Zyrtarët e Doganës së Kosovës kanë parandaluar hyrjen e një arme ajrore të padeklaruar gjatë kontrolleve rutinore në Aeroportin Ndërkombëtar “Adem Jashari” në Prishtinë.

Arma e llojit revole ajrore “FB Record” (kalibri .177) u zbulua gjatë skanimit të bagazhit të një udhëtari që kishte kaluar nëpër “kanalin e gjelbër”, zonë kjo e destinuar për personat që nuk kanë mallra për deklarim. Për t’iu shmangur kontrolleve, pistoleta ishte e çmontuar dhe e mbështjellë me foli alumini e rroba.

Pas zbulimit, arma është konfiskuar dhe i është dorëzuar Policisë Kufitare për hapa të mëtejshëm, ndërsa ndaj udhëtarit kanë nisur procedurat përkatëse administrative dhe ligjore. /E.A/

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

3 shtator 1993

CNN: Kosova është e okupuar nga Serbia që nga viti 1989

Pas vizitës që i bëri ditë më parë Kosovës dhe Maqedonisë, senatori amerikan Pol Kavërdell, deklaroi se prezenca ndërkombëtare në Kosovë është mëse e domosdoshme.

Në një program të CNN Kavërdell tha se politika aktuale e Perëndimit, e cila nuk po e pengon agresionin serb, “do t’i zhvleftësojë lëvizjet e mëdha demokratike që u bënë nga viti 1989 deri më 1990”, “bota e lirë duhet ta zotëroj guximin që të marrë hapa agresivë e jo sanksione, masë e cila po dëshmohet si e pasukseshme”.

Gjatë qëndrimit në Kosovë, e cila është e okupuar nga Serbia që nga viti 1989, Kavërdell tha se “mbikqyrja e pjesërishme nga komuniteti ndërkombëtar do të ishte një pikë ujë në det”.

DPA: Në Kosovë vdes çdo e treta foshnjë

Agjencia gjermane DPA, njofton se “në Kosovën e banuar me shumicën shqiptare, sipas një organizate për të drejtat e njeriut, çdo e treta foshnjë e posalindur shqiptare, pas një kohe shumë të shkurtër vdes.

Siç njoftoi të enjten Seksioni Austriak i Organizatës Ndërkombëtare për të Drejtat e Njeriut, në bazës të të dhënave dhe analizave profesionale të mbështetura nga raportet e klinikave përkatëse, rezulton se vdekshmëria e foshnjave të posalindura shqiptare gjatë kësaj periudhe 6 mujore është dyfishuar në krahasim me atë të vitit të kaluar.

Rreth 63 për qind të foshnjave të posalindura vdesin për shkak të infektimit të mushkërive dhe përsëritjes së brohitisit dhe për arsye se shumica e grave shqiptare, nuk kanë guxim të shtrohen në klinikë për të lindur, sepse siç vlerësojnë përfaqësuesit shqiptarë të Këshillit për Mbrojtjen e të Drejtave dhe të Lirive të Njeriut në Prishtinë, edhe klinikat janë të okupuara nga serbët. Vdekshmëria e foshnjeve në Kosovë, është në rritje”, thuhet në informatën e agjencisë DPA të publikuar në “Frankfurter Allgemeine”.

3 shtator 1995

Dhuna e përditshme në Kosovë

Maslishevë: – Më 30 gusht, me preteks të kërkimit të armëve, policia ka bastisur shtëpitë e Hamdi F. Krasniqit (60) dhe Halil O. Hotit në fshatin Carrallukë. Në stacionin e policisë ata janë keqtratjruar fizikisht dhe janë udhëruar që më 1 shtator të paraqiten sërish në polici.

Po në këtë fshat, më 31 gusht janë bastisur shtëpitë e Bajram, Muharrem, Sali, Mursel e Muhamet Hotit.

Policia kërkoi djalin e Muharremit, Avniun (37), ndërsa të gjithë kryefamiljarëve dhe djalit të Muhametit, Bilallit, ua la ftesat që të paraqiten më 2 shtator në polici.

Më 2 shtator, në polici u mor Nexhmi Hoti (1950).

Më 31 gusht, policia e stacionit të Rahovecit ka bastisur shtëpinë e Selman Sh. Paçarizit (64), në fshatin Dragobil dhe i la ftesën atij që më 1 shtator të paraqitet në stacionin e policisë në Rahovec.

Po këtë ditë, në këtë fshat u bastis edhe shtëpia e Abdurrahim H. Mazrrekut, ndërsa thirrja për t’u paraqitur në polici iu la vëllait të tij, Nazmiut (29).

Ferizaj: – Më 1 shtator, një ekspeditë policore bastisi lokalet e Ndërmarrjes Gazetare Botuese “Zgjimni”, të vendosur në shtëpinë e Ali Lubishtanit. Policia konfiskoi një pako të madhe me disketa të kompjuterëve dhe mori me vete Agron Lubishtanin, Rrahim Sadikun(1955) – pronar dhe kryeredator i gazetës lokale “Zgjimi”, Enver Zhinipotokun-punëtor arsimor dhe bashkëpunëtor i gazetës si dhe Agim Abdullahun – punëtor arsimor dhe bashkëpunëtor i gazetës.

Ata u majtën në polici afër tetë orë dhe u pyetën për veprimtarinë botuese të “Zgjimit”.

Ata u liruan por duke u dhënë ftesat që sërish, më 4 shtator, të paraqiten në polici.

Prizren: –Më 2 shtator, rreth orës 14:00, një ekspeditë policore bastisi shtëpinë e Dr. Daut Mustafës, mjek i njohur për shërimin e sëmundjeve të mushkërive.

Preteksti i bastisjes nuk dihet.

Dr. Dauti është veprimtar në Këshillin komunal për pajtim të Prizrenit.

Kaçanik:- Qe disa herë mirret në pyetje Mynyr Jenuz Hysa nga fshati Stagovë. Me pretekst të armës, ai është marrë në pyetje më 8 gusht. Policia para se ta lironte, i dorëzoi thirrjen për t’u paraqitur në stacion një javë më vonë ( 15 gusht).

Por, edhe pasi u paraqit në stacion, prej tij u kërkua që të paraqitet në polici edhe më 18 gusht, kur ai u mbajt dy orë.

Prej tij u kërkua që të paraqitet në polici edhe të nesërmen, më 19 gusht, kur u mor në pyetje rreth 30 min.

Më 29 gusht, dy policë serbë, në fshatin Gajre bastisën shtëpinë e Shukri Ismajl Shahinit, me pretekst të armës. Pas bastisjes që zgjati 30 min. u policët morën me vete Shukriun dhe e mbajtën në stacion deri në orën 21:00. Prej tij policët kërkuan të paraqitet në stacion edhe të nesërmen, kur u mor në pyetje rreth 10 min.

Më 29 gusht, në fshatin Stagovë, me pretekst të armës, u bastis shtëpia e Islam Merrxhan Manit. Bastisja zgjati gjysmë ore. Pas bastisjes u mor në polici Islami, të cilin e keqtrajtuan prej orës 16:30 deri në 23:00. Prej tij është kërkuar që të paraqitet në polici edhe më 31 gusht.

Më 30 gusht, në fshatin Stagovë, dy policë serbë, me pretekst të armës, bastisën shtëpinë e Halit Sadik Brahës. Bastisja zgjati rreth gjysmë ore. Pas bastisjes, Haliti u mor në polici dhe u lirua pas një kohe të shkurtër.

Të njëjtën ditë është bastisur edhe shtëpia e Sami Sadik Brahës me pretekst të kërkimit të armëve. Samiu u urdhërua që të paraqitet në polici më 31.08.1995.

Më 30 gusht në fshatin Stagovë, me pretekst të armës, dy policë serbë bastisën shtëpinë e Musli Saqip Jahës. Pas bastisjes, Musliu është arrestuar. Nuk ka njoftime se është liruar.

3 shtator 1997

Pejë: Policia vrau Arsim Ramën (17)

Natën mes të hënës e të martës, rreth orës 2 e 30 minuta, në rrugën “Hasan Prishtina” në Pejë, e cila gjendet afër varrezave të vjetra, policia serbe vrau Arsim Ramën (17) nga Peja.

Siç njofton shtypi i sotëm ditor, në vendin e ngjarjes shihen mbi 13 vrima në mure dhe në kulmin e një shtëpie, kurse gjurmë gjaku vërehen edhe në largësi prej 200 metrash nga vendi ku ndodhi vrasja.

Gjyqtarin hetues serb në gjykatën e Pejës ka deklaruar se patrulla e policisë vërejti 2 persona të cilët silleshin rreth një automobili të parkuar, të cilët nisën të ikin sapo u nis policia drejt tyre. “Në thirrjen e policëve që të ndaleshin, njëri prej tyre hapi zjarr në drejtim të policëve, kështu që policët u detyruan që në vetëmbrojtje të hapin zjarr, dhe me atë rast është qëlluar njëri prej tyre, që më vonë u konstatua se ështës Arsim Rama nga Peja, i moshës 17-vjeçare. Personi tjetër që ishte me Arsim Ramën ka ikur nga vendi i ngjarjes”, shton ai në deklaratë.

Gllogoc: Në rrethana të pasqaruara u vra Liman Krasniqi

Të dielën në mbrëmje, rreth orës 22:25 minuta, në rrethana ende të pasqaruara, në fshatin Gllanasellë të Gllogocit, në shtëpinë e tij, u vra Liman Krasniqi, njofton “Koha ditore”.

Sipas pohimeve të fqinjve të tij, të shtënat ishin rafale të pandërprera automatiku. Në çastin kritik, Limani gjendej në shtëpinë e tij së bashku me dy fëmijët dhe gruan, kur nga dritarja e shtëpisë së tij, në prani të anëtarëve të familjes, u shkrepën disa rafale automatiku, nga plumbat e të cilit ai mbeti i vdekur në vend.

I ndjeri Liman Krasniqi, ishte rreth moshës 65-vjeçare, ndërsa disa vjet punoi punëtor stinor në Beograd, kurse gjatë dy vjetëve të fundit ishte i papunë dhe gjendja e tij sociale ishte e rëndë.

Gjatë ditës së djeshme forcat policore ishin të shumta në fshatin Gllanasellë dhe vëzhguan terrenin deri në orët e pasditës, por deri tashti nuk është akuzuar e as arrestuar askush.

Burime të “Kohës Ditore” bëjnë të ditur se i ndjeri ishte ndër fshatarë të rrallë që kishte armën e gjuetisë me leje. Rreth rastit, djali i tij, Shemsi Krasniqi deklaron: “Unë isha i ndarë nga ai, ai jetonte në një odë që e kemi shfrytëzuar më parë dhe në çastin e vrasjes ndodhej aty me të dy fëmijët dhe nënën. Në praninë e tyre, nga dritarja, është hapur zjarr dhe ai ka vdekur. Nuk e di se babai i ka pasur dikujt borxh apo ka qëndruar keq me dikë. Ky rast e ka goditur shumë familjen tonë dhe rastin e kam paraqitur në polici të cilëve u kam treguar se nuk qëndroj keq me askë dhe nuk mund ta akuzoj askë për këtë vrasje”.

3 shtator 1998

Sulm i gjerë i forcave serbe në rajonin mes komunave Malishevë-Klinë-Gjakovë-Rahovec

Forcat serbe kanë ndërmarrë sot nga mëngjesi një sulm të fuqishëm kundër fshatrave që gjenden në kufi të komunave Malishevë-Klinë-Gjakovë e Rahovec.

Një burim nga fshati Krushë në Prizren i tha sot QIK-ut se nga ky fshat shihej se po sulmoheshin fshatrat Drenoc, Pataçan dhe Bratkofc. Këto janë fshatra të mëdha me qindra familje, ndërsa në to janë vendosur kohët e fundit edhe një numër i madh refugjatësh.

Komisioni për Informim i Degës së LDK-së në Klinë njoftoi sot se forcat serbe po sulmojnë sot nga ora 6:30 prej pozicioneve të tyre në Dollc e Zajm fshatrat Gremnik, Çupevë e Ulët, Çupevë e Epërme, Volljakë dhe Sferkë.

Në këtë regjion kanë gjetur strehim javët e fundit dhjetëra mijëra njerëz.

Prizren: Dy të vrarë dje në Lubeçevë – vazhdon sulmi mbi fshatrat e Vërrinit

Edhe sot, që nga orët e hershme të mëngjesit, forcat serbe kanë filluar t’i granatojnë fshatrat e lartshënuara, ndërsa gjatë granatimeve të djeshme njoftohet se është vrarë nipi dhe është plagosur reja e Sali Kryeziut nga Lybeqeva.

Sot, që në orët e hershme të mëngjesit forcat e ushtrisë dhe të policisë serbe me automjete të motorizuara dhe armë të rënda artilerike, kanë shkuar në drejtim të magjistrales Prizren-Kukës, ndërsa në orën 6:30, një konvoj tjetër me mbi 30 automjete të motorizuara shkoi në drejtim të magjistrales Prizren-Rahovec.

Bëhet e ditur se vetëm një orë më pas, në të njëjtin drejtim kanë shkuar mbi 40 automjete të markës “Mitsubishi”, që supozohet se ishin paramilitarë të kriminelit Arkan

Dje, forcat serbe i kanë bërë rrafsh me tokë fshatrat Lez e Lybeqevë, si dhe i kanë granatuar fshatrat Hoçë e Qytetit, Jeshkovë, Poslishtë, Kushnin, Leskovec, Vlashnje dhe Kobanjë.

I njëjti burim njofton se rreth 15 mijë banorë shqiptarë të këtyre fshatrave janë evakuar dhe pjesa dërmuese e tyre janë vendosur në qytetin e Prizrenit, por edhe në fshatrat që konsiderohen paksa më të sigurta.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Ilustrim: Sulmi serb kundër Tususit dhe disa fshatrave të Prizrenit (në foto) ka vazhduar gjatë natës dhe sot

2 shtator 1993

Policia serbe pengoi hyrjen në objektet shkollore në Kosovë

Në ditën e parë të vitit shkollor mbi 350 mijë nxënës e 18.500 arsimtarë të shkollave fillore e të mesme në Kosovë tentuan të hynë në objektet e tyre shkollore.

Fatkeqësisht, në të gjitha shkollat e mesme dhe fillore, të cilat kanë qenë të penguara vitin e kaluar, nxënësve e arsimtarëve shqiptarë i ndalua me forcë hyrja në objektet e tyre shkollore. Pothuaj se para dhe brenda secilit objekt shkollor ishin stacionuar policia dhe pjesëtarët e sigurimit serb.

Sipas informatave që kemi, gjendja më e rëndë është në Klinë, Mitrovicë, Lipjan, Kijevë, Istog etj.

Në Klinë, gjatë arrestimit të arsimtarëve dhe nxënësve, një i ri iku, ndërsa policia shtiu me automatikë në drejtim të tij. Policia arrestoi 15 mësimdhënës, kurse brutalisht u rrahën Ramadan Krasniqi, Muhamet Maloku, Xhafer Bashota, Bajram Desku, Gani Doçi, Lekë Lekaj, Ganimet Mrasori, Ferik Raci dhe Ramiz Raci.

Në Mitrovicë u arrestuan drejtorët Shemsedin Koshi e Nusret Ibishi, kryetari i LASH-it Ali Topalli, pedagogu Latif Hajrizi dhe profesori Besim Xërxa. Gjatë intervenimit policia rrahu një nxënës të Gjimnazit.

Në Lipjan u arrestua drejtori i shkollës së mesme Ruzhdi Hajdini, ndihmës drejtori Adil Rashiti, kurse në bisedë informative u morën mësimdhënësit Fatmir Sopa, Bahri Pllana, Ali Sopa, Sabit Haliti, Shaban Krasniqi, Shefki Gashi, Sejdullah Morina dhe Shaban Abazi e u legjitimuan mbi 30 mësimdhënës të shkollës së mesme.

Gjatë ndjekjes së nxënësve dhe arsimtarëve të shkollës së mesme në Kijevë policia serbe rrahu dhe arrestoi mësimdhënësin Sejdi Racin.

Në Vushtrri policia legjitimoi të gjithë mësimdhënësit e shkollës fillore “Dituria” dhe i kërcënoi ata fizikisht.

Në Istog policia serbe pengoi hyrjen e nxënësve shqiptarë në objektin e tyre shkollorë dhe arrestoi drejtorin e shkollës së mesme “Haxhi Zeka”, Ahmet Rugovën.

Në ditën e dytë në Suharekë, rreth orës 8,00, para objektit të shkollës së mesme policia serbe arrestoi profesorin Sulejman Gashin dhe dy nxënës.

Gjatë kontakteve që kanë pasur komisionet e caktuara të shkollave përkatëse me drejtoritë e dhunshme, hyrja në objektet shkollore iu është kushtëzuar me pranimin e shtetit serb dhe plan-programeve serbe. Ka raste kur komisioneve të caktuara, si në Podujevë, Fushë Kosovë, Prishtinë etj, u është thënë se pranohen apo s’pranohen plan-programet serbe, për shqiptarët nuk ka dhe

as që do të ketë objekte shkollore, sepse këtu është Serbi.

Merret vesh se mësimi u pengua në 56 shkolla të mesme dhe në këto shkolla fillore: “Lidhja e Prizrenit – Deçan, “Nazim Berati” – Dragash, “Haki Stërmilli” – Zoçishtë – Rahovec; “Shaban SHala” -Podujevë; “Asdreni” – Jabllan; “V.Bashkimi” – Jasenovik (Novo Bërdë); “7 Shtatori” – Vitomiricë – Pejë; “Dituria” – Vushtrri, “Shtjefën Gjeçovi” – Janjevë; “Vëlezërit Frashëri” – Lipjan; “Martin Camaj” – Gjurakoc; “Bajram Curri” – Istog; “Faik Konica” – Prishtinë; “Mihal Grameno” dhe “Selman Riza” – Fushë Kosovë; “Konstantin Kristoforidhi” – Nerodime; “Abetarja” – Softaj; “Dituria” – Tankosiq dhe “Jeronim De Rada” – Ferizaj, “Faik Konica” dhe “Gjon Serreqi” në Viti.

Duke pamundësuar mbajtjen e mësimit shqip në objektet shkollore, regjimi serb i detyroi nxënësit e shkollave të mesme dhe fillore që mësimet t’i ndjekin nëpër objekte private.

Fillimin e vitit të ri shkollor në Kosovë e përcollën edhe mjetet serbe të informimit, të cilat e heshtin fare represionin serb mbi nxënësit dhe mësimdhënësit shqiptarë. Për më tepër, gazetat si “Jedinstvo”, “Borba”, etj., shkruajnë se nxënësit shqiptarë nuk deshën të hyjnë nëpër objektet shkollore, me arsyetim se ata nuk duan të mësojnë sipas planprogrameve të Serbisë”.

2 shtator 1995

Së paku 51 familje të bastisura në fshatrat Glloxhan, Baballoq, Shaptej dhe Gramaqel të Deçanit

Pa incidentit të pasqaruar në stacionin e policisë serbe në fshatin Irzniq të Deçanit, me pretekst të kërkimit të përgjegjësve, policia serbe bastisi shumë familje në fshatrat Shaptaj e Glloxhan të Deçanit. Bastisja filloi në orën 16:00 dhe zgjati deri në orët e vona të natës.

Sipas njoftimeve të deritashme të Komisionit për Informim të Degës së LDK-së në fshatin Shaptaj policia rrahu, maltretoi dhe shkaktoi dëme gjatë bastisjes së 24 familjeve.

Njoftohet se janë bastisur këto familjet e Beqir, Ali, Sali, Fetah, Daut, Curr dhe të Qaush Lushajt, Isuf, Demë e Rrustem Ramajt, Ukë, Selim e të Murat Beqirajt, Shemsi Muslijajt, Kadri Delijajt, Sadri Mahmutajt, Azem, Tahir, Adem, Zeqir dhe Miftar Hajdarajt, Zenel, Dush, Jahë dhe Agush Beqirajt.

Pas fshatit Shaptaj, kjo ekspeditë e policisë u kthye në fshatin Gllogjan dhe bastisi familjet e Nexhat Derivshajt, Besim Haradinajt, Smajl Mehmetit, Daut dhe Sylejman Zeqirajt, Demë, Magjun dhe Muharrem Sejfijajt, Mehmet Arifajt, Sefë Zeqirajt, Adem, Mustafë dhe Misin Keqajt dhe Jonuz Dervishajt. Policët me këtë rast thyen dyert dhe rrahën kalimtarët e rastit.

Gjatë kësaj ekspedite policët serbë shtinin edhe me armë zjarri, por për fat të mirë nuk pati viktima në njerëz.

Një familjeje iu vra qeni.

Aksion rifilloi edhe sot. Në orën 7,30 forca të mëdha të policisë bastisën fshatrat Baballoq dhe Gramoqel.

Sipas njoftimeve, në fshatin Baballoq deri tani janë bastisur familjet e Rexhe Gjopcajt, anëtar i Kryesisë së Degës së LDK-së në Deçan, Ukë Humajt, Sali Batushës, Misin Metajt dhe Xhavit Qallakut.

Ndërsa në fshatin Gramoqel bastisja filloi në orën 9,30. Njoftohet se janë bastisur familjet e Kadri Mushkolajt, Haxhi dhe Daut Rexhajt, Demë, Hasan dhe Tahir Malokajt dhe Ukë Sejfijajt. Edhe kjo ekspeditë e policisë serbe ishte brutale.

Policia vazhdimisht u kërcënohej familjeve: “Ose gjeni ‘atentatorët’ ose do t’u shpërngulim të gjithëve në Shqipëri!” – njofton Komisioni për Informim i Degës së LDK-së në Deçan.

Situatën e vështirë në Deçan e analizoi edhe Kryesia e Degës së LDK-së në Deçan.

Në mbledhjen e saj të zgjeruar me kryetarët e nëndegëve, situata u cilësua se mjaft të rëndë dhe me tendenca të ashpërsimit të mëtejmë të saj.

Pas ngjarjes në Irzniq para katër ditësh, kur në një incident të pasqaruar thuhet se u plagosën dy policë, në emër të kërkimit të përgjegjësve të incidentit u bastis lagjja e Mushkolajve, ndërsa mbrëmë dhe sot në mëngjes u bastistën fshatrat Gllogjan, Baballoq, Shaptej dhe Gramoqel. Sipas njoftimeve të deritashme janë bastisur 51 shtëpi dhe janë keqtrajtuar shumë qytetarë.

Kryesia e Degës së LDK-së reagon ashpër kundër këtyre akteve brutale e represive që kanë për qëllim tensionimin maksimal të situatës në Kosovë deri në shkallë shpërthimit.

Kryesia e Degës së LDK-së shfaq bindjen se qytetarët e kësaj komune do t’ia dalin edhe në këtë situate të rëndë, duke përballuar terrorin me bindje të plotë se perspektiva është në anën e atyre që çmojnë deri në viktimizim dhe që kërkojnë lirinë që u takon, pa cenuar lirinë e të tjerëve, thuhet në mes të tjerash, në reagimin e Kryesisë së Degës së LDK-së në Deçan, njofton Komisioni për Informim.

2 shtator 1997

Policia serbe shqetëson nxënësit para shkollave

Forcat e policisë serbe janë stacionuar në hyrje të disa shkollave të Prishtinës ku mësojnë nxënësit shqiptarë e serbë. Kështu, dje e sot policia po qëndron para hyrjes në oborrin e shkollës fillore “Ismail Qemali” në Kodër të Diellit, duke frikësuar nxënësit shqiptarë.

Ka njoftime se policia serbe po mban nën mbikëqyrje edhe disa shkolla të tjera.

Policët kërkuan heqjen e shqiponjës nga gazeta e murit!

Më 31 gusht, policët ndaluan në rrugë Naser Osmanajn, drejtor i shkollës fillore “M. Camaj” në Gurrakoc dhe e pyetën atë rreth fillimit të vitit të ri shkollor.

Po këtë ditë, policët shkuan në lokalet e kësaj shkolle dhe drejtorin e punëtorin ndihmës i urdhëruan që nga gazetat e murit të shkollës të heqin një shqiponjë, njofton KI i Degës së LDK-së në Istog.

Po ky komision bën me dije se më 27 gusht, rreth orës 23. 30, përgjatë rrugës së fshatit Dreje, katër policë të stacionit të policisë në Gurrakoc shtinë disa rafale me armë zjarri, duke shkaktuar shqetësim tek banorët shqiptarë të kësaj ane.

 2 shtator 1998

Sulmi serb kundër Tususit dhe disa fshatrave të Prizrenit ka vazhduar gjatë natës dhe sot

Thuhet se mbrëmë janë dërguar në spital 7 të vrarë. Ka shumë të plagosur. Rreth 20 mijë njerëz janë dëbuar e larguar nga shtëpitë e veta

Gjatë gjithë natës dhe sot po vazhdojnë sulmet serbe kundër lagjes Tusus të Prizrenit dhe fshatrave Lubiçevc, Leskovec, Lez, Kushnin, Jeshkovë, Hoçë e Qytetit, Billushë e Poslish, që gjenden bri rrugës Prizren – Zhur. Gjatë sulmeve të djeshme janë vrarë dhe plagosur shumë shqiptarë. Thuhet se mbrëmë në orën 19:00 në spitalin e Prizrenit janë dërguar shtatë të vrarë.

Aktivistët e Degës së LDK-së në Prizren i thanë sot QIK-ut se gjatë gjithë natës janë dëgjuar granatimet dhe janë parë flakët e shtëpive që po digeshin në fshatrat që gjenden rreth 7 km. larg Prizrenit.

Sulmi po vazhdon edhe sot sulmet, ndërsa në drejtim të fshatrave të sulmuara shkojnë vazhdimisht forca serbe.

Nga zona e sulmuar dje është larguar popullsia. Nga lagjet Tusus dhe Bajram Curri të Prizrenit janë larguar dje rreth 10 mijë vetë, të cilët kanë gjetur strehim në pjesët tjera të qytetit. Aktivistët e LDK-së në Prizren thanë se gjatë natës në një familje janë vendosur edhe deri 50 të larguar. Mirëpo numri i atyre që kërkojnë strehim është i madh edhe sot.

Gjendja më e rëndë është për mbi 10 mijë banorë të fshatrave Lubiçevc, Leskovec, Lez, Kushnin, Jeshkovë, Hoçë e Qytetit (fshati më i madh i komunës), Billushë dhe Poslish, të cilët nuk kanë mundur të arrijën në qytet. Këta banorë janë strehuar në male dhe mbahen të rrethuar nga forcat serbe të përqendruara në Opojë, në anën e Cvilenit dhe përgjatë rrugës Prizren-Zhur-Dragash.

Nga Prizreni mirret vesh se vëzhguesit ndërkombëtarë kanë bërë përpjekje të depërtojnë drejt zonës së sulmuar, por nuk kanë pasur mundësi.

Arrin në pesë numri i të vrarëve në Rusinoc

Nga Gllogoci njoftohet se ka vdekur Fatime Sinani (60), e cila u plagos të martën gjatë granatimeve serbe në fshatin Rusinoc. Të martën u bë me dije se gjatë këitj granatimi ishin vrarë katër shqiptarë dhe ishin plagosur shtatë të tjerë. Aktivistët e Degës së LDK-së në Gllogoc njoftojnë se në mesin e këtyre të plagosurve janë edhe Fehmi Neziri (52) e Xhemë Meha (40) që të dy nga Fushtica e Ulët në Gllogoc dhe Blerim Sinani nga Rusinoci.

Njoftohet se në Kleçkë të Malishevës u plagos Halil Thaçi (35) nga lagjja Pocërk e Llapushnikut të Gllogocit.

Në Kosovë janë zhvendosur 417.483 shqiptarë

Sektori për Emigracion dhe Refugjatë i LDK-së njofton se prej fillimit të agresionit policor e ushtarak serb në Kosovë e deri më tash janë zhvendosur së paku 417.483 njerëz.

Agresioni serb ka qenë veçanërisht i përqëndruar kundër komunës së Klinës, Gjakovës, Gllogocit, Deçanit, Skënderajt, Malishevës, Rahovecit, Pejës, Suharekës, Shtimes, Mitrovicës, Vushtrrisë, Fushë-Kosovës, Obiliqit, Ferizajit e Prizrenit.

Në njoftimin e këtij sektori thuhet se janë sulmuar gjithsej 391 fshatra, ndërsa 266 prej tyre janë granatuar. Nga 257 fshatra popullsia është larguar në tërësi.

Të larguarit nga shtëpitë e vendet e veta janë vendosur në Kosovë, në Shqipëri, në Mal të Zi, në Maqedoni, në Bosnjë e Hercegovinë dhe në shtetet perëndimore.

Në Shqipëri janë vendosur rreth 20 mijë refugjatë. Në Mal të Zi shqiptarët janë vendosur në Ulqin: 16.403, në Plavë e Guci: 7.837, në Rozhajë: 8.740 dhe në Tuz: 2.204.

Në Kosovë më së shumti refugjatë kanë gjetur strehim në komunat e Mitrovicës, Vushtrrisë, Ferizajt, Prizrenit e Prishtinës.

Në disa komuna zhvendosja ka përfshirë mbi 50 për qind të popullsisë. Kështu për shembull, Klina i kishte 52.000 banorë para fillimit të agresionit serb, ndërsa numri i të zhvendosurve nga kjo komunë është 35.700. Deçani kishte 55.000 banorë, ndërsa numri i të shpërngulurve është 25.000. Skënderaj kishte 65.000 banorë, ndërsa janë larguar 40.000 vetë. Nga Malisheva me 55.000 banorë janë larguar 40.800. Rahoveci kishte 60.000 banorë, ndërsa janë larguar 34.600 vetë. Nga Suhareka me 70.000 banorë janë larguar 45.000. Shtimja kishte 34.000, ndërsa janë larguar 14.200 vetë.

Një numër shumë i madh i shqiptarëve është zhvendosur edhe nga komunat e Pejës: 36.650, nga Gjakova 50.000, nga Fushë-Kosova 9.000, nga Obiliqi 6.000, etj.

Më së shumti refugjatë janë vendosur në Mitrovicë 31.628, në Vushtrri 25.000, në Prizren 32.000, në Prishtinë 18.636 etj.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Ilustrim: Adem Demaçi

 1 shtator 1993

Policia serbe pengoi me forcë fillimin e vitit shkollor në Kosovë

Sot, në orën 8 të mëngjesit, ashtu siç kishte paraparë Ministria e Arsimit e Republikës së Kosovës, rreth 350.000 nxënës shqiptarë të shkollave fillore dhe të mesme të Kosovës dhe arsimtarët e tyre shkuan për të hyrë në shkollat e tyre. Të gjitha shkollat me mësim në gjuhën shqipe kishin caktuar përfaqësues që do të kërkonin me shkrim që t’u lejohej hyrja nëpër objekte shkollore. Por, ata kudo u pritën nga drejtorët e instaluar serbë rrethuar nga policë e punëtorë të sigurimit serb.

Informatat e para bëjnë me dije se, ngjashëm me vitin e kaluar, pjesa më e madhe e nxënësve dhe arsimtarëve të shkollave fillore u lejuan të hyjnë në objektet e tyre shkollore.

Mbi 60.000 nxënës shqiptarë të shkollave të mesme u penguan me polici që të hyjnë në objektet e tyre shkollore.

Nxënësit dhe arsimtarët shqiptarë u përpoqën që të hynin nëpër shkolla, por kudo në hyrje të objekteve qëndronin forca të mëdha policore të sigurimit serb.

Policia serbe pengoi hyrjen e nxënësve në të gjitha shkollat e mesme të Mitrovicës. Policët pasi legjitimuan profesorët e t e Qendrës Shkollore Teknike i fyen ata e pastaj arrestuan drejtorin Shemsedin Koshi, si dhe profesorët dhe pedagogët e kësaj shkolle, Nysret Ibishi, Ali Topalli, Latif Hajrizi dhe Besim Xërxa.

Në Prishtinë, të gjitha shkollat e mesme ishin të bllokuara nga forca të shumta policore, të cilat penguan nxënësit dhe arsimtarët shqiptarë të hyjnë në objektet e tyre.

Në Podujevë dy shkollat e mesme të qytetit, policët serbë penguan hyrjen e nxënësve dhe profesorëve shqiptarë. Bëhet e ditur se në këtë qytet gjendja është shumë e tendosur, pasi forca të mëdha të policisë kanë bllokuar dhe kontrollojnë qytetarët e shkollarët në rrugët kryesore.

Në Klinë, para orës 7 të mëngjesit, forca të mëdha të policisë serbe kishin bllokuar shkollën e mesme “Luigj Gurakuqi”. Pasi shpërndanë nxënësit, policët filluan të rrahnin qytetarët. Bëhet e ditur se profesorët Ramadan Krasniqi dhe Muhamet Maloku janë rrahur dhe arrestuar.

Në shkollën e mesme të Kijevës, komuna e Malishevës, policë serbë rrahën rëndë Sejdi Racin, mësimdhënës.

Në Lipjan, derisa po shkonin në shkollën e mesme, policia ndaloi mësimdhënësit Fatmir Sopën, Bahri Pllanën dhe Ali Sopën, të cilët u morën në pyetje, ndërsa u arrestuan drejtori Ruzhdi Hajdini dhe zëvendësdrejtori Adil Rashiti.

Merret vesh se edhe në qendrat e tjera të Kosovës situata është e njëjtë.

Regjimi serb ka kushtëzuar hyrjen e nxënësve dhe arsimtarëve shqiptarë në objektet shkollore me pranimin e planprogrameve shkollore dhe të shtetit serb.

Para shkollës së mesme “Muharrem Bekteshi” në Vushtrri qysh në orën 8 nxënësit dhe arsimtarët shqiptarë u tubuan dhe tentuan të hyjnë në shkollën e tyre. Policë të shumtë të armatosur i detyruan të kthehen.

1 shtator 1994

Filloi viti i ri shkollor

Sot filloi viti i ri shkollor në shkollat fillore dhe të mesme të Republikës së Kosovës.

Në bazë të njoftimeve të deritashme, procesi mësimor filloi ashtu siç ishte paraparë. Siç dihet nxënësit e shkollave fillore kryesisht ndjekin mësimet në lokalet e shkollave, ndërsa nxënësit e shkollave të mesme në lokale private.

Ditëve të fundit janë dhënë njoftime se janë siguruar pjesa më e madhe e lokaleve dhe se lokalet për mësim janë meremetuar dhe përgatitur për proces mësimor.

Mirëpo edhe fillimi i këtij viti shkollor nuk kaloi pa ndërhyrje të policisë serbe.

Gjatë ditës pati njoftime për ndërhyrje të policisë serbe në shkollat e Mitrovicës dhe për vëzhgime policore të disa shkollave të tjera në vende të ndryshme të Kosovës.

Policia ndërhyri në disa shkolla në Mitrovicë

Në të gjitha shkollat fillore dhe ato të mesme në Mitrovicë filloi viti i ri shkollor 1994-1995. Por, fatkeqësisht, menjëherë në orët e para të mësimit policia shkoi në të gjitha shkollat ku mësimi zhvillohet në gjuhën shqipe. Kështu, në shkollën fillore “Ibrahim Pervizi”, ku mësimet i zhvillon edhe shkolla e mesme e mjekësisë “Xheladin Deda”, sapo filloi mësimi në orën 7, shkuan tetë plicë të armatosur gjer në dhëmbë, të cilët i urdhëruan arsimtarët që t’i nxjerrin të gjithë nxënësit nga shkolla. Policia me këtë rast arrestoi drejtorin e Shkollës së Mesme të Mjekësisë, Shefqet Beqirin. Policët shkuan edhe në shkollën fillore “A.Shabani” ku legjitimuan drejtorin Shefqet Pllana nga i cili u interesuan kur duhet të fillojë mësimi në Shkollën e Mesme Ekonomike.

Policia ishte edhe në shkollën fillore “Migjeni” të Mitrovicës, në të mësojnë nxënësit e gjimnazit “Frang Bardhi”.

Në këto tri shkolla fillore të Mitrovicës i ndjekin mësimet të pesë shkollat e mesme që janë në Mitrovicë: shkolla e mjekësisë “Xheladin Deda”, gjimnazi “Frang Bardhi”, teknike “Arkitekt Sinani”, shkolla tjetër e mesme teknike “Trepça” dhe ajo ekonomike “Hasan Prishtina”.

1 shtator 1995

Serbët përballë konfrontimit total me NATO-n

Intervenimi ajror i NATO-s kundër serbëve të Bosnjës, në opinionin, në masmediat dhe në politikën zyrtare, ka hasur në mbështetje të plotë.

Lajmet për bombardimin e pozicioneve ushtarake të serbëve të Bosnjës u transmetuan në fillim të informacioneve ditore dhe u shoqëruan me vështrime e komente nga polikanë dhe ekspertë të ndryshëm gjerman dhe të jashtëm.

Të gjitha partitë politike të përfaqësura në Bundestag, përshëndetën intervenimin e NATO-s, me arsyetim se serbët duhet të kuptojnë se nuk ka zgjidhje të konflikteve përmes faktorit ushtarak, sepse me në fund, kjo do të shpiente serbët në konfrontim me forcën ushtarake të NATO-s, siç po ndodh në të vërtetë.

Ky është edhe mesazhi i kancelarit Kol, i cili gjatë këtyre ditëve shpesh e ka përsëritur formulën gjermane se nuk mund të pranohet në ish-Jugosllavi zgjidhja që diktohet nga forca ushtarake. Ai këtë dje e potencoi edhe në Mynster në një ceremoni me rastin e formimit të korpusit të përbashkët ushtarak gjermano-holandez.

Qeveria gjermane, në vlerësimin e saj zyrtar, intervenimin e NATO-s e quajti si “përgjegje adekuate ndaj masakrës barbare kundër popullsisë civile të Sarajevës”, njofton “Suddeutsche Zeitung”.

Zëdhënësi i Qeverisë Gjermane, Peter Hausman, duke e komentuar intervenimin e NATO-s kundër serbëve, deklaroi se ai që përpiqet që me terror të pengojë procesine  sapo mëkëmbur të bisedimeve për zgjidhjen paqësore në ish-Jugosllavi, duhet të llogarisë në reaksione adekuate të bashkësisë ndërkombëtare.

Vlerësimi i përgjithshëm i komentatorëve gjermanë është fakti se që nga themelimi i Aleancës Perëndimore, për herë të parë NATO ka marrë pjesë në një intervenim serioz ushtarak.

“Die Welt” në komentin e faqes së parë, vlerëson se pas rënies së Krainës dhe intervenimit të djeshëm të NATO-s, në Ballkan është krijuar një situatë e re, në të cilën serbët janë duke humbur rolin e tyre mbretërues.

NATO dhe OKB-ja i kanë bërë me dije kreut të Pales përmes aksionit të djeshëm luftarak se lufta po u ofrohet të dyert e shtëpisë së tyre, ku vitkima nuk do të ketë më vetëm në Sarajevë por edhe te serbët e Palës, shkruan kjo gazetë.

“Frankfurter Allgemeine” duke komentuar ngjarjet e djeshme në Bosnjë, shkruan se intervenimi ushtarak i NATO-s në Bosnjë mund të ndikonte te Millosheviqi, për t’i bërë atij të qartë se nuk do të pranohen rezultatet e politikës së tij pushtuese për Serbinë e Madhe dhe se nëse Millosheviqi vazhdon të furnizojë si deri më tash serbët e Bosnjës me material ushtarak, në Perëndim do të rritet mosdurimi ndaj Serbisë.

Analitikët e këtushëm, të cilët mbrojnë pikëpamjen se NATO ka hyrë në luftë për t’i bindur me dhunë ushtarake serbët për t’u kthyer në bisedime paqësore. Citohet deklarata e sekretarit të përgjithshëm të NATO-s, Vili Klas se “sulmet do të përfundojnë vetëm kur serbët do të ndryshojnë”.

Disa analitikë gjermanë, në vështrimet e tyre nuk përjashtojnë mundësinë e implikimit të NATO-s në luftë të përgjithshme me serbët. Eksperti për çështje të Lindjes, ish-këshilltari i kancelarit Brant, Egon Bahr, duke komentuar bombardimin e serbëve nga ana e NATO-s, ka theksuar se “gjatë dy-tre ditëve të ardhshme, Perëndimi gjendet në afërsi të linjës së implikimit në një luftë të vërtetë”.

Përpos Rusisë edhe Greqisë, asnjë vend tjetër nuk ka kundërshtuar bombardimin e pozicioneve serbe në Bosnjë, ku ishin të angazhuar 60 aeroplanë luftarak, të cilët goditën 90 pika ushtarake të serbëve.

1 shtator 1997

Fillim i mirë i vitit të ri shkollor

Rreth 270 mijë nxënës të shkollave fillore dhe 60 mijë të shkollave të mesme dhe arsimtarët të tyre filluan sot vitin e ri shkollor në Republikën e Kosovës. Për herë të parë në bankat e shkollës fillore sivjet mësojnë rreth 40 mijë nxënës, kurse në klasën e parë të shkollës së mesme janë regjistruar rreth 21 mijë nxënës.

Procesi mësimor, ashtu siç ishte paraparë filloi në lokalet shkollore dhe në shtëpitë private të shndërruara në shkolla. Përfaqësuesit e institucioneve të arsimit në Kosovë kanë deklaruar se janë bërë përgatitje të mira për mbarëvajtjen e procesit mësimor.

Policia serbe mbajti nën mbikëqyrje sot disa shkolla fillore e të mesme.

Kështu, policia ishte e pranishme në zyrat e shkollës fillore “Dardania” në Prishtinë.

Nga Deçani bëhet me dije se sot në shkollën fillore “Lidhja e Prizrenit”, para se të fillonte mësimi, policia serbe u interesua për fillimin e mësimit në këtë shkollë. Policia pyeti se a ka filluar mësimi në shkollën e mesme të kësaj komune.

Po sot drejtori i dhunshëm serb i kësasj shkolle, të cilës administrata okupuese serbe i ka vënë emrin “Stefan Deçanksi” vendosi një tabelë me këtë emërtim edhe në shkollën fillore “Minatorët e Trepçës” në Rastavicë. Kjo shkollë nga pushteti serb konsiderohet paralele e ndarë e shkollës fillore të Deçanit.

Në Vushtrri, në orën 7 të mëngjesit, policia ishte në lokalet e dy shkollave fillore, në SHF “Ali Kelmendi” dhe në atë “Zija Prishtina”.

Dr. Zejnullah Rrahmani, këshilltar për arsim i kryetarit Rugova vlerësoi se viti i ri shkollor në shkollat fillore e të mesme filloi ashtu siç ishte paraparë.

Në një deklaratë për QIK-un ai çmoi punën e madhe të shkollave, arsimtarëve, nxënësve, prindërve e institucioneve të Kosovës për organizimin sa më të mirë me qëllim që ky vit shkollor të fillojë së më mirë. Në emër të presidencës së Republikës, ai u uroi nxënësve e arsimtarëve vitin e ri shkollor dhe kthim në lokalet shkollore.

Duke komentuar nismat e ndryshme për kthimin e procesit të mësimit në lokalin shkollor, dr. Rrahmani shfaqi shpresën se ky kthim do të bëhet në kuadër të marrëveshjes Rugova – Millosheviq të vitit të kaluar. Mirëpo, në rast se pala serbe vazhdon me obstruksione, do të përdoren edhe mënyra të tjera të presionit për të realizuar të drejtën e ligjshme të shkollës shqipe për t’u kthyer në lokalet e hapësirën e vet.

Dr. Agim Hyseni, kryetar i Sindikatës së Pavarur të Arsimit, Shkencës e Kulturës i tha QIK-ut se, duke u bazuar në informacionet e deritashme, viti i ri shkollor filloi mbarë.

Edhe ky fillim në kushtet e okupimit e diskriminimit shtetëror serb flet për mbajtjen e sistemit të pavarur të arsimit shqip në Kosovë për shtatë vite shkollore me radhë duke u bërë kështu sistemi më i madh i pavarur në Kosovë. Ky është një shembull unik i mbijetesës së arsimit në botë.

Fakti se arsimin e mbajnë arsimtarët, përkujton ndërgjegjen e secilit dhe të gjithëve së bashku që të pyetemi se ç’kemi bërë ne për arsimin?! Dr. Hyseni tha se duhet të përpiqemi të bëjmë atë që duhet bërë në bazë të marrëveshjes, deklarimit e vendimit dhe që që këto përpjekje tona t’i artikullojmë e realizojmë në mënyrë sa më të organizuar kudo që kemi mundësi.

Duke komentuar situatën në arsimin e Kosovës, dr. Hyseni tha se për zgjidhjen funksionale të problemeve të çështjeve të arsimit në Kosovë çështje madhore mbetet marrja e vendimeve të institucionit kompetent për ardhjen e ministrit të arsimit të Republikës së Kosovës në vend apo emërimin e kompletimin e ministrisë këtu si dhe të marrjes së qëndrimeve për problemet e tjera të arsimit. Në këtë drejtim duhet të angazhohen me një përkushtim dhe vendosmëri të gjitha subjektet arsimore si dhe të gjitha institucionet politike e shtetërore që punonjësve të arsimit t’u sigurohet së paku minimumi ekzistencial dhe ky minimum së paku t’u ipet me kohë.

Kryetari i Sindikatës së Arsimit, Shkencës e Kulturës tha se rikthimi i pa kusht i nxënësve dhe studentëve në objektet tona shkollore e universitare dhe koordinimi i tij, nëse marrëveshja për arsim nuk realizohet, është obligim i përbashkët i të gjitha subjekteve e asociacioneve tona politike dhe jopolitike.

1 shtator 1998

Shpërthime në Tusus të Prizrenit, nën bllokadë rrugët Prizren -kufi, Zhur – Prizren dhe Dragash – Prizren

Policia u ka dhënë ultimatum banorëve që t’i dorëzojnë armët deri në orën 12 dhe është kërcënuar se pas kësaj kohe do të sulmojë

Sot rreth orës 7:30, janë dëgjuar dy shpërthime të fuqishme dhe pastaj gjuatje me armë afër lagjes Tusus të Prizrenit dhe nga fshtatrat e Vërrinit, që gjenden në anën e majtë të rrugës Prizren – Shqipëri, njofton KI i Degës së LDK-së në Prizren.

Menjëherë pas shpërthimeve, në lagjen Tusus kanë shkuar 30 automjete të policisë serbe, ndërsa po mbahet nën bllokadë rruga Prizren – Zhur dhe spitali i qytetit.

Nga Zhuri njoftohet se forcat serbe kanë ndaluar qarkullimet e autobusëve e të veturave prej Opojës në drejtim të Prizrenit.

Nga Dega e LDK-së në Prizren, duke iu referuar disa dëshmitarëve, njoftohet se policia ka kërkuar nga pjesa ku janë dëgjuar sot shpërthimet që të dorëzojnë armët deri në orën 12:00. Forcat serbe janë kërcënuar se në rast se kjo pjesë nuk i dorëzon armët, policia do të sulmojë. Nga frika prej sulmit, një pjesë e popullsisë ka filluar të largohet nga shtëpitë.

Konferencë për shtyp e përfaqësuesit politik të UÇK-së, Adem Demaçi

Adem Demaçi, përfaqësues politik i Ushtrisë Çlirimtare të Kosovës (UÇK) mbajti një konferencë për gazetarë në Presidencën e Republikës së Kosovës.

Ai falënderoi Shoqatën e Shkrimtarëve të Kosovës dhe presidentin Rugova për mirëkuptimin e treguar që takimet me gazetarë t’i mbajë në këtë ndërtesë.

Dëshirojmë t’ua bëjmë me dije të gjithë atyre që kanë shpresë e iluzione se ne jemi në njëfarë lufte me presidentin, se ne nuk jemi në luftë as nuk do të luftojmë me presidentin, por me regjimin serb, tha në fillim z. Demaçi.

Në vazhdim ai tha se dallimet me presidentin Rugova do të tejkalohen me kalimin e kohës. Do të gjejmë mënyra për të vepruar në të mirë të të gjithëve në Kosovë dhe në të mirën e popujve që i kemi përreth dhe kudo në botë.

Në vazhdim z. Demaçi foli për rastin e Kleçkës. Disa të dhëna të reja dëshmojnë se regjimi serb u përpoq të inskenojë diçka në mënyrë që ta kthejë opinionin publik kundër shqiptarëve. Mirëpo djali i axhës së “dëshmitarëve” që pohojnë se gjoja pjesëtarët e UÇK-së kanë bërë krim, Mevludin Mazreku, pohon se ata nuk kanë qenë kurrë ushtarë të askujt dhe se në asnjë mënyrë nuk ishin të lidhur me ngjarjet që propagandohen nga hegjemonizmi serb.

Gjithë këtë regjimi serb e ka bërë me qëllim që ta mashtrojë opinionin e vet publik, popullin e ndershëm, popullin mik serb, i cili për çdo ditë e më shumë po e sheh se lufta që po bëhet në Kosovë nuk është luftë e tij, konstatoi Demaçi.

1. Demaçi tha në konferencën për gazetarë se lufta në Kosovë nuk ka karakter ndëretnik dhe nuk është luftë e shqiptarëve kundër serbëve, por është luftë kundër një regjimi, i cili edhe popullit të vet i solli vetëm fatkeqësi, duke u përpjekur që mbi gjithë popujt joserbë të vendosë hegjemoninë serbe.

Mënyra se si është plasuar njoftimi për gjoja rastin e Kleçkës dëshmon se regjimi serb është përpjekur që edhe opinionin ndërkombëtar ta kthejë kundër shqiptarëve, në mënyrë që të ndërmarrë një ofensivë edhe më shkatërruese kundër popullit shqiptar të Kosovës, me motivacion se po lufton UÇK-në. Ne jemi të bindur se këto përpjekje janë të kota, sikundër që ishin të këtilla edhe përpjekjet e po këtij regjimi në Bosnjë-Hercegovinë dhe në Kroaci. Pavarësisht se jemi të bindur se ky nuk është krim që e kanë bërë shqiptarët, ne i thërrasim ekspertët ndërkombëtarë, të cilët i kemi ftuar edhe më parë, që të vijnë dhe të hulumtojnë rastet që nga Prekazi, Likoshani, Pokleku, Qirezi e shumë të tjera, në mënyrë që të ndriçohet e gjithë e vërteta materiale për krimet në Kosovë.

1. Demaçi shprehu bindjen se me këtë hap regjimi serb ka bërë përpjekje për të dalë nga kurthi, të cilin e ka ngritur vet, mirëpo e ka futur veten në një rrugë të parrugëdalje, sepse askush në botë nuk është i gatshëm që të hulumtojë vetëm rastin e Kleçkës, por edhe të gjitha pikat tjera ku janë bërë krime.

Në vazhdim Demaçi i njoftoi gazetarët për takimin e tij me përfaqësues të Shtabit të Përgjithshëm të UÇK-së dhe për bisedën që kishte patur me z. Krasniqi për njerëzit që konsiderohen të humbur dhe të kidnapuar, si serbë, ashtu edhe shqiptarë. Ai tha se ka insistuar që Shtabi i Përgjithshëm të bëjë inspektime e hulumtime nëpër shtabe lokale mos ndoshta ndonjë individ i përfshirë nga mllefi, nga dëshprimi apo nga dhimbja për vrasjet e humbjen e të afërmëve të vet ka bërë diçka që është në kundërshtim me qëndrimin bazë dhe me frymën e luftës së UÇK-së, e cila nuk dëshiron të krijojë armiqë dhe të përdorë metoda të ndyera, siç përdorë regjimi serb. Përmes zotit Krasniqi më është premtuar se do të bëjmë gjithë ç’është e mundur dhe do të më kthejnë pas një kohe përgjigje lidhur me këtë.

Z.Demaçi nuk deshi të fliste më gjerësisht për viktimat e shumta të dhunës të forcave policore serbe, për të cilat, siç tha ai, nuk bëri askush asgjë por kaluan në heshtje, por përmendi shifrat e KMDLNJ-së sipas të cilave deri sot ka prova për vrasjen e 702 shqiptarëve dhe për mbi 600 njerëz që konsiderohen të zhdukur.

Në vazhdim gazetarët shtruan disa pyetje.

– A mund të jetë hapi i ardhshëm i afrimit me Rugovën krijimi i institucioneve të Kosovës ku do të përfshiheshit edhe ju si i autorizuar i UÇK-së, pyeti korrespondenti i ATSH-së?

1. Demaçi tha se gjërat që janë ngatërruar një kohë të gjatë nuk mund të rrafshohen për një kohë të shkurtër. Ai tha se ka disa dallime vetëm deri në atë shkallë, sa që ne nuk besojmë se vetëm me mjete paqësore, sikurse është vepruar deri tash, është e mundur të detyrohet regjimi serb që të heqë dorë nga qëllimi i tij për të dominuar, për të diskriminuar dhe për të shkatërruar popullin shqiptar. Nëse zoti Rugova me stafin dhe ithtarët e tij do të jetë në gjendje ta bindë regjimin serb që të heqë dorë nga dëshira e tij që edhe më tutje ta mbajë nën robëri popullin shqiptar dhe të pajtohet me faktin se populli shqiptar duhet të vendosë vetë për fatin e tij, dhe nëse zoti Rugova do të jetë në gjendje t’i bindë edhe miqtë tanë amerikanë dhe evropianë që ta përkrahin dhe ndihmojnë efektivisht e jo vetëm duke shprehur brengosje dhe ta përkrahin popullin shqiptar, duke e detyruar regjimin serb të marrë parasysh vullnetin politik të popullit shqiptar i cili është deklaruar për pavarësi në Referendumin e vitit 1991, ne do ta përshëndesim zotin Rugova, do të jemi prapa tij dhe nuk do ta kundërshtojmë atë. Por, në qoftë se do të tregohet se kjo rrugë është e pasuksesshme, ne nuk do të mund të pajtohemi. Por, këtu jemi që të ndihmojmë që duke përdorur të dyja metodat të arrijmë deri në fitore.
2. Demaçi shprehu keqradhje pse bota nuk na shpërbleu për politikën paqësore, por përkundrazi, po përpiqet të na çojë në njëfarë autonomie, e cila nuk mund të pranohet më nga populli shqiptar.

Vullneti i popullit tonë për liri e pavarësi dhe për të qenë pjesë e botës së civilizuar shprehet tash në dy forma: në gatishmërinë që me mjete paqësore e demokratike dhe me negociata të gjendet zgjidhje adekuate që do të ishte në të mirën e shqiptarëve, por edhe të serbëve e malazezve e të popujve tjerë që jetojnë në Kosovë, si dhe të popullit serb dhe të popujve tjerë; dhe në formën të cilën ne nuk e dëshirojmë, por vjen si përgjigje ndaj dhunës së vazhdueshme të regjimit serb. Demaçi tha se populli shqiptar ka dhënë prova të shumta se është i vendosur të qëndrojë prapa vullnetit të vet politik për liri e pavarësi. Ai shtoi se nuk është e vërtetë që shqiptarët nuk flasin me një zë, sepse të gjithë i njohin rezultatet e Referendumit të vitit 1991.

Në pyetjen se a mund të pritet që argumentet tuaja t’i paraqitni edhe në ekipin negociator për bisedime me Beogradin, z.Demaçi tha se derisa të vazhdojë dhuna dhe terrori serb mbi shqiptarët në Kosovë dhe derisa regjimi serb të mos i tërheqë të gjitha forcat që kanë bërë gjithë këtë plojë e gjithë këto mizori, derisa të mos i thërrasë në përgjegjësi penale të gjithë ata që janë involvuar në këtë gjakderdhje të madhe dhe të jetë i gatshëm t’ua kompensojë shqiptarëve të gjitha dëmet e shkaktuara materiale gjatë aksioneve të veta, dhe derisa të mos e pranojë gatishmërinë për negociata brenda suazave të deklarimit të popullit të Kosovës në Referendumin e shtatorit të vitit 1991, ne mendojmë se negociatat shkojnë në favor të zgjatjes së agonisë së popullit shqiptar dhe të agonisë së popullit serb, si dhe në favor të jetës së vet regjimit serb, i cili është shkaktar i krizës dhe thellues i saj.

Ne mendojmë se nuk është mirë që të hyjmë në bisedime në këto rrethana, sepse do ta shfajësonim regjimin serb dhe Milosheviqin, si dhe do t’i jepeshin atij mundësi që para botës të deklarojë se gjoja është për negociata, ndërsa në të njëjtën kohë të vazhdojë shkatërrimin e shqiptarëve dhe të pasurisë së tyre. Ky do të ishte një gabim i njëjtë të cilin e bënë boshnjakët.

Për këtë arsye ne nuk mendojmë që të marrim pjesë në këtë ekip, ashtu si është sajuar dhe as në përpjekjet që të gjendet një zgjidhje jo e drejtë, tha ai.

Duke u përgjigjur në pyetjet tjera të gazetarëve, z. Demaçi tha se deklaratat e UÇK-së për bashkimn kombëtar janë dhënë në kohën ajo ka qenë një organizatë e vogël dhe shprehnin më shumë dëshirën sesa politikën reale. Ai tha se forcat politike në Kosovë janë të gjitha të angazhuara e të bashkuara, si ata që përpiqen në mënyrë paqësore, ashtu edhe ata që përpiqen me mjete të tjera dhe kjo do të çojë patjetër deri në fitore. Kjo është ardhmëria jonë dhe ajo mbështetet nga populli shqiptar, i gatshëm që metodën e dhunës ta lërë mënjanë, sepse metoda e jodhunës është gjithmonë më e mirë.

I lutur që të shpjegojë një deklaratë të tij të mëhershme se UÇK-ja do ta ndërrojë strategjinë e veprimit, z.Demaçi u përgjigj:

– Për fat të keq, për shkak të kësaj deklarate kanë dalë disa avokatë dhe kanë kërkuar arrestimin tim, në vend se të më merrnin në mbrojtje. Pasi përshkroi rrugën e zhvillimit të deritashëm të UÇK-së, z. Demaçi tha se për UÇK-në nuk ka rrugë tjetër përveç kalimit përsëri në një luftë guerile.

Unë nuk komandoj me UÇK-në, as ata nuk komandojnë me veprimin tim politik. Ne kemi një bashkëpunim sikurse dy anët e një vullneti të shprehur politik të popullit që përpiqet për realizimin e vullnetit të tij. Ata e bëjnë punën e tyre, unë punën time. Kemi marrëveshjen që lufta jonë nuk guxon të jetë luftë shoviniste, as luftë ndëretnike. Lufta jonë është luftë për liri e për barazi, theksoi mes tjerash z. Demaçi në këtë konferencë për gazetarë.

Mbrëmë në Rusinoc të Lipjanit forcat serbe vranë 4 dhe plagosën 7 shqiptarë

Mbrëmë në orën 20:45, forcat serbe granatuan fshatin Rusinoc të Lipjanit dhe vranë 4 shqiptarë dhe plagosën 7 të tjerë, njofton KI i Degës së LDK-së në Gllogoc.

Njoftohet se forcat serbe kanë vrarë Besim Ahmet Osmanin (20) e Hajrije Ahmet Osmanin (64) nga Fushtica e Ulët e Gllogocit dhe Abdyl Rexhep Sinanin (37) dhe Ganimet Rexhep Sinanin (27) nga Rusinoci i Lipjanit.

Bëhet e ditur se forcat serbe kanë plagosur Lutfi Osman Nezirin (17) nga Fushtica e Ulët e Gllogocit, Liman Rexhep Sinanin (60) nga Rusinoci, Afrim Liman Sinanin (33) nga Rusinoci, Mentor Liman Sinanin (18) nga Rusinoci, Fatime Sinanin (60) nga Rusinoci, Lumnije Sinanin (24) nga Rusinoci dhe Halit Hysen Shurdiqin (23) nga Rusinoci.

Gllogoc: Një i vrarë, një i plagosur dhe disa të vdekur për shkak të kushteve të rënda të jetës në male

Më 27 gusht forcat serbe kanë vrarë Saratishe Mulakun (23) nga Komorani, ndërsa më 29 gusht, në Nekoc është plagosur Sabit Halil Zogu (22) nga Komorani, njofton KI i Degës së LDK-së në Gllogoc.

Njoftohet edhe për disa të plagosur, por emrat e as numri i tyre nuk dihen për shkak të lëvizjeve të mëdha të popullsisë nga një vend në tjetrin.

Më 28 gusht forcat serbe kanë djegur disa shtëpi në Fushticë të Ulët, në lagjen Bahtiari dhe Mehaj, ndërsa policia ka djegur edhe mullirin elektrik në Komoran.

Në malet rreth Nekocit tash më shumë se dhjetë ditë janë një numër i madh banorësh, të cilët jetojnë në kushte shumë të rënda. Atyre u nevojitet ndihmë urgjente në ushqim dhe në medikamante, pasi në mesin e tyre ka fëmijë të sëmurë dhe gra shtatzëna.

Si pasojë e kushteve të rënda të jetës dhe në mungesë të ilaçeve vdiqën Zelë Murseli (70) nga Nekoci dhe Naile Haradini (9) nga Fushtica e Epërme e Gllogocit. Po kështu, ka vdekur edhe foshnja tremuajshe Ismet Izet Rrusta nga Nekoci.

KI i Degës së LDK-së në Gllogoc njofotn se dje forcat serbe kanë shtirë me armë në drejtim të Nekocit dhe Kizharekës, ndërkohë që Fushtica e Ulët u dogj tërësisht gjatë natës, sikur dhe lagjja Zogu e Komoranit nga e cila ka dalë tym e flakë tërë kohën.

Tre trupa të pajetë tash një muaj nuk kanë mundur të identifikohen e të varrosen

Që nga 25 korriku, në livadhet në afërsi të Arllatit ndodhen trupat e pajetë të tre shqiptarëve, të cilët nuk kanë mundur të tërhiqen nga aty për shkak të rrethimit të plotë nga forcat serbe. Supozohet se këta trupa të pajetë janë të Hysen Ahmet Bujupit, i moshës 60-65 vjeç, Hysen Met Bujupit, i moshës 30-35 vjeç dhe të Mujë Alush Bujupi, 65 vjeç, të gjithë nga Arllati i Gllogocit.

Përpjekjet për t’i nxjerrë nga ai vend nuk kanë pasur sukses deri tani, për shkak se në afërsi ka edhe shumë kafshë të vrara, që janë bërë pre e qenve, të cilët lehin sapo dikush tenton të afrohet, kështu që policët serbë shtijnë vazhdimisht.

I bëhet apel Komiteti Ndërkombëtar të Kryqit të Kuq që të mundësojë identifikimin e saktë dhe varrimin e këtyre trupave.

Po nga 25 korriku nuk dihet as për fatin e Sinan Ukë Morinës (40) nga Arllati.