Milani është përballur me një shqetësim të madh mbrëmjen e së hënës, pasi Rafael Leao u detyrua të largohej nga fusha i dëmtuar në ndeshjen kundër Torinos. Sulmuesi portugez u tërhoq duke çaluar menjëherë pasi goditi topin gabimisht dhe ndjeu dhimbje të forta në pjesën e sipërme të kofshës së djathtë.

Ndeshja po zhvillohej në një moment të vështirë për Milanin, që ishte në disavantazh 2-1 pas golave të Nikola Vlasic dhe Duvan Zapatës, ndërsa Adrien Rabiot kishte realizuar një gol të bukur për t’i mbajtur kuqezinjtë në lojë. Pak minuta më vonë ndodhi edhe episodi që i shqetësoi të gjithë te Rossonerët.

Leao goditi nga distanca, por sapo topi u shkëput nga këmba e tij, ai u përkul nga dhimbja dhe vendosi duart në ijë. Futbollisti u përpoq të vraponte, por e kuptoi që gjendja ishte serioze dhe doli menjëherë nga fusha, pa pritur stafin mjekësor. Ai u zëvendësua nga Samuele Ricci, ish-lojtari i Torinos.

Në stol, Leao u pa me një pako akulli të lidhur mbi muskujt adduktorë, duke rritur frikën për një dëmtim që mund ta mbajë jashtë disa javë. Ende nuk ka konfirmim zyrtar për gjendjen e tij, por Milani shpreson që futbollisti ta ketë ndalur në kohë dëmtimin për të shmangur pasoja më të rënda.

Situata bëhet edhe më e ndërlikuar për trajnerin, pasi Santiago Gimenez është ende jashtë dhe Christian Pulisic u la në stol vetëm për shkak të lodhjes nga simptomat e gripit. Leao ka qenë i rëndësishëm këtë sezon, me gjashtë gola dhe një asist në Serie A dhe Coppa Italia, ndaj mungesa e tij do të ishte një goditje serioze për skuadrën./S.K/KP/

Mbrëmja spnte do të kulmojë me super-duelin Inter kundër Liverpoolit, një përballje që ka tërhequr vëmendjen e gjithë Evropës.

Në stadiumin “Giuseppe Meazza” atmosfera pritet të jetë elektrizuese, me dy skuadra që vijnë me objektiva të qartë dhe me presion të madh mbi shpatulla.

Interi kërkon të tregojë forcën në shtëpi dhe të rikthejë qetësinë pas javëve të vështira, ndërsa Liverpooli udhëton drejt Milanos me synimin për t’u rikthyer te stabiliteti pas polemikave të fundit që lidhen me grupin dhe vendimet teknike. Kjo përballje përbën testin më të fortë të fazës aktuale, me pritshmëri të larta nga të dyja anët dhe me yje që pritet të vendosin fatin e ndeshjes.

Përveç supersfidës në Milano, dita sjell edhe duele të tjera interesante. Bayern Munich pret Sporting CP në një përballje ku gjermanët kërkojnë të ruajnë ritmin, ndërsa Barcelona ndeshet me Eintracht Frankfurt në “Camp Nou”, në një ndeshje ku katalanasit synojnë tri pikë që do t’i konsolidonin në renditje. Chelsea viziton Atalantan në Bergamo, një sfidë që mund të rezultojë më e vështirë sesa duket në letër.

PSV përballet me Atleticon e Madridit në një ndeshje me ritëm të lartë dhe spontanitet, kurse Monaco – Galatasaray dhe Tottenham – Slavia Prague plotësojnë mbrëmjen me duele që mund të prodhojnë surpriza. Royale Union SG pret Marseille në një ndeshje ku francezët duhet të tregojnë forcë për të mos rrezikuar.

Megjithatë, sytë e futbollit botëror mbeten te Milano. Interi dhe Liverpooli pritet të dhurojnë një ndeshje me intensitet të lartë, ritëm të shpejtë dhe shumë emocione.

Rezultati i kësaj sfide mund të ndikojë dukshëm në ecurinë e të dyja skuadrave në Ligën e Kampionëve, duke e bërë atë kryendeshjen e padiskutueshme të mbrëmjes./S.K/KP/

Instituti Hidrometeorologjik i Kosovës ka njoftuar se nga dita e martë pritet stabilizim i kushteve atmosferike, pasi vendi do të ndikohet nga masa ajri me presion të qëndrueshëm atmosferik. Këto masa do të sjellin mot më të qetë dhe temperatura që i afrohen vlerave mesatare për këtë periudhë të vitit.

Sipas IHK-së, të martën, të mërkurën dhe të enjten në orët e hershme të mëngjesit parashihet paraqitje e mjegullës, e cila mund të ndikojë në uljen e dukshmërisë dhe të vështirësojë qarkullimin rrugor. Për këtë arsye, instituti u bën thirrje pjesëmarrësve në komunikacion që të tregojnë kujdes të shtuar.

Temperaturat minimale do të lëvizin ndërmjet -2 dhe 0 gradë Celsius, ndërsa ato maksimale pritet të jenë nga 7 deri në 10 gradë.

Një rast i dhunës në familje është raportuar të hënën rreth orës 17:24, ku një baba ka njoftuar Policinë se është sulmuar fizikisht nga djali i tij.

Sipas raportit zyrtar, viktima ka deklaruar se djali, i cili dyshohet se ka qenë nën ndikim të substancave narkotike, është bërë agresiv dhe ka ushtruar dhunë ndaj tij. Ai ka shtuar se situata të tilla përsëriten shpesh, pasi i dyshuari kërkon para dhe shkakton tension të madh brenda familjes.

Pas incidentit, viktima ka marrë tretman mjekësor, ndërsa policia nuk ka arritur ta gjejë të dyshuarin në vendngjarje. Ai mbetet ende në kërkim dhe rasti po hetohet.

Në njoftimin e Policisë së Kosovës thuhet: “Viktima mashkull kosovar ka raportuar se djali i tij, i dyshuari mashkull kosovar, kishte ushtruar dhunë ndaj tij. Sipas viktimës, i dyshuari ka qenë nën ndikim të substancave narkotike dhe shpesh kryen veprime të tilla duke kërkuar para dhe duke u bërë agresiv. Viktima ka pranuar tretman mjekësor, ndërsa i dyshuari nuk është hasur nga policia. Rasti është duke u hetuar.”