiviteteve 19 qershorit, Ditës së Çlirimit të Podujevës kemi vendos një rruge të rëndësishme këtu t’ia lëmë emrin e kësaj mike të madhe shqiptare për çka e falënderoj shume që është në mesin tonë dhe besoj që kontributi, angazhimi i saj është shumë më i madh. Ne jemi gjithmonë borxhli që ta ruajmë si mike të mirë dhe ta respektojmë çfarëdo situate qoftë”, ka theksuar Bulliqi.

Rruga në Podujevë me emrin “Doris Pack” fillon nga kryqëzimi i rrugës “Agron Rrahmani” dhe “Ali Ajeti” deri te kryqëzimi me rrugën “Bedri Bajrami” dhe “Fahri Fazliu”.

Valët e të nxehtit kanë goditur Evropën më herët këtë vit. Greqia, Qiproja, Turqia dhe Italia tashmë po përballen me të nxehtit ekstrem, ku disa vende po regjistrojnë temperatura 10 gradë Celsius mbi mesataren sezonale.

Rreziku nga vala e të nxehtit në Lojërat Olimpike të Parisit ka ngjallur shqetësim te organizatorët lidhur me sigurinë e atletëve. Spanja është duke u përgatitur për një tjetër verë të frikshme, duke publikuar një hartë të re për të ndihmuar me parashikimet më të sakta të valëve të të nxehtit. Qytetet në të gjithë kontinentin po përgatiten për ta përballuar më lehtë nxehtësinë ekstreme.

A do të jetë kjo verë jashtëzakonisht e nxehtë në Evropë?

Kur bëhet fjalë për valët e të nxehtit ose ekstremet individuale të motit, askush nuk e di qartë. Por situata e mëhershme meteorologjike mund t’i ofrojë disa të dhëna.

“Është shumë e vështirë të parashikosh me saktësi se si do të jetë moti muaj përpara, e lëre më edhe javë e ndonjëherë ditë”, thotë Tamsin Green, një meteorologe nga shërbimi i parashikimit Weather & Radar.

Kjo për shkak se moti në të gjithë Evropën është jashtëzakonisht i ndryshueshëm me faktorë të panumërt të ndryshëm që mund të ndikojnë.

Megjithatë meteorologët mund të analizojnë modelet e motit dhe të dhënat për tendencat e përgjithshme – duke përfshirë mesataret mujore të temperaturës. Aktualisht, duket se qershori, korriku dhe gushti janë të gjitha në trend mbi mesataren për sa i përket temperaturës, thotë Green.

Moti në të gjithë kontinentin ndryshon shumë duke e bërë të vështirë parashikimin se ku mund të godasë një ‘verë e nxehtë’. Green thotë se mund të ketë pika të nxehta në Evropën Jugore dhe Lindore.

Evropa Perëndimore mund të përballet me reshje mesatare në muajin qershor, më pas reshje mbi mesataren për Evropën Jugore në muajin korrik, por kushte më të thata në lindje. Sipas saj, gushti mund të jetë muaji më i thatë.

Çfarë ndikon te moti i Evropës?

Shumë faktorë të ndryshëm ndikojnë në motin e ndryshueshëm të Evropës. Bota aktualisht është në një fazë kalimtare midis dukurive klimatike El Niño dhe La Niña, për shembull, e cila është “vendimtare” për përcaktimin e modeleve globale të motit dhe temperaturës.

Parashikohet të qëndrojmë në këtë fazë neutrale të paktën deri në fillim të verës, por efektet e El Niño janë ende në vazhdim.

“Në muajt e fundit, temperaturat e ajrit dhe temperaturat e oqeanit janë ende astronomikisht të larta. Ato janë ende këmbëngulëse”, thotë Green.

Pavarësisht se El Niño përkufizohet si temperatura mbi mesataren e sipërfaqes së detit dhe rritje të reshjeve në Oqeanin Paqësor tropikal qendror dhe lindor, ai ka efekte globale.

Evropa po ngrohet më shpejt se mesatarja globale

Megjithatë, ekziston një faktor që luan një rol të madh në verërat gjithnjë e më të ngrohta të kontinentit dhe ai është ndryshimi klimatik i shkaktuar nga njeriu.

“Një gjë që është një faktor masiv, i pamohueshëm që nuk mund të injorohet është se ne po thyejmë vazhdimisht rekordet e nxehtësisë”, thotë Green.

“Dhjetë vitet e fundit kanë qenë dhjetë më të ngrohtat e regjistruara, ku shumica e ngrohjes së Tokës ka ndodhur në 40 vitet e fundit. E kemi parë prillin e vitit 2024 i cili ishte radhazi muaji i 11-të me nxehtësinë më të madhe në histori”, shtoi ajo.

Evropa është ngrohur me dyfishin e mesatares globale që nga viti 1991, sipas të dhënave të fundit nga Organizata Botërore Meteorologjike (WMO) dhe agjencia e BE-së për klimën Copernicus (C3S). Kontinenti nuk bën “përjashtim” kur bëhet fjalë për pasojat e ndryshimeve klimatike me të dyja agjencitë që paralajmërojnë se Evropa duhet të bëjë më shumë për të reduktuar emetimet e saj dhe largimin nga karburantet fosile.

23 nga 30 valët më të rënda të të nxehtit të kontinentit kanë ndodhur që nga viti 2000 – pesë ishin në tre vitet e fundit.

Mesatarja e fundit pesëvjeçare tregon se temperaturat në Evropë tani janë 2.3C mbi nivelet para-industriale krahasuar me 1.3C më të larta në nivel global.

Për shkak të kësaj, Green beson “në një shkallë mjaft të madhe sigurie” se 2024-ta ndoshta do të jetë një vit tjetër rekord sa i përket temperaturave.

“Pavarësisht se si mund të formohen parashikimet, tendencat e rritjes së temperaturave globale janë të pamohueshme”./UBTNews/

Zëvendësministri i Punëve të Jashtme dhe i Diasporës, Kreshnik Ahmeti, po qëndron për një vizitë zyrtare në Pragë, ku u prit në takim nga homologu i tij, Jan Marian.

Gjatë takimit, u diskutua për procesin e anëtarësimit në Këshillin e Evropës, si dhe proceset e ndërlidhura me integrimet euro-atlantike të Republikës së Kosovës, sipas një njoftimi nga MPJD.

Zëvendësministri Ahmeti ritheksoi kërkesën për heqjen e masave të Bashkimit të Evropian ndaj Kosovës. Në fund, ai falënderoi Republikën Çeke për mbështetjen e vazhdueshme në këto procese.

Po ashtu, u diskutua edhe për zhvillimet në nivel botëror me theks të veçantë agresionin e paprovokuar të Federatës Ruse në Ukrainë dhe ndikimin e saj në Evropë dhe rajonin tonë.

Pas këtij takimi, Zëvendësministri Ahmeti, takoi edhe Drejtorin e Përgjithshëm, z. Konecky, me të cilin diskutuan për çështjet shumëpalëshe, më konkretisht u trajtuan proceset integruese të Republikës së Kosovës në organizata ndërkombëtare, me theks të veçantë procesi i anëtarësimit në Këshillin e Evropës dhe Bashkimin Evropian.

Zëvendësministri Ahmeti, po ashtu takoi Drejtorin Koshatka, ku në fokus të bisedës ishin marrëdhëniet dypalëshe dhe mundësitë për thellimin e tyre në fusha me interes të përbashkët, si ajo e drejtësisë, ekonomisë dhe kulturës.

Gjatë takimit u diskutua për marrëveshjet në proces dhe inicimin e marrëveshjeve të reja.