Suedia tha të hënën se Rusia përbën kërcënimin më serioz për sigurinë e vendit nordik deri në vitin 2030, raportojnë mediat lokale.

Kryeministri Ulf Kristersson, ministri i Mbrojtjes Pal Jonson dhe këshilltari i Sigurisë Kombëtare Henrik Landerholm prezantuan një strategji të re kombëtare në një konferencë shtypi në Stokholm duke deklaruar se aktualisht “kërcënimi për Suedinë është i gjerë dhe serioz”.

“Rusia është kërcënimi më i madh dhe më serioz për sigurinë tonë kombëtare”, tha Jonson, sipas medias lokale Expressen.

Megjithëse forcat ruse kanë pësuar humbje të mëdha në Ukrainë, forca ushtarake e Moskës mbetet e rëndësishme, sipas strategjisë së re.

“Rusia ka një prag të ulët për përdorimin e forcës ushtarake, është e përgatitur të marrë rreziqe të mëdha politike dhe ushtarake dhe gjithashtu ka shprehur ambicie të larta për riarmatimin e saj”, shtoi Jonson.

Sipas politikanit shtete të tjera “autoritare”, si Kina, po përpiqen të forcojnë ndikimin e tyre dhe të sfidojnë “rendin botëror të bazuar në rregulla”.

“Mund të themi se Kina po kryen tani një riarmatim të gjerë që ndikon në stabilitetin rajonal në rajonin Indo-Paqësor”, tha ministri i mbrojtjes.

Strategjia identifikoi gjithashtu krimin e organizuar dhe ekstremizmin e dhunshëm si kërcënime për vendin.

Zyrtarët thanë më tej se flukset e mëdha migratore përbëjnë një rrezik pasi migrantët mund të përdoren si mjete për të krijuar paqëndrueshmëri si një mjet për të ushtruar presion mbi Suedinë.

“Kjo do të thotë se ne kemi një situatë shumë komplekse sigurie për t’u marrë me të”, vuri në dukje Jonson.

Zyrtarët theksuan se situata e përkeqësuar e sigurisë do të vazhdojë për një periudhë të parashikueshme dhe se ekziston rreziku që ajo të përkeqësohet edhe më tej./AA

Programi Botëror i Ushqimit ka bërë thirrje për armëpushim në Gaza, duke thënë se “për shkak të qasjes jo të besueshme dhe rezervave të kufizuara, familjet shpesh nuk marrin racionet dhe shpeshtësinë e plotë që u nevojiten”.

Agjencia e ushqimit e Kombeve të Bashkuara shkroi në “X” se ndihma arriti te një milion njerëz në qershor “por kjo nuk mjafton”./UBTNews/

Ministri i Financave, Bezalel Smotrich thotë se Izraeli duhet të vazhdojë të luftojë deri në fitore.

“Hamasi po shembet dhe po lutet për armëpushim”, shkroi mes tjerash Smotrich në “X”.

“Të ndalemi tani pak para fundit, dhe t’i lëmë të atë të rikthehen dhe të luftojnë kundër nesh është marrëzi e pakuptimtë që do t’i marrë në fund arritjet e luftës të blera me shumë gjak. Duhet të vazhdojmë deri në fitore!”, shtoi ai./UBTNews/

Autoritetet ukrainase thanë se të paktën 20 persona janë vrarë dhe dhjetëra të tjerë janë plagosur gjatë një sulmi “masiv” me raketa të kryer nga Rusia në Kiev dhe qytete të tjera. Gjatë sulmeve të 8 korrikut u godit edhe spitali i fëmijëve në Kiev, si dhe ndërtesa banimi dhe infrastrukturë tjetër në mbarë vendin.

Presidenti ukrainas, Volodymyr Zelensky, tha se “mbi 40 raketa të llojeve të ndryshme” shënjestruan Kievin, Dnipron, Krijvi Rihun në qendër të Ukrainës dhe Kramaorskun dhe Sllovjanskun në rajonin lindor të Donjeckut.

“Të gjitha shërbimet janë të angazhuara për të shpëtuar sa më shumë njerëz”, tha ai përmes një postimi në X, që më herët njihej si Twitter.

Kryetari i Kievit, Vitaliy Klitschko, i tha agjencisë Reuters se ky ishte “një prej sulmeve më të këqija” në kryeqytetin ukrainas në 28 muaj luftë në shkallë të plotë.

Një video e incizuar nga Radio Evropa e Lirë në spitalin e fëmijëve, Ohmadyt, në Kiev, shfaqi radhë të njerëzve që po ndihmonin të pastronin vendin nga rrënojat e ndërtesës.

“Ka njerëz nën rrënoja, numri i saktë i viktimave nuk dihet”, tha Zelensky në rrjetet sociale, duke thënë se spitali Ohmadyt “është një prej spitaleve më të rëndësishme të fëmijëve, jo vetëm në Kiev, por po ashtu në Evropë”.

Moska – që ka nisur pushtimin e Ukrainës në shkurt të vitit 2022 – vazhdimisht ka mohuar se shënjestron ndërtesat e banimit, shkollat, spitalet dhe infrastrukturën tjetër civile, pavarësisht dëshmive që thonë të kundërtën.

Ministria e Brendshme e Ukrainës tha se numri i personave që janë konfirmuar të vrarë është të paktën 20, ndërkaq 50 të tjerë janë plagosur në sulmet e 8 korriut.

Forcat ajrore të Ukrainës shpallën gatishmëri ajrore në mbarë Ukrainën para mesditës së 8 korrikut, pas kërcënimit të dyshuar për sulme me raketa balistike, përderisa thanë se po luftojnë që të zmbrapsin sulmet ndaj Kievit.

Shpërthimet në Kiev u dëgjuan rreth orës 10:30 sipas kohës lokale, teksa administrata ushtarake e qytetit u kërkoi qytetarëve të qëndronin në strehimore derisa të ndalej alarmi për sulme ajrore.

Ushtria tha se më pas u lëshua alarmi për sulme në mbarë vendin.

Sulmet gjatë ditës në Ukrainë janë të rralla, edhe pse Rusia që gjashtë muaj ka intensifikuar bombardimin e qendrave të banuara të Ukrainës dhe ka shënjestruar infrastrukturën e energjisë.

Forcat ukrainase thanë po ashtu se gjatë natës kanë rrëzuar të paktën tri raketa lundruese. Sipas komandantit të forcave ajrore, gjeneralit Mykola Oleshchuk, raketat u rrëzuan në rajonet e Zhitomirit dhe Çerkasit.

Në Krijvi Rih dhe në Dnipropetrovsk autoritetet raportuan për të paktën dhjetë të vrarë dhe 30 të plagosur gjatë një “sulmi masiv ajror të armikut”.

Në verilindje, kryetri i Harkivit, Ihor Terekhov, tha se dy gra u hospitalizuan pasi u plagosën gjatë granatimeve ruse në tri ndërtesa banimi.

Më vonë gjatë 8 korrikut, guvernatori i Harkivit tha se të paktën pesë persona u vranë në rajon.

Ndërkaq, Shtabi i Përgjithshëm i ushtrisë ukrainase raportoi se luftimet në terren po vazhdojnë, përderisa Rusia po vazhdon ofensivën e saj në rajonin e Harkivit. Sipas ushtrisë ukrainase, duket se Rusia po kryen ofensivë edhe në Pokrovsk të Donjeckut, ku të paktën tre persona janë vrarë si pasojë e sulmeve me raketa.

Ushtria tha se trupat po tentojnë të “stabilizojnë” situatën për të parandaluar forcat ruse që të avancojnë më shumë në territorin ukrainas në këtë zonë./REL/