Organizatat AGK, Lëvizja FOL, IKD dhe aktivistja Flutura Kusari, përmes një konference për media, kanë kërkuar pezullimin e menjëhershëm të procesit për përzgjedhjen e anëtarëve të bordeve të RTK-së dhe KPM-së, duke e cilësuar atë si jotransparent dhe manipulues.

Kreu i AGK-së, Xhemajl Rexha, kritikoi ashpër nxitimin e partisë në pushtet duke kërkuar pezullimin e këtij procesi.

“Njëri nga kandidatët është ftuar mbrëmë në orën 21:24 për intervistën sot… kjo është një praktikë që nuk duhet ndjekur. AGK kërkon që ky proces të pezullohet derisa të sigurohet një proces fer”, sipas Rexhes.

Mexhide Demolli nga Lëvizja FOL denoncoi ndryshimin e metodologjisë dhe pabarazinë në intervistim.

“Komisioni ka ndryshuar metodologjinë pa asnjë arsyetim, duke favorizuar hapur disa kandidatë… Kandidatët nuk do të jenë të barabartë pasi do të ketë pyetje të ndryshme, gjë që nuk ka ndodhur në të kaluarën”, tha Demolli.

Juristja e mediave, Flutura Kusari, e cilësoi procesin si “tallje me demokracinë”:

“Ta ftosh një person rreth orës 22:00 të natës për t’u paraqitur nesër në mëngjes në intervistë është jo serioze… Ne jemi këtu për ta dokumentuar këtë kapje dhe për të ftuar Vetëvendosjen të reflektojë”, tha ajo.

Ndërkaq, Gzim Shala nga IKD kujtoi se këto ndërhyrje po e dëmtojnë imazhin ndërkombëtar të Kosovës:

“Për shkak të tentativave të vazhdueshme për ndërhyrje në këto institucione, Kosova është ranguar poshtë e më poshtë në indekset ndërkombëtare”, u shpreh Shala.

Sipas shoqërisë civile, mungesa e profesionistëve në këto gara vjen si pasojë e humbjes së besimit se Lëvizja Vetëvendosje do të zhvillojë procese të bazuara në meritokraci. /Ekonomia online/

Ministria e Bujqësisë dhe Agjencia e Ushqimit dhe Veterinarisë (AUV) kanë marrë vendim këtë të mërkurë, 15 prill 2026, për ndalimin e menjëhershëm të importit të bagëtive të imta nga i gjithë territori i Shqipërisë. Ky vendim vjen si masë mbrojtëse pas konfirmimit të rasteve të sëmundjes virale PPR (Peste des Petits Ruminants) në Qarkun e Dibrës.

Për të parandaluar përhapjen e këtij infeksioni në territorin e Kosovës, autoritetet kanë kërkuar nga komunat në brezin kufitar që të vendosin masa strikte për kufizimin e lëvizjes së bagëtive në kullosat kufitare.

Fermerëve u bëhet thirrje që të mbajnë nën mbikëqyrje të rreptë tufat e tyre dhe të shmangin çdo kontakt me kopetë nga Shqipëria, ndërsa policia kufitare do të rrisë kontrollet në të gjitha pikat kalimtare.

AUV ka lëshuar një udhëzim për fermerët, duke kërkuar rritjen e masave të biosigurisë përmes këtyre veprimeve: shmangia e lëvizjeve të panevojshme të kafshëve, mosblerja e bagëtive pa certifikatë shëndetësore, kufizimi i kontakteve me tufa të tjera dhe raportimi i menjëhershëm te veterineri i çdo shenje të dyshimtë si ethe, rrjedhje nga hundët apo diarre.

Sëmundja PPR është një infeksion viral shumë ngjitës që prek delet dhe dhitë, duke shkaktuar temperaturë të lartë dhe në raste të rënda edhe ngordhjen e kafshëve. Megjithatë, autoritetet theksojnë se ky virus përhapet vetëm mes kafshëve dhe nuk paraqet asnjë rrezik për shëndetin e njerëzve.

Pas fitores historike të Péter Magyar në Hungari, ish-presidenti amerikan Donald Trump ka befasuar me qëndrimin e tij, duke e cilësuar liderin e ri si “një njeri të mirë” që pritet të bëjë një punë të shkëlqyer.

Gjatë një interviste për ABC News, Trump u shpreh optimist për mandatin e Magyar, pavarësisht se vetëm pak ditë më parë ai kishte bërë thirrje të hapur për të votuar “mikun dhe aleatin e tij të ngushtë”, Viktor Orbán.

Rezultatet e fundit tregojnë se Magyar, i cili drejton partinë e qendrës së djathtë “Tisza”, ka siguruar një fitore bindëse me të paktën 138 ulëse në parlament, duke arritur një shumicë prej dy të tretash që i mundëson atij transformimin e vendit.

Fituesi i zgjedhjeve, një ish-bashkëpunëtor i Orbán-it, deklaroi se ky rezultat nuk është thjesht një ndryshim qeverie, por një “ndryshim i plotë i regjimit” pas një dekade të dominimit të pushtetit nga kryeministri i rrëzuar.

Magyar ka bërë të ditur se nuk ka kohë për të humbur dhe se kabineti i tij do të nisë punën menjëherë pas konfirmimit zyrtar të rezultateve më 4 maj. Ai ka premtuar një luftë të ashpër kundër korrupsionit, rikthimin e pavarësisë së gjyqësorit dhe garantimin e lirisë së mediave, të cilat ishin cenuar rëndë gjatë qeverisjes së Orbán-it.

Ky i fundit, i cili gëzonte mbështetjen e Trump-it dhe Putinit, ishte përfshirë në përplasje të vazhdueshme me Bashkimin Europian për shkak të politikave të tij mbi drejtësinë dhe Ukrainën, ndërsa tani qeveria e re shpreson që përmes reformave demokratike të zhbllokojë fondet e ngrira nga Brukseli.

Prokuroria Speciale e Republikës së Kosovës ka kërkuar dënimin maksimal, burgimin e përjetshëm, për të akuzuarit në rastin e sulmit terrorist në Banjskë, duke argumentuar se ky është i vetmi sanksion që i përgjigjet gravitetit të krimeve të kryera.

Gjatë fjalës përfundimtare, prokurori i rastit Naim Abazi kërkoi nga trupi gjykues që të akuzuarit Blagoje Spasojeviq, Vladimir Toliq dhe Dushan Maksimoviq të shpallen fajtorë dhe ndaj tyre të shqiptohet masa më e rëndë e paraparë me ligj.

Prokurori Abazi ishte i prerë në argumentimin e tij, duke thënë se: “Në një rast si ky, ku kemi të bëjmë me një sulm të armatosur kundër Policisë së Republikës së Kosovës dhe kundër rendit kushtetues, mesazhi juridik duhet të jetë i qartë, i prerë dhe i padiskutueshëm”.

Sipas tij, caktimi i një dënimi më të ulët do të krijonte një rrezik për sigurinë kombëtare, duke shtuar se: “Nëse në një rast me këto përmasa, me këtë shkallë të organizimit dhe me këtë pasojë fatale nuk aplikohet dënimi maksimal, atëherë dëmtohet ndjeshëm efekti parandalues i ligjit penal dhe krijohet perceptimi i rrezikshëm i relativizimit të cenimit të rendit kushtetues”.

Duke u fokusuar te pasojat e sulmit dhe natyra e organizimit, prokuroria vlerësoi se nuk ekzistojnë rrethana lehtësuese që do të arsyetonin butësi ndaj të pandehurve. “Në aspektin e proporcionalitetit, duke marrë parasysh natyrën terroriste të veprës, pasojën fatale të shkaktuar, rrezikshmërinë e lartë shoqërore të operacionit dhe organizimin para-ushtarak të strukturuar, prokuroria vlerëson se dënimi i vetëm proporcional është burgimi i përjetshëm”, deklaroi prokurori para gjykatës.

Në fund, ai bëri thirrje që drejtësia të jetë në nivelin e detyrës për të mbrojtur integritetin e shtetit, duke përfunduar: “Çdo dënim më i ulët do të ishte disproporcion i qartë me gravitetit dhe pasojat dhe rrezikshmërinë e veprimit dhe nuk do të përmbushte as funksionin ndëshkues e as parandalues të sanksionit penal”. Ky qëndrim i Prokurorisë Speciale vjen pas një procesi të gjatë të administrimit të provave që dëshmuan shkallën e lartë të rrezikshmërisë së grupit që kreu sulmin në veri të vendit. /Ekonomia online/