Granit Xhaka nuk do të largohet nga Sunderlandi këtë verë. Trajneri i skuadrës angleze, Regis Le Bris, ka hedhur poshtë zërat për një transferim të mesfushorit shqiptar te Chelsea, duke theksuar se e ardhmja e tij është në “Stadium of Light”.

Xhaka ishte përfolur si një objektiv i Chelseat, ku trajneri Xabi Alonso synonte të ribashkohej me ish-lojtarin e tij nga koha te Bayer Leverkuseni. Megjithatë, bisedimet mes klubeve nuk prodhuan marrëveshje dhe çështja është mbyllur.

“Nuk ka asgjë të re për Granit Xhakën te Chelsea. Kjo çështje është e mbyllur. Ai ka qenë shumë i qartë për të ardhmen e tij. E do Sunderlandin, dëshiron të qëndrojë këtu dhe të ndërtojë të ardhmen me këtë klub. Është një kapiten i mirë dhe një lider i madh”, deklaroi Le Bris.

Edhe vetë Xhaka konfirmoi se nuk ka ndërmend të ndryshojë skuadër.

“Sunderlandi ka qenë shtëpia ime që nga dita e parë. Të gjithë jemi shumë të lumtur. Kam vendosur të qëndroj aty ku jam. Gjëja më e rëndësishme është familja. Jam gati të bëj histori me këtë klub”, u shpreh mesfushori 33-vjeçar.

Xhaka iu bashkua Sunderlandit verën e kaluar nga Bayer Leverkuseni, duke u rikthyer në Premier League pas periudhës së suksesshme me Arsenalin.

Në sezonin e tij të parë me Sunderlandin, ai zhvilloi 36 ndeshje, shënoi një gol dhe dha një kontribut të rëndësishëm në suksesin e skuadrës, e cila siguroi një vend në Ligën e Evropës për sezonin e ardhshëm.

D.L

Përfaqësuesja e Kosovës U18 në basketboll është shpallur kampione e FIBA U18 EuroBasket 2026, Divizioni C, pasi mposhti bindshëm Andorrën me rezultat 91:49 në finalen e zhvilluar në Shkodër. Me këtë fitore, Dardanët e rinj e mbyllën kampionatin pa asnjë humbje dhe siguruan promovimin në Divizionin B për edicionin e ardhshëm.

Kosova dominoi gjatë gjithë turneut, duke treguar paraqitje të shkëlqyera si në fazën e grupeve ashtu edhe në ndeshjet me eliminim direkt. Triumfi në finale vulosi një sukses të madh për basketbollin kosovar dhe konfirmoi potencialin e gjeneratës së re.

Ky është një moment i rëndësishëm për basketbollin e Kosovës, pasi titulli i kampionit dhe rikthimi në Divizionin B përfaqësojnë një hap të madh përpara në arenën evropiane. Urime Dardanëve për këtë arritje historike!

D.L

Federata e Futbollit e Belgjikës ka zyrtarizuar emërimin e Marc van Bommelit në postin e përzgjedhësit të ri të kombëtares.

Ish-mesfushori i njohur holandez ka nënshkruar kontratë që do ta mbajë në krye të Belgjikës deri në përfundim të Kampionatit Evropian 2028.

Van Bommel vjen në këtë detyrë me përvojë si trajner i PSV Eindhovenit, Wolfsburgut dhe Antwerpit. Suksesin më të madh në karrierën e tij si trajner e arriti me Antwerpin, me të cilin fitoi titullin kampion dhe Kupën e Belgjikës në sezonin 2022/23.

Si futbollist, 48-vjeçari ndërtoi një karrierë të pasur duke veshur fanellat e PSV Eindhovenit, Barcelonës, Bayern Munichut dhe Milanit. Ai zhvilloi gjithsej 79 ndeshje me kombëtaren e Holandës dhe ishte pjesë e ekipit që arriti në finalen e Kupës së Botës 2010.

Pas emërimit, Van Bommel tha se synimi i tij është të ndërtojë një ekip konkurrues që mund të rivalizojë me kombëtaret më të forta.

“Synimi është të ndërtojmë disiplinë dhe guxim që të mund të konkurrojmë me përfaqësueset më të forta si të barabartë. Nuk ka garanci për sukses, por mund t’u premtoj përkushtim maksimal, punë të ndershme dhe dëshirë të madhe për përparim”, u shpreh Van Bommel.

Me këtë emërim, Belgjika synon të hapë një kapitull të ri dhe të rikthehet në garën për sukses në arenën ndërkombëtare nën drejtimin e trajnerit holandez.

D.L

Jurgen Klopp është emëruar zyrtarisht përzgjedhës i Kombëtares së Gjermanisë. Trajneri i njohur u prezantua të premten nga Federata Gjermane e Futbollit, duke nisur një kapitull të ri në karrierën e tij.

Klopp zëvendëson Julian Nagelsmannin, i cili dha dorëheqje pas eliminimit zhgënjyes të Gjermanisë në Kupën e Botës.

Trajneri 59-vjeçar ka nënshkruar kontratë katërvjeçare, e cila hyn në fuqi më 15 gusht. Ai do ta udhëheqë Gjermaninë në kualifikimet dhe fazën finale të Euro 2028, si dhe në Kupën e Botës 2030. Në stafin e tij teknik do të jenë Peter Krawietz, Pepijn Lijnders dhe Sven Bender.

Gjatë prezantimit, Klopp tha se drejtimi i përfaqësueses gjermane është një nder i madh dhe premtoi të ndërtojë një skuadër të bashkuar dhe konkurruese.

“Ekipi kombëtar mund ta bashkojë Gjermaninë si asgjë tjetër. Për këtë arsye kjo detyrë është shumë e veçantë për mua. Do të zhvillojmë një ekip me lojtarë që luftojnë për njëri-tjetrin, që e shijojnë futbollin dhe në të cilin njerëzit e vendit tonë mund të besojnë”, deklaroi Klopp.

Presidenti i Federatës Gjermane të Futbollit, Bernd Neuendorf, e cilësoi Kloppin si zgjedhjen ideale për këtë post.

“Jurgen Klopp, si pak të tjerë, përfaqëson pasionin, besueshmërinë dhe aftësinë për të frymëzuar njerëzit. Pas largimit të Nagelsmannit, ai ishte zgjedhja jonë e parë për drejtimin e ekipit kombëtar”, tha Neuendorf.

Klopp rikthehet në profesionin e trajnerit pas një periudhe në kompaninë Red Bull, ku kishte rolin e drejtuesit global të futbollit.

Gjatë karrierës së tij, ai drejtoi Mainzin, Borussia Dortmundin dhe Liverpoolin, duke fituar trofe të shumtë. Me Dortmundin fitoi dy tituj të Bundesligës, Kupën e Gjermanisë dhe dy Superkupa, ndërsa me Liverpoolin triumfoi në Premier League, Ligën e Kampionëve, Kupën FA, Kupën e Ligës, Superkupën e Evropës dhe Kupën e Botës për Klube.

Debutimi i Kloppit në stolin e Gjermanisë do të jetë në fund të shtatorit, kur “Panzerët” do të përballen me Holandën në Amsterdam në kuadër të Ligës së Kombeve të UEFA-s.

D.L