Talenti i futbollit Florent Hajdini ka marrë vendimin përfundimtar rreth së ardhmes së tij ndërkombëtare, duke zgjedhur që të përfaqësojë ngjyrat e Kosovës dhe duke refuzuar ofertën nga Përfaqësuesja e Austrisë.

Duke dëshmuar lidhjen e fortë emocionale me vendin e origjinës, futbollisti ka përcjellë një mesazh të qartë për vendimin e tij: “Faleminderit për gjithçka, por zemra rrah për Kosovën”.

Me këtë zgjedhje, Hajdini i bashkohet listës së talentëve të shquar diasporikë që i përgjigjen pozitivisht thirrjes së “Dardanëve”, duke shtuar opsione të rëndësishme për strukturat e ardhshme të Përfaqësueses së Kosovës në arenën ndërkombëtare. /Telegrafi/

Sulmuesi kosovar Vedat Muriqi ka vlerësuar lart fitoren me përmbysje të Fenerbahçes ndaj Liverpoolit me rezultat 3-2, duke deklaruar se ky triumf i tregoi mbarë Evropës madhështinë e gjigantit turk.

Prizrenasi u fut në lojë në pjesën e dytë si zëvendësues i Romelu Lukakut dhe pas vetëm pak minutash realizoi golin e fitores. Përveç golit vendimtar, paraqitja e tij u vlerësua lart nga platforma e specializuar Sofascore, e cila i dha notën 7.5 – ndër më të lartat e ndeshjes.

“Jam shumë i lumtur. Ky gol është një dhuratë për tifozët tanë. Po kalojmë disa kohë të vështira, por sot i treguam të gjithëve se sa e madhe është Fenerbahçe,” tha Muriqi pas takimit.

Ai shtoi se skuadra e nisi ndeshjen mjaft mirë dhe tregoi karakter për t’u rikthyer nga disavantazhi 1-2: “Të gjithë e ndjenë këtë energji. E nisëm mirë, goditëm shtyllën dhe pësuam një gol të pafat, por ia dolëm të riktheheshim. Kjo është madhështia e këtij klubi. Shpresoj me shpirt që ky triumf të shërbejë si pikë kthese për ne.”

Sulmuesi shtatlartë do të paraqitet me Fenerbahçen edhe në ndeshjen e këtij vikendi në kampionat, përpara se të udhëtojë drejt Kosovës për t’u grumbulluar me kombëtaren për dy sfidat e muajit nëntor ndaj Izraelit dhe Irlandës. /E.A/

William Baeten është njëri prej futbollistëve më të paguar në futbollin kosovar, të paktën sipas shifrave të publikuara nga mediumi rumun ProSport.

Futbollisti belg, i cili iu bashkua Dritës në verën e vitit 2026, raportohet se përfiton rreth 12 mijë e 500 euro në muaj.

Nëse kjo shifër është e saktë, Baeten përfiton rreth 150 mijë euro në vit vetëm nga paga bazë, pa përfshirë bonuset dhe përfitimet e tjera që mund të jenë pjesë e marrëveshjes me klubin gjilanas.

Belgu 29-vjeçar iu bashkua Dritës pas një karriere me disa ndalesa, fillimisht në futbollin rumun e më pas në atë shqiptar.

Ai ishte transferuar te FCSB nga FCU Craiova për rreth 300 mijë euro, por nuk arriti të sigurojë një rol të rëndësishëm në skuadrën rumune dhe u largua pas vetëm një viti, pa kompensim transferimi.

Pas aventurës në Rumani, Baeten nënshkroi me Flamurtarin në Shqipëri, por qëndrimi i tij zgjati vetëm rreth gjashtë muaj. Në fillim të vitit 2026, ai u largua nga klubi shqiptar për të vazhduar karrierën në Kosovë, ku iu bashkua Dritës.

Emri i mesfushorit belg ishte përmendur edhe në mediat rumune për shkak të një kontesti financiar me ish-klubin FCSB dhe pronarin e tij, Gigi Becali.

Më 23 shtator 2026, FIFA i kishte shqiptuar klubit rumun ndalesë për regjistrimin e futbollistëve në tri afatet e ardhshme kalimtare, për shkak të një borxhi prej rreth 50 mijë eurosh ndaj Baetenit.

Megjithatë, FCSB më pas e shlyeu detyrimin financiar ndaj futbollistit, duke e zgjidhur çështjen që kishte sjellë sanksionin. Kështu, Baeten arriti të marrë shumën që i takonte nga ish-klubi.

Ndërkohë, aventura e tij te Drita është shoqëruar edhe me vështirësi. Pasi kishte nisur të luante rregullisht, belgu pësoi një dëmtim muskulor që e mbajti jashtë fushave për rreth dy muaj.

Ai mungoi në pesë ndeshje, ndërsa në dy përballjet e fundit ishte në bankën rezervë, por nuk u aktivizua.

Deri më tani, Baeten ka regjistruar 11 paraqitje me Dritën në të gjitha garat, duke kontribuar me dy asistime.

D.L

Ylli i New York Red Bulls, Adri Mehmeti, është përfshirë në listën e përfaqësueses së Shteteve të Bashkuara të Amerikës për ndeshjet kualifikuese të Ligës së Kombeve të CONCACAF-it, nga përzgjedhësi Mauricio Pochettino.

Mesfushori i talentuar ishte një nga dëshirat e mëdha të Shqipërisë, por ka vendosur që në nivelin ndërkombëtar ta përfaqësojë SHBA-në.

Mehmeti ishte ftuar për herë të parë në muajin tetor, kur Pochettino e kishte përfshirë në ekip për ta vlerësuar nga afër. Paraqitjet e tij duket se kanë bindur teknikun argjentinas, i cili tashmë i ka besuar një vend edhe në listën për ndeshjet zyrtare.

Talenti shqiptar do të jetë në mesin e emrave të njohur të futbollit amerikan, si Weston McKennie i Juventusit, Malik Tillman i Bayer Leverkusenit dhe Christian Pulisic i Milanit.

Në këtë fazë të garës, SHBA-ja do të përballet me Haitin.

D.L