Me një organizim madhështor, UBT shënoi ceremoninë e gradimit të studentëve të gjeneratës së njëzetë e një, duke i dhuruar Kosovës profesionistë dhe ekspertë që do të kontribuojnë në fusha të ndryshme të jetës.

Të lumtur dhe të entuziazmuar për arritjen e tyre profesionale, studentët përmbyllën suksesshëm një cikël të rëndësishëm jetësor në drejtimet në nivelin bachelor dhe master të programeve.

I gëzuar dhe krenar për gjithë këtë arritje të tyre, Rektori i UBT-së, Prof. Dr. Edmond Hajrizi ka përgëzuar secilin student për angazhimin dhe përkushtimin për të kryer një cikël të rëndësishëm të jetës së tyre, siç janë studimet akademike.

“Në UBT, ju keni qenë pjesë e një komuniteti që beson në fuqinë e dijes dhe në rëndësinë e shërbimit ndaj shoqërisë. Ju keni qenë të rrethuar nga njerëz që kanë ndarë me ju përvojat e tyre, që kanë ndihmuar në formësimin e mendimeve tuaja dhe që kanë qenë krah jush në çdo hap të rrugës. Tani, është radha juaj të përdorni atë që keni mësuar për të bërë një ndikim pozitiv në botë. Si ambasadorë të UBT-së, ju keni një përgjegjësi të veçantë për të përfaqësuar vlerat dhe standardet tona kudo që të shkoni”, u shpreh Rektori Hajrizi.

Ceremonia e gradimit nuk kishte se si të mos konkretizohej ndryshe pa betimin e studentit, të cilin e udhëhoqën, studentet Poema Doli dhe Arbëreshë Fazliu, ndërsa betimin e hipokratit, Rrezjona Reçica, duke bërë kështu që njëzëri studentët të betohen për t’i shërbyer shkencës, edukimit, e vendit, si dhe me vetëdije dhe vullnet të plotë të bëhen pjesë kontribut dhënëse në ndërtimin e shtetit dhe prosperimin e shoqërisë sonë.

Ceremonia u përcoll me disa pika të zgjedhura muzikore nga studentët e Fakultetit Muzikë Moderne, Prodhimi Digjital dhe Menaxhimi, Meriton Heta, Diana Mehmetaj, Vjollca Osmani dhe Anjeza Gashi, teksa kulmoi me momentin shumë madhështor dhe më të rëndësishëm për secilin student, por edhe për UBT-në si institucion i arsimit të lartë, për hedhjen e kapelave, si simbol i përfundimit të një periudhe plot përkushtim dhe sakrificë dedikuar dijes dhe avancimit akademik.

Gjenerata e 21-të e UBT-së është tashmë gati për të përballuar sfidat e së ardhmes, të pajisur me dije të thellë, aftësi të pakrahasueshme dhe një vizion të qartë për të ndërtuar një Kosovë më të mirë.

Në kuadër të procesit të njohjes së kualifikimeve profesionale dhe licencimit të arkitektëve nga Kosova në Bashkimin Evropian, UBT organizoi një takim të rëndësishëm pune me Prof. Dubravko Bačić, ekspert i deleguar nga BE dhe profesor në Universitetin e Zagrebit. Ky takim kishte si synim të kontribuojë në avancimin e njohjes së kualifikimeve profesionale të arkitektëve kosovarë në tregun evropian.

Takimi i parë u zhvillua me pjesëmarrjen e strukturave udhëheqëse të Fakultetit të Arkitekturës dhe Planifikimit Hapësinor në UBT, Dekanen e Fakultetit të Arkitekturës të Universitetit të Prishtinës “Hasan Prishtina”, përfaqësues të Ministrisë së Arsimit, si dhe përfaqësues të Asociacionit të Arkitektëve të Kosovës. Në këtë takim u diskutua rreth cilësisë së programeve të studimeve të arkitekturës në Kosovë dhe lidhjes së tyre me tregun e brendshëm dhe të jashtëm të punës për arkitektët, si dhe procesit të licencimit.

Takimi i dytë, i karakterit bilateral, u mbajt mes Prof. Dubravko Bačić dhe Dekanit të Fakultetit të Arkitekturës dhe Planifikimit Hapësinor në UBT, Prof. Binak Beqaj. Në këtë takim u diskutua rreth zhvillimeve dhe sukseseve të Fakultetit të Arkitekturës në UBT, si dhe mundësive të bashkëpunimit mes UBT-së dhe Universitetit të Zagrebit, duke përfshirë fakultetet e arkitekturës të të dy institucioneve.

Me ftesën e ITP-së dhe mbështetje nga GIZ-i Gjerman, UBT po merr pjesë në Panairin Ndërkombëtar në Selanik të Greqisë.

Rektori i UBT-së, Prof. Dr. Edmond Hajrizi dhe Drejtori për Zhvillim dhe Edukim Profesional në UBT, Besnik Skenderi, kanë zhvilluar shumë takime me përfaqësues nga kompani, universitete dhe organizata gjermane, greke dhe ndërkombëtare.

Gjatë këtyre takimeve është shprehur një interes i ndërsjellë për bashkëpunim, veçanërisht në fushat e IT-së, shëndetësisë, energjisë, automatizimit dhe mjedisit.

Rektori i UBT-së, Prof. Dr. Edmond Hajrizi dhe udhëheqësi i Vector Robotics nga Italia, Andrea Beggio, kanë nënshkruar marrëveshje bashkëpunimi për zgjerimin dhe avancimin e teknologjisë së dronëve në Ballkanin Perëndimor.

Qëllimi kryesor i këtij bashkëpunimi është përmirësimi i kapaciteteve teknologjike dhe infrastrukturës për përdorimin e dronëve në sektorë të ndryshëm, përfshirë mbikëqyrjen, sigurimin dhe menaxhimin e resurseve.

Duke u fokusuar në avancimin e teknologjisë dhe aplikimeve të saj, kjo marrëveshje do të përmirësojë efikasitetin dhe cilësinë e shërbimeve në Ballkanin Perëndimor, si dhe të kontribuojë në rritjen e inovacionit dhe konkurrencës në këtë sektor.

Gjatë qëndrimit të tij në Itali, Rektori Hajrizi ka zhvilluar takime me partner të rëndësishëm nga Evropa dhe rajoni duke përfshirë Rektorin e Universitetit të Salentos, Prof. Fabio Pollice.