Dogana e Kosovës ka parandaluar një rast të deklarimit të pasaktë të mallrave në pikën e kalimit kufitar në Vërmicë, ku gjatë kontrollit të një kamioni janë zbuluar sasi të konsiderueshme të produkteve të padeklaruara me vlerë rreth 72,600 euro, pa përfshirë taksat e importit.

Rasti është identifikuar gjatë procedurës së zhdoganimit, pasi zyrtari doganor ka ngritur dyshime për përputhshmërinë mes peshës së paraqitur në dokumentacion dhe ngarkesës faktike.

Pas peshimit të automjetit ka rezultuar se kamioni ishte më i rëndë se sa ishte deklaruar. Me këtë rast, zyrtarët kanë ushtruar kontroll të hollësishëm, me ç’rast kanë zbuluar mallra të padeklaruara:

• 1,036 palë këpucë;
• 2,980 copë veshmbathje (pothuajse të gjitha me marka tregtare të mbrojtura).

Lidhur me këtë rast janë iniciuar procedurat përkatëse administrative dhe janë njoftuar organet kompetente për trajtim të mëtejmë ligjor.

Dogana e Kosovës i ka kujtuar të gjithë operatorëve ekonomikë se sipas Kodit Doganor dhe të Akcizave, çdo mall duhet të deklarohet saktësisht, ndërsa ka konfirmuar përkushtimin e saj për luftimin e kontrabandës dhe mbrojtjen e konkurrencës së drejtë në treg. /E.A/

Albi Mall Superliga e Kosovës rikthehet sot me sfidën hapëse të xhiros së 13-të, ku Dukagjini pret Llapin në stadiumin “18 Qershori” në Klinë, me fillim nga ora 17:00.

Të dyja skuadrat hyjnë në këtë përballje me synime të qarta për të marrë pikët e plota. Klinasit synojnë të shfrytëzojnë faktorin e fushës vendase për rezultat pozitiv, ndërsa llapjanët udhëtojnë me ambicie për t’u kthyer me pikë nga ky transfer i vështirë.

Kjo është e vetmja ndeshje e programuar për ditën e premte, ndërsa xhiroja e 13-të vazhdon gjatë fundjavës me takimet e tjera:

E shtunë:

Feronikeli ’74 – Ballkani (13:00)

Gjilani – Malisheva (16:00)

E diel:

Vushtrria – Prishtina (13:00)

Drenica – Drita (13:00)

Inspektorati Qendror i Mbikëqyrjes së Tregut (IQMT) po vazhdon aktivitetet intenzive inspektuese ndaj bizneseve që operojnë online, me fokus të veçantë te produktet që ndodhen në transport drejt konsumatorëve.

Aksioni po realizohet nga 10 ekipe inspektuese në bashkëpunim me Policinë e Kosovës, Administratën Tatimore të Kosovës (ATK) dhe Autoritetin Rregullativ të Komunikimeve Elektronike dhe Postare (ARKEP). Deri më tani janë kryer mbi 24 inspektime të shërbimeve postare në të gjithë territorin e vendit.

Gjatë kontrolleve, ekipet e terrenit kanë evidentuar parregullsi të ndryshme, duke përfshirë rastet kur produktet nuk posedonin kupon fiskal, si dhe mungesën e deklaracionit të prejardhjes e dokumentacionit përcjellës.

Në përputhje me kuadrin ligjor, inspektorët u kanë dhënë afat subjekteve përkatëse për prezantimin e dokumentacionit të nevojshëm. Në rast të mospërmbushjes së kërkesave, do të ndërmerren masa administrative e ligjore, përfshirë sekuestrimin e mallit dhe shqiptimin e gjobave.

Përveç tetë qendrave kryesore, aksioni është shtrirë edhe në komunat e rajonit të Dukagjinit dhe më gjerë, si në Klinë, Istog, Deçan, Junik, Rahovec, Malishevë, Suharekë dhe Dragash. Ky proces përfshin gjithashtu monitorimin e faqeve online, reklamave si dhe trajtimin e ankesave të konsumatorëve. /E.A/

Gjashtë vjet pas dërgimit në Hagë të katër ish-udhëheqësve të Ushtrisë Çlirimtare të Kosovës (UÇK), institucionet shtetërore dhe subjektet politike në Kosovë kanë intensifikuar veprimet për mbështetjen e procesit të apelit, pas vendimit me të cilin ata u dënuan me gjithsej 81 vjet burgim.

Të shtunën pritet të mbajë takimin e radhës grupi strategjik për hartimin dhe zbatimin e strategjisë shtetërore lidhur me procesin gjyqësor në Dhomat e Specializuara. Zëvendëskryeministri i parë dhe ministri i Punëve të Jashtme dhe Diasporës, Glauk Konjufca, ka bërë të ditur se punimet e këtij grupi do të zhvillohen në mënyrë të plotë konfidenciale me synim koordinimin e saktë institucional.

Konjufca konfirmoi se grupi është konstituuar gjatë javës së kaluar, ku janë përcaktuar rregullat e punës dhe është formalizuar edhe trupa punuese.

Paralelisht me këtë proces, Partia Demokratike e Kosovës (PDK) ka kërkuar një angazhim të përbashkët politik dhe institucional në mbrojtje të procesit të apelit.

Nga ana tjetër, platforma “Liria ka Emër” u është drejtuar zyrtarisht institucioneve të Bashkimit Evropian me gjashtë kërkesa specifike, përmes të cilave kërkohet shqyrtimi i menjëhershëm i shqetësimeve lidhur me respektimin e të drejtave të njeriut dhe standardeve për një gjykim të drejtë e të paanshëm në Gjykatën Speciale. /E.A/